Unha folerpa con outras, ás veces calla e fai neve

Defensa do Ensino Público


De Viñetas

"A historia dunha lingua debería ser coma a dunha longa cadea, onde cada xeración fora un elo que lla transmitira á seguinte"

GALEFAS
aferrer@mundo-r.com
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

Non se pode querer a Galicia e non o Galego
Non se pode querer a Galicia e non ao galego
Xesús Palmou, en Xornal: "Non se pode querer a Galicia e non ao galego"

- ?O PPdeG ten que contar cunha absoluta independencia de Madrid para tomar as súas decisións?.

- Di que a Constitución "discrimina o galego".

- "Non creo que o sucedido en Ourense vaia ter un custe electoral para o PP".

Xoves, 12 de febreiro de 2009

_____________________________________________________

Palmou sostén que o Estatuto "pódese desbloquear mencionando ás Irmandades da Fala". AMADOR LORENZO - Rodri Suárez / XORNAL.COM - A Coruña.- A estas alturas do xogo, Xesús Palmou non se vai agochar. Máis ben ao contrario. Dotado dun discurso que conta co aval de máis dun cuarto de século de carreira política, o que foi conselleiro de Xustiza na era Fraga defende o PP do que foi secretario xeral, aquel que resultaba difícil de imaxinar da man de organizacións como Galicia Bilingüe. Agora, o seu partido comeza a mudar ese discurso salferido de galeguismo e el afronta as eleccións fóra das listas, pero non por iso coxea a súa fidelidade. Simplemente, insiste na defensa de camiños clásicos, o que podería soar a contestación de non tratarse dunha figura coa suficiente autoridade moral para seguir a enriquecer o debate no PPdeG.

Vostede formou parte da comisión que traballou para reformar o Estatuto. Por que non se chegou a un acordo?
Non hai Estatuto porque despois dun traballo longo de máis dun ano, nunha ponencia na que houbo acordos moi importantes como a lingua, chocamos en flocos que necesitaban unha aproximación desde as máis altas instancias dos partidos, como o financiamento e o principal escollo, que foi a definición de Galicia no preámbulo, xa que na parte normativa xa había acordo, que era o de definirse como nacionalidade histórica. Pero ao non haber acordo no preámbulo xa non se entrou no resto, onde a aproximación era máis sinxela. En financiamento, o BNG pretendía contar co 90% dos impostos, mentres que o resto pedíamos o 50%, como Cataluña. Iso nos levaba a unha situación complicada porque podería rachar o principio de solidariedade do Estado, o que prexudicaría ás comunidades máis pobres. Pero, insisto, o problema foi o preámbulo, que é algo que non se aplica.


Pero non houbo nese apartado un principio de acordo?

Houbo unha posibilidade de acordo que ao final non se puxo enriba da mesa, que era que no preámbulo se fixese unha referencia á Asemblea Nacionalista de Lugo en 1918, a primeira das Irmandades da Fala, na que se define a Galicia como ?Nación?, algo que é absolutamente obxectivo e era unha fórmula semellante á do Estatuto andaluz.


Pódese recuperar esa fórmula?

Como posibilidade segue aí. Na próxima lexislatura vai haber acontecementos que van posibilitar o acordo, como a sentencia dos recursos dirixidos ao de Cataluña ao Constitucional. Onde o Tribunal diga que non, aí non se poderá entrar. Estará claro o que é constitucional e o que non. Pero é importante lembrar que o que non hai nin houbo foi un bloqueo por parte do PP, o que houbo é falta de acordo. Tendo en conta que agora temos un Estatuto que non contou coa aprobación de todas as forzas parlamentarias, non se pode facer outro no que volva a pasar isto. O novo ten que ser de consenso, para que sexa realmente un Estatuto de Galicia, no que todas as forzas pidan o si no referendo.


Aceptaría a dirección estatal do PP que o seu partido en Galicia incluíse unha referencia nacional no preámbulo do Estatuto aínda que fose por medio das Irmandades da Fala?

Eu entendo que si porque aceptou a de Andalucía, que non di ?nación? pero si ?realidade nacional?.


Pero o PP semella que aposta pola centralidade. Aí está a recente imaxe de varios altos representantes da súa formación na rúa xunto a Galicia Bilingüe, que máis alá do que manifeste é obvio que non sente moito cariño polo galego.
No tema da lingua pártese dun erro. A Constitución impón o deber de coñecer o castelán pero non os idiomas autóctonos. Polo tanto, hai unha discriminación cara ao galego que debe solucionarse dende o Estatuto, estabelecendo a igualdade das dúas linguas no seu ámbito territorial, co deber de que os galegos coñezan o galego. Iso está claro. O Goberno de Albor, coa súa impecable Lei de Normalización Lingüística, decretou que os galegos tiñan o deber de coñecer o galego, pero recorreu o Goberno do PSOE e o Constitucional recortou a lei. Agora? Temos o problema de non ter a obriga de coñecer o galego e a segunda cuestión é que no ánimo de favorecer dende os poderes públicos o uso do galego, algo co que estou completamente de acordo, sacouse un decreto onde se di que hai que impartir en galego un mínimo do 50% das clases. Eu penso que o normal é que fose 50% en galego e 50% en castelán, porque se non se pode dar unha inmersión lingüística en galego de todo o ensino, o que non favorecería porque hai que fuxir das imposicións. Unha vez se igualen os dous idiomas, cada un ten o dereito de usar o que queira. Eu estou a favor das medidas de discriminación positiva a prol do galego pero sen imposicións para evitar que os están en contra do galego teñan argumentos.


A defensa da lingua non é un tema menor, polo tanto.
O galego é o principal elemento definidor da nosa identidade. Non se pode querer a Galicia e non ao seu idioma. É incompatible. Non se pode querer a Galicia e non ao seu idioma propio. Esa é a miña posición substancial e creo que tamén a de Alberto Núñez.


Entón, Corina Porro non quere a Galicia?


[Sorrí] Corina quere a Galicia e eu dou fe que fala galego porque eu tiven moitas conversas con ela en galego, máis que en castelán. Eu creo que foi un erro, incluso desde as posicións que queren o mellor para o galego, ese decreto do ensino, porque o utiliza xente que non quere falar o galego nin tampouco que sexa un idioma normal.


Depende este PPdeG máis de Madrid que o que lideraba Fraga?

Non. Creo que o partido en Galicia ten que contar cunha absoluta independencia para tomar as súas decisións. Tivémola durante a época de Fraga e creo que Alberto Núñez a mantén.


Preguntan os internautas se cre que Feijóo acertou coas listas, sobre todo logo do que ocorreu co destituído número un por Ourense, Luis Carrera.
A renovación ten que ser algo permanente, e é necesario. No que fai referencia a min contribuín no posible xa que é razoable que despois de vinte anos eu deixe paso a outro, malia que tampouco me excluín. Sobre o do home este de Ourense... eu supoño que Alberto Núñez miraría o currículo, e igual ata se fixera unha investigación non coñecería o que fixo este home. Pero hai que recoñecer a rapidez de reflexos e de actuación de Alberto Núñez, que fixo o que teñen que facer os partidos: poñer empeño en que haxa limpeza na vida pública.


O sucedido en Ourense terá custe electoral?


Non creo, os cidadáns teñen que ver que a actuación do presidente foi a correcta.


E as relacións de Pablo Crespo, recentemente detido dentro da trama de Madrid, co PPdeG?
Hai actuacións a título persoal que non teñen que ver coas organizacións. Hai que diferenciar. Xente que se salta as normas hai en todos os ámbitos e o que hai que facer é que esas actitudes desaparezan. Non hai ningún partido que queira ter no seu seo tipos desta calaña. Algunhas desas persoas que están detidas foron expulsadas do partido, aquí en Galicia. Non volveu a entrar, nin fisicamente nin con ningunha empresa.


Cre que houbo cambio no país coa chegada do bipartito?

O cambio valórase se hai mellora. E ese cambio non se ten producido. Si é certo que na primeira parte da lexislatura se deu a continuación da inercia de crecemento económico que viña da época de Fraga. Iso é consecuencia dos 16 anos de goberno anterior, nos que se modernizaron as estruturas produtivas do país. A xente malvivía da agricultura e iso modernizouse, como o sector servizos ou a industria, algo atribuíble ao goberno e tamén a outros axentes, como unha clase empresarial e laboral moi ben preparada. Con este Goberno non houbo variación no eido económico. E no último ano apareceu a crise, onde non está habendo respostas importantes dende o Goberno de España, que é onde residen as políticas transcendentais, e aí non se está acertando. Agora, estamos no furgón de cola.


Estamos inmersos nunha dura crise.
Afecta a todos, pero a uns máis que a outros. Porque a quen realmente afecta é aos que quedan sen traballo. A un funcionario non lle pasa nada, non lle afecta para nada, de feito ten as viaxes ou as hipotecas máis baratas. Aféctalle a quen queda sen traballo. E eles teñen que ser os primeiros aos que se dirixan as medidas.


Falando de medidas e dende un punto de vista político, pero tamén dende o xurídico, como ve a polémica do voto emigrante?

Ten solución?

A saída democrática é unha: que os emigrantes voten igual que se vota aquí, en urna e identificándose. Non pode ser que unha persoa vote por outra como ocorre agora na diáspora, sabemos que un tipo pode chegar a Correos con cincuenta votos para quen lle dea a gana. Iso é unha trapallada. Un Estado de dereito non o pode permitir. Pero como esa situación favorece ao que ten a capacidade para cambiala pois mantense. Se aquí en Galicia teño que ensinar o DNI, como alí non? Como pode dicir un partido serio que iso é impedir que voten os emigrantes? É o mínimo. A solución ten que ser votar en urna, como fan outros países. Se supón maior incomodidade... haberá que facer o mellor posible e poñer facilidades. Pero os países que teñen aquí unha importante poboación emigrante pois votan aquí. É o lóxico, dende un punto de vista político e xurídico.


Afirma o PSOE que sería moi complicada esa medida porque non hai lugar físico para que voten tantos galegos.
En España as mesas electorais están en colexios ou incluso tabernas. Alá, por exemplo en Bos Aires, hai moitos sitios onde se poden poñer urnas como as de aquí ademais do Consulado, como o Centro Galego e similares. E se os votos chegan máis tarde, pois é igual que agora, pero chegarían con garantías. Non pode ser que chegue un tipo con cen votos. O 90% dos que votan alá non saben a quen votan.


Que pasaría se os sufraxios exteriores decidisen as eleccións?

Sería un desastre, un atentado á democracia. O voto emigrante emitido nesas condicións non pode decidir un Goberno.


Cando vostedes estaban no poder tampouco cambiaron o método.
O cambio lexislativo non se fai aquí en Galicia. Nós gobernamos en Madrid oito anos, pero é certo que en 2001, nas eleccións autonómicas, eu falei con todas as forzas para que se tomasen medidas para evitar que o voto emigrante chegase con dúbidas. Solicitaba que cada cidadán emitise o seu voto, pero non houbo resposta, seguramente porque daquela se pensaba que non podía decidir unhas eleccións. Pero agora, en Galicia xa afecta a deputados e pode definir gobernos, o que é escandaloso.


Vostede foi presidente de Sogama, como ve a polémica que está a rodear esta sociedade actualmente?
Sogama foi un proxecto absolutamente válido e imprescindible para Galicia, pero non se completou como estaba previsto e por iso falla. O evidente é que en Sogama na actualidade hai cousas que cheiran mal, nunca mellor dito. E se algúns dos que estaban antes agora fan mal o que antes facían ben é que a culpa pertence aos que mandan.


E, como avogado e ex conselleiro de Xustiza, cre que os xuíces teñen dereito á folga?

A situación da Xustiza hai que cualificala de insostible. É dramática e desastrosa. Os responsables fundamentais e únicos desta crise son os Gobernos. Hai problemas estruturais, incluso que afectan á organización. As Comunidades Autónomas teñen que ter máis competencias. Non se lle están dando á Xustiza os medios necesarios para facer o seu traballo, hai 176.000 casos pendentes só en Galicia. Non se reforzaron os xulgados. Ante isto, os xuíces non só teñen o dereito senón tamén a obriga de protestar. Tiñan que telo feito hai moito tempo. Non quedar quedos mentres os xulgados podrecen.

Coordenadora de Equipas de Norm. de Ferrolterra
Categoría: Opinión - Publicado o 12-02-2009 21:45
# Ligazón permanente a este artigo
Modelos linguísticos de tres partidos políticos
Sacado de bloque Coordinadora de Equipas de Normalización Lingüística de FerrolTerra

Un conflito, dúas linguas, tres modelos

Xoves, 12 de febreiro de 2009
Iago Martínez / XORNAL.COM I A Coruña.- A lingua entrara na campaña electoral moito antes de que Galicia Bilingüe, coa complicidade do partido de Rosa Díez e certos sectores do PP, intentase mobilizar á sociedade por unha causa lexítima, a liberdade de elección, sustentada sobre un diagnóstico perverso, o da imposición do galego na Galicia do século XXI. E entrara antes porque as tres principais forzas políticas representan pola súa vez tres modelos lingüísticos distintos. Para dúas linguas enleadas nun só conflito, socialistas, nacionalistas e populares propoñen tres saídas diferentes. Ningunha pasa pola erradicación do castelán, a única lingua cuxo coñecemento é obrigado pola Constitución, pero non todas reservan o mesmo papel ao galego nin entenden da mesma maneira a convivencia dos dous idiomas no Estatuto de Autonomía.

PP: "Proporcionalidade" e "libre elección"

Para a os estudosos da sociolingüística, o proceso de "substitución" é aquel mediante o que unha lingua de poder, como o latín, consegue desprazar a outras con menos prestixio até ocupar o seu espazo ou facelas desaparecer, como aconteceu con algunhas linguas prerromanas. Para o PP de Alberto Núñez Feijóo, e así o recolle o seu programa electoral, "substitución" é o que está a provocar en Galicia a aplicación do Plan de Normalización Lingüística.

Dito doutro xeito, os populares cren que o único idioma cuxo coñecemento é obrigado no Estado español porque así o estabelece a Constitución de 1978, o castelán, está a ser desprazado por outro, o galego, que non é de obrigado coñecemento nin sequera no Estatuto de Autonomía de Galicia. Feita a diagnose, os populares detallan as súas medidas de combate á "imposición". Propoñen un "bilingüismo integrador" sustentado no "coñecemento por todos de ambas linguas" e explícano nun texto escrito en galego e salferido de erros ortográficos, sintácticos e gramaticais.

Se acceden ao goberno logo do 1 de marzo, os conservadores comprométense a derrogar o Decreto de Fomento do uso do Galego na ensinanza aprobado polo bipartito para substituílo por unha norma que permita aos pais elixir a lingua materna dos seus fillos e a estes seren escolarizados nese idioma. Ademais, asegurarán a libre elección da lingua nos exames e nos materiais didácticos, agás en Lingua Galega e Lingua Castelá, e garantirán a "proporcionalidade" entre os dous idiomas, que definirán os claustros dos centros.

Logo de paralizar as actuais políticas de promoción do galego no comercio, o PP creará unha Oficina de Dereitos Lingüísticos e centralizará nun único organismo adscrito á Xunta de Galicia todos os cursos de capacitación lingüística e a expedición de títulos de competencia en galego.

PSOE: Dous idiomas, "dobre privilexio"


Sobre a base de que ter dúas linguas oficiais "é un dobre privilexio do que moi poucos pobos disfrutan", aínda que este verbo non existe en galego ?o correcto é "gozar"?, os socialistas non prevén no seu programa ningunha medida que rebaixe o actual estatuto do galego. É certo que cando propoñen reformar o actual Estatuto de Autonomía tampouco se comprometen a incluír no texto a obriga de coñecelo, como fai a Constitución Española co castelán, pero tampouco pretenden ?a xulgar pola letra impresa? dar marcha atrás na implantación do galego.

Na vindeira lexislatura, se o PSOE accede ao goberno autonómico e ten competencias nesta materia, elaborarase un Plan Estratéxico de Política Lingüística que determine as prioridades de acción e estabeleza os mecanismos de avaliación que se precisen. Ademais, empezará a funcionar un Consello Social da Lingua Galega encargado de escoitar e implicar á sociedade no debate e posta en marcha deste tipo de políticas.

En liña co que propoñen no capítulo educativo, os socialistas reiteran a súa aposta polo plurilingüismo, neste caso mediante iniciativas de diálogo interterritorial entre Galicia, España e Europa. Por iso, anuncian a súa colaboración co Goberno español e con outras Comunidades Autónomas con lingua propia na creación do Consejo de las Lenguas, así como outras actividades de promoción da diversidade no contexto europeo.

O programa socialista, baseado en grandes liñas de actuación e non en medidas concretas de goberno, na liña da campaña presidencialista que están a desenvolver, centrada na imaxe de Emilio Pérez Touriño como presidente da Xunta, deixa aí o capítulo da lingua. A súa é unha aposta "por un modelo de educación plurilingüe".

BNG: "Como mínimo", o 50% en galego

A diagnose dos nacionalistas é lixeiramente diferente á dos seus socios de goberno do PSOE, e dende logo está nos antípodas do que pensan no PP. A xuízo da formación frentista, sendo o Decreto de Fomento do uso do Galego na ensinanza un "avance importante", a "lentitude" na súa aplicación está a desvirtuar o seu contido. Así, segundo recollen no programa electoral, "continúan os incumprimentos á hora de impartir, como mínimo, o 50% das aulas en lingua galega" e "á hora de elaborar o plano de formación do profesorado".

Para facer fronte ás "manipulacións" sobre o estatus do galego, dunha banda, e á "deficitaria" situación que atravesa, da outra, o BNG comprométese a cumprir o decreto tal e como foi concibido e aprobado, así como a crear unha Subdirección Xeral de Normalización Lingüística adscrita á Consellaría de Educación ?agora é unha secretaría xeral e depende de Presidencia, na área socialista do executivo?. Ademais, de acceder ao goberno, porá en marcha un plan de formación do profesorado para mellorar a súa competencia e formación específica e activará as comisións territoriais de coordinación de equipos de normalización lingüística dos centros educativos, aos que incrementará tamén o apoio económico e técnico. Nas probas de acceso á función pública docente, o profesorado deberá superar como mínimo unha proba en lingua galega.

Por último, o programa dos nacionalistas porfía na necesidade de ampliar o número de materias que se deben impartir en lingua galega e incentivará a innovación e a elaboración de materiais que redunden nunha maior galeguización do ensino, tamén a través de subvencións. Por último, exixirase o perfil obrigatorio de Lingua Galega nos concursos de traslados para Educación Infantil e para aquelas materias que o decreto estabelece que se deben impartir en galego.

Curiosamente neste xornal non di o mesmo. Haberá que ler os programas.
Categoría: Galego - Publicado o 12-02-2009 21:40
# Ligazón permanente a este artigo
Cal está en perigo?
Categoría: Galego - Publicado o 12-02-2009 16:52
# Ligazón permanente a este artigo
Patacas por ebay

Categoría: Humor - Publicado o 11-02-2009 20:18
# Ligazón permanente a este artigo
Políticos de pataco
Supoño que algúns xa non saben o que é un pataco, unha chica e un patacón. A miña época é máis ben a do pataco, era o custo dun caramelo dos pequenos. Unha peseta eran dez patacos.
A que ben isto a conto. Pois ben a que hoxe cando lin a entrevista que lle fixeron a Touriño na prensa, o que máis me chamou a atención foi o segundo titular: "Yo soy castellano en lo personal". E a min saíume da ?ialma?: ?Políticos de pataco?.
Que pena me deu!. Que satisfación para outros moitos! Que medo lle teñen as eleccións! Os do PP fastidiáronlle a foto a Rosa Diez na manifestación do domingo. Agora semella que os do PSOE lla queren estragar ós do PP.
Despois de reflexionar un pouco e, por sacarlle algo positivo, pensei que era de agradecer a sinceridade, pois outros, comparando un pouco, semella que lle teñen alerxia: Rajoi, Ana Pastor, ? e hoxe meto neste último lote a ?Pepe Blanco?, que nun mitin di que ?No habla gallego porque no le gustan las imposiciones?. Manda truco! Que pena que non estivera na manisfestación!
Cando falou Fernando Blanco galego? Levo anos seguindo a este ?cerebro? e unha das cousas que nunca me gustaron del, foi que case nunca falou ?a súa lingua materna? , nin nas campañas electorais. Parece que marchan para Madrid par non tropezar coa súa lingua.
Digo pena, porque seguimos relegando ó galego a unha segunda ou terceira división, nalgúns sitios coido que está nunha ?Terceira Rexional? con perigo de extinción.
De que maneira queda relegada a estas categorías? Aquí van algúns exemplos:

*Moitas familias de orixe rural que agora viven na cidade falan o galego na casa (neste caso si que é verdadeira intimidade) pero tan pronto saen da casa desaparece: nos comercios, na piscina, cando se vai ó médico ... case sempre cando están fora da casa.

*Estas mesmas familias, que entre eles falan galego, fano en castelán cos fillos/as. Foi o que sí se lles impuxo a eles cando ían a escola, daquela estaba mal visto falar galego, e non se podía falalo nas escolas. Moitos seguen a facer o mesmo que lle dicían seus pais : ?Habla bien?.
*No ensino , como xa dixen noutros artigos, moitos dos libros están en galego, pero tan pronto saen da clase desaparece ?A Fala? por arte de maxia, isto case no mellor dos casos, pois aínda hai moitos mestres/as que dan explicación en castelán. Estouno padecendo coas dúas das tres fillas que teño.

*Os políticos no parlamento, traballadores da TVG, etc. que cando os vés na tele "semella" que falan galego acotío, pois vai e lévaste un chasco cando os escoitas fóra dese contorno. Aquí hai que dicir ó seu favor, que polo menos fano nalgún contexto... esperando que pouco a pouco vaian mellorando e aumentando os espazos . Os galefás (galego ?falantes) temos que vivir destas miserias!

*Cando queres ler a prensa ?galega?, como non o fagas por internet, apenas atopas case nada en galego.
Xa non falemos, de cine, videoxogos, ?.

En resumo, non me gustan moito estes "modelos de políticos a seguir", son "políticos de pataco ou patacón"O prestixio da lingua non se acada deste xeito.Así seguimos potenciando a grande diglosía que aínda temos.

No simil futbolístico, en que categoría situariades vós o galego?

Coñeces algunha outra expresión para definir isto? Será isto "esperpento"?
Categoría: Paradoxos - Publicado o 11-02-2009 18:07
# Ligazón permanente a este artigo
© by Abertal
Estadisticas y contadores web gratis
Estadisticas Gratis


Este blogue forma parte da Rede de Blogueiras/os en defensa do Galego
Chuzame! chúzame -





Warning: Unknown: Your script possibly relies on a session side-effect which existed until PHP 4.2.3. Please be advised that the session extension does not consider global variables as a source of data, unless register_globals is enabled. You can disable this functionality and this warning by setting session.bug_compat_42 or session.bug_compat_warn to off, respectively in Unknown on line 0