Blog do escritor
Xesús Constela

www.xesusconstela.com

info@xesusconstela.com
 CATEGORÍAS
 CUARTO DOS TRASTES
 SALA PARA VISITAS
 SALA DAS PROCURAS
 SALA DOS BLOGS GALEGOS
 NO FAIADO
 ANTERIORES

Do día das Letras
Por un Día das Letras non festivo
Por un Día das Letras de librarías abertas
Por un Día das Letras con libros na rúa
Por un Día das Letras dedicado aos autores vivos...

Achégovos o artigo que publiquei en Sermos Galiza hai dezanove días:

Vaia por diante que non me gusta que se celebre un Día das Letras Galegas, e moito menos que a xornada sexa festiva. Non me gusta nada.

Non me gusta que os xornais que ao longo do ano levan todo o seu contido en castelán ese día publiquen as portadas en galego coma unha concesión á cultura de nós. Paréceme unha tomadura de pelo!

Non me gusta que se conmemore a morte de alguén falecido como mínimo dez anos antes porque odio esa cultura funeraria. E ódioa porque son partidario das homenaxes para as persoas vivas, especialmente para todas esas persoas que con vida tecen nas mans poemas, novelas, obras de teatro, ensaios tamén abraiantemente cheos de vida.

Como pode ser que neste país de nós non exista un gran premio nacional de literatura para todas esas persoas que consagran a vida enteira a nos facer gozar do seu traballo de calidade inmensa? E non falo dun recoñecemento honorífico (que está moi ben) senón dun galardón dotado cunha boa cantidade de cartos que sirvan para expresar o agradecemento do pobo todo ao labor de poetas, narradores, ensaístas, dramaturgos, literatos en fin, que con eorme dignidade van deixar a súa pegada na nosa historia común?

Non me gusta o Día das Letras Galegas. Nin o nome me gusta.

E aínda me gusta menos que se declare festivo porque iso supón que para a meirande parte da poboación acabe convertida nun día de sol e praia.

Sinto unha tremenda envexa desas rúas da cidade de Barcelona ateigadas de xente a comprar libros o vinte e tres de abril na Diada de Sant Jordi (O ano pasado arredor de millón e medio de exemplares!). E sinto unha envexa que é directamente proporcional á mágoa que me dá ver as librarías de nós todas pechadas nese maldito Dia das Letras Galegas festivo!

Nada. Non me gusta nada!
Comentarios (2) - Categoría: Da lingua de nós - Publicado o 17-05-2013 13:22
# Ligazón permanente a este artigo
Polo dereito a sermos escritoræs en lingua galega
Pronunciamento da Asociación de Escritoras e Escritores en Lingua Galega (AELG) ante das eleccións ao Parlamento.-

A Asociación de Escritoras e Escritores en Lingua Galega quere facer pública a súa demanda de implicación dos partidos e organizacións políticas que concorren a estas eleccións co obxecto de incluíren nos seus programas de goberno a defensa activa e efectiva dun sistema literario galego e en galego.

Demandamos, dos partidos e organizacións políticas que presentan candidaturas ao Parlamento, que inclúan nos seus programas as xustas reivindicacións do colectivo de escritoras e escritores en lingua galega no referente á irrenunciábel defensa e promoción da lingua e da cultura propias de Galiza en todos os ámbitos de actuación e responsabilidade gobernativa.

A literatura, e o idioma que a expresa, debe ser comprendida como un factor de desenvolvemento sociocultural favorecedor do autocoñecemento como corresponde a Galiza, nación cunha das máis antigas culturas de Europa.

Concibimos a literatura e a lingua galega como creadoras de cidadanía con valores democráticos, como depositarias e defensoras da nosa identidade como pobo, como instrumentos necesarios e irrenunciábeis para conseguirmos maiores espazos de decisión propios, que permitan o desenvolvemento cultural e social en función unicamente dos intereses do pobo galego e que doten a Galiza dun maior status político e xurídico, único xeito de non sermos varridos polo mal vento da globalización, que pretende unha homoxeneización e uniformización dos valores culturais e lingüísticos dos pobos a conta de amolecer e engulir toda diversidade cultural e plural.

Entendemos que a literatura e a lingua consolidan os dereitos dos pobos e son a vacina protectora para a consecución dunha democracia coa suficiente calidade e eficacia como para que mereza ser así chamada, que nos converte en individuos dun pobo cunha cultura e un idioma senlleiros.

Defendémolo nun momento en que, de continuar a asfixia económica programada que está a padecer o tecido cultural da Galiza e tamén as industrias culturais, pode levar á súa invisibilización e, na práctica, á súa ilegalización social.

É por isto que demandamos dotación económica, verdadeiramente comprometida e en clave de aposta de futuro, nos orzamentos da administración galega, posto que a cultura tamén forma parte da economía produtiva do noso país. Asemade, requirimos da administración galega instrumentos de xestión para o achegamento da literatura e polo tanto tamén dos escritores e escritoras á sociedade galega e de xeito transversal, sexa a través do ensino do galego e en galego, así como da visibilización da literatura en galego, desde as actividades de goberno como son o turismo cultural, ou os servizos sociais, até aquelas actividades dirixidas á formación dunha xuventude crítica e educada para o respecto, a paz e a solidariedade.

Como primeiras medidas do novo goberno, solicitamos:

1. Reposición da desaparecida Consellaría de Cultura.
2. Creación dunha Dirección xeral do libro.
3. Creación dun Instituto de promoción da cultura galega no exterior.
4. Participación das escritoras e escritores galegos e od sistema editorial que difunde e amplifica a súa creación nas feiras e mercados internacionais.
5. Apoio ao teatro galego.
6. Promoción para a recuperación da memoria histórica da literatura oral.
7. Recuperación e posta en valor dos Premios Nacionais da Cultura Galega.
8. Elaboración dun plan da lectura.
9. Apoio efectivo aos medios de comunicación en galego.
10. Elaboración dun plan director da cultura galega, e en concreto do libro en galego, que desenvolva a lei do libro na súa condición de industria estratéxica.
11. Restitución do uso do galego no ensino de todas as áreas de coñecemento técnico ou científico (Matemáticas, Física e Química e Tecnoloxía), dada a importancia da escrita e da creación científica no desenvolvemento dunha cultura plena.
12. Expropiación da Igrexa de Bonaval e acceso libre ao espazo público e laico que para as galegas e galegos debe ser o Panteón de Galegos Ilustres.

Así mesmo, trasladamos á cidadanía a nosa preocupación polo progresivo deterioro tanto do prestixio social como do uso oral e escrito da nosa lingua, polo que lles rogamos que, á hora de decidiren a opción política que a vai representar durante os próximos catro anos, preste especial atención ás propostas e intencións ao respecto expresadas nos seus programas electorais.

O Consello Directivo da AELG
11 de outubro de 2012
Comentarios (2) - Categoría: Da lingua de nós - Publicado o 11-10-2012 18:51
# Ligazón permanente a este artigo
Comunicado da AELG pola dimisión do Valedor do Pobo
Achégovos un comunidado da Asociación de Escritores en Lingua Galega no que se pide a dimisión do Valedor do Pobo.

Subscribo todas e cada unha das súas palabras:

(A Coruña, 12 de decembro de 2011) A Asociación de Escritoras e Escritores en Lingua Galega (AELG) recibe con profundo malestar a información que algúns medios de comunicación ofrecen no día de hoxe á cidadanía, a respecto de o Valedor do Pobo terse dirixido á Consellaría de Educación e Ordenación Universitaria para que se retire ‑do mercado e das aulas nas que está en activo‑ un libro de texto de Coñecemento do Medio, en Educación Primaria, por recoller de xeito literal o disposto a respecto da lingua galega polo Estatuto de Autonomía no seu artigo 5.1., «A lingua propia de Galicia é o galego»; petición acollida, de xeito inmediato, por parte da propia Consellería de Educación, indicando que instará á editorial a «que corrixa con carácter definitivo» as próximas edicións da obra e advertíndo de que «En caso contrario teriamos que adoptar as decisións oportunas por parte da Administración educativa.»

Esta negación e deslexitimación da redacción do propio Estatuto de Autonomía é considerada pola AELG como unha gravísima actuación que ataca o principal soporte legal protector da nosa lingua (a súa consideración como propia e oficial), promovida como un ataque manipulador contra o principal trazo identificador do que somos e representamos no actual marco plurilingüe e pluricultural do Estado español.

A AELG quere deixar constancia pública da súa valoración como absolutamente inadmisíbel deste feito, un ataque máis á nosa lingua que nunca debeu terse producido, máxime tendo en conta que procede daquelas autoridades e organismos que deberan centrar a súa preocupación e esforzo en cumprir cos principais mandatos legais a este respecto: a súa protección real e promoción desprexuizada.

Desde a AELG, agardamos unha rectificación inmediata por parte do Valedor do Pobo, así como a súa dimisión, pois en reiteradas ocasións ten manifestado o incumprimento das súas funcións a respecto da defensa do galego como lingua normalizada.
Comentarios (2) - Categoría: Da lingua de nós - Publicado o 12-12-2011 20:52
# Ligazón permanente a este artigo
Da desaparición de Galicia Hoxe.

Só quero informar da máis que lamentábel desaparición da edición impresa do xornal Galicia Hoxe.

Na súa páxina web dise:
A crise económica e o radical recorte das axudas institucionais converten en inviable o proxecto do único diario en galego // Herdeiro de O Correo Galego, publicouse por primeira vez o 17 de maio de 2003 // Dezanove profesionais, entre periodistas e filólogos, quedan sen traballo // O Grupo Correo Gallego manterá o espírito do xornal na rede dende www.galiciahoxe.com

Vaia dende aquí a miña solidariedade cos empregados que quedan no paro!

Dende a chegada ao poder do presidentiño Núñez Feijoo xa desapareceron as edicións impresas de tres medios escritos integramente na nosa lingua: A Nosa Terra, A peneira e agora Galicia Hoxe.

(Entrementres outros xornais en castelán receben moreas de cartos (de todos nós) en subvencións públicas. Será para pagar favores electorais? Ti fala ben de min e eu págoche o que faga falla)

Un motivo máis para a indignación!
Comentarios (4) - Categoría: Da lingua de nós - Publicado o 29-06-2011 13:51
# Ligazón permanente a este artigo
A lingua esta que nos define
A lingua esta que nos define coma un ADN primixenio e imposíbel de ocultar é a que nos serve para cociñar as máis fermosas frases que dicimos nas conversas, unhas veces sinxelas e outras arrevesadas, labirínticas

A lingua esta que nos define é a que nos serve para tecer frases de amor que nos serven para sorprender as nosas parellas (e para nos deixar abraiar tamén)

A lingua esta que nos define é a que nos serve para admirar o sol que nos quenta na praia cando é verán, porque cando é inverno usámola para nos queixar das chuvias e os temporais.

É a que nos serve para pedir auxilio

E tamén para socorrer os amigos

E alcumar os inimigos, como non?

A que nos serve para tirarmos diñeiro do caixeiro automático... e para gastármolo no centro comercial.

A que sacamos do peto nos momentos de dúbida e vacilación coma que tira un pano co que limpar o pó dunha ferida

A que lanzamos ao ar coma un aturuxo festeiro

A que soltamos coma unha bágos furtiva de impotencia

(e coma un arrouto de enchente)

(e coma unha risada tola de borracheira)

Esta lingua que nos define é unha marca na pel que non vai desaparecer por moito que se esfregue

unha mensaxe impresa en nós

imborrábel mesmo con agresivas cirurxías estéticas

Esta lingua que nos define é o ulido ancestral que levamos no corpo logo de moitos séculos agachados nas cavernas coma as feras

Esta lingua que nos define

transmitirase aos nosos descendentes agachada nese código xenético que herdamos sen nin sequera pretendelo


(En Poio, a 17 de maio de 2011, Día das Letras dedicado ao gran Lois Pereiro)

NOTA: E nunca cansarei de reivindicar que a festa de hoxe pase a ser de novo día laboral e enchamos as rúas de libros e as librarías de xente.






Comentarios (2) - Categoría: Da lingua de nós - Publicado o 17-05-2011 12:51
# Ligazón permanente a este artigo
Da lingua (minoritaria?) de nós
Achégovos un video para facerdes interesantes reflexións.

Somos realmente unha lingiua minoritaria?

Comentarios (1) - Categoría: Da lingua de nós - Publicado o 12-05-2011 11:52
# Ligazón permanente a este artigo
De Xurxo Borrazás: A lingua preferida
Unha vez máis o meu amigo Xurxo Borrazás volveu sorprenderme.

Achégovos o manifesto que leu na Festa da Lingua, que tivo lugar en Carballo o pasado sete de maio.

Non queremos unha lingua excelsa, preferímola vulgar. Tampouco a queremos celebrada, preferímola falada. Non a queremos amábel, preferímola impertinente. Non queremos unha lingua fermosa, preferímola útil.
Non queremos unha lingua de escritores, preferímola de mecánicos, de taberneiros, tendeiros, médicos, xuíces e mariscadoras, de xornalistas, de músicos, de albaneis, de travestís, de futbolistas, taxistas e labradores. Non queremos unha lingua de mestres, querémola de estudantes. Non queremos unha lingua baixo os focos, preferímola transparente. Non queremos unha lingua con historia, preferímola con futuro. Non queremos unha lingua ritual, nin virtual nin ideal, preferímola real. Non queremos unha lingua doce, azucrada, na que todo soe ben, preferímola salgada. Non queremos unha lingua de letras, preferímola de ciencias. Non queremos unha lingua de espíritos, preferímola de corpos. Non queremos unha lingua de erotismo, preferímola de sexo. Non queremos unha lingua de xardín francés, preferímola de bosque. Non queremos unha lingua folk, preferímola punk. Non queremos unha lingua limpa, preferímola sucia, chapuzando en todas as pozas. Non queremos unha lingua doméstica, preferímola fóra. A ver esa lingua! Non queremos unha lingua sentada, preferímola a bailar. Non queremos unha lingua de pau, preferímola eléctrica. Non queremos media lingua, preferímola enteira. Non queremos unha lingua nosa, querémola de todos. Non a queremos de confidencias, preferímola de aturuxos. Non a queremos de domingo, preferímola de diario. Non a queremos recibir, querémola dar. Non a queremos discreta e virtuosa, querémola de troula. Non a queremos nos libros, querémola nos contratos. Non queremos lingua de natureza, querémola de fábrica. Non queremos diplomas, aspiramos ao podio. Non queremos cans, queremos vacas. Queremos unha lingua escaladora, ciclista, surfista, fogueteira, moinante, zulú. Non a queremos santa, querémola voraz. Non a queremos excepción, querémola norma. E tampouco a queremos norma, mellor infracción. Querémola feiranta. Non a queremos conmemoración, querémola festa. Ou rutina. Non a queremos grande, querémola nosa. Non a queremos nai, querémola amiga. E senón inimiga, pero sempre enfronte, a escape libre. Querémola en inglés e querémola en verde. Querémola na boca dos nosos adversarios. Querémola deslinguada, montaña rusa. Querémola en google e en yahoo. Queremos lingua Messi, lingua Pelé. Non queremos unha lingua quieta, querémola en marcha e de man en man, coma se nada. Queremos unha lingua a almorzar de hotel, buffet libre, relax total. Queremos mil primaveras máis, mil vendimas logradas, mil nevaradas brancas e mil veráns na area ao sol. Querémola en marcha e non a queremos nada. Preferímola toda.
Comentarios (0) - Categoría: Da lingua de nós - Publicado o 10-05-2011 11:33
# Ligazón permanente a este artigo
Por unha Rede popular de ensino en galego
Dende aquí podedes apoiar a creación dunha rede poular de escolas en galego.

O prazo remata o vindeiro 17 de maio.

Facédelle publicidade!

Esta é a definición da rede:

Estará composta por un conxunto de instalacións de ensino de tódolos niveis e modalidades que teñan como obxectivo a transmisión de coñecementos científicos e útiles para a formación integral da persoa e que a lingua vehicular (lingua franca), a do ensino sexa o galego.
Que a formación da persoa sexa realizada con criterios de pluralismo, respecto, tolerancia, diversidade, fora de toda influencia relixiosa (laico).
O conxunto das escolas (da rede popular) estará ao servizo do Pobo de Galiza, para poder ser usada por tódolos seus habitantes, será universal, e para todas aquelas persoas que desexen recibir unha educación en lingua galega.
A rede popular e cada unha das escolas, será privada, sendo os seus propietarios os seus usuarios e impulsores, correspondendo á comunidade escolar no seu conxunto a xestión educativa de cada centro e a participación no global da rede.
A rede manterá a súa independencia dos poderes políticos, a pesar das axudas que por lei lle puideran corresponder e desempeñarán a súa función para acadar os máximos resultados de competencia dos seus alumnos/as equiparables a nivel europeo, conforme ao establecido na lexislación educativa vixente.
En adíante e para evitar calquera interpretación que dificulte o seu contido a Rede popular galega privada de ensino en galego, pasará a denominarse:
Rede popular de ensino en galego.


1.- Apoio a creación dunha asociación popular “Galiza co Galego” que acade recursos económicos para a creación dunha rede popular galega privada de ensino en galego, a todos os niveis, con especial atención dende os niveis inferiores (de cero a 6 anos), deica a finalización da educación obrigatoria (sobre os 16 anos).

2.- Apoio a creación dunha asociación popular “Galiza co Galego” cun ideario laico e pluralista.

3.- Apoio a creación dunha asociación popular “Galiza co Galego” que promova e apoie as escolas privadas laicas que usen o galego como lingua de ensino.

4.- Apoio a creación dunha asociación popular “Galiza co Galego” que busque a consecución por medio do ensino en galego, con métodos científicos a competencia lingüística nas linguas romances de tronco común como o portugués, catalán, castelán, francés, italiano,...

---> Aplicación da didáctica comparada das linguas romances: francés, italiano, galego, castelán, catalán, portugués....de xeito que se acade a competencia lingüística de comunicación oral e escrita nunha delas, ademais do castelán, e noutras a competencia nos recursos para a súa comprensión escrita e a profundidade no seu estudio.

5.- Apoio a creación dunha asociación popular “Galiza co Galego” para desenvolver un ensino científico e de calidade, que ademais permita acadar a competencia lingüística noutro idioma como o inglés, alemán, ruso, chinés..... e que procure nocións da lingua vasca (éuscaro), como outra lingua do Estado Español.

---> Aplicación dos métodos e medios pedagóxicos precisos para acadar un ensino científico e de calidade, poñendo especial atención á formación solidaria en respecto aos dereitos humanos e ao medio, para o crecemento persoal e realización do individuo formado.
Estudo doutra lingua diferente das romances, como exemplo: Inglés, Alemán, Ruso, Chinés....que permita a súa competencia lingüística.

6.- Apoio a creación dunha asociación popular “Galiza co Galego” que axude as familias para facilitarlles os medios, as ferramentas, para que poidan desenvolver a súa vida con normalidade en galego.

---> É un dereito do Pobo e polo tanto unha obriga da asociación popular favorecer na medida das posibilidades a inclusión de tódalas persoas na rede de ensino con independencia dos seus recursos económicos. A asociación popular buscará os recursos necesarios para poder dar escola en galego a quen o precise. Tamén promoverá todo tipo de actividades co gallo de que as familias poidan ter un espazo en galego no que poder convivir.

7.- Apoio a creación dunha asociación popular “Galiza co Galego” que unha vez en marcha de inmediato poderá poñer en práctica o proxecto educativo global en galego, como pode ser en convenio cos centros de ensino privados existentes, ou coa creación de novos centros.

---> Á rede popular de ensino en galego poderán adherirse calquera centro que o desexe, sempre e cando se garanten os seus principios de pluralismo e laicidade e se poña en práctica o proxecto educativo da rede popular de ensino.
Será necesario que os centros cumpran cos aspectos pedagóxicos e os principios de realizar o ensino en galego, laico e pluralista da rede popular de ensino en galego. A comunidade educativa participará na xestión global da rede.

8.- Apoio a creación dunha asociación popular “Galiza co Galego” que reclame da administración pública os recursos económicos precisos para o desenvolvemento dunha rede galega de ensino en galego, tanto na súa parte pública como privada.

---> Reclamarase da administración os recursos precisos, como o material didáctico , escolar, os libros de texto, a concesión de becas...

9.- Tendo en conta que a asociación popular “Galiza co Galego”, contará con asociados nun número inicial de 3000, que ao mesmo tempo, na maior dos casos serán beneficiarios da rede de ensino en galego, comprometo a miña afiliación, á asociación popular “Galiza co Galego”, cunha cota anual de 100 a 200 euros, que farei efectiva no momento da súa constitución.

---> A asociación popular “Galiza co Galego” non terá ánimo de lucro, disporá duns estatutos democráticos, favorecedores da participación e control por parte dos asociados, supervisando que as escolas da rede de ensino en galego cumpran coa súa función e os principios fundacionais de laicidade, ensino en galego e pluralidade.
O inicio da actividade terá lugar cando se acaden 3.000 socios que farán posíbel alcanzar os recursos económicos precisos para o funcionamento da primeira escola.
A cota establecerase anualmente en base ao presuposto anual do funcionamento do primeiro centro de ensino, nos limites que se establecen. A cantidade económica da cota dos socios terá a consideración de creto, ou fondo, ou garantía para o funcionamento das escolas.
O gasto orixinado do mantemento do centro de ensino promocionado pola asociación, será asumido polo seus usuarios.
Á finalización do curso farase un balance social e pedagóxico do funcionamento da rede e das escolas, aportando no seu caso as medidas correspondentes para manter o máximo nivel de competencia educativa.
Á finalización do curso farase un balance económico dos gastos da asociación e dos recursos económicos empregados, podendo rescatarse parte ou todo do aportado, dependendo do resultado.
A renovación da cota anual farase cada ano nos termos indicados e calculada en base o reparto do gasto entre todos os asociados en relación aos proxectos a desenvolver, e sempre nos límites económicos establecidos para a mesma.

As axudas económicas extraordinarias de persoas ou entidades (privadas ou públicas), non serán aportadas directamente a asociación senón ás familias, como por exemplo becas, material, uso de inmobles.....
Comentarios (0) - Categoría: Da lingua de nós - Publicado o 27-04-2011 13:11
# Ligazón permanente a este artigo
Do peche de Flocos

Esta maldita Xunta de Galicia que nos tocou en gracia vén de ordear o peche de FLOCOS TV, videoclube galego gratuíto e único repositorio de traballos audiovisuais galegos.

Os xornais de galicia non dixeron nada da noticia.

Só falou dela o xornal Público de Madrid.

(Lede a nova aquí)

O punto forte da dereita neste país noso é a desinformación total da poboación!
Comentarios (4) - Categoría: Da lingua de nós - Publicado o 01-03-2011 20:02
# Ligazón permanente a este artigo
Da honrosa renuncia de Siniestro Total
Siniestro Total anuncia na súa web que renuncia á nominación a mellor canción en galego pola Academia da Música, da que os integrantes do grupo se senten moi orgullosos, porque considera que é inxusto nominar para ese premio a un grupo que habitualmente non canta en galego e só inclúe unha canción na nosa lingua en cada un dos seus discos.

"Non consideramos que sexa xusto que nos outorguen o devandito premio. O feito de que só un tema en galego poida ser nomeado aos Premios da Música, entendemos que implica que aqueles grupos que apostan totalmente pola nosa lingua propia, sexan merecedores de tal premio e nós non o somos."

Podedes ler aquí o comunicado do grupo.

Veña un grolo pola honestidade de Siniestro Total!



Comentarios (3) - Categoría: Da lingua de nós - Publicado o 01-03-2011 19:51
# Ligazón permanente a este artigo
© by Abertal