O FALAR NON TEN CANCELAS


ENDL IES Lagoa de Antela

O meu perfil
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

>UN DÍA NO PARQUEi> COS DE TEATRO
Os membros do grupo de teatro de 3º C de ESO protagonizaron unhas escenas teatrais coas que o público se mondou de risa. Personaxes frikis transitaron por un parque do máis atípico, ou non. O amor triunfou, con humor, sobre a violencia e a mala educación. Ou iso cremos.Noraboa ás actrices e actores, en especial a Pablo, que só coa súa presenza camaleónica, enche o escenario.

Comentarios (0) - Categoría: TEATRO - Publicado o 22-06-2009 10:27
# Ligazón permanente a este artigo
AS LINGUAS SUMAN

Este é o TRÍPTICO INFORMATIVO "AS LINGUAS SUMAN" confeccionado pola Coordinadora Galega de Equipos de Normalización e Dinamización Lingüística.
O obxectivo deste tríptico é informar a pais e nais sobre os beneficios de estudar en galego e contrarrestar con criterios pedagóxicos a enquisa que nos vindeiros días deberán cubrir para "decidir" en que idioma queren que os seus fillos e fillas estuden nos centros públicos e concertados de Galicia.
Comentarios (0) - Categoría: NOVAS DE INTERESE - Publicado o 09-06-2009 23:19
# Ligazón permanente a este artigo
EN GALEGO MERCA MELLOR: CAMPAÑA PARA O COMERCIO N'A LIMIA

Este
é o adhesivo que imos empregar na nosa campaña de normalización no sector comercial da comarca limiá, foi deseñado por Antía Valbuena, de 4º B da ESO, toda unha artista.
Comentarios (0) - Categoría: CAMPAÑAS - Publicado o 08-06-2009 19:15
# Ligazón permanente a este artigo
ZARA, HOME, ZARA
Zara, home, Zara é o título do vídeo gañador do 3º premio do II Concurso Popular de vídeos "Mobilízate pola lingua" da Mesa pola Normalización Lingüística da zona de Lugo. O vídeo foi realizado por Lolo e Iago.



Comentarios (3) - Categoría: NOVAS DE INTERESE - Publicado o 25-05-2009 12:28
# Ligazón permanente a este artigo
X NADA E O FESTIVAL DE CANS

No VI Festival de Cans proxectáronse varias curtametraxes de animación e de ficción, resultando gañadora X nada, de Dani de la Torre e Toni Veigas. Conta unha historia de violencia no ámbito da adolescencia. Dura pero necesaria. Esperamos que a proxecten logo en Onda Curta, o programa da Televisión de Galicia que emite estas curtas e ao que se pode acceder a través de Televisión á carta.
Dende logo, polo que vin, as curtas do noso alumnado non desmerecen nada, mesmo supera a calidade dalgunhas presentadas no festival.
Comentarios (0) - Categoría: NOVAS DE INTERESE - Publicado o 24-05-2009 21:17
# Ligazón permanente a este artigo
ENTREGA DE PREMIOS

As e os gañadores dos concursos de fotografía, relato e videopoemas recibiron os seus premios. Noraboa!!
Comentarios (1) - Categoría: LETRAS GALEGAS - Publicado o 22-05-2009 11:34
# Ligazón permanente a este artigo

Mañá sábado, a asociación cultural Aguilhoar celebra unha xornada pola lingua.

Facemos unha chamada á mocidade limiá e en especial á do instituto para que acuda e participe desta celebración.

18H30 Proxección do documentario:
‘LINGUAS CRUZADAS’

19H30 Charla-coloquio:
“A situacion do galego na mocidade”

20H00 Acto a carrego da mocidade
estudantil da Limia

21H00 Cea para os asistentes

22H30 Concerto:
‘ESQUIOS’
Comentarios (2) - Categoría: NOVAS DE INTERESE - Publicado o 22-05-2009 09:15
# Ligazón permanente a este artigo
COLAXES E CALIGRAMAS 2009
Velaquí as marabillas vangardistas de 4ºB da ESO.

Comentarios (1) - Categoría: CREACIÓNS ALUMNADO - Publicado o 22-05-2009 09:09
# Ligazón permanente a este artigo
REGHEIFA DE PRODUCIÓN PROPIA
Ollade e escoitade esta regheifa elaborada e realizada por Esther, Ana e Carlos, merece a pena.

Comentarios (2) - Categoría: CREACIÓNS ALUMNADO - Publicado o 21-05-2009 08:13
# Ligazón permanente a este artigo
VIDEOPOEMA A XUSTIZA PÓ-LA MAN
Para vós, o videopoema A xustiza pó-la man, inspirado no poema de Rosalía de Castro e realizado por Raquel Trigo, Raquel Vázquez, Elísabeth e Néstor.

Comentarios (1) - Categoría: CREACIÓNS ALUMNADO - Publicado o 20-05-2009 20:32
# Ligazón permanente a este artigo
VIDEOPOEMA XAN
Aquí tedes o videopoema Xan, inspirado no poema de Rosalía de Castro e realizado por Esther, Ana e Carlos, alumnas e alumno de 1º de BAC do noso instituto.

Comentarios (2) - Categoría: CREACIÓNS ALUMNADO - Publicado o 20-05-2009 20:28
# Ligazón permanente a este artigo
PROGRAMA LETRAS GALEGAS E PREMIOS
PROGRAMA LETRAS GALEGAS 2009

HOMENAXE A:

RAMÓN PIÑEIRO
EDUARDO BLANCO-AMOR
XOHANA TORRES


MÉRCORES 2º RECREO:
PROXECCIÓN DE VIDEOPOEMAS

XOVES
1º RECREO:
ENTREGA DE PREMIOS DOS CONCURSOS
(RELATO, FOTOGRAFÍA, VIDEOPOEMA)

2º RECREO: LECTURAS POLA LINGUA

VENRES
1º RECREO: PROXECCIÓN DE VIDEOPOEMAS

2º RECREO: LECTURA DRAMATIZADA D’A ESMORGA

LUGAR: BIBLIOTECA

PREMIOS LETRAS GALEGAS 2009

RELATO BREVE

1º CICLO DE ESO
Yolanda Doliveira Domínguez, de 2º A de ESO, baixo o seudónimo de Luscofusco

2º CICLO DE ESO
Alejandra Parejas Suárez, de 3º B de ESO, baixo o seudónimo de Pomba degolada

FOTOGRAFÍA

ESO
José Luís Rodríguez Salgado, de 4º de ESO, baixo o seudónimo de Mouril

ACCÉSITS
Maimuna Sidha, de 4º de ESO, baixo o seudónimo Río Limia

Alba Augusto Mandianes, de 3º de ESO, baixo o seudónimo Buky

Elena Carballo Folgoso, de 1º de ESO, baixo o seudónimo Paco, o de galego

BACHARELATO
Ana Barxa Cid, de 1º de BAC, baixo o seudónimo de Viradeira

VIDEOPOEMAS

1º PREMIO
Cunetas, de Alba Núñez, Ruth Lorenzo, Mayte López e David Castro
ACCÉSITS

Regheifa e Xan, de Esther Álvarez, Carlos Rodríguez e Ana Barxa
A xustiza pola man, de Raquel Vázquez, Raquel Trigo, Néstor Dopozo, Elísabeth Lamas
Letras Galegas, de Miguel Carballo
Comentarios (0) - Categoría: LETRAS GALEGAS - Publicado o 18-05-2009 19:56
# Ligazón permanente a este artigo
A QUINTANA QUEDOU PEQUENA

Neste caso, unha imaxe vale máis ca mil palabras, aínda que sen elas,as palabras, non sería posible esta imaxe.
Comentarios (1) - Categoría: LETRAS GALEGAS - Publicado o 18-05-2009 19:49
# Ligazón permanente a este artigo
VERSOS POLA LINGUA
VERSOS POLA LINGUA

"O galego que non fala
Na lingua da súa terra
Non sabe o que ten de seu
Nin é merecente dela."

Victoriano Taibo "Da vella roseira".


Comentarios (2) - Categoría: ACCIÓNS EN VALORES - Publicado o 17-05-2009 08:50
# Ligazón permanente a este artigo
DEITADO FRENTE AO MAR
Deitado frente ao mar



Lingoa proletaria do meu pobo,
eu fáloa porque sí, porque me gosta,
porque me peta e quero e dame a gaña;
porque me sai de dentro, alá do fondo
dunha tristura aceda que me abrangue
ao ver tantos patufos desleigados,
pequenos mequetrefes sin raíces
que ao pór a garabata xa nan saben
afirmarse no amor dos devanceiros,
falar a fala nai,
a fala dos abós que temos mortos,
e ser, co rostro erguido,
mariñeiros, labregos do lingoaxe,
remo i arado, proa e rella sempre.
Eu fáloa porque sí, porque me gosta
e quero estar cos meus, coa xente miña,
perto dos homes bos que sofren longo
unha historia contada noutra lingoa.
Non falo pra os soberbios,
non falo pra os ruis e poderosos,
non falo pra os finchados,
non falo pra os valeiros,
non falo pra os estúpidos,
que falo pra os que agoantan rexamente
mentiras e inxusticias de cotío;
pra os que súan e choran
un pranto cotidián de volvoretas,
de lume e vento sobre os ollos núos.
Eu non podo arredar as miñas verbas
de tódolos que sofren neste mundo.
E ti vives no mundo, terra miña,
berce da miña estirpe,
Galicia, dóce mágoa das Españas,
deitada rente ao mar, ise camiño...

Celso Emilio Ferreiro

Abondan estas palabras...
Comentarios (0) - Categoría: LETRAS GALEGAS - Publicado o 16-05-2009 19:29
# Ligazón permanente a este artigo
PRESENTACIÓN SOBRE RAMÓN PIÑEIRO
No blogue escoitamos e falamos atopamos esta interesante e rigorosa presentación sobre Ramón Piñeiro realizada por Chus Sarmiento, profesora de Lingua Galega e Literatura no IES San Mamede de Maceda




Comentarios (0) - Categoría: LETRAS GALEGAS - Publicado o 15-05-2009 20:56
# Ligazón permanente a este artigo
RAMÓN PIÑEIRO
BIOGRAFÍA:
Ramón Piñeiro López naceu en Láncara (Lugo) en 1915. Despois de cursar na capital de provincia o Bacharelato elemental, volta á súa vila para axudar nas tarefas agrícolas familiares e en 1930 comeza a traballar en Sarria. En 1931, ano da proclamación da República, terá a oportunidade de asistir nesta vila a diferentes actos electorais. Un ano despois Piñeiro regresa a Lugo para estudar o Bacharelato superior e, influído por un mitin do recén creado Partido Galeguista, Ramón participaría na creación da Mocedade Galeguista de Lugo, sendo elixido na altura secretario de Cultura (máis tarde chegaría a desempeñar o cargo de presidente). A partir deste momento Piñeiro entra nun período de intensa actividade política que o levaría a exercer en 1936 como secretario do Comité Provincial do Estatuto de Autonomía organizado polo Partido Galeguista.
Tras a guerra civil comeza a cursar Filosofía e Letras en Compostela e Madrid. Porén, Piñeiro, máis preocupado pola reagrupación clandestina do galeguismo, abandonaría definitivamente estes estudos. Cando a finais de 1945 os nacionalistas cataláns, bascos e galegos deciden tratar co goberno republicano exiliado en Francia, Piñeiro será designado como representante galego naquela xestión. De regreso sería detido e condenado a seis anos de prisión, dos cales cumpriría tres, de 1946 a 1949. Xa libre, Piñeiro voltará a Galiza e desde entón vaise esforzar en mudar radicalmente a estratexia galeguista, prescindindo da opción política e reducíndoa cara á intervención cultural, o que provoca a desvertebración do Partido Galeguista. Froito deste posicionamento, coñecido como "piñeirismo", será a fundación en Vigo de Galaxia (1950), a primeira iniciativa editorial galeguista de posguerra. Como director desta empresa e codirector da revista Grial, Piñeiro dedicarase á promoción e difusión da cultura galega. Desde a mesa do seu gabinete de Xelmirez fomentará entre a mocidade o imposibilismo dunha reactivación política galega e dedicarase á escrita. A súa breve produción ensaística (mesmo a de carácter lingüístico-literario, como a que se recolle en Olladas no futuro, de 1974) ten como punto de partida o pensamento filosófico: Siñificado metafísico da saudade (1951), Pra unha filosofía da saudade (1953), A saudade e Rosalía (1962)...
No ano 1967 ingresa na Real Academia Gallega cun discurso titulado A lingoaxe i as língoas (1967). Xa en época democrática sae eleito deputado independente do Parlamento de Galiza polas listas do PSdeG-PSOE e desde 1983 até a súa morte, acontecida en Compostela en 1990, Ramón Piñeiro será presidente (o primeiro) do Consello da Cultura Galega.


Traemos aquí a biografía do homenaxeado este ano nas Letras Galegas, información extraída da Biblioteca Virtual Galega. Nela podedes acceder aos títulos da súa obra: bvg
Comentarios (0) - Categoría: LETRAS GALEGAS - Publicado o 14-05-2009 09:21
# Ligazón permanente a este artigo
3º PROGRAMA DO BEN FALADO NO IES LAGOA DE ANTELA
O venres 8 deste mes de maio emitiuse o 3º programa gravado para o Ben falado no IES Lagoa de Antela. As alumnas de 4º da ESO Úrsula Casado, Tamara Castro e Miriam Fernández e a avoa de Raquel Trigo, alumna de 1º de BAC, falaron dos remedios tradicionais. O alumnado entrevistou ás súas avoas e rexistrou remedios caseiros realizados con plantas medicinais (ortigas, ourego, salvia, romeu...) que se están colgando na revista dixital do instituto No límite e na revista impresa do mesmo nome. O traballo contou coa colaboración de Isabel García, profesora de Física e Química, que achegou a parte científica da tarefa.
Se queredes visionar o programa accedede á páxina web da Televisión de Galicia, ao apartado “Televisión á carta”, escribide o nome do programa (Ben falado), procurade a data e... A ESCOITAR E VER!!
Comentarios (0) - Categoría: NOVAS DE INTERESE - Publicado o 13-05-2009 17:34
# Ligazón permanente a este artigo
O CONTADOR DE HISTORIAS CELSO FERNÁNDEZ SANMARTÍN ENCHEU DE MAXIA O SALÓN DE ACTOS
Outro ano máis a maxia invadiu o salón de actos do IES Lagoa de Antela e encantounos. O alumnado de 1º e 2º da ESO escoitou o contador Celso Fernández Sanmartín e gozou coa súa habilidade para construír historias. A tradición oral é un referente cultural que corre o risco de perderse, e esa perda significaría a desaparición dunha riqueza lingüística de incalculable valor. Se a lingua se mantivo viva durante séculos foi grazas ao pobo e á necesidade de crear mundos imaxinarios que aliviaran a dor de pertencer a unha comunidade de desherdados.
Comentarios (0) - Categoría: ACCIÓNS EN VALORES - Publicado o 12-05-2009 20:00
# Ligazón permanente a este artigo
BÚSCANSE FIGURANTES

PADRE CASARES- CASTING FIGURANTES DE TÓDALAS IDADES

VOZ AUDIOVISUAL, produtora da serie PADRE CASARES, busca figurantes para a nova tempada da serie, cuxa gravación comezará o próximo 18 de maio.



A produtora seleccionará persoas de todo tipo, idade e características físicas para figurar nos novos capítulos, que se empezarán a emitir o 14 de setembro.

Entre os perfís, a produtora busca un bebé, nena, para papel fixo na serie.



Os interesados deben chamar (a partir do martes 12 de maio, ás 9 da mañá) ao teléfono 629613376, ou escribir ao enderezo electrónico marcos.vazquez@vozaudiovisual.com.



As entrevistas terán lugar o mércores 13 de maio na Coruña, entre as 9 e as 18 horas, nas instalacións da produtora (calle Gambrinus 97, Polígono A Grela).



Comentarios (0) - Categoría: NOVAS DE INTERESE - Publicado o 08-05-2009 21:00
# Ligazón permanente a este artigo
CORRELINGUA 2009
O alumnado de 1º da ESO, como é tradición, participou nesta nova edición do CORRELINGUA.

Esta carreira é un acto simbólico pola defensa da nosa lingua que se celebra todos os anos nas capitais das catro provincias.

Comentarios (1) - Categoría: DATAS PARA NON ESQUECER - Publicado o 08-05-2009 14:01
# Ligazón permanente a este artigo
LETRAS GALEGAS 2009
Para saber do homenaxeado este ano nas Letras Galegas, Ramón Piñeiro, procura información nestes enlaces:
Letras galegas

Letras Galegas 2

E visiona este vídeo: Ramón Piñeiro, o neno que quería ver o tren.

Comentarios (0) - Categoría: LETRAS GALEGAS - Publicado o 08-05-2009 13:42
# Ligazón permanente a este artigo
MANIFESTACIÓN POLA LINGUA
O 17 de maio as galegos e galegos que amamos o idioma estamos convocad@s a unha manifestación en Santiago de Compostela.
Acude!!

Máis información na páxina web da Mesa pola Normalización Lingüística MSNL
Comentarios (1) - Categoría: NOVAS DE INTERESE - Publicado o 08-05-2009 09:18
# Ligazón permanente a este artigo
CURTAS NA REDE
A Secretaría Xeral de Comunicación, a través da Dirección Xeral de Comunicación Audiovisual, e o Consello da Xuventude de Galicia invítanos a participar na IV edición do Concurso de Curtametraxes na Rede. Curtas na Rede.
Curtametraxes de ficción, curtametraxes experimentais, curtametraxes documentais e curtametraxes de animación.
A quen vai dirixido?
A todas as persoas, a partir dos 15 anos de idade en adiante, interesadas no mundo da creación audiovisual e multimedia.
Como me podo inscribir?
A inscrición é gratuíta e realízase a través do formulario que atopará na nosa páxina web.
O prazo de inscrición está aberto dende o 14 de febreiro de 2009 ata o 10 de setembro de 2009.5 Prazo de presentación das obras
As curtametraxes, cápsulas e micromovies poderán presentarse dende o sábado 14 de febreiro de 2009 ata o xoves 10 de setembro de 2009.

6 Características xerais das curtametraxes

O autor ou autora da curtametraxe deberá ter presente:
A curtametraxe non poderá exceder os cinco (5) minutos de duración, incluíndo os títulos de crédito.
• Poderá participar toda curtametraxe estreada ou producida durante o ano 2009. A participación en Curtas na Rede non impide a presentación destes traballos noutros concursos ou festivais mentres dure esta iniciativa. O non cumprimento destas condicións causa a baixa automática da/s obra/s presentadas.
• Cada autora ou autor poderá participar co número de obras que considere oportuno.
• Non se admiten obras que inciten ao racismo, á xenofobia, á violencia de xénero, á homofobia ou que atenten contra a dignidade da persoa.
• A curtametraxe non deberá facer publicidade ou promover o uso de ningún produto ou servizo de natureza comercial.
• As curtametraxes poderán presentarse indistintamente en galego, castelán ou portugués. Para calquera outra lingua, a curtametraxe terá que vir subtitulada en galego ou en castelán.
• As curtametraxes enviadas pasan a formar parte do arquivo deste concurso e os autores e autoras ceden gratuitamente os dereitos das obras para facer uso delas para ser exhibidas ou duplicadas sen fins comerciais ata finais deste ano co fin da promoción do concurso.
• Calquera apropiación indebida de dereitos de autor ou autoría na curtametraxe é responsabilidade da persoa que a inscribiu.

Máis información:
curtas na rede
Comentarios (0) - Categoría: CONCURSOS - Publicado o 08-05-2009 09:07
# Ligazón permanente a este artigo
CONCURSOS PARA A MOCIDADE
A Vicepresidencia da Igualdade e do Benestar, a través da Dirección Xeral de Xuventude e Solidariedade convídavos a participar neste Certame Galego de Creadores Novos, que inclúe as especialidades de teatro, artes plásticas, moda, música, relato breve, poesía, videocreación, banda deseñada, graffiti, carteis e deseño de xoias.

Acreditamos na creatividade da mocidade galega, apostamos por crear estímulos e canles de comunicación para a súa divulgación como modelos reais de presente e de futuro. O que pretendemos e implicarnos de xeito activo coa mocidade galega na procura de ferramentas e espazos que permitan estimular e vehicular as múltiples inquietudes artísticas individuais e colectivas da xuventude galega.

Poderán solicitar a participación os mozos ou mozas galegos ou residentes en Galicia, non profesionais, con idades comprendidas entre os 16 e os 30 anos de idade cumpridos no ano 2009.

A solicitude dos participantes deberá facerse nos impresos normalizados (Anexo I e Anexo II), e entregarase tamén a documentación xeral que se explicitan nas bases, así como, a documentación específica de cada especialidade, que se atopa nesta web, en cada unha das súas seccións.

Cada participante poderá presentar unha obra por especialidade ou por modalidade, establecéndose os seguintes premios por especialidade (teatro, artes plásticas, moda, música, relato breve, poesía, videocreación, banda deseñada, graffiti, carteis e deseño de xoias):

* Un primeiro premio de 3.000 €

* Un segundo premio de 1.500 €

* Un terceiro premio de 1.000 €

Poderanse outorgar mencións de honra, que carecerán de dotación económica, nas diferentes especialidades a aquelas obras que, a xuízo da comisión seleccionadora, acaden a suficiente calidade.


Nas ligazóns asociadas atoparás toda a información necesaria,

ENTÉRATE E PARTICIPA!!!

Bases neste enlace:
Galiza crea
Comentarios (0) - Categoría: CONCURSOS - Publicado o 08-05-2009 09:04
# Ligazón permanente a este artigo
BELÉN REGUEIRA NA RECOLLIDA DO PREMIO MESTRE MATEO
Belén Regueira, presentadora do programa O país dos pequenos, da televisión de Galicia, pronunciou unhas palabras reveladoras na defensa da lingua cando recolleu o premio Mestre Mateo á mellor comunicadora do ano 2008. En tempos de crise e agresións á lingua agradécense todo tipo de declaracións a prol dela.
Son reveladoras estas palabras pois seguen a probar unha vez máis que a lingua que está verdadeiramente ameazada no noso país, que a lingua que corre perigo de desaparecer é o galego e non o castelán.

Escoitade!!!!

Comentarios (2) - Categoría: NOVAS DE INTERESE - Publicado o 05-05-2009 15:03
# Ligazón permanente a este artigo
OUTRO AGASALLO
Recibimos un agasallo ben simpático do CEIP Manuel Masdias, de Ferrol http://www.blogoteca.com/xogosmasdias

Debemos procurar 10 blogs que merezan o agasallo. Para a semana desvelarémolos, previa consulta ao alumnado.

Mistero!
Comentarios (0) - Categoría: ACCIÓNS EN VALORES - Publicado o 02-05-2009 09:26
# Ligazón permanente a este artigo
ALBA PROL CID FALOU DA LINGUAXE DOS MEDIOS DE COMUNICACIÓN

Alba Prol Cid, vella alumna do IES Lagoa de Antela, deu unha charla sobre “A linguaxe nos medios de comunicación” ao alumnado de 1º de BAC. Ela, que vén de rematar a carreira de Comunicación Audiovisual na Universidade de Santiago de Compostela, expuxo dunha maneira clara e precisa a influencia no comportamento das persoas, sobre todo dos adolescentes, do chamado 4º poder.

Destacamos algúns aspectos da súa interesante conferencia ao respecto dos medios de comunicación:

A importancia da imaxe: vale máis parecer que ser.
A difusión de estereotipos a través dos programas e da publicidade.
A audiencia como factor determinante na emisión de programas e apublicidade como financiadora de programas.
A presenza perniciosa dos estereotipos verbais, xeradores de prexuízos.
A supremacía da cantidade sobre a calidade nos produtos audiovisuais.
A mercantilización e o factor ideolóxico no enfoque da programación.
A pervivencia das mensaxes subliminais a pesar de estaren prohibidas.
A influencia nefasta de programas- lixo, series televisivas e publicidade no comportamento dos e das adolescentes.
Os e as adolescentes como principal obxectivo de mercado: encaixan no perfil de consumidores influenciables.
A existencia do fluxo monodireccional da comunicación, do norte ao sur, e o perigo de aculturización.
A presión do castelán sobre o galego no ámbito mediático.

Alba Prol rematou pedindo ao auditorio que non se deixe enganar, QUE DESCONFÍEN E SEXAN CRÍTICOS.
Deixounos como agasallo unha curtametraxe en que participou que trata sobre espazos que coexisten pero que non se tocan e que se titula Tan preto e tan lonxe.

Grazas, Alba, foi un pracer.
Comentarios (1) - Categoría: VISITAS E ENCONTROS - Publicado o 02-05-2009 09:08
# Ligazón permanente a este artigo
RECIBIMOS TRES AGASALLOS!!
Recibimos tres agasallos!! da man de tres diferentes blogs. O blog foi agraciado co Selo Violeta por conter maxia ( a cor violeta representa a paz) na defensa da nosa lingua e é unha iniciativa de Mil Primaveras.

Dámosllelas grazas a quen nos agasallou :


O BLOG DO endl do IES Félix Muriel de Rianxo http://www.blogoteca.com/ocastelodalua/

O refraneiro http://www.blogoteca.com/orefraneiro/ )

O blog do ENDL de Breamo (http://www.blogoteca.com/asgabarras/

Aceptamos as regras pois esta mención ten as súas normas:

- Exhibir o selo Violeta.
- Poñer o nome do blog que cho deu.
- Indicar os blogs que merezan o agasallo.
- Avisar os indicados.
- Publicar as regras.
- Comprobar que os blogs indicados sigan as regras.
O noso agasallo vai para:

The painther, blog da nosa vella alumna Ana Parada, pola beleza das súas palabras e o seu constante espírito artístico. http://www.blogoteca.com/thepainter/

Os colegas das palabras, http://www.colegasdaspalabras.blogspot.com/,
blog lector do IES Julio Prieto Nespereira, polo fomento da lectura en galego.

O cartafol do vento,
blog do ENDL do IES San Mamede de Maceda, pola súa alma creativa e didáctica. ocartafoldovento.blogspot.com

Na punta da lingua, pola súa entrega na procura de estratexias dinamizadoras, http://www.blogoteca.com/napuntadalingua/



http://ocartafoldovento.blogspot.com
Comentarios (4) - Categoría: NOVAS DE INTERESE - Publicado o 28-04-2009 11:37
# Ligazón permanente a este artigo
25 DE ABRIL SEMPRE!!
Onte foi 25 de Abril!! O 25 de abril conmemórase a Revolução dos Cravos, o levantamento que, en 1975, en Portugal, protagonizou o exército contra a ditadura de Marcelo Caetano, continuador do tirano Salazar.
O exército entrou en Lisboa cun caravel na punta dos fusís e foi recibido pola poboación con moito balbordo e alegría. Unha revolución sen derramamento de sangue e liderada polo exército, o que tal se viu! Portugal estaba canso de mandar fillos a África a morrer pola patria, cuxa defensa na conservación das colonias rebeldes era máis importante para os dous ditadores que a vida dos seus compatriotas. A PIDE, odiada institución que se encargaba de perseguir, torturar e eliminar os “subversivos”, foi desmantelada.
A canción símbolo da revolución foi Grándola, cantada por José Afonso (Zeca), hoxe convertida nun himno que non coñece froterias.Grándola, vila morena, terra da fraternidade, o povo é que máis ordena, dentro de ti, ó cidade... A acrtiz e directora portuguesa Maria de Medeiros dirixiu e protagonizou unha película sobre os acontecementos: Capitães de Abril.
25 de Abril sempre!!
Comentarios (1) - Categoría: DATAS PARA NON ESQUECER - Publicado o 26-04-2009 18:48
# Ligazón permanente a este artigo
CAMPAÑA POLA LECTURA EN GALEGO
Interesante campaña de promoción da lectura en galego. Copiámoslla ao blog

as gabarras
Comentarios (2) - Categoría: CAMPAÑAS - Publicado o 23-04-2009 13:18
# Ligazón permanente a este artigo
VÍDEO SOBRE RAMÓN PIÑEIRO

As letras galegas homenaxean a Ramón Piñeiro. Atopamos este vídeo grazas ao blog


no bico da lingua
Comentarios (1) - Categoría: DATAS PARA NON ESQUECER - Publicado o 20-04-2009 09:54
# Ligazón permanente a este artigo
PRESENTACIÓN SOBRE MULTILINGÜISMO DO IES DE ELVIÑA
O ENDL do IES de Elviña preparou esta interesante e didáctica presentación sobre o multilingüismo. Unha delicia!


Comentarios (0) - Categoría: MATERIAIS DIDÁCTICOS - Publicado o 16-04-2009 12:47
# Ligazón permanente a este artigo
LIBROS GALEGOS PARA TODAS AS IDADES E GUSTOS
Neste enlace encontramos unha lista inmensa de libros clasificados por idades e con resumos e opinións. Debémosllo a Anxo González e Vitoria Ogando: LIBROS
Comentarios (0) - Categoría: RECOMENDACIÓNS LITERARIAS - Publicado o 14-04-2009 18:52
# Ligazón permanente a este artigo
XINZO EN FOTOGRAFÍAS

Antía Pousa, de 2º de BAC, mándanos esta reportaxe fotográfica de Xinzo.


Comentarios (0) - Categoría: NOVAS DE INTERESE - Publicado o 11-04-2009 09:35
# Ligazón permanente a este artigo
ENTREVISTA A XABIER XIL XARDÓN
ESTHER LOSADA E PAULA CRISTINA LIMIA, alumnas de 2º de BAC no IES Lagoa de Antela entrevistaron ao poeta Xabier Xil Xardón, antigo alumno do centro. Interesantes preguntas e interesantes respostas.

Para ler ben o documento debes premer no artigo e regular + ou - o zoom.



Comentarios (1) - Categoría: NOVAS DE INTERESE - Publicado o 09-04-2009 09:35
# Ligazón permanente a este artigo
AS LECTURAS POLA PAZ NO BEN FALADO

BEN FALADO!
Ben falado! é un microespazo de cinco minutos diarios dedicados á lingua galega presentado por Xesús Ferro Ruibal.

Capítulo 184
IES Xinzo. Lecturas abertas pola paz
Fraseoloxía: En abril xa se cea sin candil. Xaneiro, xeadeiro. Á xeada de abril, fame ha de seguir. A lama de agosto i-o polvo de abril non son de rir. Marzo ventoso e abril chuvi...
03/04/2009 - 15:31 h.

Se queres ver o vídeo entra na tele galega á carta e escribe ben falado:

Ben falado
Comentarios (0) - Categoría: NOVAS DE INTERESE - Publicado o 06-04-2009 18:39
# Ligazón permanente a este artigo
AS MULLERES DE VERDADE TEÑEN CURVAS

Título orixinal: Real women have curves (As mulleres de verdade teñen curvas)
Ano: 2002
Directora: Patricia Cardoso
Guión: George LaVoo e Josefina López
Música: Emma García de Mantilla e Héctor Pereira

Premios: Sundance 2002: premio do público. San Sebastián 2003: premio do público xove

SINOPSE: Ana, unha adolescente méxico-americana, vive na comunidade hispana do Leste de Los Ángeles, e recentemente acabado o instituto o seu profesor anímaa para que solicite unha bolsa para estudar na Universidade de Columbia. Pero os seus tradicionais pais pensan que non é tempo para estudar, senón para axudar a súa familia. Dividida entre as súas ambicións persoais e a súa tradición cultural, accede a traballar coa súa nai na fábrica de costura da súa irmá, no centro de Los Ángeles.

Proxectouse no salón de actos en versión orixinal con subtítulos, esta película da directora mexicana Patricia Cardoso que trata moitos temas interesantes. Baséase na obra teatral de Josefina López, co-guionista, produto da súa experiencia como traballadora sen papeis nun taller de costura en Los Ángeles, cidade onde transcorre a acción.
O filme trata múltiples temas dende unha óptica feminista: a capacidade de decidir, o valor da cultura e a educación, o enfrontamento xeracional, o desarraigo cultural, o conflito lingüístico, o espertar do sexo, o amor, a explotación laboral, a solidariedade entre mulleres, a aceptación do corpo, o cuestionamento da tradición, a liberdade...

Logo da proxección, que provocou fortes aplausos e callou sobre todo no público feminino, abriuse un pequeno interesante debate sobre a película.

Sen dúbida, esta é unha película para recoñecerse, valorarse e aceptarse, imprescindible para traballar a igualdade.
Comentarios (0) - Categoría: CINEFÓRUM - Publicado o 06-04-2009 14:35
# Ligazón permanente a este artigo
O DOCUMENTAL SOBRE O ENTROIDO XA É UNHA REALIDADE
Aquel proxecto de documental sobre o Entroido de Xinzo que naceu dunha idea de Roxelio Barbosa, profe de Matemáticas, xa é unha realidade. Na elaboración do vídeo, que leva o nome de “Con elas chegou o Entroido” , invertéronse moitas horas de traballo: gravación, confección dun guión, escolla, montaxe, un camiño arduo e non exento de dificultades. Pero o esforzo mereceu a pena e o produto final é a recompensa a todo ese tempo de dedicación.Alumnas e alumno participantes no proxecto: Uxía Alonso, Úrsula Casado, Isabel Fernández, Noelia Gamallo, Beatriz Domínguez, Susana Diz e Álvaro Araújo.

Noraboa!!
Comentarios (0) - Categoría: NOVAS DE INTERESE - Publicado o 05-04-2009 12:24
# Ligazón permanente a este artigo
OS EQUIPOS DE NORMALIZACIÓN CREAN UNHA COORDINADORA

Reproducimos esta nova tomada de www.blogoteca.nalinguadetodos e facémola nosa:

Na xuntanza mantida por un cento de coordinadores de Equipos de Normalización e Dinamización Lingüística (ENDL) dos centros de ensino públicos e privados no Instituto Galego de Información (Santiago de Compostela), acordouse a constitución dunha Coordinadora Galega de Equipos de Normalización e Dinamización Lingüística para establecer dinámicas de colaboración entre os diferentes equipos, unha cooperación que permita compartir experiencias normalizadoras que redunden positivamente no traballo da dinamización lingüística nos centros de ensino galegos.

A primeira acción da Coordinadora Galega de ENDL é dar a coñecer o posicionamento público dos equipos sobre a derrogación do Decreto 124/2007, polo que se regula o uso e a promoción do galego no sistema educativo, anunciada polo novo goberno da Xunta de Galicia.

Por iso, convídase a todos os Equipos de Normalización a adherirse a este texto que se pode consultar na páxina web da coordinadora
Comentarios (0) - Categoría: NOVAS DE INTERESE - Publicado o 01-04-2009 00:16
# Ligazón permanente a este artigo
© by Abertal