O pé da porta


O pé da porta é un lugar da parroquia de Combarro.Concello de Poio.Pontevedra.Galiza.

O meu perfil
combaraxo@gmail.com
 CATEGORÍAS
 FOTOBLOGOTECA
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

A fonte, fontiña

Fonte de Pedaporta . Combarro

Outra mostra máis de patrimonio arquitectónico devastado. Na imaxe superior a fonte coma tal foi construida no ano 1915 e na inferior como hoxe existe, depois da mutilación que sufriu a finais dos anos 50, que ben parece que lle molesta ao "pau da luz".

Para ela, estes versos de Xerardo Álvarez Limeses

A fonte, fontiña,
inda naceu onte;
nos panos do ceo
os seos esconde
e a vela tan nova
a meiga do bosque
morre de carraxe,
e de envexa morre.
¡Fonte, fontiña,
bule e camiña!...

Comentarios (0) - Categoría: Combarro - Publicado o 02-09-2018 12:28
# Ligazón permanente a este artigo
CHOUSA É NOSA

En apoio da reivindicación "CHOUSA É NOSA" da Asociación CulturaL Armadiña.

Foto de Chousa dende o peirao. Combarro 1970.
Foto Lavandeira.


Emilio Lavandeira Prieto é un fotógrafo galego nado en Ortigueira no 1934. Aos 8 anos trasladase a Santiago debido a profesión militar do seu pai. Tralo bacharelato, iniciou estudos de dereito pero sobre todo, descubriría a súa paixón pola fotografía. Abriu estudio no n.º 22 da Rúa Doutor Teixeiro. Comezou a traballar para os principais xornais galegos e en 1960 expuxo a súa obra na Sede Protectora de Artesáns na Rúa do Vilar. Traballou na revista Blanco y Negro, no xornal Arriba e posteriormente en Nuevo Diario. Comezou a estudar periodismo na Universidade Complutense de Madrid. En 1979 regresa a Santiago, onde funda a Sociedade Fotográfica Compostelá. Emilio é un home polifacético, tivo incursións no mundo da música, escribiu un par de libros sobre aforismos e realizou obra pictórica como caricaturista e acuarelista. Recibiu varios premios, entre eles o Premio Galicia de Comunicación e 1998 e o da Fundación Caixa Galicia - Unha vida en imaxes, polos 50 anos de traxectoria profesional como fotoxornalista. A Emilio Lavandeira gustaríalle ver feito realidade un Museo da Fotografía de Galicia que tivese como referencia a Ksado, ao que considera o mellor fotógrafo galego.
Comentarios (0) - Categoría: Combarro - Publicado o 02-08-2018 16:46
# Ligazón permanente a este artigo
Catro fotos da praia de Chousa

En apoio da reivindicación "CHOUSA É NOSA" da Asociación CulturaL Armadiña.


Catro fotos da praia de Chousa. Combarro.
1. Francisco Zagala 1890
2. Jaime Pacheco 1929
3. Joaquín Pintos 1932
4. Carlos Valcarcel. 1972
Comentarios (0) - Categoría: Combarro - Publicado o 02-08-2018 16:37
# Ligazón permanente a este artigo
Espiritualidade dun pobo

Comezaba en Xullo de 2015 cun primeiro posteado de "Descricións combarresas" que Carlos Martínez Barbeito facia no libro Galicia (1957) de editorial Destino, ilustrada por Ramón Dimas. Logo, en Outubro do 17 en "O Combarro de Manuel" mostraba a reseña que do pobo facia Manuel Chamoso Lamas.
Esta "Espiritualidade dun pobo" recollida do libro "Rías Bajas de Galicia", 1ª edición 1953 con texto de Xosé María Castroviejo Blanco-Cicerón ( Compostela 1909 - Tirán, Moaña 1983 ) xornalista e escritor galego, é a continuación destas breves crónicas da nosa literatura, con Combarro como referente. O título "Espirutualidade dun pobo" alude a guia Galicia Espiritual de una Tierra, do mesmo autor. A foto superior "Praza de San Roque,Combarro" ilustra a portada da mesma guia,"Rías Bajas de Galicia" edición 1957 e posteriores.

Combarro é hoxe case un tópico, espléndido tópico, para tódolos pintores, fotógrafos e turistas que buscan o belo nas nosas rías. Realmente o encanto das súas vellas casas mariñeiras, seus hórreos, súas rúas empinadas de vellas pedras, cos seus carros do país e as súas embarcacións no arredor, logran a través da barroca paisaxe e da finísima luz da ría, efectos de marabilla.(traducido do orixonal en español).
O Combarro de Manuel
Descricións combarresas
Comentarios (0) - Categoría: Combarro - Publicado o 05-05-2018 09:29
# Ligazón permanente a este artigo
Gravados e fotos 3

Foto do hórreo que ilustra a folla inicial de cortesía do libro "Galicia" Edicións Anaya do ano 1982 e gravado en augaforte do hórreo por Castro Gil do primeiro tercio do s.XX.
Comentarios (0) - Categoría: Combarro - Publicado o 06-04-2018 19:42
# Ligazón permanente a este artigo
Combarro en mini-tv

Os mini-televisores foron uns dos souvenirs máis demandados, por nenos e adultos, nas tendas e quioscos turísticos durante os anos 60 e 70. Eran uns pequenos aparellos cuadrangulares, de pasta plástica, que tiñan un visor na parte posterior por onde se podían ollar sete ou oito diapositivas, do lugar visitado ou dalgúns dos seus monumentos, que ían cambiando e repetindo, premendo un botón na cara inferior do aparello.



Neste facsímile a modo de demostración, utilicei algunhas das postais de Combarro que Editorial Fama de Vigo difundiu nestes anos, que compartiron época con agasallos, de cando aínda o "Made in China" era impensable. Non lle demos ideas, non vaia a ser "revival next"
Comentarios (0) - Categoría: Combarro - Publicado o 18-02-2018 17:47
# Ligazón permanente a este artigo
Gravados e fotos 2

Praza de San Roque.
A esquerda foto do ano 1935, asinada por Sayd de Juliis que fora pintor e debuxante italiano, aveciñado en Vigo. A dereira, debuxo a lapis do ano 1978 de Francisco Gonzalo Seijo Alonso, escritor ( Castrelos, Vigo 1925 - Alicante 2013 )
Comentarios (0) - Categoría: Combarro - Publicado o 06-01-2018 17:56
# Ligazón permanente a este artigo
De "Á LUS DO CANDIL" a " LUCE TEU POBO"

Funme á beiramar, terra leda, pra esquencer aquil amor disgraciado. A disgracia daquil amor non fai ó caso. Non tiña outra cousa que faguer. Había deixado os estudios. Despóis, iríame pra as Américas. Vendera unhas leiras, e díranme máis de vinte mil reás por ilas.Non voltaría para Ameixende hastra o outono. Tiña sempre diante min a cara de Rosario. ¿ Qué lle importa a naide quén era Rosario? Fun a Pontevedra, a Marín i a Combarro. Mais a comtempración do mar dábame unha gran tristura. Iba daquí pra aló buscando o que non atopaba en ningures: a calma do esprito.

Así comeza o conto "Aleluia" incluido no libro de Ánxel Fole "Á lus do candil" editado en 1953.

¡A UN CHISCO ESTAMOS DE QUE ESA LUZ SEXA MOITO MÁIS INTENSA!
¿ALGUNHA DÚBIDA PARA VOTAR?


Foto: "Combarro nocturno" Un lenzo do recentemente falecido Pedro Solveira
Comentarios (0) - Categoría: Combarro - Publicado o 29-11-2017 22:25
# Ligazón permanente a este artigo
© by Abertal

clocks for websitecontadores web