O Balaídos C.F., que dende 1963 é o equipo de fútbol do noso barrio, ven de estrear unha nova páxina na Rede, cun renovado deseño, novos contidos e mesmo un foro no que participar.

Non podo se non parabenizar ao club pola súa nova fiestra na rede de redes á que se pode acceder dende o enderezo http://www.balaidoscf.com

Pero tamén é de xustiza aplaudir e agradecer publicamente o inxente traballo desenvolvido por todas as persoas que formaron parte da equipa directiva do clube ou os seus colaboradores.

Esa importantísima laboura en favor do deporte de base no barrio ten como resultado os centos de rapaces e mozos que xogaron e xogan coa camisola verdibranca.

O Balaídos C.F. é o equipo que toda a veciñanza do barrio sentimos como propio.

Grazas polo voso traballo e parabéns pola nova web.

Abel Caballero trala xunta de governo local celebrada o pasado luns 10 de decembro, anunciaba que os proxectos de humanización das avenidas da Florida e Castrelos estaban aprobados e que ían ser remitidos á Consellería de Ordenación Territorial, que será a encargada de financiar os case 12 millóns de euros que custarán as obras.

A humanización desas avenidas, que son as principais vías do barrio e dúas arterias importantes da cidade, é unha vella reivindicación da veciñanza. A Asociación Veciñal "Val do Fragoso" traballou arreo na pasada lexislatura para conseguir desbloquear os proxectos que ficaban no caixón do maior desinterese da anterior alcaldesa, a popular Corina Porro. Xuntanzas coa delegada da COTOP, cos anteriores concelleiros de Vías e Obras e distrito, coa Alcaldesa, numerosos escritos e mesmo unha moción apresentada polo BNG e que foi aprobada pola unanimidade do pleno, foron en síntese as actuacións da asociación urxindo a actuación na Florida e Castrelos.

Porén o governo municipal anterior sí presentou, froito dese traballo de reivindicación, á A.V. Val do Fragoso a documentación e o deseño dos proxectos de humanización.

Abel Caballero pola contra, ao igual que os concelleiros Isaura Abelairas, Vías e Obras, e Xulio Calviño, Mobilidade, ignorou sistematicamente á entidade socialmente máis representativa do barrio, obviando a opinión da veciñanza residente nuns proxectos que lles afectarán directamente, nunha actitude escandalosa, antidemocrática e prepotente.

O Alcalde si recibiu mesmo a un reducido grupo de comerciantes que non estaban constituidos formalmente, pero na súa axenda de previsións na que ten tempo para recibir a directivos de Alcampo ou Ikea non tivo vontade política de escoitar á Asociación Veciñal "Val do Fragoso" que a día de hoxe segue a descoñecer as modificacións feitas no proxecto.

Ogallá as obras rematen en 20 meses como dixo o Alcalde, e o seu resultado sexa satisfactorio, pois a veciñanza do barrio non merece menos. Pero se Abel Caballero non cambia de actitude, seguiremos a ter un Alcalde xordo, que é o primeiro síntoma da doenza do despotismo.

Quero agradecer con esta entrada no meu blog a difusión que diversos meios de comunicación lle concederon a traves de reseñas e noticias publicadas.

Inda que teño o convencemento de que o desenvolvemento das potencialidades do web 2.0 revolucionará definitivamente o concepto de comunicación, os meios clásicos coma a imprensa, inda que sexa dixital, seguen a ser ferramentas non só complementares senón mesmamente fundamentais.

Grazas pola cobertura.

Escandaloso e inaceptábel. Só así se pode calificar o feito de que o Alcalde de Vigo, o socialista Abel Caballero, continue sen recibir á Asociación Veciñal "Val do Fragoso".

Hai case un mes e meio a asociación solicitaba ser recebida polo Alcalde para abordar o tema das humanizacións das avenidas da Florida e de Castrelos, despois de que Abel Caballero sistematicamente obviase á entidade socialmente máis representativa do barrio nun asunto que afecta de maneira directa á veciñanza residente.

Caballero si tivo a ben reunirse cos comerciantes de AETRAVI, e mesmo con outro colectivo formalmente non constituido, pero non tivo oco na axenda para recibir aos representantes dunha entidade que representa directamente a máis de 1200 familias do barrio, como é a AV Val do Fragoso.

O asunto xa revirte suficiente gravidade até aquí, pero se cadra adquire tintes inda máis inadmisíbeis cando consultamos a axenda de previsións do Alcalde, xulgade vós mesmas/os, esta é a axenda de mañá venres:

Previsións

venres, 30 de novembro 2007
10:00 O alcalde, Abel Caballero, reúnese con representantes do Colexio de Enxeñeiros Técnicos Industriais (SÓ GRÁFICOS)
10:30 O alcalde, Abel Caballero, recibe os directores dos centros comerciais que Alcampo ten na cidade (SÓ GRÁFICOS)
11:00 A concelleira de Medio Ambiente, Sanidade e Consumo, Chus Lago, xunto con representantes de Mercados vigueses, presenta una xornada de Sanidade nos Mercados Municipais
11:30 O tenente de alcalde, Santi Domínguez, visita o mercado do Progreso
11:30 O alcalde, Abel Caballero, recibe a representantes de IKEA (SÓ GRÁFICOS)
12:15 O alcalde recibe os representantes das Asociacións de Transportistas da cidade
12:30 O alcalde, Abel Caballero, presenta a nova normativa de acceso ao casco urbano de tráfico pesado e a sinalización
12:45 O concelleiro de Deportes, Xabier Alonso, presenta o Memorial Belarmino Alonso
14:00 O alcalde, Abel Caballero, clausura as III Xornadas sobre Tecnoloxías e Solucións para a Automatizacón Industrial
17:00 O alcalde, Abel Caballero, asiste ao XV aniversario da Titulación de Enxeñería de Minas
18:00 O tenente de alcalde, Santi Domínguez, e as concelleiras María Méndez e Elena Maure asisten á entrega dos premios Aproin "Edificio Galego 10"
20:30 Festival de Música de Vigo "Are-More"
20:30 O alcalde, Abel Caballero, asiste á cea-aniversario do Club Financiero de Vigo


¹(1) Información tirada da web do Concello de Vigo ^

O novo Plan Xeral de Ordenación Municipal, que como todo o mundo sabe é o documento que serve para regular o desenvolvemento urbanístico da cidade, leva alo menos tres anos de retraso.

En termos socioeconómicos este retraso supón un custe de oportunidade relevante. Vigo non está na cubeta sometida ao valeiro dun laboratorio, senón que está insertada nunha realidade global de competencia intermunicipal. Nos proximos anos determinarase cal é a cidade cabeceira do eixo Atlántico e da Eurorexión Galiza-Norde de Portugal, na que cidades como Oporto debuxanse como un competidor relevante.

Porén todo isto, inda que importante, situase no nível macro, alonxado do común dos mortais.

Pero ¿en que afecta ao conxunto da cidadanía? ¿que suporá o novo PXOM para o barrio?

De entrada cabe distinguir entre a cidadanía, entre a veciñanza, dous grupos diferenciados: propietarias/os e veciñanza.

Propietarios son aqueles que posúen os terreos que se desenvolverán urbanisticamente nos diferentes APR, xa que logo, son axentes implicados a un nível diferente ao dun veciño residente, no que ao seus intereses económicos, absolutamente lexítimos e comprensíbeis se refire.

A perspectiva fundamental, e a que tivo en conta a Asociación Veciñal "Val do Fragoso" cando acordou apoiar o PXOM nas súas liñas xerais, foi a da veciñanza. Sen entrar no concreto ou particular a respecto de coeficientes de edificabilidade, senón abordando a globalidade.

Para as/os veciñas/os do barrio o desenvolvemento do PXOM suporá varias consecuencias positivas:

1. A mellora dos suministros de electricidade e auga, que actualmente están nunha situación case crítica sobre todo na Espedrigada e na Carballa.

2. Máis zonas verdes e espazos de esparcemento. O PXOM inclue para cada APR (antes denominados PERIs) unha reserva de solo destinada a zona verde, que no caso do noso barrio está recollida nuns níveis máis que suficientes.

3. Solo dotacional. Unha das caracterísitcas máis positivas do deseño urbanístico do noso barrio no PXOM é unha reserva moi elevada de solo dotacional, é dicer, a porcentaxe de terreos que se van destinar a solo público, sobre o que poder edificar dotacións tan necesarias como centros de saúde, garderías, biblioteca, centro social para maiores...

4. Vivendas de promoción pública. Como é sabido o PXOM destina unha porcentaxe das vivendas construídas a vivendas de promoción pública para as que se fixan restriccións nos prezos máximos destas.

Fiando co do solo dotacional, hai que ser conscientes de até que non se aprobe o PXOM e comece a desenvolverse urbanisticamente as zonas da Espedrigada e a Carballa, o noso barrio non poderá superar o seu histórico défice dotacional e infraestructural xa que as administracións públicas non dispoñen de solo de titularidade pública para poder construir esas instalacións tan necesarias.

O venres 23 fun convidado xunto a representantes da Asociación Veciñal "Val do Fragoso", do Balaídos C.F. ou do colectivo de comerciantes AETRAVI, a un xantar co Tenente de Alcalde, Santi Domínguez, e con outros tres concelleiros.

Agradezo o convite feito por parte do Grupo Municipal do BNG, para participar nun xantar agradábel e que serviu tamén para trasladar aos edís nacionalistas as necesidades do barrio in situ.

Alí estaban Xabier Alonso, concelleiro de deportes, Xesús López Carreira, concelleiro de cultura, Elena Moure, concelleira de Patrimonio Histórico.

Tralo xantar, os asistentes percorreron unha parte significativa do barrio, dando a oportunidade aos colectivos sociais de explicarlle sobre o terreo os problemas e necesidades.

Santi Domínguez ao remate da comida, e antes de iniciar o paseo pola zona, afirmaba ser consciente de que haberá problemas aos que non se poida dar solución inmediata ou a que se lle de non sexa definitiva ou plenamente satisfactoria. Pero o importante é que o Tenente de Alcalde demostrou unha profunda responsabilidade política ao afirmar que o dialogo, entendido como un instrumento útil para solucionar problemas, será o leit motiv desta lexislatura no que compete as áreas dirixidas polos nacionalistas.

Pero non quedou aí. Nos temas que se refiran ás áreas socialistas, Santi afirmou que non escurrirán o bulto, e como parte do governo municipal, farán todos os esforzos que fagan falta para trasladar as necesidades e axudar a dar respostas efectivas.

Independentemente de que este tipo de declaración son verificadas ou corrixidas trala avaliación do paso do tempo, e que este tipo de xestos inda que se agradecen non debe supor relaxar nen o máis minimo o nível de exixencia social ao governo municipal, o certo é que existe un alto contraste.

Contrasta o talante cercano, dialogante, de proactividade á hora de escoitar á cidadanía, demostrado nesta ocasión polo Grupo Municipal do BNG, cun Alcalde e os seus concelleiros do grupo socialista que siguen sen recibir á asociación veciñal, ou botando balóns fora en relación ao escasisimo orzamento municipal destinado ao barrio.

Por non falar das bravuconadas en forma de promesa electoral do actual Alcalde en relación á construcción dun campo de fútbol, onde o antigo campo de Leri, na rúa Pablo Iglesias, ao que sorpresivamente non destina nen un só euro no Proxecto de Orzamentos Municipais.

1 [2]