Warning: getimagesize() [function.getimagesize]: Filename cannot be empty in /var/www/vhosts/blogoteca.com/httpdocs/include/func-blog.php on line 249
A Mesa pola Normalización Lingüística na Coruña


    A Mesa pola Normalización Lingüística na Coruña


O sitio na rede da Mesa pola Normalización Lingüística na zona da Coruña
Recibe a boa vinda ao pequeno sitio na rede da Mesa pola Normalización Lingüística na zona da Coruña.

A Mesa é unha plataforma cidadá independente, plural e apartidaria que ten como único obxectivo a plena normalización da lingua galega en todos os ámbitos da socidade.

É na actualidade a principal asociación cultural de Galiza, con máis de 3.500 socias e socios, un 17% das e dos cales están nesta zona.

O meu perfil
amesadacorunha@gmail.com
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES
 DESTACADOS

Marineda City estará na "Carretera de los Baños de Arteijo", segundo decretou a alcaldía da Coruña
A Mesa pídelle a Javier Losada que "cumpra a súa palabra" sobre a galeguización "progresiva" do rueiro da cidade

A asociación en defensa do galego denuncia que o Concello segue a empregar denominacións viarias ilegais, mesmo en actos e documentos de aprobación recente

A Mesa pola Normalización Lingüística da Coruña vén de entregar unha carta por rexistro ao alcalde Javier Losada instándoo a que ?cumpra e faga cumprir? o seu compromiso público, de hai agora un ano, de introducir ?progresivamente e con naturalidade?, segundo as súas propias palabras, o galego no rueiro urbano da cidade, onde a entidade cidadá en defensa da lingua galega leva anos a denunciar a persistencia de denominacións que fan alusión a topónimos galegos castelanizados ou a deturpación sistemática dos nomes de varios barrios e lugares tradicionais.

Malia que A Mesa recoñece que hai nomes de rúas concretas, como Rianxo ou Tui, que acabaron por grafarse correctamente de acordo ?coa lei e co sentido común?, seguen aínda a persistir denominacións ?propias dos mellores tempos do franquismo? como Arteijo*, Finisterre*, Villa de Lage*, Mellid*, Puentedeume*, Orense*, Río Jallas*, Monasterio de Cines* ou Río Anllones*, entre outras.

Cuestionado por esta anomalía democrática hai agora aproximadamente un ano, logo de que a Concelleira de Normalización Lingüística Ermitas Valencia recoñecese publicamente a súa pervivencia, Javier Losada anunciaba que o rueiro da Coruña se modificaría ?progresivamente e con naturalidade?, aínda que sen concretar medidas nin prazos temporais para tales modificacións.

A Mesa da Coruña constata e lamenta que, transcorrido un ano de aquel anuncio mediático do alcalde, a situación do rueiro coruñés siga sen variar e que mesmo se ?desaproveiten oportunidades? para usar correctamente as denominacións daqueles nomes de lugar presentes no rueiro urbano que teñen como única forma legal a galega; ?oportunidades que non terían un custo económico engadido e que servirían para reingresar A Coruña na legalidade lingüística?, considera o colectivo.

Hai unhas semanas o grupo local da Mesa denunciaba que a Concellaría de Mobilidade e Transporte ignoraba a toponimia e microtoponimia propia da cidade na nova sinaléctica das paradas dos autobuses, mesmo ignorando o traballo previo realizado desde o Servizo de normalización lingüística municipal. Nesta ocasión, A Mesa lamenta que o Concello non aproveitase o cambio de numeración da Estrada dos Baños de Arteixo aprobada pola Xunta de Goberno Local o pasado mes de xullo para restaurar, a través desa resolución, o correcto topónimo galego. No canto diso, o Concello da Coruña parece optar por conservar a denominación franquista de ?Carretera de los Baños de Arteijo*.

A Mesa, que salienta o feito de nesta vía estaren situadas algunhas das máis importantes empresas asentadas na cidade, entre elas o novo centro comercial Marineda ou IKEA, lamenta ?o profundo desinterese? do Concello a respecto dos seus propios compromisos e pídelle a Javier Losada ?que non sexa preguiceiro? e que ?cumpra coa palabra dada?.
Categoría: Xeral - Publicado o 01-04-2011 20:30
# Ligazón permanente a este artigo
A Mesa estará presente no Achegarte 2011 a vindeira fin de semana
A Mesa contará cun stand informativo no espazo reservado para as entidades culturais do Achegarte 2011, que se desenvolverá no recinto do Palexco da Coruña durante esta vindeira fin de semana, o sábado 2 e o domingo 3 de abril.

A través deste posto, que se manterá aberto no mesmo horario xeral do Achegarte, A Mesa achegará a través de distintos materiais e soportes ás persoas asistentes o traballo que realiza ao longo de todo o ano para defender os dereitos lingüísticos en Galiza e incorporar o galego a diferentes ámbitos da sociedade.

Como sempre, aproveitaremos tamén o stand da Mesa para pór ao dispor de todo o público que nos visitar os diferentes materiais da Tenda da Mesa: http://www.amesanl.org/tenda/index.html
A venda destes materiais é un dos principais instrumentos de autofinanciamento con que conta a asociación, fundamental para podermos desenvolver moitas das nosas iniciativas.

Dentro da atractiva e completa oferta que achega o Achegarte 2011, queremos pór en destaque os diferentes foros abertos de reflexión e debate que se organizan para a presente edición, para os que xa se poden ir facendo achegas a través da rede. Un deses foros ten directamente a ver coa situación actual da nosa lingua: http://lingua.achegarte.org/
Foro de Lingua Achegarte 2011
Páxina principal do Achegarte
Categoría: Xeral - Publicado o 27-03-2011 20:15
# Ligazón permanente a este artigo
A Mesa critica que o Concello non teña en conta o galego na nova sinalización das paradas do transporte urbano
A asociación constata tamén que se seguen deturpando nomes tradicionais da xeografía coruñesa ?como nos mellores tempos do franquismo?

?Tan ilegal é empregar La Coruña como Las Jubias ou La Zapateira?


O grupo local da Mesa pola Normalización Lingüística na Coruña lamenta profundamente que o Concello ?desaproveite a oportunidade? de introducir o galego nas novas sinalizacións do transporte urbano que se están a instalar en diferentes puntos da cidade, así como de ?pór en valor e recuperar as denominacións oficiais? de diferentes zonas e barrios.

A Mesa da Coruña xa sinalou en diferentes ocasións que o ámbito do transporte público municipal é, dos moitos exemplos posíbeis, ?un territorio cen por cen desgaleguizado?, ao igual que a estación de autobuses, cuxa xestión é tamén competencia municipal.

A entidade cidadá en defensa do galego, que conta na cidade da Coruña cunha das delegacións máis numerosas de todo o país, ten proposto ?para avanzar na incorporación do uso do galego no ámbito do transporte público? aproveitar as sucesivas renovacións de elementos visuais e informativos, tanto no interior dos vehículos como nas paradas, para incoporporar o galego ?de xeito progresivo?. ?Unhas propostas que nin a Compañía de Tranvías nin a Concellaría de Transporte e Mobilidade quixeron nunca recoller?, lamenta a asociación.

Ao comprobar ?a nova oportunidade perdida? polo Concello coa instalación destes novos equipamentos nos últimos días, A Mesa contactou cos responsábeis do Servizo municipal de Normalización Lingüística para pór no seu coñecemento esta situación. Dito servizo confirmoulle á asociación que, por propia iniciativa, ofrecera o seu asesoramento á Concellaría de Transporte e Mobilidade e preparara unha relación completa das denominacións das paradas de todas as liñas que cobre a Compañía de Tranvías adaptadas á legalidade vixente, que como é sabido indica que os topónimos e microtopónimos de Galiza terán como única denominación oficial a galega. Tal relación foille enviada ao departamento que dirixe Eudoxia Neira de acordo cos prazos indicados.

Malia este traballo desenvolvido polo Servizo de Normalización Lingüística do Concello, A Mesa vén de constatar como na rotulaxe dos novos indicadores colocados estes días en varias paradas de diferentes liñas e en diferentes zonas da cidade os nomes de lugares e barrios con denominacións oficiais en galego ?seguen a aparecer castrapizados, como nos mellores tempos do franquismo?. A entidade cívica en defensa da lingua recórdalle ao Concello que, segundo as leis vixentes, ?tan ilegal é usar *La Coruña como *Las Jubias, *La Zapateira ou *Las Lagoas?; ?exemplos de castrapo? que para A Mesa ?non teñen sentido nin cabida na Coruña do século XXI?.


A Mesa
Categoría: Xeral - Publicado o 26-02-2011 20:44
# Ligazón permanente a este artigo
Exposición sobre toponimia galega deturpada na Casa Casares da Coruña até o 31 de decembro
Pódese visitar estes días, até o vindeiro día 31 deste mes, a exposición TOPONIMIA GALEGA CASTELANIZADA na Casa Museo Casares Quiroga da Coruña (Rúa das Padeiras, 12). O horario de visitas da Casa é de terzas feiras a sábados, de 10.30 a 14 horas e de 17.30 a 20 horas, e os domingos e feriados de 10.30 a 14 horas.

A exposición, organizada pola Concellaría de Mocidade, Solidariedade e Normalización Lingüística do Concello da Coruña, é obra dun traballo colectivo ideado e desenvolvido polo profesorado e alumnado do Equipo de Normalización Lingüística do IES Rafael Puga Ramón. A través de varias ducias de imaxes e textos achégasenos unha realidade lamentabelmente frecuente: a da nosa toponimia propia e oficial burdamente deturpada e barbarizada que aínda persiste (ou mesmo aparece nova) en múltiplos espazos públicos, coa indolencia, complicidade ou mesmo o impulso, segundo os casos, das administracións públicas.

Parabenizamos ao ENL do Puga Ramón por esta súa brillante e útil iniciativa (que se complementa, ademais, cunha unidade didáctica coa que se pode traballar en Secundaria) ao tempo que temos que recordar (e denunciar) que A Coruña segue a ser con amplísima diferenza, malia os innegábeis avances dos últimos anos, a capital galega da toponimia deturpada: non só no que atinxe ao nome da cidade e do municipio, senón no referido á nosa microtoponimia tradicional, denominacións de rúas, lugares e barrios, etc. É unha batalla polo dereito á restitución da propia existencia que non podemos renunciar a dar.
Servizo de Normalización Lingüística do Concello da Coruña
Categoría: Xeral - Publicado o 16-12-2010 14:31
# Ligazón permanente a este artigo
A Mesa inicia unha colaboración estábel no espazo Recendo de CUAC FM
O grupo comarcal da Mesa da Coruña vén de iniciar unha colaboración estábel co programa radiofónico Recendo, unha iniciativa da Agrupación Cultural Alexandre Bóveda que se emite todas as terzas feiras (martes) de 19 a 20 horas a través da radio comunitaria CUAC FM, sintonizábel en toda a área coruñesa no 103.4 da FM.

A colaboración da Mesa no programa de contidos culturais, lúdicos e de actualidade social materialízase nunha sección de cinco minutos de duración intitulada O Bico da Lingua, a través da cal se reflexiona sobre un tema de actualidade relacionado coa nosa lingua propia.

Aínda que inicialmente é Fran Rei, vicepresidente da Mesa e responsábel da mesma na Coruña, quen se encarga do desenvolvemento desta nova experiencia radiofónica, ábrese ao conxunto das asociadas e asociados a posibilidade de proporen contidos concretos sobre os cales falar ou mesmo encargárense das locucións, ben de xeito habitual ben nalgún caso concreto.

Podedes escoitar os podcast de Recendo a través da ligazón: http://recendo.podcast.es/podcast.php?editor=recendo
Podscast de Recendo
Categoría: Xeral - Publicado o 16-12-2010 14:19
# Ligazón permanente a este artigo
Carlos Callón presenta en Oleiros o seu libro "En castellano no hay problema"
Convidado desta volta pola Asociación Sociocultural Vieiros, o presidente da Mesa e portavoz da Plataforma Cidadá Queremos Galego, Carlos Callón, presenta en Oleiros o último libro que vén de dar ao prelo: "En castellano no hay problema".

O acto de presentación, que será conducido polo presidente de Vieiros, Antón Reixa, será esta cuarta feira (mércores) 17 de novembro ás 8 do serán no auditorio das Torres do Porto de Santa Cruz (Liáns).

Desde A Mesa animamos a todas as veciñas e veciños de Oleiros comprometidos coa defensa da nosa lingua milenaria, que sabemos que son moitas e moitos, a un acto no que teremos a oportunidade de compartir ideas, visións e alternativas sobre a complexa situación (socio)lingüística que estamos a vivir e sobre a política que, en consecuencia, esta nosa terra e este noso idioma precisan, aquí e agora.
Categoría: Xeral - Publicado o 16-11-2010 18:57
# Ligazón permanente a este artigo
Preséntase na Coruña o libro Estudos xurídicos sobre o Decreto para o plurilingüismo
A Agrupación Cultural Alexandre Bóveda da Coruña infórmanos que esta quinta feira (xoves) 21 de outubro terá lugar a presentación do traballo, de autoría conxunta, Estudos xurídicos sobre o Decreto para o plurilingüismo, editado en Laiovento.

No acto, que terá lugar ás 20.30 no salón de actos da agrupación (Rúa dos Olmos, 16-18, 1º), intervirán dous dos seus coautores: o xuíz Luís Villares (quen é ademais coordinador da obra) e o catedrático de dereito administrativo e actual Secretario Xeral da Universidade da Coruña Carlos Amoedo Souto. Intervirá tamén Francisco Pillado como responsábel da editora.

No traballo, tirado do prelo este pasado verán (isto é, apenas un mes e medio despois da aprobación e publicación no DOG do mal chamado Decreto para o plurilingüismo), participaron tamén outros expertos xuristas de diferentes ámbitos profesionais da Xustiza e do Dereito en Galiza, tal como a profesora da USC Alba Nogueira, os avogados Héctor López de Castro e Blanca Roura ou a xuíza Dalila Dopazo, entroutros.

Estudos xurídicos sobre o Decreto para o plurilingüismo é unha análise do punto de vista legal sobre a norma lingüística aprobada polo executivo de Núñez Feijóo. Maxistrados, avogados e profesores universitarios especializados en diversos campos reflexionan sobre o decreto e poñen de manifesto as ?aberracións? e ?falacias? legais do citado documento.
Categoría: Xeral - Publicado o 20-10-2010 12:35
# Ligazón permanente a este artigo
Fanse 90 anos da primeira intervención oficial en galego no pleno dun concello: foi no da Coruña, da man de Lois Peña Novo
Cartaz homenaxe a Lois Peña Novo
A Concellaría de Mocidade, Solidariedade e Normalización Lingüística do Concello da Coruña e a Agrupación Cultural Alexandre Bóveda, coa colaboración da Academia, organizan para a vindeira cuarta feira (xoves) 7 de xullo unha xornada dedicada a Lois Peña Novo, concelleiro coruñés que tivo, entre outros, o mérito de ser o primeiro edil galego en intervir na lingua do país no pleno dun concello.

Non se sabe se pode haber exemplos anteriores, mais o de Peña Novo é o primeiro caso documentado que nos consta e, grazas a el, o da Coruña o primeiro concello de Galiza en que -o que é a historia! -o galego foi empregado de maneira oficial, en 1920. Lois Peña era membro destacado da Irmandade de Amigos da Fala da Coruña.

O primeiro acto de conmemoración desta efeméride vai consistir na colocación dunha placa, promovida pola Agrupación Cultural Alexandre Bóveda, na rúa que leva o nome do noso ilustre concelleiro galeguista o 7 de xullo ás seis da tarde. Esta, desgrazadamente, non estará emprazada en Monte Alto, distrito polo que no seu día foi electo representante Peña Novo, senón no Martinete (por tras O Birloque, fronte ao tanatorio).

Xa ao día seguinte, 8 de xullo, ás 20h, o salón de actos da Agrupación Cultural Alexandre Bóveda (Rúa dos Olmos, 16-18, 1º)acollerá unha conferencia de Manuel Roca Cendán, experto na figura de Peña Novo, so o título: "Lois Peña Novo, noventa aniversario da utilización da lingua galega oficialmente no Concello da Coruña".

A lembranza deste feito histórico para a presenza pública do noso idioma é unha oportunidade de ouro para reflexionarmos sobre a situación na que se atopa, 90 anos após a intervención institucional de Lois Peña Novo, a lingua galega na vida institucional e administrativa do noso concello e o uso real que dela se fai, fóra de anécdotas, casos illados ou exemplos meritorios.
páxina SNL do Concello da Coruña
Categoría: Xeral - Publicado o 01-07-2010 19:11
# Ligazón permanente a este artigo
O 29 de xuño preséntase na Coruña "En castellano no hay problema", de Carlos Callón
Esta vindeira terza feira, 29 de xuño, preséntase na cidade da Coruña o último traballo do Presidente da Mesa, Carlos Callón: En castellano no hay problema. Unha escolla chea de ironía que procura chamar á reflexión colectiva do conxunto da sociedade galega sobre a situación real da lingua de noso.

Na presentación, que terá lugar ás 8 do serán na Casa Museo Casares Quiroga (Rúa das Panadeiras ou das Padeiras, a carón do Campo da Leña), acompañarán ao autor do libro Iria Taibo, Secretaria Xeral da Mesa; o escritor e académico Manuel Rivas; e Manuel Bragado, director de Xerais, editora do libro.

En castellano no hay problema naceu concibido, en palabras de Carlos Callón, como un libro para o combate cívico, coa palabra e desde a palabra, en favor do galego, nun momento no que se multiplican os ataques e agresións -moitos deles, nunca vistos antes- e a todas e todos nos cómpren respostas e argumentos.
O blogue de Carlos Callón
Categoría: Xeral - Publicado o 23-06-2010 13:56
# Ligazón permanente a este artigo
Xa á venda as entradas para o macrofestival de Queremos Galego
Xa están dispoñíbeis para a súa compra as entradas para o macrofestival musical de Queremos Galego que, so o nome "Música contra o decretazo", reunirá o vindeiro sábado 17 de abril no Recinto feiral de Pontevedra o mellor do noso panorama musical actual nun cartaz pensado para xuntar un público heteroxéneo na idade, nos gustos musicais e nas procedencias.

A Plataforma cidadá, con esta súa arriscada aposta, pon inicialmente 5.000 entradas á venda (1.000 máis se as primeiras se esgotaren)para un evento que tenciona ser histórico na súa calidade e dimensións artísticas, técnicas e organizativas así como no obxectivo central: demostrar que a cultura galega non está nin ensimesmada nin acomplexada. Antes ao contrario, está máis viva e comprometida que nunca e reaxe unida fronte a quen a cuestiona.

Tino Baz, Roi Casal, Uxía, A Quenlla, Fuxan os Ventos, Berrogüetto, Luar na Lubre, Os Carunchos, Ruxe Ruxe, Espido, Os Tres Trebóns, Lamatumbá ou Galegoz son só algúns dos nomes de grupos, artistas e proxectos que quixeron colaborar desinterasadamente con Queremos Galego para esta causa colectiva.

Na comarca da Coruña podedes adquirir as entradas, ao prezo de 10? (este será de 12 o propio día do concerto, na entrada do recinto), nos seguintes lugares:

Na Coruña: en Nicetrip, Libraría Sisargas, Libraría Couceiro, A Cova Céltica, O Tabuleiro, BNG, CIG, A Repichoca, Patachim, A Casa da Moura, O Alfaiate e Agrupación Cultural Alexandre Bóveda.

En Betanzos: na Adega O Barral (xunto aos institutos) e no Picho Carolo (nas Calexas).

En Arteixo: a través da AC Monte da Estrela (acmontedaestrela@gmail.com)

En Carral: a través da Agrupación Cultural Cultura Aberta

En Oleiros: na cafetaría Melide (xunto ao Centro de Saúde de Perillo)

En breve, haberá puntos de venda en Sada, Cambre e Culleredo
Categoría: Xeral - Publicado o 29-03-2010 20:56
# Ligazón permanente a este artigo
[1] 2 [3]
© by Abertal

Warning: Unknown: Your script possibly relies on a session side-effect which existed until PHP 4.2.3. Please be advised that the session extension does not consider global variables as a source of data, unless register_globals is enabled. You can disable this functionality and this warning by setting session.bug_compat_42 or session.bug_compat_warn to off, respectively in Unknown on line 0