 Entre os días 4 e 7 de Agosto asistimos na Exposición Universal de Zaragoza á Tribuna da auga, concretamente á Semana Temática "Auga e Sociedade".
Este foro trata de recompilar o coñecemento universal para contribuír a reorientar e mellorar os modelos e sistemas vixentes en materia de auga e desenvolvemento sostible.
Expertos de todas as partes do mundo, técnicos, universitarios, autoridades, xornalistas, axentes sociais, ONGs, empresarios, políticos, etc. dialogamos para intentar buscar solucións e achegar ideas que se recollan na Carta de Zaragoza, que pretende ser o documento guía que estableza as pautas dunha nova cultura en materia de auga e desenvolvemento sostible, non só para diagnosticar o problema, senón que achegue solucións ao desenvolvemento da política mundial da auga nos próximos anos.
Nestes días nos que falamos de auga e sociedade, quedou patente de xeito claro que ademais da importancia da comunicación e a educación, a participación cidadá é clave para resolver os problemas actuais da auga. Pequenos proxectos como o noso axudan a concienciar ás persoas da importancia de conservar os recursos naturais, porque se realizan baseándose nun modelo de xestión e desenvolvemento que vai desde abaixo cara arriba, isto é, desde os propios cidadáns cara ás institucións. Recuperar o patrimonio e a cultura da auga, así como tradicións pasadas que axuden a comprender como os nosos antepasados usaban os recursos naturais de forma ordenada, é clave para facer comprender que a auga é un ben prezado, que non se valora na súa xusta medida porque en países como o noso disponse del con facilidade. É necesario espertar sentimento na cidadanía, para que defendan os recursos naturais como propios.
Non será suficiente só coas decisións políticas dos grandes organismos mundiais, será igualmente importante que as asociacións máis próximas fagamos de interlocutores para implicar á cidadanía, para unirnos na procura do respecto do que a natureza dános, e que isto non sexa motivo de enfrontamento entre os pobos.
Este novo cambio de mentalidade vén provocado sobre todo pola aceptación de que estamos ante un cambio climático, ao que hai que buscarlle solucións urxentes e estas pasan por unha nova cultura que renove o valor social, espiritual e económico da auga, en definitiva, que actualice a antiga cultura da auga dos nosos antepasados.
Por todo isto, para o Proxecto Esmelle, para os voluntarios e para Ferrol en xeral debe ser MOTIVO DE ORGULLO, que participemos neste foro que será referente mundial nos próximos anos en política de auga e desenvolvemento sostible, xunto a grandes expertos de diversos países do mundo.
Proxecto Esmelle
Asociación de veciños Val de Esmelle |
