Caderno da Coordenadora de Equipas de Normalización Lingüística de Ferrolterra








clocks for websitecontadores web


anuncia o portal na túa web





O meu perfil
cequipnormalizacion@gmail.com
 CATEGORÍAS
 FOTOBLOGOTECA
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

Iniciativa Lexislativa Popular sobre o uso do galego
INICIATIVA LEXISLATIVA POPULAR

Comezaranse os trámites para impulsar unha Iniciativa Lexislativa Popular, que dea garantías legais que posibiliten o uso do galego en todos os ámbitos e nomeadamente no ensino e na administración (ao remate desta entrada aparece o texto completo en slideshare)

A cantidade de sinaturas mínima que cómpre recoller é de 15.000.

Para posibilitar a participación do alumnado, que participou activamente na folga do 21 de xaneiro, editaranse tamén pregos de sinaturas que permitirán aos menores de idade expresar o seu apoio á ILP. O texto da ILP pódese consultar en http://sites.google.com/a/queremosgalego.org/queremos-galego/iniciativa-lexislativa-popular , así como no arquivo adxunto que vos achegamos. O luns 8 de febreiro entregarase no rexistro do Parlamento.

FESTIVAL DE MÚSICA QUEREMOS GALEGO

Organizarase cara o mes de abril un festival de música en Santiago coa presenza de diferentes grupos galegos.

CONTESTACIÓN AO PROXECTO DE DECRETO

Convocaranse actos en todas as comarcas o día seguinte da presentación do proxecto de decretazo contra o galego, que previsibelmente será neste mes de febreiro.

REPARTO DE BANDEIROLAS, CAMISETAS E BONOS DE AXUDA.

Repartiranse as bandeirolas de Queremos Galego para colocarmos nas fiestras, e facermos público dese xeito o noso apoio á nosa lingua e o noso rexeitamento á política lingüística do gobernos da Xunta. Ademais seguen á venda polo prezo de 10? bonos-axuda de Queremos Galego e camisolas para sufragar gastos.

É importante contribuirmos aos gastos da plataforma adquirindo algún destes bonos ou camisolas.

MOBILIZACIÓN 17 DE MAIO.

Ao redor do 17 de maio convocarase unha manifestación nacional na defensa na nosa lingua.

Comentarios (0) - Categoría: Manifestos - Publicado o 06-02-2010 19:54
# Ligazón permanente a este artigo
Comunicado das Equipas de Normalización Lingüística de Ferrolterra
Comentarios (0) - Categoría: Manifestos - Publicado o 19-01-2010 17:30
# Ligazón permanente a este artigo
XUNTANZA IMPULSADA POLA PLATAFORMA CÍVICA QUEREMOS GALEGO?FERROL EN APOIO E IMPULSO DO ENSINO GALEGO

XUNTANZA IMPULSADA POLA PLATAFORMA CÍVICA QUEREMOS GALEGO?FERROL EN APOIO E IMPULSO DO ENSINO GALEGO.


As asociacións relacionadas a pé da páxina, directamente relacionadas co ensino na comarca de Ferrol, manifestamos:



O noso profundo rexeitamento aos ataques que se están a producir contra o proceso democrático de normalización do galego.

A nosa preocupación polo efecto negativo que a aplicación dunha proposta de decreto elaborada de costas aos sectores directamente afectados tería na calidade do ensino e sobre o incremento do fracaso escolar do alumnado

A nosa oposición a que o Presidente da Xunta pretenda trasladar a súa responsabilidade de gobernar ao alumnado e ás familias creando un conflito sen precedentes na comunidade escolar.

Que o uso do galego é un dereito fundamental do que non podemos privar ás novas xeracións. Para poder exercer ese dereito en liberdade, o goberno ten a obriga de garantir a plena competencia na nosa lingua propia.

O noso rexeitamento a que logo de tantos anos de gobernos do PP en Galiza, se pretenda utilizar o pésimo resultado acadado na aprendizaxe do inglés para agochar unha agresión ao noso idioma propio.

O noso desexo dunha inmediata volta ao sosego, reflexión e consenso na toma de decisións sobre o sistema de ensino, logo da ruptura unilateral por parte do PP.

A necesidade de impulsar a aplicación do decreto vixente, de avaliar anualmente os seus resultados e do posterior estudo consensuado de posíbeis modificacións no camiño sinalado na Lei de NL, no PXN da lingua galega e na Carta Europea das linguas rexionais ou minoritarias.

Facemos unha chamada ao conxunto da sociedade da nosa comarca para que apoie o paro no ensino facendo as previsións necesarias para que o alumnado non acuda aos centros escolares o vindeiro xoves día 21 e que participe na manifestación que partirá da Alameda de Santiago de Compostela ese día 21 ás 11:30 h.

Información de autobuses gratuítos na páxina www.queremosgalego.org

CIG, Comités, Coordenadora de ANPAS de Ferrolterra, Coordenadora de ENL de Ferrolterra, Galiza Nova, Representantes na Xunta Provincial de Directores/as de primaria e secundaria de ferrolterra, STEG e Xuventudes Socialistas de Galicia
Comentarios (0) - Categoría: Manifestos - Publicado o 18-01-2010 08:45
# Ligazón permanente a este artigo
'Goberne quen goberne, a lingua non se vende'
AMPARO Á MARCHA DO 21 DE XANEIRO

O colectivo Galiza Non Se Vende fai público un manifesto onde critican o borrador do decreto do galego no ensino presentado por Feijoo.

Redacción Vieiros - 12:30 15/01/2010

O colectivo Galiza Non Se Vende fixo público un manifesto onde critican o borrador do decreto do galego no ensino presentado polo Goberno o pasado día 30 de Nadal, que cualifican de "atentado á lingua galega e, polo tanto, un atentado á cultura e á identidade" do país.

Neste senso, mostrou o seu "pleno apoio á manifestación en reivindicación dun ensino en galego" que se desenvolverá o vindeiro xoves en Compostela (partirá ás 12.00 horas da Alameda), coincidindo coa folga no ensino convocada por diversas organizacións para ese día.


MANIFESTO EN DEFENSA DA LINGUA
GOBERNE QUEN GOBERNE, A LINGUA NON SE VENDE


Dende Galiza Non Se Vende queremos manifestar a nosa total oposición ao decreto do galego no ensino do PP, pois constitúe un atentado á lingua galega e, polo tanto, un atentado á cultura e á identidade de Galicia.

Non podemos admitir un decreto que pretende lexitimar o abandono da lingua polos poderes públicos e interromper a súa transmisión interxeracional. Non podemos consentir que se menoscabe o dereito dos galegofalantes a usar, conservar e transmitir a lingua propia como legado, e que se impida a normalización do seu uso polo resto da poboación. Non podemos tolerar que a miseria intelectual, a inconsciencia e a insensibilidade dos que se avergoñan de seren galegos sirvan como xustificación espuria dunha pretendida liberdade para destruir unha lingua que é o noso máis prezado patrimonio cultural e un valioso patrimonio da humanidade.

O decreto que nos ocupa, igual que outras disposicións legais, que non lexítimas, revela o absoluto descoñecemento da realidade do noso país, e o desprezo da nosa cultura, por parte de quen nos goberna.

A incesante presión socio-político-económica sobre a nosa terra ao longo da historia colocou a nosa lingua nunha posición de desvantaxe que pode provocar a súa desaparición, e que é preciso neutralizar con medidas de protección eficaces. Pero ningún dos gobernos que sufrimos tivo nunca unha intención clara de facer do galego a lingua vehicular do ensino, único camiño viable para a súa normalización. Non recoñecer este feito, e adoptar unha postura contraria, converte ao goberno da Xunta en promotor da desaparición da lingua galega.

Os membros dos máis de sesenta colectivos que formamos GNSV somos conscientes da nosa identidade. Sabemos que o noso medio natural é único e valioso, nin máis nin menos que calquera outro do planeta, pero é o noso, non porque o posuamos, senón porque a él pertencemos. Tamén sabemos que a lingua galega é tan só, pero nada menos que, unha das linguas do mundo; unha obra colectiva do noso pobo ao longo da historia; nin mellor ni peor que outras, pero é a nosa; o medio co que construimos o noso pensamento, e a máis valiosa aportación de Galicia ao patrimonio cultural da humanidade. Debemos estar lexítimamente orgullosos desta nosa herdanza, e non podemos consentir que sexa neciamente desprezada, nin irresponsablemente destruida.

Defendemos a Terra e, polo tanto, a biodiversidade. Polo mesmo, defendemos a diversidade cultural que permitiu ao ser humano adaptarse á biosfera e, polo tanto, defendemos a nosa cultura e a nosa lingua.

Terra, cultura e lingua van da man. Destruir a nosa terra é destruir a nosa cultura, ao facer desaparecer o seu soporte material. Destruir a nosa terra é destruir a nosa lingua, ao facer desaparecer os lugares que nomea, as actividades que describe, a memoria que ela guarda e lembra. Destruir a nosa lingua é deixar á nosa terra orfa de nomes, valeira de significado, carente de memoria cultural, desprotexida.

Temos a responsabilidade de defender o noso medio natural e, polo tanto, o noso patrimonio cultural identitario, e o noso idioma, e de preservalos para as xeracións vindeiras. Igual que non consentimos a destrución nin a privatización do noso territorio nin do noso mar, non imos consentir ningunha agresión máis á nosa lingua.

Dende GNSV, rede participativa, non xerárquica, apartidaria, aberta a toda a sociedade, consideramos que a defensa da riqueza linguística e da cultura do noso País fai necesario e inevitable o estricto incumprimento deste malfadado decreto do galego no ensino.

Por todo o devandito, mostramos o noso pleno apoio á manifestación en reinvindicación dun ensino en galego que, convocada por diversas organizacións, terá lugar o día 21 de Xaneiro, e partirá ás 12:00 h da Alameda de Compostela.


Goberne quen goberne, A LINGUA NON SE VENDE!
Comentarios (0) - Categoría: Manifestos - Publicado o 16-01-2010 14:07
# Ligazón permanente a este artigo
Manifesto pola hegemonia social do galego
Mando-che a ligação e o texto do Manifesto pola hegemonia social do galego, que foi colocado na Internet esta mesma tarde, e já cresce. Para que o assines, para que o assinedes. E que role!

Muito obrigado, e um abraço,

Celso Alvarez Cáccamo
lxalvarz@udc.es



MANIFESTO


A Galiza vive uma crise da língua própria sem precedentes. À evidente perda do galego na mocidade une-se agora a política das novas elites do Partido Popular governante, decididas a acabar com os tímidos avanços na promoção da língua que o governo bipartido anterior começava a introduzir. Especialmente preocupantes são a eliminação da obrigatoriedade de demonstrar conhecimento de galego escrito para o acesso à função pública (isto é, as trabalhadoras e trabalhadores ao serviço de todos e de todas), e a notável discriminação que se avizinha na presença do galego no sistema educativo público (isto é, coletivo). O Partido Popular, sob a demagogia da "liberdade linguística", parece decidido a instituir o golpe de graça legislativo e político que impossibilite a recuperação da transmissão, dos usos e do prestígio da língua da Galiza. Que, por políticas dirigidas, num breve período histórico praticamente um povo inteiro deixe de transmitir e de utilizar o seu idioma como forma de conduta diária constitui um linguicídio em toda a ordem, que vulnera frontalmente os direitos humanos e cívicos coletivos.

Mas a situação não é apenas fruto dum plano improvisado do PP à luz duma contingente vitória eleitoral: é também resultado duma prática de décadas em que a classe política dirigente da Galiza se demitiu da sua responsabilidade histórica de contribuir para a necessária hegemonia social do galego como língua de relações sociais, de referência identitária, e de avanço cultural e material. Como em qualquer sociedade, só esta hegemonia do próprio poderá produzir a integração social num espaço comunicacional comum no nível local, nacional e internacional, imprescindível para imaginarmos e portanto construirmos uma ordem de verdadeira igualdade num âmbito de decisão verdadeiramente soberano.

Nós, as pessoas e coletivos abaixo assinantes,

DENUNCIAMOS o plano ultraliberal do Partido Popular e dos poderes económicos e mediáticos dominantes para manterem a língua (isto é, a conduta visível de milhões de pessoas) à mercê do darwinismo social, da lei do mais forte económica e mediáticamente, a língua espanhola;
RECLAMAMOS dos poderes públicos, sujeitos sempre a renderem contas perante a cidadania, o exercício das suas obrigações para a promoção social e institucional do galego e para a eliminação de qualquer discriminação e obstáculo à sua expansão, consolidação e naturalização como língua nacional própria a todos os efeitos;
e CHAMAMOS, na mais firme tradição do galeguismo, a um compromisso comum, horizontal e persistente de toda a cidadania galega pola construção da hegemonia social da nossa língua, a meio da sua transmissão efetiva aos mais novos na vida diária e no ensino, nos seus usos orais e escritos, como o nosso principal instrumento integrador e como o nosso vozeiro internacional no âmbito linguístico e cultural galego-luso-brasileiro de que nunca deixou de fazer parte.

Galiza, julho de 2009
Comentarios (0) - Categoría: Manifestos - Publicado o 16-07-2009 12:57
# Ligazón permanente a este artigo
Mil firmas apoian xa
MANIFESTO

O filósofo Antón Baamonde, o escritor Xabier P. Docampo e o editor Manuel Bragado presentan hoxe en Vigo o texto en defensa da lingua.

MARÉ - GALICIA HOXE


O Salón de actos da Casa Galega da Cultura de Vigo acolle hoxe ás 12:30 horas a presentación do manifesto Galego. Patrimonio da Humanidade, que foi asinado até o momento por máis de 1.200 persoas. En nome dos redactores do documento, intervirán o filósofo Antón Baamonde García, o escritor Xabier P. DoCampo e o editor Manuel Bragado. A iniciativa, que se pode consultar na web http://galegopatrimoniodahumanidade.blogaliza.org/, quere constituírse en grupo promotor para a elaboración e presentación no Parlamento de Galicia dunha iniciativa lexislativa popular que protexa a oficialidade do idioma galego. "A pretensión de facer crer nunha inexistente imposición lingüística disimula o intento de liquidación do idioma galego e de supremacía do castelán", asegura o manifesto. O texto deixa claro que o PP "saíu do consenso" mantido durante estes anos arredor da lingua propia, pero advírtelle ao goberno de Núñez Feijóo que "gañar unhas eleccións non autoriza a destruír o que é unha das bases da convivencia na nosa sociedade e un dos signos da nosa existencia como país".

"O idioma de Galicia é un patrimonio da humanidade que debemos custodiar e garantir como medio de comunicación e de creación", conclúe o manifesto que se insire dentro dunha serie de movementos de apoio social á lingua como a plataforma "Queremos Galego" que está de impulsar a Mesa pola Normalización Lingüística.

TEXTO DO MANIFESTO


GALEGO. PATRIMONIO DA HUMANIDADE (asina aquí)


Ata hai pouco tempo era un valor compartido, que formaba parte dos consensos básicos sobre os que se articulaba o autogoberno de Galicia, que o idioma galego era merecente dunha especial Protección por parte dos poderes públicos. Ese valor partía da subordinación histórica dun Idioma que foi sempre o das maiorías populares pero que tamén estivo sempre discriminado ou
proscrito, salvo nos períodos en que Galicia e España gozaron da democracia. A liberdade e o dereito ao uso do idioma propio foron Historicamente da man.

A pretensión de facer crer nunha inexistente imposición lingüística disimula o intento de liquidación do idioma galego e de supremacía do castelán. Os que tal sosteñen queren evitar a
presenza do galego nas súas vidas para pecharse en ámbitos en que o castelán sexa o único idioma. Pero Galicia é unha sociedade na que se falan dúas linguas que, non se pode negar, están en
situación de desigualdade, polo que o galego debe recibir unha especial protección. Só así se poderá afirmar que se actúa en xustiza e na procura da igualdade entre os dous idiomas.

Esa é a letra e o espírito da Constitución, do Estatuto de Autonomía, e da vixente Lei de normalización Lingüística. As sentenzas do Tribunal Constitucional así o confirman. Sen
embargo, o PP saíu do consenso. Pero gañar unhas eleccións non autoriza a destruír o que é unha das bases da convivencia na nosa sociedade e un dos signos da nosa existencia como país.

A sociedade galega que sente aprecio cara a súa lingua ?independentemente de cal sexa o idioma no que se expresa usualmente? debe reclamar unha volta do PP a un terreo común, así como mostrar o seu acordo coas políticas de afirmación positiva para o idioma galego, que o propio PP impulsou desde a Xunta, e que non buscan senón a súa protección. O idioma de Galicia é un patrimonio da humanidade que debemos custodiar e garantir como medio de comunicación e información.
Comentarios (0) - Categoría: Manifestos - Publicado o 11-07-2009 16:32
# Ligazón permanente a este artigo
MANIFESTO DE APETEGA EN DEFENSA DA LINGUA GALEGA
Asociación do Profesorado de Tecnoloxía de Galicia
Apartado 142 - C.P. 15702 - Santiago de Compostela
www.apetega.org contacto@apetega.org

A Asociación do Profesorado de Tecnoloxía de Galicia (APETEGA) quere facer
público o seguinte comunicado:
Como asociación de profesorado, queremos manifestar a nosa preocupación ante a intención do novo goberno de Galicia de derrogar o Decreto 124/2007 polo que se regula o uso e promoción do galego no sistema educativo.
Consideramos que a lingua galega forma parte da riqueza e da idiosincrasia do noso país, e como todos sabemos o seu uso está en alarmante retroceso.
Dende as institucións educativas debe ser transmitida e apoiada para fomentar o seu uso, buscando unha situación de igualdade real entre as dúas linguas de Galicia.

Asociación do Profesorado de Tecnoloxía de Galicia, APETEGA
Santiago de Compostela a 12 de xuño de 2009
Comentarios (0) - Categoría: Manifestos - Publicado o 25-06-2009 21:46
# Ligazón permanente a este artigo
Manifesto dos profes de Lingua Castelá
Chéganos este manifesto que proximamente pensan colgar na web para buscar adhesións.
No seu momento, publicaremos a ligazón.

Os e as abaixo asinantes, profesionais da docencia dedicados á ensinanza da lingua castelá, queremos facer constar o seguinte:

1.- A nosa experiencia socio-educativa como profesionais con competencia no ámbito da docencia lingüística demostra que o castelán non sofre ningún tipo de ameaza na nosa comunidade. Disfrutamos de todos os medios que unha sociedade moderna pode pór a disposición do alumnado e o profesorado de lingua e de literatura.

2.- Sentímonos orgullosos e orgullosas de poder transmitirlle ao noso alumnado toda a riqueza patrimonial, lingüística e literaria do español das dúas beiras do atlántico, mais tamén sentimos o orgullo de formarmos parte da comunidade galego falante, posuidora igualmente dun amplísimo patrimonio oral, dunha literatura de primeirísimo nível e con capacidade para abrirnos as portas do portugués.

3.- Termos dúas linguas oficiais é unha riqueza evidente, e é tarefa educativa de primeira orde lograr a igualdade de competencias lingüísticas nos dous idiomas. Non obstante, somos conscientes das dificuldades e ameazas nas que se atopa a día de hoxe tanto a nível oral como escrito o idioma propio da nosa comunidade, o galego.

En consecuencia, rexeitamos, ou cando menos cuestionamos, a falta de sensibilidade e a carencia de rigor científico que se transluce na consulta sobre as linguas no ensino que promove estes días a administración educativa.
Comentarios (3) - Categoría: Manifestos - Publicado o 16-06-2009 16:29
# Ligazón permanente a este artigo
Manifesto do Colexio Oficial de Psicoloxía de Galicia sobre a Lingua
Comentarios (0) - Categoría: Manifestos - Publicado o 15-06-2009 17:53
# Ligazón permanente a este artigo
O GALEGO E O ENSINO DA CIENCIA
A Xunta Directiva da Asociación de Ensinantes de Ciencias de Galicia (ENCIGA), que está presente no eido da educación secundaria dende hai máis de vinte anos e que conta con case un milleiro de profesores e profesoras no ámbito da Física, Química, Bioloxía, Xeoloxía, Matemáticas e Tecnoloxía, dende o coñecemento e a experiencia de tan prolongada presenza, pon de manifesto:

* Que os profesores e profesoras que participan nas actividades de ENCIGA desenvolven as súas actividades docentes en centros escolares situados en cidades, vilas grandes e pequenas e con moi variadas situacións sociolingüísticas.

* Que, polas súas actividades e antigüidade, é a asociación de profesores de Ciencias máis importante no ámbito da secundaria das que hai no territorio español.

* Que esta asociación ten publicado ata hoxe 67 números da súa revista ?Boletín das Ciencias? en galego, o que supón preto de mil cincocentos artigos dedicados ao ensino das ciencias na secundaria.

* Que leva celebrados 21 congresos anuais, nos que se teñen presentado máis de 500 comunicacións, cuxa inmensa maioría foron expostas en galego.

* Que profesores e profesoras que colaboran ou colaboraron nas actividades de ENCIGA se contan entre os mellores profesionais no seu ámbito, como queda demostrado por teren recibido o recoñecemento de institucións e organismos de todo tipo, tanto de Galicia como de fóra dela.

* Que nunca nas súas actividades, asembleas, comunicacións, artigos, etc., se ten producido ningunha intervención no sentido de manifestar que o uso do galego poida producir ningún tipo de atranco na aprendizaxe dos contidos científicos, ou en calquera outra acción que sexa propia do ensino na secundaria.

Por todo isto, AFIRMAMOS que:

Calquera intención de situar o galego como un problema no ensino, en calquera etapa educativa, non se corresponde coa realidade e non se sustenta en ningunha razón didáctica ou pedagóxica.
Comentarios (0) - Categoría: Manifestos - Publicado o 11-06-2009 18:44
# Ligazón permanente a este artigo
[1] 2 [3]
© by Abertal

Warning: Unknown: Your script possibly relies on a session side-effect which existed until PHP 4.2.3. Please be advised that the session extension does not consider global variables as a source of data, unless register_globals is enabled. You can disable this functionality and this warning by setting session.bug_compat_42 or session.bug_compat_warn to off, respectively in Unknown on line 0