DE LINGUA EN LINGUA


BLOGUE DE LINGUA GALEGA DO CPI DE PONTECESURES
Hai quen bota a lingua a pacer con moita facilidade; outros chegan a perderse pola lingua ou teñen que morder a lingua para non irse da lingua. Nós, neste caderno de bitácora, imos tirar da lingua para dicir todo aquilo que temos na punta da lingua aínda que fiquemos coa lingua fóra. Tentaremos non ser lixeiros de lingua, ou si, se cadra...pero nunca malas linguas...Iso deixámosllelo ás linguas viperinas, que cospen veleno. Quizais cheguemos a ter don de linguas, mais o que nos importa de verdade é que a nosa lingua vaia de lingua en lingua.

O meu perfil
 CATEGORÍAS
 WEBS RECOMENDADAS
 FOTOBLOGOTECA
 DESTACADOS
 BUSCADOR
 BUSCAR BLOGS GALEGOS
 ARQUIVO

"SON D'ALDEA", TRADICIÓN E FUTURO EN PALAS DE REI. ACTIVIDADE PARA 3º DE ESO


Que é Son d’Aldea?
Son d’Aldea é unha actividade dinamizadora da cultura rural que procura amosala, proxectala e dignificala a través dunha xornada de participación activa das persoas que se acheguen a Albá (Palas de Rei, Comarca da Ulloa) nesa xornada festiva.Trátase dunha aproximación ás coordenadas sociais e culturais do rural no pasado, e dunha reflexión sobre novas vías de ruralidade no presente.

Un recoñecemento á súa riqueza e á súa heteroxeneidade a través dun espectáculo teatral que transita por diferentes escenarios e que ofrece unha visión de diversos oficios do rural galego a mediados do século XX; dun Xantar con produtos elaborados por xente que traballa no rural na actualidade e dunha Romaría Tradicional que pechará este evento.

Esta xornada acompáñase dunha Mostra de Artesanía Alimentária e outra de Oficios Artesáns, que pretenden amosar as novas formas da economía na aldea. Unha radiografía subxectiva da situación do rural cargada de emoción e sensibilidade e con vontade de reflectir a filosofía vital do ser humano que habita esa contorna.

O poeta Carlos Negro reflexiona neste artigo de opinión sobre a importancia deste evento:

http://www.sermosgaliza.gal/opinion/carlos-negro/santiago-alba/20160906135906050795.html

Despois de leres o artigo, responde a esta cuestión:

1. Explica por que ás distintas actividades do festival "Son d'aldea" lles acaen estas características:
"recreación etnográfica"
"dignificación cultural"
"manifestación lúdica"
"carácter reivindicativo"
"carácter divulgativo"

2. Pon ao lado de cada característica a actividade do festival que mellor lle acae.

3. Indica cales son as medidas que se sinalan no vídeo para revitalizar o medio rural en Galicia.

4. Redacta un texto no que expliques cales cres ti que son as vantaxes e desvantaxes de desenvolver a vida profesional no medio rural na actualidade. Reflexiona tamén sobre as medidas políticas que se deberían adoptar para que aumente a poboación nas aldeas e, finalmente, explica un proxecto profesional que che parecería interesante para levar a cabo nelas. Lembra que o teu texto debe ter tres parágrafos.

Se queres coñecer máis sobre este evento visita esta páxina web:
https://sondaldea.wordpress.com/
Comentarios (0) - Categoría: DE ACTUALIDADE - Publicado o 15-09-2016 10:44
# Ligazón permanente a este artigo
SERIE DE XOGUETES NATURAIS: ASUBÍO DE LANDRA.ACTIVIDADE PARA 1º DE ESO

Xosé López González e Xosé Manuel García son dous maiores coa mesma ilusión no maxín que cando eran nenos. Manteñen unha sección fixa no Noticieiro galego denominada "Picaraxadas", que revisaremos con certa frencuencia en 1º e 2º de ESO para descubrir xoguetes que temos á altura de calquera peto, que non deixan pegada contaminante nin xeran desigualdades ou discriminacións sociais. Iso si, debemos fabricalos nós mesmos empregando o que a natureza nos ofrece en cada estación.
Comezamos o curso buscando debaixo dos carballos o froito que tiran no chan agora que remata o verán: as landras ou belotas. Con elas poderemos fabricar chifres cos que asubiar.

1. Lemos con atención o texto.

http://www.noticieirogalego.com/chifre-ou-asubio-de-landra/.

2. Procuramos nun dicionario virtual as seguintes palabras: fastío, lecer, enredar, asesoramento, mester, suplir, furabolos, matapiollos, carapucho, fenda. Intentamos explicar o significado sen copiar a defición literal que dá o dicionario. Indicamos tamén, coa axuda do dicionario se fose necesario, a categoría gramatical das palabras anteriores.

3. Respondemos ás seguintes preguntas de comprensión do texto:
a) Con que laboura agropecuaria asocian os autores do texto a elaboración dos chifres?
b) Con que finalidade acostumaban asubiar os rapaces?
c) Cita as tres maneiras das que se fala no texto para asubiar.

4. Na casa, intentamos seguir os pasos da elaboración do chifre. Se consegues un bo resultado podes amosalo na clase o seguinte día.

5. Redacta un texto na casa de máis de 10 liñas no que expoñas a túa experiencia na elaboración deste xoguete natural. Debes seguir este guión e lembra que cada idea do mesmo desenvolverase nun parágrafo independente:
-Introdución: explicación resumida da actividade.
-Partes do proceso que che resultaron máis complicadas ou divertidas.
-Anécdota/s curiosa/s que sucederon durante o proceso.
-Reflexión persoal sobre esta actividade.

6. Copia no cartafol de galego do teu computador o texto, presentándoo adecuadamente:

-Comproba nun corrector ortográfico que todo estea ben e corrixe aquilo que faga falta.
-Tipo de letra: Times New Roman, cor negra.
-Tamaño: Título 18, corpo do texto 11.
-Espazo entre o título e o corpo do texto.
-Título centrado na páxina e en maiúsculas.
-Espazos entre os distintos parágrafos.
Comentarios (0) - Categoría: RISOS E SORRISOS - Publicado o 14-09-2016 10:51
# Ligazón permanente a este artigo
Iniciamos este curso en 4º de ESO coñecendo este proxecto musical do cantante Sérgio Tannus, que afonda nas conexións de Galicia co ámbito cultural da lusofonía.



1. Despois de ouvires a canción, responde estas cuestións:

-Que mensaxe se intenta transmitir a través do acrónimo "brasilego"?

-Que elementos culturais brasileiros e galegos se mencionan na canción?

-Tamén se inclúen nela algúns "falsos amigos" e palabrs non coincidentes entre galego e portugues

Escoitamos un alalá na voz de Uxia:



Tamén se menciona no texto a Narf, que escoitamos nesta canción:


Comentarios (0) - Categoría: O FARDEL DOS SONS - Publicado o 14-09-2016 10:45
# Ligazón permanente a este artigo
O ASTEROIDE
Xa hai unha semana desa noticia. Eu aínda non mo creo, ou iso intento pensar. Non paran de saír na televisión ou nas redes sociais fotos dese gran asteroide que se dirixe rapidamente cara á nosa fráxil Terra. Os ricos e multimillonarios están fabricando enormes búnkers soterrados a grandes profundidades, só para eles, para as súas familias e a súa fortuna. O resto de persoas temos que esperar, sen poder facer nada, a nosa morte. A NASA e outras axencias espaciais, como a ESA, están traballando contrareloxo para evitar esta gran catástrofe.
Como dixen antes, confío en que todo isto sexa unha equivocación, que, debido a un erro de cálculo, a órbita deste gran satélite non estea en rumbo de colisión.
Hai moita xente que pensa coma min, pero hai moita máis que pensa o contrario. Vandalismo, roubos, atracos a tendas, pasan todos os días. As persoas queren vivir as últimas semanas que lles quedan da súa vida ao grande, sen importar as consecuencias. Faltan dous meses. O segundo día de outubro producirase esta tremenda apocalipse.

Só queda un mes. A medida que van pasando as horas, vou perdendo máis a miña esperanza. Un pequeno fragmento que se desprendeu do gran asteroide chocou en Rusia, preto dunha cidade. O tremor sentiuse ata en Finlandia. Locais pechados, coches ardendo, xente descontrolada e borracha pola rúa... A policía non pode conter todo este descontrol. Pero non todo son cousas malas. Polas noites celébranse grandes festas nas que a xente se divirte e baila. A NASA lanzou onte unha nave espacial cunha carga nuclear dentro. O seu obxectivo é chocar contra o asteroide para desviar a súa órbita. Dentro de dous días chegará ata o seu destino. En moitos países de Europa estanse construíndo búnkers públicos, pero por desgraza hai que pagar moito diñeiro para reservar unha praza, e non hai espazo para todos os millóns de persoas que somos no mundo.

Unha semana para o impacto; xa é oficial. O xuízo final está preto. Nostradamus tiña razón, o mundo que nós coñecemos acabarase debido a un gran asteroide. Eu estou nun avión que se dirixe a Pontevedra. Quero pasar esta última semana cos meus pais. Xa hai tres anos que non os vexo.
Moitos gobernos de países asiáticos e africanos caen na anarquía, a xente non obedece as leis, non pagan os impostos, hai manifestacións violentas e os cárceres, atestados de xente.
Xa hai tempo que baixei do avión e agora estou percorrendo as estradas de Pontevedra montado nun taxi. Miro pola ventá. Os parques están cheos de nenos xogando, divertíndose, a maioría alleos a todo o que está pasando. Os pais miran para os seus fillos con cara de alegría, mesturada con tristura e bágoas.
O taxi para diante dun edificio de pedra, antigo, verde polo musgo. É a casa onde me criei, xa case non a recoñecía. Toquei ao timbre e pouco tempo despois un señor xa vello e de pelo cano abriume. Deixo as maletas no chan e apértoo; é meu pai.

Vintecatro horas, vintecatro escasas horas para a extinción masiva de todo o que estea na superficie da Terra. A xente aférrase ao único que lle queda: a fe. As igrexas cheas de devotos católicos e incluso de persoas desesperadas que buscan consolo en Xesús e en Deus. Eu nunca fun moi católico, a diferenza dos meus pais.
Unha gran bóla de fogo movíase lentamente polo ceo azul. Onte á noite este gran asteroide apareceu no firmamento, e segue aí. Vese tan preto... pero en realidade aínda está moi lonxe, o suficiente para desfrutar un pouco máis da vida. A NASA segue intentando ser a salvadora da Terra e o superheroe de todos os humanos que habitamos nela, pero en balde. Xa son decenas as misións espaciais fallidas, miles de millóns de dólares investidos nesta causa perdida.
Unha gran festa celebrarase esta noite, xusto cando o asteroide pasará a ser un gran meteorito. Eu non vou ir, prefiro pasar os meus últimos momentos cos que máis me importan. Toda a miña familia quedamos no xardín da casa dos meus pais para poder ver o noso asasino no seu máximo esplendor.
Últimos cinco minutos da miña vida. Xa é de noite, pero parece que estamos a plena luz do día. A lúa xa non se ve e non hai nin unha estrela no ceo. Os meus sobriños están mirando fascinados a gran esfera luminosa, os meus primos e irmáns están abrazados ás súas esposas. O meu pai está agarrando á man da miña nai, e unha pequena bágoa esváralle polas meixelas. Segundo a radio, quedan uns poucos segundos para que impacte na costa leste de Florida.
Un amplo e estresante silencio. Por primeira vez en meses, toda a cidade está en silencio. Non hai coches, non hai xente pelexando pola rúa, nada. Un cegador feixe de luz atravesa o ceo nocturno e fainos pechar os ollos a todos. Despois chegou cun pouco de retardo un gran ruído e unha calor abrasadora. Abro os ollos e o que vexo é unha gran masa de lume destruíndoo todo ao seu paso.

NOSTRADAMUS

CENTURIA II, Cuartilla 91

"Ao amencer un verá un gran lume,
Ruído e luz estendéndose cara Aquilón (Norte)
Dentro do globo, morte e un escoitará berros,
Polo medio de aceiro, lume, fame, morte esperando."



Xenxo Santiago Lorenzo.
4º ESO Curso 2015/2016
Comentarios (0) - Categoría: A FORXA DAS LETRAS - Publicado o 19-06-2016 12:18
# Ligazón permanente a este artigo
PEREGRINO

Era un señor, que xa tiña o pelo branco. Pareceume xeneroso. Tería eu arredor de oito anos cando este entrou pola porta do bar dos meus pais. Era un peregrino; estaba a facer o camiño de Santiago só. Miña nai preparoulle unha tapa especial, porque parecía que tiña fame. Polo visto viña de lonxe. Contounos algunhas historias da súa vida. A min deume moita pena cando nos contou que perdera a súa muller e a súa única filla. Que era a familia que tiña. Elas tiveran un accidente de coche. Todo o que tiña, en tan só un segundo xa non o tiña. E víase el só neste mundo. Sorprendeume o forte que era, el a pesar dos últimos desgrazados acontecementos que vivira, tiña esperanzas na vida. O caso é que antes de que lle ocorrera esta desgraza, ía facer o camiño de Santiago coa súa muller e a súa filla. Pero como iso non puido ser, decidira facelo só, en honor a elas.
Recordo que me regalara unha figura feita de arame… A forma da figura era dun peregrino, o cal se podía impulsar cun dedo e parecía que corría. Esta figuriña se non recordo mal ten unha historia tamén, a cal penso que nunca se me esquecera. Sempre que vexo a figuriña vénme a mente o peregrino daquel día, era tan simpático! Lémbrome como se ocorrera onte. As palabras do peregrino foron: ¨Cando túa nai che bote a bronca ou precises axuda, colle esta figura e impúlsaa. Cando o peregrino estea correndo… eu estarei vindo como un raio para axudarche¨.
Cando só tes oito anos isto chega a ser impresionante, como os contos de Disney, onde todo se converte en real. O certo é que despois de tanto tempo ao ver a figura, pregúntome: Que sería deste señor? Espero que tivera algo de sorte na súa vida. Porque era unha gran persoa, ensináballe un sorriso á vida, por moi mal que o estivera a pasar. Decateime que neste mundo hai persoas boas. Regálanche un sorriso e fan que ti te sintas ben.

Jenny Garanger Domínguez

3º ESO
Comentarios (0) - Categoría: A FORXA DAS LETRAS - Publicado o 25-05-2016 11:32
# Ligazón permanente a este artigo
VISITA Á CASA MUSEO DE MANUEL MARÍA

O 7 de abril o alumnado participante no club de lectura e de 4º de ESO realizou unha excursión á Terra Chá, patria literaria e biográfica de Manuel María, para visitar a súa Casa-Museo e outros lugares emblemáticos para entender a súa obra: As Penas de Rodas, a Carballeira de Santa Isabel en Outeiro de Rei e o Castro de Viladonga.

Deixamos aquí o enlace á páxina web da fundación do autor para pescudardes sobre a súa vida e obra:

http://www.casamuseomanuelmaria.gal/portada.htm;jsessionid=C8430274F41CAA278A58723533AADB25
Comentarios (0) - Categoría: A FORXA DAS LETRAS - Publicado o 08-04-2016 12:17
# Ligazón permanente a este artigo
O BALLÓN. XORNAL DE METEOROLOXÍA
Este curso os departamentos de Lingua Galega e Bioloxía decidimos poñer en andadura esta actividade para o Plan Proxecta "Meteocesures", na que colabora tamén o ENDL do centro. Trátase dun breve xornal, que pretende ter continuidade e ser máis ambicioso en próximos anos, que na edición deste curso recolle dúas noticias, unha reportaxe e unha crónica de temática meteorolóxica, redactadas nas aulas de 1º e 2º de ESO de lingua galega, co asesoramento e a colaboración do Departamento de Bioloxía.

A continuación, explicamos como organizamos o traballo nas aulas:

1. Decidimos cales foron os temas de maior interese informativo deste curso:

-A escaseza de choivas e as altas temperaturas do outono de 2015.

-A acumulación de choivas na 1ª quincena de xaneiro.

-As consecuencias dun trebón extraordinario en 1939 en Pontecesures.

-Os datos fenolóxicos observados este ano no CPI de Pontecesures.

2. Tratamos o tema dos xéneros xornalísticos na aula de lingua galega.

Para iso baseámonos na información que incorpora a seguinte ligazón:

http://cotovia.org/proxecto/tex/tex_ud4_03.html?orix=ud4&tare=12&tema=tex_ud4_03.html

3. Decidimos que xénero xornalístico se adaptaba mellor a cada un dos temas seleccionados e a cada nivel educativo:

-REPORTAXE: O outono do 2015 (2º ESO)
-NOTICIAS: Inundacións de xaneiro e datos fenolóxicos (1º ESO)
-CRÓNICA: O trebón do 39 (2º ESO)

4. Incorporamos ligazóns neste blog para que o alumnado de 1º e 2º buscase información sobre estes temas nas aulas de lingua galega.


ENLACES DE INTERESE XERAL PARA A REDACCIÓN DO BALLÓN



"METEOCESURES"

BLOG DO PLAN PROXECTA DE METEOROLOXÍA DO CPI DE PONTECESURES

http://meteocesures.blogspot.com.es/p/galego.html

CANLE DE YOUTUBE DO PLAN PROXECTA METEOCESURES


https://www.youtube.com/channel/UCo4h2pq7Rxu1c2Ns34hnP4A

DATOS DA ESTACIÓN METEOROLÓXICA DO CPI DE PONTECESURES


http://www2.meteogalicia.es/galego/observacion/climantica/resumostaboas.asp?Nest=20154&x=8&y=-44&red=110&idprov=3

CAMBIO CLIMÁTICO


http://cambioclimatico.cmati.xunta.es/portada

http://siam.cmati.xunta.es/presentacion-do-proxecto-cligal



LIGAZÓNS E INDICACIÓNS PARA TRABALLAR CADA UN DOS TEMAS NA AULA DE LINGUA GALEGA:

A) A FENOLOXÍA:

-PROXECTO TÉMPORAS. PÁXINA DE FENOLOXÍA

http://temporas.cesga.es/index.htm

Baseándonos na información que nos ofrece esta páxina, elaboramos unha noticia que recolle os datos fenolóxicos obtidos nesta primavera no CPI de Pontecesures. A noticia pode seguir este guión:

0. Pensa cal pode ser o TITULAR DA NOTICIA.
1. Que é a fenoloxía?
2. Que é o proxecto Témporas?
3. Fenoloxía e cambio climático.
4. Especies que investigamos no CPI de Pontecesures ao longo deste ano.
5. Análise dos resultados e comparación cos obtidos outros anos.
6. Conclusións.



B) INUNDACIÓNS DE XANEIRO DE 2016.


TIPO DE ARTIGO: NOTICIA XORNALÍSTICA

GUIÓN:
1. Que aconteceu? Cando? Onde? Cales foron as consecuencias? Cal foi o tratamento que lle deron a esta noticia os principais medios de comunicación?
2. Comentario dos datos de precipitación recollidos na nosa estación meteorolóxica o día 13 de xaneiro.
3. Finalmente, pon en relación o acontecido nese día coa situación meteorolóxica habitual da primeira quincena de xaneiro. Houbo outros casos de alerta meteorolóxica durante eses días?

FONTES DE INFORMACIÓN:

TELEDIARIO MEDIODÍA DA TVE DO 14 DE XANEIRO
http://www.rtve.es/alacarta/videos/telediario/telediario-15-horas-14-01-16-lengua-signos/3444402/

AVISO DE ALERTA METEOROLÓXICA DO TELEXORNAL DA TVG DO 13 DE XANEIRO
http://www.crtvg.es/informativos/activase-o-aviso-por-chuvia-1731191


ARTIGO NO BLOG 4GOTAS SOBRE O TEMPO DA PRIMEIRA QUINCENA DE XANEIRO EN GALICIA
http://www.4gotas.com/mas-tiempo/blog-noticias-meteorologia/lluvia-enero-2016/?lang=gl

INFORMACIÓN SOBRE OS RÍOS ATMOSFÉRICOS E TEMPORAIS EN GALICIA

http://galego.lavozdegalicia.es/noticia/galicia/2016/01/10/rios-atmosfericos-procedentes-golfo-mexico-generan-lluvias-extremas/0003_201601G10P7991.htm


C) UN OUTONO (2015) MÁIS CÁLIDO E SECO DO NORMAL
TIPO DE ARTIGO: REPORTAXE

GUIÓN:

1. INTRODUCIÓN. RESUMO DO RECOLLIDO NO ARTIGO DE 4 GOTAS.

http://www.4gotas.com/mas-tiempo/blog-meteorologia-4cosas/noviembre-diciembre-seco-calido-galicia/

2. ANÁLISE DOS DATOS DE OUTONO DE TEMPERATURAS E PRECIPITACIÓN RECOLLIDOS NO INFORME DE METEOGALICIA.

http://www.meteogalicia.es/datosred/infoweb/clima/informes/estacions/anuais/2015_gl.pdf

3. CONTRASTAR ISTO COS DATOS QUE HAXA DA NOSA ESTACIÓN METEOROLÓXICA.



D) REDACCIÓN DUNHA CRÓNICA SOBRE UNHA TREBOADA DO ANO 1939.

-Resumo do acontecido baseándonos no relatado en dous xornais da época:

"El Faro de Vigo"



El Pueblo Gallego



-Incorporar a información de entrevistas do alumnado a persoas maiores que viviron o acontecido.

-Redacción do artigo aplicando o estilo xornalístico da crónica.


5. Realización de distintas portadas para o xornal e elección dunha delas nunha reunión do ENDl.

6.O RESULTADO FINAL: XORNAL O BALLÓN. MAIO DE 2016

Cada alumno redactou no seu ordenador portátil o artigo que se pedía para cada nivel. Logo lemos na clase distintos resultados e seleccionamos o que consideramos que tiña máis calidade, facendo as correccións oportunas:


o Ballón. Xornal de Meteoroloxía Do CPI de Pontecesures

Comentarios (0) - Categoría: O BALLÓN. ANUARIO METEOROLÓXICO DO CPI - Publicado o 22-01-2016 11:59
# Ligazón permanente a este artigo
2016: O ANO DAS IRMANDADES DA FALA E MANUEL MARÍA
Comeza un novo ano con conmemoracións importantes coa lingua galega de por medio: a celebración das Letras Galegas, cuxo homenaxeado é Manuel María, e o centenario da creación das Irmandades da Fala na Coruña, unha importante entidade que loitou na promoción, dignificación e normalización do galego na etapa previa ao franquismo. Enlazamos este artigo do xornal Praza que comenta isto polo miúdo.

http://praza.gal/cultura/10883/un-ano-para-lembrar-a-manuel-maria-e-as-irmandades/
Comentarios (0) - Categoría: DE ACTUALIDADE - Publicado o 06-01-2016 17:21
# Ligazón permanente a este artigo
A DIVERSIDADE LINGÜÍSTICA NO MUNDO
Este mapa conceptual sintetiza a información do texto que aparece na páxina 68. "O plurilingüismo. Situación e status das linguas".

Comentarios (0) - Categoría: TEORÍA 3º ESO - Publicado o 11-11-2015 14:17
# Ligazón permanente a este artigo
"MEDO NA ESCURIDADE" RELATO GAÑADOR DO CONCURSO DE RELATOS DE TERROR 2015 NA CATEGORÍA DA ESO
O reloxo da cociña empeza a soar. Xa son as dúas da noite. Estou falando cun amigo polo móbil. Teño ganas de ir ao baño. Apago e deixo o móbil enriba da cama. Levántome e vou moi paseniño ata o corredor. Se os meus pais espertan e descobren que non estou durmido a estas horas, castigaranme. Abro a porta do baño moi amodo, prendo a luz e pecho a porta. Ao acabar, tiro da cadea. Por sorte é moi silenciosa, e volvo á miña habitación.
Cando xa estou a punto de meterme na cama, oio un ruído, como de algo que cae contra o chan. Ese ruído vén da habitación dos meus pais. Decido ir para ver que pasou. A porta está aberta, e a luz da lúa entra pola fiestra e ilumínao todo.
Póñome á beira da porta e inclino a cabeza para ver o que hai aí dentro. No chan hai un regueiro de sangue. Sígoo coa mirada ata chegar a un corpo inerte, creo que é o meu pai. Contra a xanela vese unha figura estraña, cun brazo longo e punzante, semellante ao dunha gran espada, e no seu extremo está a miña nai.
Fago un gran esforzo por non berrar, porque faría que o asasino se decatase de que estaba alí, e viría matarme a min tamén. Ese ser xira a súa cabeza cara a porta onde estou eu. Saio correndo e o único sitio onde se me ocorre agocharme é na miña habitación. Noto como os seus pasos dirixíndose ata onde estou eu e, nun acto de nerviosismo, métome na cama e fágome o durmido. Poucos segundos despois entra pola porta.
Eu estou cos ollos pechados pero o suficientemente abertos para poder ver.
O home queda mirándome fixamente, sen moverse. Dá a volta e vaise. Estou pensando en saír correndo cara á porta da saída, pero seguro que me atrapa polo camiño. Outra posibilidade é tirarme pola fiestra. A miña habitación está nun primeiro piso, tal vez non me faga moito dano, pero é mellor iso a que te maten atravesado por unha espada.
Xa é demasiado tarde para poder facer nada, o home volve á miña habitación. Ten aos meus pais nos ombreiros. Tíraos ao chan. Colle ao meu pai e séntao nunha cadeira. Xíralle a cabeza para que mire cara a min. Escóitase como as vértebras do pescozo rompen e estalan. Fai o mesmo coa miña nai.
Intento non chorar nin moverme para que pense que sigo durmindo. El tamén colle unha cadeira e senta. Os minutos convértense en horas, cada vez desespérome máis. Empezo a pensar que está xogando coa miña mente, pero non o conseguirá. Tal vez canse axiña e se marche.
Levántase da cadeira e crava no peito do meu pai a súa espada . Achégase a min, mírame e logo escribe algo na parede.
Ao acabar, marcha ao corredor, pecha a porta e vaise. Oio como rompe unha ventá. Levántome dun chimpo da cama e miro pola fiestra. Está camiñando pola calzada. Vai vestido de negro, cun sombreiro, unhas botas de coiro e unhas luvas, pero non ten nin unha pinga de sangue nin ten esa especie de espada coa que matou aos meus pais. Párase, dá a volta e mira a onde estou eu. Agáchome rapidamente para que non me vexa. Pasados uns segundos, volvo mirar e xa non está.
Os raios da lúa iluminan toda a habitación e fai que poida ver os cadáveres dos meus pais. Os dous miran cara a min cos ollos abertos e cun sorriso sinistro.
De repente acórdome que escribira algo na parede. Xírome e leo o que puxo: “Sei que estás esperto”.

Xenxo Santiago Lorenzo.
4º ESO
Comentarios (0) - Categoría: A FORXA DAS LETRAS - Publicado o 04-11-2015 20:01
# Ligazón permanente a este artigo
© by Abertal