A oposición veciñal en Sarria ao proxecto de canalización do río ten un custo, un prezo que lle pon a Subdelegación do goberno español en forma de multas a 34 activistas por un importe de case 17.000 euros. A colaboración de amizades, familias e veciñanza fixo que xa se pagasen 8.000 euros a comezos deste ano. O resto dos cartos terán que pagalos de contado para evitar o risco de embargos de bens e contas. Por iso activouse unha campaña de solidariedade no marco da cal se abririon 2 contas bancarias.

En 2014 a Plataforma Sarriana en defensa do río foi quen de mobilizar a veciñanza contra un proxecto, o da Confederación hidrográfica Miño-Sil, que procuraba unha canalización do río que afectaba gravemente patrimonio local e importantes zonas ambientais. Mediante a mobilización, conseguiuse salvar gran parte das 180 árbores do Malecón que ían ser taladas, así como o illote fluvial do Toleiro e importantes elementos dunha das pontes.

Os membros do colectivo ven nestas sancións unha forma máis de represión e defenden que o único que fixeron foi protexer de forma pacífica o patrimonio natural e histórico de Sarria.