Viaxes O Lóstregho


Furancho Oficial de Cabañas & Catoira Travels
A partir deste santo día de Nadal do ano 2006 este vai ser o Furancho Oficial da xa célebre axencia de viaxes perralleiros Cabañas & Catoira Travels. Este e-zulo está especialmente deseñado para todos aqueles infelices ós que xa non lles carbura ben o 4 Latas, que xa están cansos de viaxar con AirZambia ou que levan toda a vida facendo auto-stop en carromato. Chegamos a un punto onde a xente moderna quere viaxes modernas, opinións modernas e visións modernas. Pois ben, para estes últimos non é esta páxina. Estes deben ir á páxina da COPE. Neste "fotolog" haberá fotos das nosas viaxes, comentando diferentes aspectos e anécdotas vividas. Recomendaremos lugares e esperamos que todo o mundo o pase ben e teña ganas de repetir a visita.

O meu perfil
 CATEGORÍAS
 FOTOBLOGOTECA
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

As viaxes con Heródoto
Onte rematei de ler outro libro, últimamente estou que me saio, xa ía sendo hora.

O libro en cuestión é "Viajes con Heródoto" de Ryszard Kapuscinski. É o segundo libro que leo del, despois de "Ébano". Obviamente, os libros sobre viaxes escritos por un corresponsal que se pateou Asia, África e Latinoamérica sempre gustan nesta casa.

Pero deixoume unha impresión como o primeiro: fíxoseme algo longo, comezou moi ben, engaiolante, pero segundo avanzaba ía perdendo interese, non moito, pero algo si.

O plantexamento da obra é curioso. Lembra algúns dos traballos que tivo que facer polo mundo adiante tendo en conta que cando comezou lle regalaron a "Historia" de Heródoto. Levábaa a moitas viaxes para ler nas horas mortas. Ademais de contar interesantísimas anécdotas sobre o seu propio traballo (pero menos das que me gustaría a min) compárao con fragmentos da obra de Heródoto sobre os gregos, persas, exipcios... Analiza o método de traballo do primeiro historiador coñecido e as súas motivacións.

O dito: ben pero podía estar mellor. De Kapuscinski sempre se agarda o mellor. Tivo unha vida desas que é un pracer escoitar.

Saúdos.
Comentarios (1) - Categoría: Xeral - Publicado o 08-07-2007 12:44
# Ligazón permanente a este artigo
Taramundi e Tapia de Casariego
O outro día un grupiño de xente fomos de pequena excursión a Taramundi e Tapia de Casariego. Se esto é guerra, nunca paz no mundo haxa, como dixo alguén.

En Taramundi xa estivera varias veces, pero en Tapia estreeime un par de veces nestes días. Moi pero que moi interesante lugar. Para os que non o coñezades, recoméndovolo.

Saúdos.
Comentarios (4) - Categoría: Xeral - Publicado o 02-07-2007 21:29
# Ligazón permanente a este artigo
A medición do mundo: Humboldt vs. Gauss
Esta última fin de semana puiden dedicar unhas horas a un dos meus grandes vicios: ler. Por desgraza xa non teño demasiado tempo para facelo.

E púxenme cunha novela á que lle tiña ganas dende había algún tempo. Chámase "A medición do mundo" e o autor é o alemán Daniel Kehlmann. Foi un dos éxitos de vendas no seu país no ano 2006.

É unha biografía algo novelada e en paralelo de dous dos maiores científicos alemáns da Historia: Alexander von Humboldt e Carl Friedrich Gauss. Facendo fincapé en que buscaban o mesmo (medir o mundo) pero de xeitos moi opostos: Humboldt viaxaba sen parar e medía "fisicamente" todo o medible e Gauss non se movía da súa casa, odiaba viaxar e deducíao todo coa forza do seu intelecto.

En todo caso, a novela é moi asequible, non representa dificultade de comprensión para ninguén, coido.

Saúdos.
Comentarios (5) - Categoría: Xeral - Publicado o 19-06-2007 19:49
# Ligazón permanente a este artigo
Lecer en Cambre
Esta fin de semana boa parte do meu lecer vai ser no concello de Cambre. Un concello ao que, a pesar de estar a poucos quilómetros do meu fogar, sempre tiven moi esquecido. A ver se corrixo ese erro.

O sábado pola tarde irei de novo á Fundación Wenceslao Fernández Flórez, en Cecebre. Celebran o VI Aniversario da inauguración da sede, en Villa Florentina (xa vos teño falado do lugar). Haberá moita xente interesante, seguro.

O domingo imos facer unha ruta de sendeirismo que deseñou o concello. Parte e remata no Museo Arqueolóxico, diante da igrexa románica que vedes na foto, son só 9 quilómetros, case chans, e leva unhas tres horas. Iso será pola mañá.

Despois xantaremos nalgún dos interesantes mesóns ou restaurantes que hai na vila.

E pola tarde iremos de novo (eu por segunda vez en dous días) á FWFF a unha tertulia sobre Otero Pedrayo.

E o pronóstico meteorolóxico é óptimo. Vaime vir ben tanto descanso e agradable compaña.

Como vedes, totalmente oposto ao ocio actual de fútbol, cubatas e centro comercial.

Saúdos. Cabañas & Catoira Travels.
Comentarios (0) - Categoría: Xeral - Publicado o 02-06-2007 18:15
# Ligazón permanente a este artigo
Kepa Junkera na Coruña
Non sabedes o que vos perdestes. Os que xa o coñecedes, si o saberedes, e os demais deberíades saber que este bilbaíno é un dos maiores virtuosos do mundo do acordeón diatónico (en éuscaro, trikitixa).

Se ao ler a palabra "acordeón" pensastes automáticamente en María Jesús e "El Baile de los Pajaritos" nin o intentedes: estades totalmente imposibilitados intelectualmente para aprezar o virtuosismo desta máquina e correríades risco de sufrir un derrame cerebral nun dos seus concertos.

Impresionante espectáculo. Aínda que claro, eu non son obxectivo. Eu son un dos seus fanáticos.

Incrible un grupo de seis músicos no que a mitade da xente toca a percusión. A batería normal da música moderna non sorprende. Pero os dous xenios que tocan a txalaparta (conxunto de tablóns e pedras golpeados perpendicularmente con cilindros de madeira) son para flipar.

Se tedes un mínimo de interese xa sabedes: ides a Youtube e poñedes "Kepa Junkera". Xa hai bastantes videoclips e fragmentos de concertos. Que o disfrutedes.



Saúdos.
Comentarios (2) - Categoría: Xeral - Publicado o 26-05-2007 18:35
# Ligazón permanente a este artigo
A emigración galega en Venezuela (ou en toda Sudamérica)
Hai pouco coñecín a alguén moi moi interesante.

No colexio no que traballo estabamos desenvolvendo actividades en torno á emigración. E decidimos que para os máis maiores o máis interesante sería traer a algún emigrante-inmigrante, por exemplo un galego retornado.

E chegounos o contacto dun responsable de CIG-Migración chamado Xurxo Martínez Crespo. Veu ao noso colexio e contoulles unhas cantas cousas aos alumnos de 4º ESO e 1º Bacharelato.

E ademais agasallounos cun exemplar do libro e do video coa investigación que estivera realizando nos últimos anos. O libro fala, en forma de biografías, da emigración galega en Venezuela, Nicaragua, Dominicana e Panamá. E o video céntrase no país venezolano.

Non sabedes vós que cousas tan interesantes se contan alí. Por exemplo, que varios miles de traballadores galegos, con moi bo prestixio por construír a rede de ferrocarril en Cuba, foron levados dende alí para facer o Canal de Panamá.

E algunha das anécdotas que contou sobre a emigración foi ben curiosa. Como a de aquel matrimonio de uruguaios xa maiores que decidiron vir á Coruña, cidade na que non coñecían a ninguén, porque nunha consulta do Hospital do Centro Galego de Montevideo viron un cartel que poñía "La Coruña, ciudad en la que nadie es forastero".

Saúdos.
Comentarios (0) - Categoría: Xeral - Publicado o 26-05-2007 17:42
# Ligazón permanente a este artigo
Catalunya is fine
Fontes de Montjuïc
Ola xente, xa estamos aquí de novo. Estivemos por Catalunya, onde todo andaba un pouco húmido, pero xa voltamos para que non vos sintades tan sós.

Para que non digades que mentimos, deixaremos probas de que realmente estivemos alí. Esta foto que vedes foi sacada na Fonte Máxica de Montjuïc na noite do venres 6 de abril, cerca das 9 da noite.

Saúdos. Cabañas & Catoira Travels.
Comentarios (0) - Categoría: Xeral - Publicado o 09-04-2007 19:08
# Ligazón permanente a este artigo
Freedom for Catalunya
Viaxes O Lóstregho volta á estrada. O venres 30 de marzo, se Deus quixer, desprazámonos dende a Gallaecia ata a Tarraconensis, para facer unha severa inspección dos "conventus provinciais" de Barcino e Tarraco.

Para os estudosos en estratexia viaxística, a nosa idea é aloxarnos en Martorell, a uns 20 quilómetros de Barcelona, na confluencia dos ríos Llobregat e Anoia, cidade industrial (alí esta á SEAT) e importante nudo de estradas que nos permite saír en todas direccións de xeito doado.

En 20 ou 30 minutos situámonos en Barcelona capital por varias vías de tren diferentes (Renfe e Generalitat). Ou sexa, que estaremos na gloria.

Ata o luns 9 de abril probablemente esta será a última comunicación.

Saúdos. Cabañas & Catoira Travels.
Comentarios (3) - Categoría: Xeral - Publicado o 29-03-2007 17:11
# Ligazón permanente a este artigo
Algo interesante na televisión, incrible

Obviamente, esta opinión é tan subxectiva como todas as demais pero este da televisión sempre é un tema candente. En todo caso, como tampouco teño maior interese en que este blog se convirta nun foro de opinión sobre o divino e o humano, e seguramente á xente non lle interesa en absoluto o que eu opino sobre ningún tema (e non lles culpo), simplemente comentarei algo que vin hoxe e que pode resultar interesante.

Eu xa case non vexo a televisión. Agás algún partido de fútbol (cada vez menos), algunha película (gravada, aínda que eu estea libre á hora na que a emiten) só vexo algún que outro documental. Por exemplo, "Al filo de lo imposible". Pero agora non está na programación. Botaron hai pouco unha serie de 6 capítulos sobre a Antártida, pero xa rematou.

O único programa ó que son relativamente fiel é "Redes" de Eduard Punset. Como o cambiaron de día, últimamente bótano despois de "Estravagario", razón pola cal nos últimos tempos tamén vexo este, porque gravo os dous xuntos.

Onte xoves (eu vino hoxe venres) botaron unha interesantísima entrevista con Benoit Mandelbrot, o descubridor dos fractais. Como tiña certa fama, por suposto pensei que xa estaba morto. E non. Ten algo máis de 80 anos, pero aí sigue o tipo.

Contaron cousas alucinantes, como que se pode aplicar a xeometría fractal ás fracturas das minas de Riotinto, ó comportamento da Bolsa, á forma do brécol. Alucinante.

Saúdos. Ignatius J. Reilly.
Comentarios (1) - Categoría: Xeral - Publicado o 23-02-2007 19:27
# Ligazón permanente a este artigo
U-las fotos do Salnés? di o outro
Vista da Illa de Tambo dende o Mosteiro de Poio
Pois si, hai que recoñecelo. Viaxes O Lóstregho desprazouse durante as vacacións de Entroido de 2007 ó Salnés, que fora sacudido polas cheas en novembro. Intentamos botarlle unha man á súa hostelería e comercio, tomándolle unha. O campamento base estaba en Vilagarcía e dende alí facíamos as nosas incursións. Xa sabedes que calquera lugar a menos de 200 quilómetros de onde pernoctemos pode ser escenario dos nosos saqueos.

Incluso saímos algo da nosa zona para pasar por Catoira (FALTARÍA MÁIS), Valga (sendeirismo), Caldas (papeo), Pontevedra (paseo), Poio (papeo tamén) etc. O tempo non foi moi bo, que digamos, pero fixemos o que puidemos.

Como mostra diso, deixamos unha curiosa foto. Casualmente é de fóra do Salnés. Estabamos no Mosteiro de Poio e vendo a fermosa estampa da Illa de Tambo que tiñamos diante, decidín inmortalizala. Eu son un fotógrafo bastante cazurro pero, por sorte, a miña cámara toma decisións independentes cando lle parece. Esperamos que vos guste.

Saúdos. Cabañas & Catoira Travels.

PD: Obviamente, reanudamos a serie de fotografías do País Leonés coa que levamos dende o 1 de xaneiro. Acabamos de entrar en Zamora capital. Visiten a FOTOBLOGOTECA.
Comentarios (2) - Categoría: Xeral - Publicado o 22-02-2007 18:20
# Ligazón permanente a este artigo
© by Abertal