O RECANTO DE MIK


LER, COMPARTIR, DISFRUTAR E APRENDER COA BIBLIOTECA
Este blog quere ser un lugar de encontro e comunicación onde compartir experiencias en torno á lectura, a biblioteca escolar e a educación en xeral.
http://www.edu.xunta.es/biblioteca/blog/


Counter
benvidosempty


Os teus comentarios


O MEU PERFIL
bibliocole@gmail.com
 ETIQUETAS - SECCIÓNS
 LIGAZÓNS
 FOTOGALERIA
 BUSCADOR
 ARQUIVO

ALMORZO CON BEIZOS BRANCOS
O alumnado de terceiro e cuarto de primaria participou esta mañá na actividade “Almorz@ con Beizos Brancos”, un programa organizado pola Asociación Galega de Cooperativas Agroalimentarias (AGACA) e a Obra Social “La Caixa”, que ten por obxectivo difundir fórmulas nutricionais sas entre os escolares de Galicia. A actividade incluíu unha charla didáctica sobre alimentación, exercicios lúdicos e un almorzo equilibrado e con produtos naturais.
A mensaxe que se quere trasladar tanto aos nenos e nenas como ás súas familias afonda na importancia que ten o almorzo no rendemento físico e académico dos escolares. Tal e como explicou María Fernández, a dietista que impartiu a charla, é fundamental ter en conta os valores nutricionais desta primeira comida do día, recomendando incluír nela as froitas de tempada e os produtos lácteos e evitar alimentos procesados industrialmente que achegan un exceso de azucres pouco beneficiosos para a saúde.
Para ilustrar a charla educativa, repartíronse almorzos equilibrados compostos por pan con aceite de oliva, mandarina e leite adozada con cacao puro e mel. Ademais, os nenos e nenas aprenderon o proceso do leite, desde que se extrae das vacas ata que chega aos seus fogares.


Por certo, unha chuscada: a TVG grabou a actividade!! Agardamos ver axiña a reportaxe e saír tan guap@s como os nen@s que aparecen AQUÍ
Comentarios (0) - Sección: Varios - Publicado o 11-11-2016 20:56
# Ligazón permanente a este artigo
ESCORNABOTS
Desde o curso 2015/16 vense desenvolvendo un proxecto pioneiro, unha iniciativa incluída no Plan LÍA de Bibliotecas Escolares que está destinada aos centros de infantil e primaria que están integrados no Plan de mellora de bibliotecas escolares
Podemos acceder ao texto da convocatoria do curso pasado, recollido no Blog de Bibliotecas escolares de Galicia. VER CONVOCATORIA. Pero...

Que é un Escornabot?

Escornabot é un proxecto de código/hardware aberto que ten por obxectivo achegar a robótica e a programación aos nenos e nenas. Podedes atopar moita información sobre estes sinxelos robots na páxina ESCORNABOT. Se vos interesa este proxecto, podedes acceder ás distintas experiencias que se están desenvolvendo nos centros seleccionados para implementar esta novidosa alternativa para traballar a robótica nas escolas que se recollen no artigo Aprendizaxe por descubrimento, ou como facer andar ao escornabot, relacionados no blog das Bibliotecas Escolares de Galicia.
Que vos parece, amiguiños?? A que é chulo? Ao mellor animádesvos a participar para a próxima convocatoria!!!! Eu creo que o pasaríamos xenial!!
Moitos bicos ratunos e a experimentar!!!
Comentarios (0) - Sección: Tics - Recursos - Xogos - Publicado o 06-11-2016 21:58
# Ligazón permanente a este artigo
MAGOSTO 2016
Aínda que o tempo non axudou, a festa do magosto resultou moi animada e superdivertida. Os preparativos comezaron días antes elaborando colares, coroas e cestiños para as castañas. O alumnado estivo moi creativo:
Alumnado de 5º de EI
Os nenos e nenas de 5º de EP encargáronse de facer uns preciosos cartaces para empregar durante os xogos:

O ximnasio do centro foi o campo de xogos onde tod@s gozaron pasando polas distintas "estacións" con propostas inxeniosas e que "molaban" moito.
Para finalizar, chegou a papatoria das riquísimas castañas asadas que nos tiña preparadas Alfonso, o noso querido conserxe. Queremos dar as GRAZAS e unha agarimosa aperta á profe MARILUZ e ao profe VICENTE, sempre dispostos a brindarnos a súa axuda.


Podedes ver máis fotos na páxina web do centro ( Actividades- Galería) e nos blogs de aula "O curruncho do primeiro ciclo" e "Mi aula".
Moitos bicos ratunos e ATA O PRÓXIMO ANO!!!
MIK

Comentarios (0) - Sección: O Magosto - Publicado o 04-11-2016 17:24
# Ligazón permanente a este artigo
QUE BONITOS!!
E que orixinais e creativas son as familias do noso alumnado!! Aquí temos novos magníficos traballos para ilustrar o lema da biblioteca:
Comentarios (0) - Sección: PAÍSES E CULTURAS. PDI 16/17 - Publicado o 04-11-2016 17:22
# Ligazón permanente a este artigo
MÁIS ARTISTAS!!!
Aquí tendes os espléndidos traballos de Julia e de Miriam!!! PARABÉNS!!!

Comentarios (0) - Sección: PAÍSES E CULTURAS. PDI 16/17 - Publicado o 03-11-2016 15:59
# Ligazón permanente a este artigo
A VOLTA AO MUNDO EN OITENTA HISTORIAS: CHEGAN OS PRIMEIROS TRABALLOS
Preciosos os traballos que empezan a chegar ás aulas arredor do lema deste curso da nosa biblioteca: A VOLTA AO MUNDO EN OITENTA HISTORIAS. ALEJANDRO S., LUCÍA, NICOLÁS e NEREA, de cuarto de EP, mostraron a orixinal interpretación que fixeron do lema, en colaboración coas súas familias. PARABÉNS aos catro por tan estupendo traballo!!!
Comentarios (2) - Sección: PAÍSES E CULTURAS. PDI 16/17 - Publicado o 02-11-2016 18:48
# Ligazón permanente a este artigo
TEMPO DE SAMAÍN
Xa temos aquí o Samaín! E para escorrentar o medo non hai cousa mellor que cantar, e cantar ben alto. Aquí tes dúas cancións moi chulas do grupo Mamá Cabra, para que nin meigas, nin bruxas, nin curuxas, se acheguen a ti.

Lembrámosvos que no panel lateral temos o acceso a diferentes recursos para as distintas efemérides que adoitamos celebrar ao longo do curso.
Ademáis da nosa recompilación sobre o Samaín (panel lateral), tamén sacaredes algunhas ideas revisando as 
entradas doutros anos.
Se che interesa coñecer o programa de actividades que ofrece o Concello de Vigo para este samaín, preme na imaxe de abaixo
.

http://snl.vigo.org/archivos/noticias/20161021144402c88c251fec7f413c808d8fcd45e6677a.pdf
Comentarios (0) - Sección: Samaín - Publicado o 27-10-2016 16:15
# Ligazón permanente a este artigo
RESOLUCIÓN PLAMBE 16/17
O DOG de hoxe, 26 de outubro, publica a Orde de 13 de outubro pola que se resolve a convocatoria do Plan de mellora de bibliotecas escolares en centros non universitarios sostidos con fondos públicos para o curso 2016/2017. A resolución detalla as contías asignadas a cada centro para este curso que para os centros con máis de dous anos de permanencia no programa será só para fondos, e para os incluídos nesta convocatoria e na correspondente ao curso anterior, será para fondos, mobiliario e outros equipamentos imprescindibles, así como para gastos de funcionamento. 
As bibliotecas escolares, deben ter, ademais, no orzamento "ordinario", derivado dos gastos de funcionamento do centro, de entre un 5% e un 10%, segundo as instrucións de comezos de curso da D.X. de Centros e Recursos Humanos. 
Intégranse 38 centros públicos e 10 centros concertados, polo que o total de centros integrados neste "rede de bibliotecas escolares" que constitúe o PLAMBE chega este ano a 615 centros, coa seguinte distribución:  
O Plan de mellora de bibliotecas escolares beneficia directamente a uns 181.600 alumnos e alumnas e ás súas familias e nel están integrados, tomados no seu conxunto, o 54% dos centros públicos galegos. 
Comentarios (0) - Sección: Biblioteca - Publicado o 26-10-2016 16:50
# Ligazón permanente a este artigo
CUARTO DE EP: PRIMEIRA VISITA Á BIBLIOTECA
Seguindo co programa de actividades para celebrar o Día das Bibliotecas Escolares, hoxe foi a quenda do alumnado de cuarto de EP para facer a súa ansiada primeira visita á biblioteca do centro. Primeiro repasaron as normas e ensaiaron a utilización dos "marcadores de sitio" para que os libros estean sempre ben colocados nas estanterías:

Os encargados recolleron as "mochilas viaxeiras" que andarán polos seus fogares este curso:
Miraron con entusiasmo a exposición de novidades:
E, para finalizar, recolleron o agasallo de benvida que MIK lles tiña preparado:
FOI XENIAL!!!
FOTOS
Comentarios (0) - Sección: Biblioteca - Publicado o 25-10-2016 15:55
# Ligazón permanente a este artigo
24 DE OUTUBRO, DÍA DAS BIBLIOTECAS ESCOLARES
O 24 de outubro é, desde hai 20 anos, o Día da Biblioteca, pois van xa dúas décadas desde que a Asociación Amigos del Libro Infantil y Juvenil propuxera esta data para facer fincapé nos beneficios destas institucións ao servizo da lectura, da cultura e da cidadanía. Posteriormente, o Ministerio de Cultura apoiou esta celebración e todos os anos edítase un cartel cun texto conmemorativo e realízase un acto de celebración oficial. Nesta ocasión foron dúas mulleres da "periferia", a ilustradora vasca Elena Odriozola e a escritora galega Ledicia Costas, as encargadas de darlle fondo e forma e esta mensaxe a prol da existencia das bibliotecas.
Fermosísimo é o texto de Ledicia Costas, Premio dos Clubs de Lectura 2016, que nos facilita GALIX na súa orixinal versión en galego e do que entresacamos un parágrafo:
"Alguén me contou que o 24 de outubro é o Día da Biblioteca. Sería xenial organizar unha festa con confeti e pompas de xabón. Celebrala ao grande. Encantaríame vestirme para tal ocasión como o personaxe dalgún libro, sentarme na mesa dunha biblioteca da cidade onde vivo e esperar a que fosen visitarme. Nas bibliotecas podes ser quen ti queiras. Desde Mary Poppins ata Matilda, Atreyu, Drácula ou mesmo Pippilotta Viktualia Rullgardina Krusmynta Efraimsdotter Långstrump. Podes poñerte botas de pelo, plumas, zancos e chapeus. Chapeus! Iso é! Imaxino a unha pequena lectora achegándose a min discretamente, atraída polas cores e formas do meu chapeu:
-- Sombreireira tola, que festa máis marabillosa! Sería tan amable de servirme unha cunca de té?"

En Galicia, a campaña de visibilidade da biblioteca escolar deste curso 2016/2017 lembra que a Biblioteca Escolar é "territorio das Artes", un espazo no que aproximarse á produción artística do noso país e de todas as culturas, a través dos libros, dos vídeos, dos mil sitios aos que internet nos permite acceder... pero é tamén un espazo no que vivir a música, a pintura, as artes visuais (fotografía, cómic, cine), a escultura, a danza, o teatro e, moi especialmente, a literatura en todos os seus xéneros e temáticas; e vivir é experimentar e compartir, pero tamén expresarse e comunicar a través das distintas opcións artísticas.
Comentarios (0) - Sección: Biblioteca - Publicado o 25-10-2016 15:43
# Ligazón permanente a este artigo
© by Abertal




Se algunha das fotografías, debuxos... que aparecen neste blog están suxeitas a dereitos de autor, póñanse en contacto con nós e serán retirados.


Free counter and web stats