CENTRO DE DESENVOLVEMENTO RURAL PORTAS ABERTAS

Nos pasados días 12 e 21 de Maio 2009, dentro dun marco de colaboración entre o CEIP de Castrelo do Val e a asociación do Centro de Desenvolvemento Rural ?Portas Abertas? vimos de levar a cabo unhas actividades, das que nos consideramos moi satisfeitos/as.

A nosa asociación sempre preconizou, que a comunidade escolar, non é unha illa, e as xeracións que van a protagonizar o noso futuro, deberían manter un contacto continuo e próximo co entorno, e non so a nivel medioambiental, paisaxístico e cultural, que dacotío vimos celebrando, senón que había que dar un paso máis para vincularnos coa realidade, coa parte productiva, coas potencialidades, coas empresas, cos protagonistas do noso desenvolvemento e as súas traxectorias polas xeracións que nos fixeron chegar ata aquí.

Así pensamos que os nenos e nenas do colexio de Castrelo do Val, que ademais no seu programa formativo estaban a tratar temáticas dos Sectores Productivos, deberían ver toda esa teoría na realidade, e para iso contactamos con algunhas empresas, para que puideran apreciar que toda a teoría, tiña unha plasmación sinxela no seu entorno, onde viran a veciños/as con iniciativas empresarias exitosas, que xeran traballo, que procuran riqueza á nosa sociedade pero dunha forma próxima, coñecida e real.

Agradecemos ás catro empresas ?Ecoagro, Gargalo, Aserradeiro de Pedra Castor, Agroalimentarias Antonio Martín- a súa disposición, e o seu esforzo, empresas nas que tamén apreciamos coincidencia coas nosas inquietudes, e que fixeron agradables para os nenos/as as visitas e as súas instalacións, onde se mostraron dispostos a explicar os procesos que estaban a desenvolver.

Tamén como colofón, sentímonos especialmente contentos/as por ser capaces de por un día trocar os habituais profesores/as que ensinan aos nosos nenos e nenas, por uns catedráticos da vida, tres persoas como Manuel Vaz, Pablo Serrano e Xosé Lois Vaz, que dende xeracións distintas foron quenes de expoñer as súas traxectorias profesionais e vivenzas persoais en eidos tan distintos como son os dun vello canteiro, un vocacional garda forestal e un innovador da gandeiría ecolóxica.
Os nenos/as, e os que tivemos o gusto de estar presentes puidemos ver como por un día, Avós, Amigos e coñecidos dalgúns dos nenos de Castrelo foron os protagonistas e abriron a súa vida coas asentidas exposicións e sobre todo coa enchenta de preguntas ás que foron sometidos todos eles polos nenos e nenas, boa proba do éxito da iniciativa.

Desto nós tamén aprendemos, unha vez máis, que os avós, os nosos maiores seguen sendo unha fonte inagotable de exemplo e ensinanzas.

Por unha vez, ímonos permitir darnos a nós mesmos (Colexio de Castrelo do Val e Portas Abertas) a noraboa da iniciativa.

José Paz Paz, Presidente CDR Portas Abertas.