Viaxes O Lóstregho


Furancho Oficial de Cabañas & Catoira Travels
A partir deste santo día de Nadal do ano 2006 este vai ser o Furancho Oficial da xa célebre axencia de viaxes perralleiros Cabañas & Catoira Travels. Este e-zulo está especialmente deseñado para todos aqueles infelices ós que xa non lles carbura ben o 4 Latas, que xa están cansos de viaxar con AirZambia ou que levan toda a vida facendo auto-stop en carromato. Chegamos a un punto onde a xente moderna quere viaxes modernas, opinións modernas e visións modernas. Pois ben, para estes últimos non é esta páxina. Estes deben ir á páxina da COPE. Neste "fotolog" haberá fotos das nosas viaxes, comentando diferentes aspectos e anécdotas vividas. Recomendaremos lugares e esperamos que todo o mundo o pase ben e teña ganas de repetir a visita.

O meu perfil
 CATEGORÍAS
 FOTOBLOGOTECA
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

Villa Florentina

Hoxe estiven en agradable compañía. Como non tiña nada moi moi urxente que facer, decidín achegarme a Villa Florentina (Cecebre-Cambre), que é a sede da Fundación Wenceslao Fernández Flórez.

Todos os sábados ás 7 da tarde teñen algún acto. Hoxe tiñan unha lectura dramatizada sobre a conmemoración do Día da Lingua Materna. Leron fragmentos de diferentes documentos importantes da lingua galega.

O Foro do Burgo de Castro Caldelas (1228), Cantigas de Santa María, cartas dun Conde de Gondomar do s. XVII que eu descoñecía pero parecía moi interesante, deron noticia dunha condesa de Altamira de principios do s. XVI que se negou a asinar un documento en castelán porque non o entendía, textos do Padre Sarmiento, do Catecismo do Labrego, de Wenceslao (fomentando o achegamento ó portugués)...

En definitiva, moi agradable, e ó rematar, como sempre, o café, as pastas e os biscoitos cos que agasallan a todos os que se achegan por alí os sábados. Hai outros mundos, pero están neste.

A ver se dende a A. C. Alexandre Bóveda podemos facer algunha cousa conxuntamente con esta xente tan esforzada e loitadora.

Saúdos. Os Mártires da Caeira.
Fundación Wenceslao Fernández Flórez
Comentarios (2) - Categoría: Os Mártires da Caeira - Publicado o 25-02-2007 00:04
# Ligazón permanente a este artigo
A deusa Kaissa
Custoume bastante atopar unha imaxe da deusa Kaissa, pero creo que esta o é. Creo que é unha divinidade hindú. Considerada a deusa do xadrez.

O outro día lin unha agradable noveliña editada por Biblos, titulada "O xuízo de Kaissa". O autor é Pablo Roibás Painceira. Foi finalista hai un par de anos na novela por entregas da Voz de Galicia. Iso condiciona que non sexa moi longa (lese nun par de horas) e que estea dividida en 31 capítulos breves.

Trata dunha partida de xadrez na cal un dos xogadores fai de narrador. O comezo de cada capítulo amosa un taboleiro onde acaba de facerse un movemento. Mestúrase historia e mitoloxía do xadrez, táctica e estratexia e moitas outras cousas que non teñen que ver co xogo. Incluída unha sinxela trama pseudo-policial. Agradable.

Foi presentada no ano 2006 na Coruña no local da A. C. Alexandre Bóveda. Eu asistín e foi daquela cando souben da existencia de Kaissa. Paréceme estraño que cos certos achegamentos que tiven ó xadrez (que xa deixei, é un xogo moi complexo para a miña mente tan simple) e coa cantidade de xente que hai alí que está en contacto co tema nunca oíra falar desa deusa. Serei despistado!!

Saúdos. Os Mártires da Caeira.
Biblos Clube de Lectores
Comentarios (1) - Categoría: Os Mártires da Caeira - Publicado o 24-02-2007 23:54
# Ligazón permanente a este artigo
Algo interesante na televisión, incrible

Obviamente, esta opinión é tan subxectiva como todas as demais pero este da televisión sempre é un tema candente. En todo caso, como tampouco teño maior interese en que este blog se convirta nun foro de opinión sobre o divino e o humano, e seguramente á xente non lle interesa en absoluto o que eu opino sobre ningún tema (e non lles culpo), simplemente comentarei algo que vin hoxe e que pode resultar interesante.

Eu xa case non vexo a televisión. Agás algún partido de fútbol (cada vez menos), algunha película (gravada, aínda que eu estea libre á hora na que a emiten) só vexo algún que outro documental. Por exemplo, "Al filo de lo imposible". Pero agora non está na programación. Botaron hai pouco unha serie de 6 capítulos sobre a Antártida, pero xa rematou.

O único programa ó que son relativamente fiel é "Redes" de Eduard Punset. Como o cambiaron de día, últimamente bótano despois de "Estravagario", razón pola cal nos últimos tempos tamén vexo este, porque gravo os dous xuntos.

Onte xoves (eu vino hoxe venres) botaron unha interesantísima entrevista con Benoit Mandelbrot, o descubridor dos fractais. Como tiña certa fama, por suposto pensei que xa estaba morto. E non. Ten algo máis de 80 anos, pero aí sigue o tipo.

Contaron cousas alucinantes, como que se pode aplicar a xeometría fractal ás fracturas das minas de Riotinto, ó comportamento da Bolsa, á forma do brécol. Alucinante.

Saúdos. Ignatius J. Reilly.
Comentarios (1) - Categoría: Xeral - Publicado o 23-02-2007 19:27
# Ligazón permanente a este artigo
III Edición do Premio Literario Frei Martín Sarmiento

Estase celebrando a III Edición do Premio Literario "Frei Martín Sarmiento". E agora hai un blog no que as persoas que participen (alumnos e profesores) poden poñer as súas opinións sobre os libros finalistas.

Seguramente será necesario facer unha breve explicación de como funciona, porque o parágrafo anterior puido despistar a moita xente.

Neste premio, que ten lugar nalgúns dos colexios relixiosos de Galicia, os alumnos non teñen que escribir, senón que teñen que ler 3 libros que foron escollidos por un grupo de profesores, expertos e responsables de editorias galegas.

Os libros xa foron publicados (nesta edición os libros son de 2005), obviamente son todos en galego, e de autores galegos, e o xurado formado polos alumnos, agrupados en catro categorías ou franxas de idades, outorga unhas votacións que fan ganador a un libro en cada categoría.

Na edición que xa está en marcha (faltan por chegar uns poucos libros ós centros) están participando algo máis de 20 colexios e máis de 3.000 alumnos.

Xusto debaixo deste texto debe haber un enlace para ir ó blog do Premio e poder opinar e participar. Espero que vos pareza interesante a proposta.

Saúdos. Os Devotos de Santa Clara.
Blog do Premio Literario "Frei Martín Sarmiento"
Comentarios (0) - Categoría: Os Devotos de Santa Clara - Publicado o 23-02-2007 19:10
# Ligazón permanente a este artigo
U-las fotos do Salnés? di o outro
Vista da Illa de Tambo dende o Mosteiro de Poio
Pois si, hai que recoñecelo. Viaxes O Lóstregho desprazouse durante as vacacións de Entroido de 2007 ó Salnés, que fora sacudido polas cheas en novembro. Intentamos botarlle unha man á súa hostelería e comercio, tomándolle unha. O campamento base estaba en Vilagarcía e dende alí facíamos as nosas incursións. Xa sabedes que calquera lugar a menos de 200 quilómetros de onde pernoctemos pode ser escenario dos nosos saqueos.

Incluso saímos algo da nosa zona para pasar por Catoira (FALTARÍA MÁIS), Valga (sendeirismo), Caldas (papeo), Pontevedra (paseo), Poio (papeo tamén) etc. O tempo non foi moi bo, que digamos, pero fixemos o que puidemos.

Como mostra diso, deixamos unha curiosa foto. Casualmente é de fóra do Salnés. Estabamos no Mosteiro de Poio e vendo a fermosa estampa da Illa de Tambo que tiñamos diante, decidín inmortalizala. Eu son un fotógrafo bastante cazurro pero, por sorte, a miña cámara toma decisións independentes cando lle parece. Esperamos que vos guste.

Saúdos. Cabañas & Catoira Travels.

PD: Obviamente, reanudamos a serie de fotografías do País Leonés coa que levamos dende o 1 de xaneiro. Acabamos de entrar en Zamora capital. Visiten a FOTOBLOGOTECA.
Comentarios (2) - Categoría: Xeral - Publicado o 22-02-2007 18:20
# Ligazón permanente a este artigo
Os rebeldes estratosféricos
Este é un pequeno fragmento dun traballiño que fixemos unha vez para unha xente especial (que seguramente o merecía). Pasádeo ben, aínda que só algúns entenderán do que se trata.

Saúdos. Can de Palleiro Productions.

Comentarios (3) - Categoría: Xeral - Publicado o 12-02-2007 17:33
# Ligazón permanente a este artigo
Entramos en Zamora
Este é un breve aviso para que visitedes a Galería de Fotos do País Leonés visitado no verán de 2001.

Sempre digo mal a referencia. Se queredes visitar as nosas fotos tedes que ir ó panel da esquerda e mirar na sección "FOTOBLOGOTECA". O que aparecen aí son as Galerías de Fotos. De momento só hai a de "País Leonés - Verán 2001". Xa puxemos 40 fotos da provincia de León, coas súas correspondentes parrafadas -de desigual fortuna- e agora toca comezar coa de Zamora. Xa aviso que imos poñer 35 fotos da mesma, hai para unha boa tempada.

Saúdos. Cabañas & Catoira Travels.
Comentarios (1) - Categoría: País Leonés - Verán 2001 - Publicado o 10-02-2007 13:23
# Ligazón permanente a este artigo
Comeza a Era de Xéminis
Representación medieval de XéminisXeroglífico:

É posible que o xoves 8 de febreiro comece a Era de Xéminis.

Non o entendedes?

Pistas:
- Quen fai este blog?
- Cando naceu? (é dous tercios da Bestia).
- Que pasa o xoves 8 de febreiro?
- Que tipo de novas aparecen NESTA SECCIÓN do blog?

En galego creo que se di "Xemelgos" pero a min gústame máis "Xéminis". A ilustración saqueina da wikipedia en bable (ast.wikipedia.com).

Saúdos. Os Mártires da Caeira.

PD: Eu non dixen que o xeroglífico fora doado de acertar.
Agrupación Cultural Alexandre Bóveda
Comentarios (2) - Categoría: Os Mártires da Caeira - Publicado o 06-02-2007 20:42
# Ligazón permanente a este artigo
Maratón de lectura na Real Academia Galega

O pasado venres 26 de xaneiro de 2007 tivo lugar na Real Academia Galega un Maratón de Lectura no que estivemos tres horas lendo textos de todos os autores homenaxeados no Día das Letras Galegas.

Participaron alumnos dos Franciscanos, Maristas e Escolapios da Coruña. Como académicos participaron Xosé Luis Axeitos (inaugurou), Xesús Ferro Ruibal, Ramón Villares, Luz Pozo Garza e Xosé Ramón Barreiro (clausurou).

Vedes unha foto que se sacou o presidente da RAG, D. Xosé Ramón Barreiro con alumnos dos Escolapios e a profesora que os coordinou, Guadalupe Martínez. A foto está un pouco movidiña, pero....

Saúdos. Os Devotos de Santa Clara.
Comentarios (3) - Categoría: Os Devotos de Santa Clara - Publicado o 02-02-2007 18:17
# Ligazón permanente a este artigo
© by Abertal