No pasado mes de decembro presentou Galinux, o sistema operativo de código aberto e en lingua galega que estiveron a desenvolver dende Mancomún, o Centro de Referencia e Servizos de Software libre impulsado pola Consellaría de Innovación e Industria, e a comunidade de software libre do país. Estes días podemos escoitar cuñas publicitarias na radio e mesmo spots televisivos sobre Galinux, o que evidencia que se trata dunha aposta forte pola súa difusión social.
Galinux é un sistema operativo completo en galego. Á súa vez é unha adaptación de araOs, metapaquete desenvolvido por Mancomún que usa como base a distribución de Linux Ubuntu e conta tamén con aplicacións de código aberto traducidas ao galego por grupos de voluntarios. Do mesmo xeito ca Ubuntu, Galinux empregará, en principio, o escritorio Gnome.
Este proxecto non ten relación directa con Galinux-Slax, que foi pensado para o seu uso na comunidade escolar, aínda que comparte a súa filosofía de software libre e, polo tanto, parte do seu software e dos seus desenvolvementos
Categoría: Informática - Publicado o 03-02-2009 21:53
