| Blog do EDLg do Colexio Plurilingüe Divina Pastora Franciscanas de Ourense |
|
| O meu perfil |
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
| «Thriller», a Biblia da música pop, cumpre trinta anos |
|
.jpg)
O álbum de Michael Jackson segue sendo o máis vendido de todos os tempos con 65 millóns de copias distribuídas en todo o mundo
«Unha fastuosa produción que revolucionou a industria da música». Así reza a declaración da Biblioteca do Congreso sobre o videoclip de Thriller , incorporado ao Rexistro Nacional do Cine de Estados Unidos o 30 de decembro do 2009, entronizando definitivamente ao tema que daba título ao álbum do que hoxe, cando se cumpren trinta anos do seu lanzamento, segue sendo o disco máis vendido de todos os tempos cuns 65 millóns de copias distribuídas en todo o mundo e que cambiou para sempre o modus operandi das discográficas. Alí, xunto a filmes como Todos os homes do presidente, Primeira plana ou O Imperio contrataca, repousa unha copia deste tesouro que encumbró a Michael Jackson ao olimpo dos deuses musicais, onde apenas os Beatles ou Elvis Presley poden tratarlle como a un igual.
O máis coñecido dos Jackson Five viña de cultivar un éxito comercial co seu anterior traballo, Off the Wall (1979), aínda que saíra escaldado en canto á recepción de parte da crítica. O artista de Gary (Indiana) sentíase infravalorado pola cor da súa pel e só na cúspide. Necesitaba desmontar estereotipos e alumar un disco que lle asentase para sempre entre os grandes.
Para iso recorreu ao produtor Quincy Jones, quen botou a casa pola fiestra, pondo 750.000 dólares ao servizo de Jackson. Os dous bosquexaron os nove temas que configurarían o álbum, cribados da trintena que manexaron, e graváronos entre os meses de abril a novembro de 1982 nos estudos Westlake de Los Ángeles. Pero o ambicioso do proxecto fixo madeixa en ambos. Ningún estaba satisfeito do resultado final. Para o executivo, 'Billie Jean' era mediocre e non merecía ser incluída no track list. A estrela non estaba de acordo e negouse a recortar a extensa introdución do tema. O mercado permanecía alicaído e as perspectivas en canto a vendas eran sombrías. O intérprete non quería nin oílo e ameazou con cancelar o lanzamento. Puxera toda a súa alma no proxecto, escribindo catro das cancións -The Girl is Mine, xunto a Paul McCartney, Beat it, Billie Jean e Wanna Be Startin' Somethin- e non concibía a posibilidade de que se malograsen as súas esperanzas.
O 1 de decembro de 1982 chegaba por fin ao mercadoThriller. A recepción foi apoteósica. En apenas unha semana vendéronse un millón de copias. A crítica rendeuse ao talento de Jackson, aínda que non todo foron eloxios. Boa parte das obxeccións levoullas The Girl is Mine, o primeiro single do álbum, que foi tachado de brando, pero tamén o tema que daba título ao disco, escrito por Rod Temperton e vilipendiado pola revista Rolling Stone por mor da súa temática escura e o que describía como unha inaceptable desorde da parte final, recitada polo actor Vincent Price. Billie Jean, en cambio, foi acollida extraordinariamente e a mesma revista que deostaraThriller terminaríaa incluíndo entre as mellores da historia. Baseada na experiencia persoal do cantante cunha acosadora, entrou na lenda cando o 25 de marzo de 1983, nun programa especial para render tributo á Motown, Jackson executou por primeira vez o 'moonwalk', o paso de baile que se convertería nun dos seus selos distintivos. Tamén se rendeu pleitesía a Human Nature e o seu «refrán irresistible», tal e como o cualificou The New York Times, e a Beat It, merecedora coa súa mensaxe en favor da non violencia de dúas dos oito premios Grammy, incluíndo o de Álbum do Ano, que acreditarían a revolución que supuxera Thriller. O disco cultivaría tamén oito American Music Awards e tres MTV Vídeo Music Awards, permanecendo durante 37 semanas no máis alto da lista Billboard e ingresando en 1984 no Libro Guinness das Marcas como o máis exitoso de todos os tempos.
O álbum cambiou tamén para sempre o concepto dos vídeos musicais. A estrea, o 2 de decembro de 1983, do videoclip de Thriller , sacudiu a industria. Dirixido por John Landis, e cun orzamento de medio millón de dólares, era máis ben unha curtametraxe que parodiaba o xénero de terror e que implicou a centenares de extras. Sacado adiante a pesar das reticencias de Sony, acabou converténdose nun dos grandes emblemas da cultura pop e no máis visto da historia. Ademais, e poida que este fose o seu maior logro, contribuíu a derrubar as barreiras raciais que aínda predominaban nos programas musicais da época.
Hoxe, trinta anos despois do seu lanzamento, resulta imposible minimizar a importancia de Thriller na historia da música. Como no seu día ocorrese co Sgt. Pepper dos Beatles, o Pet Sounds dos Beach Boys ou o Highway 61 Revisited de Bob Dylan, cambiou os parámetros que rexían a industria e, como eses discos, segue sendo fonte de inspiración para artistas dos máis variados rexistros. Michael Jackson dirixiu ao mundo cara a unha nova fronteira e a súa particular Biblia erixiuse nun dos textos fundamentais para comprender a cultura pop. Encomiado sexa por iso este deus que nos deixou hai máis de tres anos.
Nuria Salgado López
2º Bacharelato B
|
|
|
|
|
|
|
|
|
|
