Viaxes O Lóstregho


Furancho Oficial de Cabañas & Catoira Travels
A partir deste santo día de Nadal do ano 2006 este vai ser o Furancho Oficial da xa célebre axencia de viaxes perralleiros Cabañas & Catoira Travels. Este e-zulo está especialmente deseñado para todos aqueles infelices ós que xa non lles carbura ben o 4 Latas, que xa están cansos de viaxar con AirZambia ou que levan toda a vida facendo auto-stop en carromato. Chegamos a un punto onde a xente moderna quere viaxes modernas, opinións modernas e visións modernas. Pois ben, para estes últimos non é esta páxina. Estes deben ir á páxina da COPE. Neste "fotolog" haberá fotos das nosas viaxes, comentando diferentes aspectos e anécdotas vividas. Recomendaremos lugares e esperamos que todo o mundo o pase ben e teña ganas de repetir a visita.

O meu perfil
 CATEGORÍAS
 FOTOBLOGOTECA
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

Vaia racha que leva o Fórum Metropolitano

Contábavos hai uns días o sorpresón que levei cando me dixeron que non podían proxectar "O sétimo selo" de Ingmar Bergman porque os da mensaxería perderan a película.

Pois o de onte foi aínda "mellor". Achegueime ao Fórum Metropolitano da Coruña para ver un concerto, para que o imos negar, bastante alternativo. Un grupo do Chaco arxentino chamado TONOLEC que fan unha estraña mestura entre música electrónica e tradicional da súa zona cantando e recitando poemas en español e en lingua toba, autóctona da zona. Podedes saber máis cousas deles na páxina web que aparece abaixo.

Chego á taquilla, que está fóra, e pechada. Que raro!!! Se só faltan 10 minutos!! Baixo as escaleiras, encaro o corredor que leva ao auditorio, e pechado. Que raro!!! Vou á recepción e pregúntolle á rapaza que está alí e dime que se suspendeu o concerto porque absolutamente ninguén reservou ningunha entrada con antelación, e iso é indicio claro de que o público vai ser case inexistente. Non o preguntei pero probablemente eu fun a única persoa que aparecín alí con intención de asistir ao concerto.

Reflexión: non me gusta a música electrónica, en xeral. O folklore toba non o coñezo pero podería interesarme, como todos os do mundo. Pero recoñezo que a mestura desas dúas cousas podía chamarme a atención, e fun á páxina web para enterarme algo máis de que ía. Pero paréceme incrible que nunha "área metropolitana" onde viven unhas 300.000 persoas fora EU o único que amosou certo interese por este concerto. Faime pensar moito este tema.

Iso si, á mesma hora e cidade, o Coliseo estaría case abarrotado vendo aos monologuistas do Club da Comedia que son famosos por saír en teleseries. Para iso si hai público.

Saúdos.
Tonolec
Comentarios (4) - Categoría: Xeral - Publicado o 29-09-2007 11:33
# Ligazón permanente a este artigo
O medieval Reino de Galiza
O outro día fun a unha conferencia organizada pola Asociación Cultural "O Facho" da Coruña (creo que a segunda máis antiga do país, despois de "O Galo" de Santiago).

No novo edificio da Fundación Caixa Galicia falaba o historiador Anselmo López Carreira sobre a historia do Reino de Galiza.

Impresionante. Como todos ou case todos os historiadores que coñezo, un orador excepcional destes que é capaz de terte horas coa boca aberta sen moverte do asento. E sen ler nada. Todo na cabeza. Que portento!!

E as cousas que dixo, como é habitual nel. Desas que raramente escoitas pero dan moita sensación de verosimilitude. Lembro especialmente o que dixo de que en ningún cronista da época falou nunca dunha provincia romana chamada Hispania, iso foi un invento posterior.

O que botei de menos foi a ambulancia medicalizada na porta por se asistía a charla algún españolista. Ían sufrir un infarto cada cinco minutos.

Saúdos.
Comentarios (0) - Categoría: Xeral - Publicado o 28-09-2007 19:45
# Ligazón permanente a este artigo
A xove da perla
Onte vin unha película gravada da televisión uns días antes. Era "A xove da perla", película baseada nunha novela de Tracy Chevalier e que fala dunha breve parte da vida do pintor holandés Jan Vermeer.

Eu supoño que o que me atraía para ver a película era o binomio Jan Vermeer-Scarlett Johansson.

Saber algo da vida dese pintor, tan esquecido durante moito tempo e que foi "descuberto" hai poucos anos. A súa cidade de Delft, co encanto dos seus canais. Obviamente non estiven alí pero sempre lle dá un colorido especial.

E, por suposto, Scarlett Johansson. Pero non creades. A súa incrible beleza apenas se ve na película. Os tocados e vestidos da época ocúltana case por completo. Só se ve a súa cara, e ademais coas cellas case inexistentes.

En todo caso, a película é bastante interesante, aínda que algo "paradiña" de máis por momentos.

Saúdos.
Comentarios (2) - Categoría: Xeral - Publicado o 23-09-2007 12:04
# Ligazón permanente a este artigo
O meu gozo cinéfilo nun pozo
Hai unhas semanas escribín un artigo sobre "Amorodos salvaxes", unha película de Ingmar Bergman que acababa de ver na TVG.

E remataba dicindo que seguramente pouco despois vería "Blow-up" de Antonioni e "O sétimo selo" de Bergman no Fórum Metropolitano da Coruña.

Pois foi imposible. A semana que botaron "Blow-up" estiven tan ocupado que non puiden pasarme por alí. Botan cinco sesións en tres días, tampouco é unha oferta moi abondosa.

"O sétimo selo" si chegaba a tempo para ver a última das cinco sesións. Pero casualmente pasei por alí un par de horas antes e dixeron que non se puidera proxectar porque a máis famosa das empresas de mensaxería perdera o paquete coas cintas da película.

Non sei de onde a traían, se da Filmoteca Nacional, ou así, pero se cadra a esa xentiña cáeselle o pelo por perder un paquete tan valioso.

Saúdos.
Comentarios (0) - Categoría: Xeral - Publicado o 23-09-2007 11:57
# Ligazón permanente a este artigo
Urbano Lugrís
Acabo de pedir en Biblos un libro de Luis Rei Núñez titulado "O señor Lugrís e a negra sombra" que debe ser unha biografía novelada do artista Urbano Lugrís.

Aproveito entón para poñer algún cadro deste pintor surrealista que, na miña opinión, é un dos mellores pintores da historia.

Sempre se poden ver algúns cadros del en locais como o Café Vecchio ou o restaurante La Bottega da rúa dos Olmos (antes restaurante Fornos) na Coruña, ou na Cofradía de Pescadores de Malpica.

Saúdos.
Comentarios (1) - Categoría: Xeral - Publicado o 17-09-2007 00:19
# Ligazón permanente a este artigo
Rafael Álvarez "El Brujo"
O venres 14 de setembro fun ao Teatro Rosalía de Castro a ver unha actuación longamente esperada por min: Rafael Álvarez "El Brujo". Tiña moi boas referencias del.

Pero teño que recoñecer que saín decepcionado. Esperaba moitísimo máis. Algúns puntos estiveron moi ben. Pero outros non. Nalgún caso estiraba demasiado as chanzas, segundo a miña opinión.

Por momentos, pareceume unha actuación do "Club da Comedia". E del esperaba moito máis que iso. E ademais os do Club da Comedia parécenme unha pandilla de mediocres. Que lle imos facer!!!!!!

Saúdos.
Comentarios (0) - Categoría: Xeral - Publicado o 16-09-2007 21:59
# Ligazón permanente a este artigo
Kill Bill vol. I
Tamén estes días vin unha película da que ouvira falar ben, aínda que moito non me fiaba. Era "Kill Bill vol. I" de Quentin Tarantino.

Nada, o de sempre con este tipo. Unhas imaxes potentísimas. Unha capacidade para crear situacións e personaxes moi atraentes. Pero sempre ultra violencia para solucionar todas as esceas e todos os problemas. Non ten solución este rapaz. Violencia, violencia e máis violencia. Sen xustificación na maioría dos casos.

Saúdos.


Comentarios (0) - Categoría: Xeral - Publicado o 09-09-2007 19:25
# Ligazón permanente a este artigo
Amorodos salvaxes, de Ingmar Bergman
Onte gravei da televisión a película "Amorodos salvaxes" de Ingmar Bergman. Supoño que a botarían como homenaxe póstumo. En V.O.S. e con subtítulos en galego. E xa a vin.

Teño que recoñecer que me pareceu bastante interesante. Tiña medo en que fora un coñazo insufrible mega-super-filosófico pero resultou moi doada de seguir e entender. Iso si, coa súa reflexión e a súa filosofía, pero moi levadeira. Os dous actores principais moi ben. E turbadora a beleza de Ingrid Thulin. Déixovola en primeiro plano.

Sospeito que este mes verei "Blow-up" de Antonioni e o "Sétimo selo" de Bergman. Bótanas na Coruña.

Saúdos.
Comentarios (1) - Categoría: Xeral - Publicado o 09-09-2007 19:19
# Ligazón permanente a este artigo
Día tras día, de Mariclown
Onte fun ao teatro a pasar un bo rato ríndome. Asistín no Fórum Metropolitano á representación de "Día tras día. A vida de Rosa" a cargo da compañía de teatro-circo-clown Mariclown.

Esta compañía, antes, estaba formada por tres mulleres. Agora só quedan dúas, polo visto. Xa vira algún fragmento deste espectáculo anteriormente. Polo tanto, máis ou menos xa sabía a que ía. E non estivo mal.

Certo é que os números non están moi ben enlazados entre sí, que case non hai texto porque case todo se basa en son pregravado e en facer burradas ouvindo de fondo cancións principalmente españolas (María Jiménez sae bastante) ou incluso telenovelas.

Pero hai que recoñecer que é bastante divertido, e pasas unha boa hora.

Saúdos.
Comentarios (0) - Categoría: Xeral - Publicado o 09-09-2007 19:14
# Ligazón permanente a este artigo
Rivadulla Corcón
Asistín hai pouco a un "martes literario" na Galería Sargadelos da Coruña.

Dende que abriu hai uns meses, a súa directora Yolanda Castaño quixo darlle ese toque literario e cada quince días leva por alí a un escritor a que conte algo da súa obra, recite....

Teño que recoñecer que era a primeira vez que ía, polo tanto supoño que farán iso, non sei se sempre van poetas.

En definitiva estivo contando como compoñia, todos os proxectos e programas de radio nos que participaba. Dixo que estes últimos lle "obrigaban" a escribir e que por iso tiña unha certa produción abondosa.

Tamén dixo que el quería ser poeta, pero que iso non daba para vivir, e que había que facer moitas cousas (mal indicio) e publicar en moitos xéneros (novela e libro infantil no seu caso) para poder levarse ben cos editores e que lle publicasen algún libro de poesía de cando en vez.

Saúdos.
Comentarios (2) - Categoría: Xeral - Publicado o 05-09-2007 23:40
# Ligazón permanente a este artigo
© by Abertal