Víchelo, miráchelo!



O meu perfil
 CATEGORÍAS
 BUSCADOR
 BUSCAR BLOGS GALEGOS
 ARQUIVO
 ANTERIORES

Traballo sobre a voz da muller

Imos abordar un traballo sobre a voz da muller galega ao longo dos tempos. O obxectivo é visualizar nun formato de revista esas voces galegas de mulleres de distintas épocas.

Se dicimos muller e galega, pensamos seguramente en Rosalía, pode ser esta o punto de partida ou de chegada, mesmo unha referencia central da revista que elaboremos en grupo.

Cada grupo deberá realizar a edición dun monográfico ao que lle debe dar un título e un editorial (isto xunto co deseño global que poñades en común, non debe ir asinado, pero os restantes artigos, entrevistas, reportaxes, crónicas, etc... deben levar unha referencia ao autor dos mesmos e unha breve reseña da bibliografía usada).

O prazo de entrega será o 11 de abril.



Traballamos con tres referencias iniciais:

A voz da muller en Rosalía.

A voz da muller na Idade media e o contraste coa actualidade.

As mulleres de hoxe e de onte anónimas e silenciadas ás que queremos darlles voz.



Para contrastar coa voz da muller de hoxe, no libro de clase hai no segundo volume un monográfico específico (páx.184-189), no que tamén aparece a entrevista a cantautora Ses. Ademais da cantante SES, tes no mundo do folk galego, herdeiras das pandereteiras tradicionais (que son á vez continuación a lírica medieval tradicional feminina) a moitas outras mulleres e instrumentistas destacadas den Guadi Galego a Uxía Senlle ou dende Susana Seivane a Mercedes Peón. Grupos formados exclusivamente por mulleres como Habelas Hainas, etc...

Na música coral The Vacas, da música clásica ata o rap e un longo etc.


Comentarios (0) - Categoría: CREOCOMUNICACIóN - Publicado o 14-03-2018 07:08
# Ligazón permanente a este artigo
O pergamiño Vindel espéranos en Vigo...

Seremos quen de descubrir por que é un tesouro?

Que é un pergamiño?

En que idioma están escritos os textos deste pergamiño? Por que está normalmente nun Museo en Nova York e só durante uns meses estará exposto en Galicia?

Quen era Vindel?

Quen era Martín Codax?

Que contén o pergamiño Vindel?

Que é unha cantiga de amigo? De que tratan?

Cantas cantigas están escritas neste pergamiño?

Por que é único o Pergamiño Vindel?

Cantas persoas intervirían na confección deste pergamiño, ademais do autor das cantigas?


Bótalle un ollo aos textos do Pergamiño Vindel.

Escoita dúas cantigas das que se atopan no Pergamiño.


Logo de escoitalas imos comentar algunhas das súas características na aula.

As confidentes da muller nas cantigas.

Algúns dos recursos literarios das cantigas
Comentarios (0) - Categoría: CREOCOMUNICACIóN - Publicado o 18-02-2018 14:03
# Ligazón permanente a este artigo
Corazón de futuro, voz de muller.

Un traballo de creación persoal e de grupo sobre a presenza da muller na sociedade a través dos tempos e que parte da Idade Media e procura chegar e incidir nos tempos que vivimos. Unha revisión do xeito de analizar á muller a través dos tempos e unha valoración do aporte das mulleres de todos os tempos.

Comezamos cun tríptico: unha canción de SES, as mulleres no medievo e o contraste que ofrece a lectura desta avaliación.

RACHANDO TÓPICOS




De SES: Non son fada nin princesa. Sobre as princesas de conto

Logo seguiremos o repaso das voces femininas da cultura galega ata os nosos días co contraste do primeiro trimestre:

A muller das cantigas. Investiga: Cales eran os tópicos nas cantigas de amigo e amor? Había mulleres que escribían cantigas na Idade Media? Que mulleres cres poderían escribir naqueles tempos, as raíñas e nobres ou as pastoras e labregas?

O NOSO TRABALLO PARA MARZO SOBRE A MULLER NA IDADE MEDIA:

Falaremos, investigaremos para realizar unha boa biografía de sete mulleres con nome de seu na nosa Idade Media. Unhas son raíñas, outras humildes labregas, mesmo nas cantigas que daquela escribiron conservamos algúns dos cantos que seguro elas tamén cantaban.

DE CANDO NACE O GALEGO: SÉCULO IX
Ilduara ou Aldara

ENTRE OS SÉCULOS XI e XII
Sancha I, raíña de Galicia (1037-1067). Aínda que nacera en León en 1013, será a raíña de galicia dende o 1037. Esposa do Conde de Castela, grazas ao cal este será logo rei, Fernando I.

Urraca, raíña de Galicia (1081-1126) neta de Sancha I e filla de Afonso VI e Constanza de Borgoña, é unha das raíñas máis controvertida da Idade Media polo seu afán de poder que a levou a enfrontarse a súa irmá Tareixa, condesa de Portugal, favorecendo así a independencia deste condado e a súa configuración coma un novo reino, separado da Gallaecia histórica entre o norte e o sur do Miño. As dúas irmás casaran con dóus irmáns nobres de Borgoña, Urraca con Raimundo e Tareixa con Henrique. Pero se cadra o episodio máis coñecido produciuse anos despois co enfrontamento co seu fillo Afonso VII, rei de Galicia, León e Castela, e aspirar ao goberno destes territorios tras casar por segunda vez con Alfonso I de Aragón.

AS MULLERES NAS CANTIGAS DO SÉCULO XIII

Aínda que houbo mulleres nobres que escribían, non se conservan referencias escritas sobre mulleres galegas a non ser polo que os homes escribían acerca delas en documentos literarios como as cantigas de amigo (das máis coñecidas as de Martín Códax xograr de Vigo) ou en cantigas de escarnio e maldicer onde se nomea a unha tal María Balteira.

Na nosa visita ao Museo do Mar de Vigo e a exposición do Pergamiño Vindel: Un tesouro en sete cantigas imos tentar descubrir por que ten tanta importancia este documento.
O Esplendor dunha lingua milenaria posto en boca dunha muller. Cando Rosalía de Castro vivía centos de anos despois(no século XIX)aínda era practicamente descoñecido que existiran na nosa lingua escritos de reis e trobadores que fixeran da nosa literatura unha das máis brillantes da Europa medieval.Esa época dourada foi coñecida grazas aos estudos como os de Sarmiento (editados no XIX) e a descubertas como a do Pergamiño Vindel en 1914. Á volta da visita seredes vós os que narredes o resto da historia de por que este pergamiño é un tesouro en sete cantigas e de como procurar a voz das mulleres da época a través deses textos que son algo máis que palabras milenarias.

E NO SÉCULO XIV
Inés de Castro, raíña de Portugal despois de morta.
Ampliando esta historia de amor despois da morte.
Finalmente María Castaña, unha clara precursora da Revolta Irmandiña da que xa falamos.

A muller na lectura "A cova da Moura". Analicemos agora as dúas mulleres protagonistas desta ficción literaria.

Na nosa viaxe cara ao castelo no que se desenvolve esta novela e a modo de introdución comezaremos este traballo lembrando a María Vinyals. Unha mágoa que este vídeo non teña unha versión en galego, mais paga a pena botarlle unha ollada. Pero serve de limiar ao noso achegamento á figura de María Vinyals, a derradeira dona do castelo de Soutomaior que non quería ser princesa...


Comentarios (0) - Categoría: CREOCOMUNICACIóN - Publicado o 02-02-2018 07:15
# Ligazón permanente a este artigo
DE ROSALÍA A SES

Imos realizar un traballo de creocomunicación para galego no que realicemos unha aproximación aos textos xornalísticos.

O tema é a voz feminina na cultura galega o prazo o 21 de marzo.

Sarmiento, o curioso erudito do século XVIII deixou dito: "Teño observado que en Galicia as mulleres non só son poetisas, senón tamén músicas naturais. Xeneralmente falando, en Castela como en Portugal e noutras provincias, os homes son os que compoñen as coplas e inventan os tons ou aires; e así se ve que neste xénero de coplas populares falan os homes coas mulleres, oo para amalas ou para satirizalas. En Galicia é o contrario. Na maior parte das coplas galegas falan as mulleres cos homes; e é porque elas son as que inventan as coplas, sen artificio algún; e elas mesmas son as que inventan os tons ou aires as que han de cantar, sen ter idea da Arte musical."

Nós imos comprobar que dende o século XVIII ata hoxe isto segue sendo unha realidade en Galicia.

DE ROSALÍA A SES é unha experiencia de creación dun xornal único en edición especial para avaliar ata que punto é certo isto que afirmaba sarmiento no século XVIII. Podemos usar como referencias o libro do 2º trimestre tema 5.

O traballo de ter formato de revista, conter unha editorial, novas, artigos de opinión, entrevistas e reportaxes. Para poder enchela de contido deixamos aquí algúns enlaces de interese onde rastrexar a presenza da muller na poesía,na literatura e na música galega:

- Rosalía de Castro, Emilia Pardo Bazán, Juana de Vega, Concepción Arenal, Maruxa Mallo o álbum de mulleres do Consello da Cultura Galega é moi interesante, as mulleres das Irmandades

-Asociación de escritoras e escritores galegos, onde podes encontrar narradoras ou tamén poetas como Yolanda Castaño,ou Ana Romaní e un longo etc...
-Músicaengalego onde podes achar a Uxía Senlle, Ugía Pedreira, Guadi Galego, Rosa Cedrón,Cristina Pato, Susana Seivane, ou a grupos de mulleres Nordestinas, The Vacas, Faltriqueira, Ialma...
- Para unha posible entrevista hai autoras que viven en Marín como Elena Gallego Abad, ou pandereteiras dalgún grupo de de folclore tradicional.
- Autoras na Banda deseñada
Comentarios (0) - Categoría: CREOCOMUNICACIóN - Publicado o 03-03-2017 06:56
# Ligazón permanente a este artigo
QUE A LINGUA TE ACOMPAÑE!

Acabamos de saber que a primeira película da saga QUE A LINGUA TE ACOMPAÑE! vai ser protagonizada por Rosalía de Castro que interpretará o papel da propia Rosalía.

Estamos impacientes xa por ver o adianto que se espera se faga público en cuestión de días.
Comentarios (0) - Categoría: CREOCOMUNICACIóN - Publicado o 23-02-2016 23:13
# Ligazón permanente a este artigo
Achégase o día da estrea. Quen son e a onde irán?

Comentarios (0) - Categoría: CREOCOMUNICACIóN - Publicado o 23-02-2016 08:55
# Ligazón permanente a este artigo
A PRAIA DOS AFOGADOS
Un filme tirado dunha novela de Domingos Villar que será a primeira lectura do tema primeiro do libro de texto deste curso.

Unha ventá á creación dun produto cultural para Galicia e para o mundo: a praia dos afogados.

PARA REFLEXIONAR

Non é a única creación cinematográfica que se estea a proxectar nestes e que situe en Galicia a acción e que sexa protagonizada por actores galegos. Saberías citar algunha outra? Pero non todas teñen a súa versión en galego. le o seguinte enlace o artigo sobre a produción do filme "A praia dos afogados" e logo responde:cal pode ser o motivo?
Comentarios (0) - Categoría: CREOCOMUNICACIóN - Publicado o 07-10-2015 06:55
# Ligazón permanente a este artigo
A nosa compañeira Ángela, 1º premio de poesía concello de Marín
A alumna de 2º ESO B Ángela Pousada González vén de gañar o 1º premio de poesía Concello de Marín que convoca a Concellería de Cultura para os centros escolares deste municipio a través da súa Concellaría de Cultura. O poema titulado Xente é un texto cargado de intención crítica e con gran poder expresivo. Esperemos que este recoñecemento a súa capacidade creativa sirva de alento para que siga escribindo no futuro e cultive e enriqueza coa súa produción o mundo das nosas letras.

O próximo día 17 ás 12 h. recibirá o premio e fará unha lectura do texto no Museo Manuel Torres de Marín.

Podedes ver unha reportacxe e o texto gañador no blog da Biblioteca
Comentarios (0) - Categoría: CREOCOMUNICACIóN - Publicado o 15-05-2015 17:04
# Ligazón permanente a este artigo
UNHA LECCIÓN SOBRE A BANDA DESEÑADA

Hoxe a clase centrouse na creación dunha banda deseñada. Veu a compartir a súa experiencia un dos máis recoñecidos deseñadores galegos do momento, Xosé Tomás, quen explicounos que hai detras dunha banda deseñada, detívose no seu proceso, paso a paso, e escolleu un exemplo concreto, un dos seus últimos traballos:NÓMADES. Foi unha lección de vida e de intervención a través da creatividade crítica, ese sentido crítico ao que lle levamos todo o curso dando voltas e máis voltas e que pode expresarse con debuxos tirados dun longo proceso de reflexión, entrevistas, achegamentos á realidade dos outros, á comprensión do sufrimento e dos soños dos homes e mulleres que comparten o planeta con nós. A sensibilidade de plasmar en imaxes esas vidas cargadas de heroísmos e miserias provocadas pola incomprensión dos demais con actitudes racistas, belicistas, inxusticias e prohibicións... soubemos que a realidade o mundo está cheo de historias e personaxes aos que observar con ollos críticos e cos que compartir esperanzas e desexos dun mundo mellor.

Graciñas Xosé Tomás por facermos entender que o cómic é outra cousa, que merece chamarse banda deseñada e que tamén pode falar e levarnos á reflexión máis profunda e non tan cómica da nosa propia existencia.

Podedes ver unha pequena reportaxe gráfica do seu paso polo centro no blog da Biblioteca.

Comentarios (0) - Categoría: CREOCOMUNICACIóN - Publicado o 11-05-2015 22:11
# Ligazón permanente a este artigo
AGORA MARÍN CONTA

LEMBRADE: O Ateneo de Marín fai unha convocatoria na que pensamos e te animamos a participar. Trátase dun concurso de creación dun texto narrativo que debe acontecer en Marín. MARÍN CONTA:

Un texto narrativo debe ter unha historia (aventuras, misterio, amor, medo, fastántica, policíaca...)que contar e claro un narrador que o faga. O narrador pode ser mesmo un dos personaxes que intervén nos acontecementos ou non. Os personaxes poden parecerse a nós mesmo ou facer algo que nós desexemos ou soñemos ( ser invisibles, voar, ter un dragón...). Podemos crear tamén un antagonista, un Don Quixote, un Sancho e unha Dulcinea, un Romeo e unha Xulieta ou unha meniña gaiteira... O espazo xa nos vén imposto, nesta ocasión é Marín. Pero o que non está predeterminado é o tempo cronolóxico no que imos desenvolver a nosa historia, poden ser varios, poden ademais narrarse de xeito lineal ou discontinuo, indo cara atrás no tempo ou cara ao futuro. A túa historia pode e debe usar distintos modos de contar, non todo vai a ser acción narrativa, pode haber descrición de paisaxes marinenses e/ou dos personaxes que tamén poder facer uso do diálogo entre eles. Ao final porémoslle un título para facer máis atractivo o noso relato. Non pasarse de 500 palabras!.
Comentarios (0) - Categoría: CREOCOMUNICACIóN - Publicado o 06-05-2015 06:24
# Ligazón permanente a este artigo
1 [2]
© by Abertal