Facendo un pé dun cabaceiro, na eira da aldea de Eiras (San Amaro), atópase esta curiosa pedra circular que recorda a un miliario. Tamén pode tratarse dun trozo de columna cilíndrica.

Non garda relación, en canto á súa factura, cos outros pés do cabaceiro, polo que debe supoñerse como aproveitada doutra construción anterior.

Na aldea de Eiras están a igrexa parroquial, onde hai evidencias dunha antiga vila romana, e os pazos, ó seu carón, nun dos cales se atopa a ara de Bandua.

Nesta eira había nas décadas finais do século XX unha ducia de cabaceiros, tres deles de cantería. Hoxe quedan catro, algún deles en avanzado estado de deterioro.

---