A idea de reactivar a Cidade dos Raparigos leva anos sendo un dos obxectivos prioritarios
da Asociación Cultural Pai Silva. A principios do 2019, coa inauguración do museo do circo,
situado na rúa Bailén, poñíase en marcha un proxecto de recuperación da historia da
formación que pretendía evolucionar ata converterse nunha segunda vida para a escola.
Aínda non foi posible poñelo en marcha de forma oficial pero o equilibrista Mustafá
Danguir está a traballar para conseguilo canto antes. El formou parte do Circo dos
Raparigos desde 1990 e unha vez que a formación artística ourensá desapareceu,
continuou a súa carreira en distintos puntos do planeta. Conseguiu premios de
recoñecemento mundial como o Guinness por percorrer en moto sobre un cable de arame
unha distancia de 1,5 quilómetros a 150 metros de altura. A súa especialidade é pasar dun
rañaceos a outro cruzando sobre unha pequena corda de metal.
A última vez que o fixo foi no 2019 en Chile. Desde o mes de xuño, Danguir realiza
demostracións en Benposta xunto a outra vintena de artistas que viven na antiga Cidade
dos Raparigos. «Atópome en débeda co pai Silva por confiar en min cando era un neno e
con esta cidade por ser o lugar onde naceu todo», explica este funambulista marroquí.
Quere conseguir encarrilar unha escola profesional circense e, para iso, devolveu o circo a
Ourense. «Facemos pequenas mostras do noso traballo, cada un na súa especialidade.
Con iso conseguimos un espectáculo orixinal e entretido de case unha hora de duración. É
a forma que se nos ocorreu para recadar diñeiro para poder levar a cabo o soño de
recuperar a Benposta que nós vivimos hai moitos anos e que merece Ourense», afirma.