O MEGO DA ESCOLA


Blog da Comisión Cultural MARTÍN SARMIENTO de Vilafranca para a potenciación do uso do galego nos centros do ensino no Bierzo e a promoción dos Intercambios escolares Bierzo-Galicia.

O meu perfil
 CATEGORÍAS
 FOTOBLOGOTECA
 BUSCADOR
 BUSCAR BLOGS GALEGOS
 ARQUIVO
 ANTERIORES

Alumn@s do BIERZO e MARÍN comezan o camín
Trátase dun proxecto didáctico de comunicación e estudo sobre a cultura e a lingua galegas a desenvolver en conxunto entre alumn@s do Bierzo e de Marín, atendendo a unha invitación da Comisión Cultural Martín Sarmiento de Vilafranca.
Os centros que van participar desta iniciativa son o IES. Padre Sarmiento de Vilafranca do Bierzo e o CPR. San Narciso de Marín .

Os alumn@s que participan inicialmente son de 4ºda ESO coordinados polos seus profesores de galego en Vilafranca e en Marín, que son Xosé Álvarez e Héctor Silveiro,respectivamente.

Imos dar comezo cunha presentación das comarcas e localidades para logo entrar sempre seguindo o "modus opperandi" do Padre Sarmiento nunha peculiar panorámica da historia da lingua a través das súas palabras, procurando palabras que contrasten ou se complementen entre si.
Cada entrada será asinada polos seus autores que son un/unha do Bierzo e outr@ do Morrazo.
Comentarios (0) - Categoría: O CAMÍN DE SARMIENTO DE MARÍN AO BIERZO - Publicado o 12-05-2009 20:40
# Ligazón permanente a este artigo
Máis dun centenar de alumn@s de galego en Galicia
Unha iniciativa da Secretaría Xeral de Política Lingüística da Xunta de Galicia fixo posible este mes de abril do 2009 que unha das solicitudes dos centros e dos colectivos que apoian a introdución do galego nos Centros se levase a cabo. Trátase pois dunha experiencia para alumn@s de primaria e secundaria de distintas localidades do Bierzo que ao longo dunha semana percorrerán lugares emblemáticos de Galicia ( castros, mosteiros , cidades monumentais e paisaxes naturais) ademais de procurar o contacto directo coa lingua en diversos centros de ensino con outros alumn@s galeg@s cos que, especialmente os estudantes de secundaria, teñen realizado intercambio por carta, lazos de comunicación na lingua que os une. Para un maior detalle podedes consultar máis abaixo algunhas das reseñas que recolleu a prensa nestes días.

Podes ver un vídeo do programa Ben Falado sobre este intercambio.
consultar referencia no Xornal de Galicia
VER reseña na prensa
VIDEO PROGRAMA TVG BEN FALADO!
Comentarios (1) - Categoría: O GALEGO NOS CENTROS DO BIERZO - Publicado o 15-04-2009 19:52
# Ligazón permanente a este artigo
Un nove de marzo máis sen a Casa Natal
Cando se cumpre o 314 aniversario do nacemento de Pedro Xosé García Balboa Gosende Sarmiento un 9 de marzo de 1695 en Vilafranca do Bierzo a súa Casa Natal que foi derruída a causa de que ameazaba con caerse a casa veciña en 1999. A casa daquela xa era propiedade da Xunta de Galicia que a mercara no ano do tricentenario(1995).
Foi no día 18 de maio ano 2002, ano da conmemoración do Día das Letras Galegas na honra de Sarmiento cando se asinou un acordo entre a Xunta de Galicia e a Junta de Castilla y León para erguer un centro dedicado a difundir, neste enclave tan simbólico do Camiño a Compostela como é Vilafranca do Bierzo, a vida e a obra do ilustrado galego-berciano.
Nas pasadas Xornadas Martín Sarmiento, convocadas pola Comisión Cultural do mesmo nome, un dos actos logrou reunir nunha mesa a representantes da administración local, ao arquitecto do Proxecto de rehabilitación e a un representante da Xunta e do Xacobeo, confirmando o compromiso de Galicia para levantar a Casa, pero faltou a outra administración autonómica implicada que optou por non estar na mesa que analizaba a situación pola que atravesa este convenio para a construción dun Centro Cultural no solar da Casa Natal.

Nos enlaces que che proporcionamos máis abaixo podes consultar algunha das biografías de Frei Martín Sarmiento e un dos artigos reivindicando o cumprimento do acordo que contemplaba que no ano 2004 estaría rehabilitada a Casa onde veu á luz e escoitou por vez primeira a lingua que tanto amou dos beizos da súa nai Clara Balboa Sarmiento que posiblemente fose nativa da comarca berciana, aínda que descoñecemos o lugar.
Biografía de MARTÍN SARMIENTO
Comunicado sobre a Casa Natal
Sobre Sarmiento
Comentarios (0) - Categoría: CASA NATAL DE MARTÍN SARMIENTO - Publicado o 10-03-2009 05:32
# Ligazón permanente a este artigo
Os premios Xarmenta na súa IV edición
A Asociación Berciana da lingua Xarmenta vén de anunciar a próxima entrega dos premios que anualmente convoca para prestixiar o labor que a prol da lingua realizan tanto diversas personalidades ou entidades do Bierzo como de Galicia.
Este ano os premios foron para a gaiteira galega Susana Seivane, na categoría de personalidade que máis esforzos fixo a prol da defensa da lingua galega fóra da Galicia administrativa. Por outra banda, o Grupo Aira da Pedra, conxuntamente coa Asociación Cultural Escola de Gaitas de Vilafranca,recibirán o galardón na categoría de institución que máis colaborou co desenvolvemento do galego no Bierzo. A gala celebrarase o vindeiro 15 de xaneiro no Teatro Bergidum de Ponferrada e será presentada polos xornalistas Ricardo López Témez e Soledad Figueroa.

ENTREGA dos IV PREMIOS XARMENTA
sobre os premios e os premiados
premios en Ben falado!
Comentarios (0) - Categoría: XERAL - Publicado o 14-01-2009 05:32
# Ligazón permanente a este artigo
Un 25 % dos alumn@s de Secundaria en Vilafranca escollen galego

No IES Padre Sarmiento de Vilafranca este curso 08/09 van cursar galego de xeito optativo e voluntario aproximadamente un 25% dos alumn@s matrículados no centro.

Dende que comezou a impartirse o galego ano a ano vai medrando a cifra e a pesar das dificultades e malentendidos que presenta a presenza do galego no ensino no Bierzo é unha evidencia do éxito do programa que se vén aplicando dende que, tamén en Vilafranca, se asinara o primeiro convenio entre as autoriaddes da "Junta de Castilla y León" e da Xunta de Galicia, no mesmo ano que era homenaxeado no Día das Letras Galegas o Padre Sarmiento.

Este número de rapaces, rapazas e familias interesadas no estudo e coñecemento da cultura e da lingua galega, lingua patrimonial do Bierzo, favorecerá a súa conservación e dignificación á vez que permite un enriquecemento persoal e colectivo deste importante número de persoas que vén de confirmar,curso tras curso, a súa sensibilidade cara a lograr un achegamento útil e práctico ao que o galego como idioma ofrece a día de hoxe.
Comentarios (0) - Categoría: O GALEGO NOS CENTROS DO BIERZO - Publicado o 21-11-2008 22:35
# Ligazón permanente a este artigo
Viaxe a Santiago
O idioma galego gaña adeptos, aínda que moi de vagar, entre os leoneses. Preto de mil alumnos estudan na actualidade no Bierzo a lingua de Rosalía, que falan alí entre 30.000 e 35.000 persoas. Fronte a unha transmisión familiar cada vez máis feble, Xunta e e Goberno castelán-leonés fixeron unha aposta: promover a lingua e a cultura galegas en zonas límítrofes como a devandita.

A experiencia funciona e, este venres, a secretaria xeral de Política Lingüística da Xunta, Marisol López, recibiu en Santiago a un grupo de 48 alumnos bercianos de Ensino Secundario que participan no programa de difusión do galego.

Durante unha estadía de dous días, os alumnos dos Institutos de Educación Secundaria Padre Samiento de Villafranca del Bierzo, Bergidum Flavium de Cacabelos, María Luísa Ucieda de Toral de los Vados e Europa de Ponferrada terán un completo programa de actividades que inclúe visitas aos principais puntos de interese do casco histórico compostelán, a museos e outros lugares emblemáticos da comunidade autónoma.

O grupo de estudantes fixo tamén unha visita ao Instituto de Ensino Secundario Xelmírez I de Santiago, que en datas próximas vai desprazar un grupo de alumnos ao Bierzo para favorecer o intercambio e o coñecemento da zona.

Situación complicada

A situación do galego no Bierzo é "complicada", pero non moito máis que en Galicia, segundo un dos profesores que acompaña a expedición, o redondelano Xosé Álvarez García, que leva catro anos impartindo clases no IES Padre Sarmiento de Villafranca.

Os avós de rapaces como os que hoxe e mañá visitan Santiago son case na sú totalidade galegofalantes, algo que xa non é tan frecuente no caso dos seus pais. Mentres que avós e netos falan entre eles na lingua nai, Xosé Álvarez di xa non pasa tanto entre pais e fillos e menos entre os xóvenes, como sucede no caso de Galicia.

Pero eses máis de 30.000 bercianos que falan galego non proceden só das aldeas ou vilas limítrofes a Galicia, senón que hai moita poboación galega que foi vivir a Ponferrada.

Este profesor sinala que non hai máis que acudir un día a un mercado a Vilafranca e comprobar que "alí o que oies falar é galego, non oies outra cousa", afirma sen dubidar.

Noutros contextos é diferente, e sucede en parte como en Galicia, en que depedendo do organismo, a Administración ou entidade de que se trate, o idioma cambia. "Pero si vas, por exemplo, A Veiga do Valcarce, a xente fala alí en galego", sinala, porque o fala todo o mundo.

Xosé Álvarez e máis optimista que antano sobre o uso do galego no Bierzo. Afirma que, de feito, os rapaces que chegan agora ás escolas xa non teñen vergoña de falar galego entre eles.

Os estudantes empezan a entender tamén que o galego e algo seu, e segundo aseguraron algúns dos alumnos que hoxe chegaron a Compostela, estudan este idioma porque lles gusta. Aseguran, ademais, que é dodado de aprender.

Patrimonio común
Na reunión que mantivo Marisol López con este medio cento alumnos, a secretaria xeral destacou "o pasado común e os fortes lazos que nos achegan" xeográfica, cultural, social e lingüísticamente. Destacou tamén que á importancia de saber varias linguas súmase neste caso o valor engadido da condición da lingua "como patrimonio común" entre galegos e bercianos, polo que expresou o compromiso do seu departamento de seguir traballando para que o galego chegue cada vez a máis centros da comarca do Bierzo.

Na actualidade, este programa está presente non só nos centros de Primaria e Secundaria da comarca leonesa, senón que se ofrecen tamén cursos na Escola Oficial de Idiomas de Ponferrada. (información reproducida do Galiciadiario.com)
Comentarios (0) - Categoría: INTERCAMBIOS ESCOLARES CON GALICIA - Publicado o 21-11-2008 22:27
# Ligazón permanente a este artigo
EDITADO UN DVD RETROSPECTIVO SOBRE A FESTA DO MAIO
No mes de maio coincidindo coa festa saía ás rúas este DVD editado pola Escola de Gaitas de Vilafranca e que é unha retrospectiva sobre os máis de 25 anos que levan potenciando esta tradición que ten esta peculiar presenza no Bierzo.
Trátase do único maio mozo no territorio de Castela e León, un dos poucos que se conservan no ámbito da cultura galega, pois os as súas coplas que se conservan por tradición oral están no galego do Bierzo. Invitamos a que quen desexe ter este DVD que contén máis de 150 fotos ademais de dous documentais, gravados no ano 1991 por Benxamín Vázquez e outro emitido recentemente no programa da TVG Alalá. É en definitiva un magnífico e imprescindible documento para coñecer mellor o Bierzo Tradicional.
Comentarios (0) - Categoría: BIERZO TRADICIONAL - Publicado o 31-10-2008 08:57
# Ligazón permanente a este artigo
A FESTA DO MAIO
REVITALIZAR O MAIO : UN TRABALLO DE DIGNIFICACIÓN DO NOSO PATRIMONIO INMATERIAL

Unha vez máis en pleno século XXI unha festa ancestral marcará como todos os anos o comezo da primavera en Vilafranca e no Bierzo. Unha festa popular e participativa, unha festa distinta que vén a rachar coas tebras do escuro inverno, abre as portas e achega aos balcois das casas da vila medieval un rito sinxelo, acompañado dunha sinxela melodía e uns cantos tamén sinxelos que todos os nenos e nenas coñecen a pesar de ser unha vella letra. Todos a repiten desde non se sabe canto tempo. Aí está outra vez un maio mozo, un maio humano apañando as castañas como parte dun rito que soubemos conservar para o futuro, porque de tantos que había noutras vilas do norte, especialmente en Galicia, en todas elas desapareceu haiche ben de tempo. A casualidade e a fidelidade á tradición fixeron preservar unha reliquia viva do noso calendario tradicional, un verdadeiro símbolo desta tipoloxía de festexos e un modelo ideal para o tan cacareado turismo alternativo ou cultural que converte a Vilafranca, por outro motivo máis, nun lugar de referencia na comarca, para veciños e visitantes.

para ver imaxes dos maios no 2006 en BIERZOTV
Comentarios (0) - Categoría: BIERZO TRADICIONAL - Publicado o 12-04-2008 08:33
# Ligazón permanente a este artigo
Ola, un saúdo para os nosos colegas de Pontevedra.

Son Óscar espero vervos mañá ou pasado. A ver se xogamos un partido.

Eu son Nerea, gústame xogar ao fútbol. O meu equipo favorito é o Real Madrid.

Eu son Dani, Murdo para os amigos, Estou a morte co Barça., Morte ao Madrid.

Eu son Cecilia, gústame o rap, o meu grupo favorito é Eminen.

Eu son Toni, non vou a Pontevedra este ano, pero espero vervos cando veñades vós, e a ver se imos todos xuntos ás Médulas.
Comentarios (0) - Categoría: INTERCAMBIOS ESCOLARES CON GALICIA - Publicado o 02-04-2008 08:56
# Ligazón permanente a este artigo
Breve historia dos Intercambios Escolares

A raíz da creación no ano 2005 das denominadas Xornadas "Martín Sarmiento" por parte da Comisión Cultural, que nacera en Vilafranca do Bierzo no ano 2001, houbo un intento de integrar de sempre ao mundo do ensino no proceso de difusión da figura do Padre Sarmiento e de que o seu ideario sexa tamén asumido pola sociedade berciana(falamos do seu interese por aprender, dos seus valores didácticos, da recuperación patrimonial desde a natureza, pasando pola historia e, como non, atendendo de xeito especial á lingua galega dada a situación problemática pola que está pasando no Bierzo).

De aí o interese en facer que a experiencia inicial dunha visita de alumn@s e profesores da ESO de galego do Bierzo a Pontevedra ao Instituto Torrente Ballester, as experiencias da Xornadas Escolares no Bierzo no 2005 fosen o xermolo para que b¡nacesen no ano seguinte os denominados Intercambios Escolars "Martín Sarmiento".

OS INTERCAMBIOS ESCOLARES BIERZO–PONTEVEDRA
O Proxecto escolar ou didáctico Martín Sarmiento pon especial fincapé na participación e colaboración dos distintos centros escolares e dos seus profesores á hora de facer realidade a presenza nas aulas da figura, obra de Sarmiento, o interese polo Patrimonio no seu sentido máis amplo e o traballo coa lingua que estudou e amou.
Aínda que houbo pequenos cambios na participación dos centros e do alumnado berciano(especialmente os que dan galego como optativa)son case sempre os mesmos centros os que xa levan participando dos intercambios dende o ano 2006.
Os centros que participaron inicialmente do Proxecto son:
NO BIERZO:
-Unha aula de GALEGO de alumn@s da ESO cos seus profesores de:
-IES. PADRE SARMIENTO de Vilafranca do Bierzo
-IES. BERGIDUM FLAVIUM de Cacabelos.
-IES. EUROPA de Ponferrada.
-IES. VIRGEN DE LA ENCINA de Ponferrada.
-Unha aula de 6º curso de Primaria do:
-CEIP. SAN LORENZO DE BRINDIS de Vilafranca do Bierzo.
EN PONTEVEDRA:
-Unha aula de GALEGO de alumn@s da ESO cos seus profesores do IES. GONZALO TORRENTE BALLESTER de Pontevedra
-Unha aula de 6º curso de Primaria do CEIP. XUNQUEIRA II de Pontevedra.

DATAS PREVISTAS PARA O INTERCAMBIO
Normalmente se veñen realizando no mes de marzo-abril.

No ano 2006 foron:
-23 e 24 de MARZO Centros de Pontevedra en Vilafranca do Bierzo.
-30 e 31 de MARZO centros do Bierzo en Pontevedra.

No ano 2007 foron:
1-2 de marzo: Intercambio escolar en Pontevedra.
27-28 de marzo: Intercambio escolar en Vilafranca e no Bierzo.

No desprazamento a Pontevedra dos alumn@s bercianos participaron este ano:
- de 6º de Primaria do CEIP S.: LORENZO DE BRINDIS (Vilafranca)e CRA Ximena Muñiz (Corullón) e de 1º ESO de Lingua galega dos centros IES.BERGIDUM FLAVIUM (Cacabelos) e IES. PADRE SARMIENTO (Vilafranca do Bierzo).


Este curos 2006/07 foi o segundo curso con esta experiencia de intercambio escolar, cultural e lingüístico para unha aula de Primaria e o tercerio para unha de Secundaria entre centros Bercianos e Pontevedreses. O fío conductor son a figura e obra de Sarmiento e os valores patrimoniais.


MATERIAIS DE TRABALLO DAS VISITAS
Para levar a cabo as diversas actividades didácticas nas visitas a Pontevedra e ao Bierzo elaboranse materiais de traballo que baixo as premisas propostas dende a Comisión Cultural e o profesorado implicado servirán de guieiro fundamental nas distintas experiencias pedagóxicas pensadas. É importante sinalar que a lingua vehicular dos intercambios e dos materias previstos será a lingua materna de Sarmiento e porán o seu centro de interese, ademais do galego, no estudo e o aproveitamento da riqueza patrimonial da que gozan estes dous enclaves relevantes da biografía sarmentiana.
Estes materiais tocarán aspectos tan variados como a Historia, a Xeografía, a Natureza, as Ciencias, a Economía, a Etnografía, a Cultura e a Lingüística.
Os materiais elabóranse nunha última fase coa aportación creativa dos propios alumn@s coa intención de facelos responsables do proceso integralmente. Realizaranse ao longo do mes de febreiro-marzo coa finalidade de que sexan o comezo dunha fórmula didáctica novidosa na que tamén a Comunidade Educativa participe. Enriquecerase así o corpus de materiais didácticos adaptados ás realidades Berciana e Galega.
A posta en común das diversas propostas entre alumn@s dos dous ámbitos servirá tamén como elemento válido de avaliación do intercambio e da súa valoración pedagóxica.

COLABORACIÓN DE POLÍTICA LINGÜÍSTICA, CULTURA E DE EDUCACIÓN
Pola importancia deste tipo de iniciativas de cara a promover un proceso de Normalización Lingüística no Bierzo nas seguintes ámbitos:
-No conxunto da Comunidade Escolar berciana, é dicir, entre o alumnado, o profesorado, nos centros e tamén e especialmente pola incidencia nas familias tanto as que participan de forma entusiasta no intercambio como as que non o fan.
-No tecido cultural singularmente nos entes que colaboran cos intercambio que son a totalidade dos de Vilafranca e unha parte moi significativa do resto da Comarca.
-Na entorno social da comarca que se fai eco destas actividades a través da prensa e medios audiovisuais que acollen estas iniciativas con interese.
-Na administración local e comarcal que tamén apoian os intercambios facilitando os gastos da estancia dos alumn@s que veñen de Pontevedra nos dous días que estean no Bierzo.
Debemos indicar que, ademais dos centros de ensino citados, colaboran outras entidades para que estes intercambios se leven a cabo. O propio Concello de Vilafranca do Bierzo e a Concellería de Cultura e Normalización Lingüística do Concello de Pontevedra, a Delegación Provincial de Pontevedra da Consellería de Cultura e Deporte da Xunta de Galicia, levan estes todos estes anos colaborando e arroupando con gran cariño este proxecto.

Consideramos,finalmente, que os responsables de Normalización como de Educación están interesados neste proxecto ante a transcendencia e repercusión da experiencia presente, interesados no futuro e mellora das mesmas, polo que solicitamos a colaboración das autoridades educativas da Junta de Castilla y León, da Xunta de Galicia a través da Secretaría Xeral de Política Lingüística, Consellería de Cultura e da Consellería de Educación.

A colaboración cremos que podería ir encamiñada tanto a subvencionar a propia viaxe para facilitar e asegurar a presenza de todos os rapaces e rapazas, para que non deixen de participar por impedimentos económicos no intercambio, e, por outra banda, axudar na creación de materiais didácticos axeitados en lingua galega para que esta iniciativa novidosa, a través da cal tentamos aportar unha nova experiencia didáctica coa nosa lingua, sexa un éxito.

MEMORIA DOS II INTERCAMBIOS NO BIERZO
Comentarios (0) - Categoría: INTERCAMBIOS ESCOLARES CON GALICIA - Publicado o 08-03-2008 08:50
# Ligazón permanente a este artigo
© by Abertal