Luis Ventoso

O domingo, o vicepresidente invitou a comer en Silleda a 5.000 mulleres, nun remake dos festíns preelectorais de Fraga, custeado, coma entón, polas arcas públicas da Xunta en beneficio da imaxe dun candidato. O luns viaxou a Madrid e houbo máis chiscadelas populistas. Nunha intervención no Palace, o segundo hotel máis luxoso da capital, o vicepresidente pediu que se recupere o «control público» da AP-9 (é dicir, que se estatalice) e que se intente tamén algo similar con Fenosa. O que non aclarou é como se pode facer algo así no noso modelo xurídico, un tanto distante aínda do de Evo Morales .
Tampouco explicou algo máis sinxelo: se resulta saudable que os bens de Galicia sexan de titularidade pública, que sen dúbida pode ser, ¿por que el opta xusto polo contrario e entrega a mans privadas, e con criterios moi discutibles, os molinillos do maior concurso eólico en marcha en Europa? Navarra se autoadxudicou os seus muíños e cando os revendeu ingresou 700 millóns de euros para as arcas de todos. Canarias conserva o 26% da propiedade dos seus parques e os vascos reserváronse no seu día o 22%. En Galicia a vía non foi esa e ata pode darse a circunstancia de que empresarios ao bordo do concurso de acredores sexan agraciados coa lotería do vento. Se tanto queremos ao país, ¿non era mellor facelo dono dos seus recursos eólicos? Estraño concurso. Ate os computadores de Industria cascan (ou iso din) no momento en que toca ensinarlle ao socio do bipartito a relación de agraciados co outro gordo deste Nadal.