O FALAR NON TEN CANCELAS


ENDL IES Lagoa de Antela

O meu perfil
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

VIDEOPOEMA OS MITOS, DE CARLOS NEGRO
Por fin atopei o videopoema Os mitos das nosas alumnas de 2º de BAC Noelia, Uxía, Beatriz e Isabel, baseado no poema homónimo de Carlos Negro.Trátase dunha produción artística orixinal, cun contido transversal: un alegato contra a violencia de xénero.
O actor é Pablo González, alumno de 1º de BAC, antigo alumno de teatro do instituto e membro do grupo de teatro de Xinzo. O outro colaborador chámase Roberto Estévez, amigo do grupo.

A voz é do irmán pequeno de Uxía, Xurxo Alonso.

Comentarios (2) - Categoría: CREACIÓNS ALUMNADO - Publicado o 07-11-2010 13:04
# Ligazón permanente a este artigo
ENTREGA DE PREMIOS DO SAMÁIN
ENTREGAMOS TAMÉN OS PREMIOS DO CONCURSO DE CABAZAS E DE CONTOS DE MEDO.

NORABOA A TODAS, POIS FORON TODAS MULLERES AS PREMIADAS. O PREMIO DE BEATRIZ DOMÍNGUEZ FOI RECOLLIDO POLO SEU IRMÁN JOSÉ LUIS.



Comentarios (0) - Categoría: CONCURSOS - Publicado o 07-11-2010 12:57
# Ligazón permanente a este artigo
SAMAÍN 2010 NA BIBLIOTECA DO IES LAGOA DE ANTELA
Durante toda a semana pasada celebramos o Samaín. Decoramos o corredor que conduce á biblioteca e esta con motivos de medo, realizamos un concurso de cabazas e dedicamos tres recreos a escenificar contos de medo.
Os grupos de teatro de 3º da ESO realizaron unha lectura dramática dunha adaptación do relato "O Fornadas" de Xabier P. Docampo (de Cando petan na porta pola noite) e escenificaron tres contos de medo inventados por elas e eles mesm@s.
A nosa lectora de inglés Natalie tamén leu un conto de medo de Edgar Allan Poe, "O corazón delator" empregando tres idiomas: inglés, castelán e galego.


Aquí van algunhas fotos e secuencias breves da celebración.>




Comentarios (0) - Categoría: DATAS PARA NON ESQUECER - Publicado o 07-11-2010 11:59
# Ligazón permanente a este artigo
SAMAÍN 2010, PÁNICO NA BIBLIOTECA
Esta semana celebramos o Samaín con dramatizacións de contos de medo na biblioteca e un concurso de cabazas.
Aí vai un primeiro vídeo para crear ambiente.


Comentarios (0) - Categoría: DATAS PARA NON ESQUECER - Publicado o 05-11-2010 08:13
# Ligazón permanente a este artigo
DÍA DA CIENCIA EN GALEGO, 4 DE NOVEMBRO

Do CERN a Compostela coa Física de Partículas

A CGENDL e o Departamento de Física de Partículas da Universidade de Santiago de Compostela convidan a todos os centros educativos non universitarios a participar nesta videoconferencia vía web, na que investigadores galegos do CERN e da Facultade de Fisica da USC explicarán os proxectos científicos que desenvolven na actualidade. Ademais de seguir a videoconferencia, os centros escolares que desexen participar terán a posibilidade de interaccionar con eles vía chat.


O IES Lagoa de Antela vai participar nesta xornada de ciencia en galego.

A ciencia pode estudarse, expresarse, investigarse, impartirse... os 365 días do ano en galego, como non!
Comentarios (0) - Categoría: NOVAS DE INTERESE - Publicado o 02-11-2010 21:02
# Ligazón permanente a este artigo
PREMIOS CONTOS DE MEDO
Ás veces resulta tan difícil decidir! Iso pasoulle ao xurado desta convocatoria, que encontrou tanta calidade nos textos presentados que tardou en tomar unha decisión. Escoller significa renunciar e, neste caso, aínda que na convocatoria só figuraban tres premios, o xurado decidiu outorgar tres accésits.

PARABÉNS A TODAS!!!




En breve subiremos os contos ao blog de revista No Límite.
Comentarios (0) - Categoría: CONCURSOS - Publicado o 01-11-2010 11:28
# Ligazón permanente a este artigo
O DOCUMENTAL A MEMORIA DA LINGUA XA É UNHA REALIDADE
No blog As Candongas do Quirombo atopamos toda a información sobre o proxecto audiovisual A memoria da lingua. Merece a pena ver, ler e reflexionar.

Os parabéns a esta xente que investiu tantas horas neste traballo.


A memoria da lingua from as candongas do quirombo on Vimeo.

Comentarios (0) - Categoría: ACCIÓNS EN VALORES - Publicado o 01-11-2010 11:19
# Ligazón permanente a este artigo
CAMIÑO DA MEMORIA, PREMIO AMAL EXPRESS
A nosa benquerida Ana Barxa, onte alumna deste instituto, hoxe universitaria, mándanos esta referencia a un vídeo que trata a enfermidade do Alzheimer: Camiño da memoria, de Alberte Mera, premio Amal Express.

Un saúdo para ti, Ana, e para toda esa xente que navega noutras augas sen esquecer estas.


Comentarios (1) - Categoría: AUDIOVISUAL - Publicado o 01-11-2010 11:11
# Ligazón permanente a este artigo
TRAILER DO DOCUMENTAL DAS CANDONGAS DO QUIROMBO SOBRE A MEMORIA LINGÜÍSTICA
Este é un avance sobre un documental que esperamos ver e escoitar en breve sobre a memoria da nosa lingua. Nestes tempos difíciles convén botar a ollada ao pasado e reflexionar sobre o presente da nosa lingua que, vítima de ataques ignominiosos por parte dalgúns sectores, corre o risco de desaparecer. Nas nosas mans e, sobre todo, nas nosas bocas, está evitar que se consuma este lingüicidio, algo que non logrou a longa noite de pedra da ditadura.

Parabéns para o traballo das Candongas do Quirombo.


Comentarios (1) - Categoría: AUDIOVISUAL - Publicado o 23-10-2010 11:56
# Ligazón permanente a este artigo
O GALEGO É O NOSO MEDIO NATURAL
Dende a Coordinadora de Equipos de Normalización e do Servizo de Normalización da Universidade de Vigo chéganos este interesantísimo traballo sobre a diversidade lingüística.
















O contido desta páxina precisa unha versión máis recente de Adobe Flash Player.


Obter Adobe Flash Player




Comentarios (1) - Categoría: CAMPAÑAS - Publicado o 21-10-2010 19:33
# Ligazón permanente a este artigo
VÍDEOS DE FLOCOS
De flocos (espazo web para vídeos galegos) escollemos estes vídeos interesantes.













Comentarios (0) - Categoría: AUDIOVISUAL - Publicado o 19-10-2010 08:57
# Ligazón permanente a este artigo
O 22 DE OUTUBRO COMEFA O F.I.T.O.

Do día 22 ao 31 deste mes celebrarase en Ourense o FITO (Festival de Teatro Internacional de Ourense).

Para ver o programa premede aquí.

Acompañamos a nova cunha pintura de Maruxa Mallo.
Comentarios (0) - Categoría: NOVAS DE INTERESE - Publicado o 18-10-2010 12:56
# Ligazón permanente a este artigo
CASTELÁN: A LINGUA DE PRESTIXIO
En Carnota unha muller de 67 anos, Marisa Beiro, fala sobre o galego. Interesante!


Comentarios (0) - Categoría: NOVAS DE INTERESE - Publicado o 09-10-2010 11:28
# Ligazón permanente a este artigo
NENAS E NENOS D'A INDIA CANTANDO EN GALEGO

Unha ONG de Cangas, Shaga India, financia un proxecto educativo n'A India. Na Escola Maria Soliño en Punbai-Orissa aprenden cancións en galego.
A información chéganos a través do SNL do Concello de Redondela.
Parabéns por este proxecto para a ONG!


Comentarios (0) - Categoría: NOVAS DE INTERESE - Publicado o 09-10-2010 11:25
# Ligazón permanente a este artigo
CONCURSO DE FOTOGRAFÍA
Comentarios (1) - Categoría: CONCURSOS - Publicado o 05-10-2010 17:39
# Ligazón permanente a este artigo
CONCURSO DE CONTOS DE MEDO
Comentarios (0) - Categoría: CONCURSOS - Publicado o 05-10-2010 17:38
# Ligazón permanente a este artigo
VÍDEO SOBRE A ESENCIA DA LINGUA
Inauguramos o curso 2010-2011 cun vídeo do programa do "Ben Falado" ao que chegamos a través de Xela, a coordinadora do IES Julio Prieto Nespereira, vía Noia.
Emociona, de verdade.

Comentarios (0) - Categoría: VARIOS - Publicado o 29-09-2010 20:20
# Ligazón permanente a este artigo
FERMOSOS DEBUXOS DE LEDICIA PRIETO
Imos despedir este curso con este agasallo de Ledicia Prieto, integrante do club de lectura de 4º da ESO e colaboradora do ENDL. Debuxos para admirar e para reflexionar que me lembran ese poema de Ronseltz aplicado á poesía: "O poema é unha pedrada na cabeza./Por iso lles recomendamos aos leitores/ que usen casco."
Agardamos que esta artista siga creando durante o verán.

E lembrade:
A Limia aínda é ese paraíso onde se vive en galego, onde o horizonte circular que a abraza soña en galego, onde ata as sombras das barcas que navegaron a Lagoa falan galego.

Feliz verán a tod@s!!


Comentarios (1) - Categoría: CREACIÓNS ALUMNADO - Publicado o 24-06-2010 20:38
# Ligazón permanente a este artigo
TEATRO A ESGALLA NO INSTITUTO
Estas dúas semanas gozamos co teatro en varias sesións.
O grupo de teatro de 3º C e D levaron á escena Hotel Desguace, unha simpática comedia protagonizada por vellos que sobreviven nunha sociedade represora en que está prohibido ler en galego. Unha festa clandestina, un traficante de libros, un asasinato inesperado e un interrogatorio policial compoñen os ingredientes básicos desta peza made in feita na casa.

ESCENA DE HOTEL DESGUACE

INSPECTOR: A ver, dígame algo que eu non saiba.
ROBERTO: Eu non sei nada.
INSPECTOR: Alguén dixo que...que leva aí?
ROBERTO: Eeeu?
INSPECTOR: Detective, rexistre a este individuo.
ROBERTO: Déixeme. (forcexean, cáenlle dous libros)
INSPECTOR: Ahá, así que traía a mercancía enriba. A ver que hai por aquí, Rosalía de Castro, Castelao, libros prohibidos. Non lle dará vergonza, señor Roberto? Aos seus anos.
ROBERTO: Por favor, señor inspector, que teño muller e fillos. Que vai facer? Nooon, iso non, Os vellos non deben de namorarse non. (rompen os libros)
INSPECTOR: Preparen a desintoxicación inmediatamente, este home ten unha adicción espantosa. Vostede non sabe que ler en galego prexudica seriamente a saúde? Que noxo!
ROBERTO: Fascistas!
INSPECTOR: Chamen a House e que lle apliquen unha descarga, e logo rexistren o cuarto deste subversivo.
ROBERTO: Nooon, o doutor House non.

INSPECTOR: Efectuaron o rexistro?
DETECTIVE: Si, inspector, encontramos a mercancía, libros agochados debaixo da cama e entre a roupa.
INSPECTOR: Que títulos?
DETECTIVE: Dous exemplares de Longa noite de pedra, de Celso Emilio Ferreiro e tres de Ollos de auga, de Domingo Villar, estaban aínda quentiños, inspector, alguén debeu lelos hai pouco.
INSPECTOR: Que barbaridade, este país está enfermo. Hai que desinfectar todo o edificio. Ler en galego, que perverso.

INSPECTOR: Señora Ana, bóteme o alento.
ANA: É estritamente necesario, inspector?
INSPECTOR: Obedeza. Puagh, que comeu?
ANA: Allo, inspector.
INSPECTOR: Pois a min chéirame a libro podre, señora Ana, vostede le?
ANA: Eeeeu? Só nalgunha data sinalada, inspector, case nada.
INSPECTOR: O Día das Letras Galegas dille algo? É unha data sinalada?
ANA: Non sei onde quere chegar, inspector, insinúa algo?
INSPECTOR: Ten vostede alento de Longa noite de pedra, señora Ana, cheira que fede. Cando foi a última vez que leu en galego?
ANA: O día antes de que o prohibisen, inspector.
INSPECTOR: Sométana inmediatamente a proba do polígrafo verbal.
DETECTIVE: O teito é de pedra, de pedra o chan e as reixas… Inspector, mire.
INSPECTOR: Ahá! A ver, siga.
DETECTIVE: Unha vez tiven un cravo...
ANA: Cravado no corazón.
INSPECTOR: Témola, ao calabozo, aplíquenlle a tortura 17 de maio, cantará.

ANA: Nooon.
DETECTIVE TORTURADOR. Toma outra ración de Luar. (voz do Gayoso e sintonía)
ANA: Por favor, por favor, confesarei.

INSPECTOR: Confesou?
DETECTIVE: Si, inspector, tiña lida toda a literatura galega publicada na clandestinidade.
INSPECTOR: Que barbaridade! Hai que sometela a un lavado de cerebro canto antes.
DETECTIVE: Niso estamos, inspector.
INSPECTOR: Quen falta por interrogar, detective?
DETECTIVE: Roque e Rosa, inspector.
INSPECTOR: E os enfermeiros?
DETECTIVE: Cando se produciu o crime estaban atados e amordazados, inspector. Tamén lles vendaron os ollos, non puideron ver nada, inspector. E a Luís, un dos fíos condutores desta peza teatral, deulle un infarto, inspector.
INSPECTOR: Descartados. Tráiame a Roque. Por certo, entón estamos nunha peza teatral, detective?
DETECTIVE: Iso parece, inspector.
INSPECTOR: Vaia, e hai público?
DETECTIVE: Mire para aí, inspector?
INSPECTOR: Ostrás, entón é certo. Coloque ben o uniforme, detective, que nos están mirando.




O grupo de 3º B representou unha adaptación da obra de Fernando Arrabal Pique-Nique. As escenas e diálogos absurdos nun escenario de guerra descoloca os espectadores que acaban percibindo a crítica aos conflitos bélicos. Proxectouse nesta sesión Historia de Corterríbel, unha lenda da Lagoa de Antela, un vídeo pola paz e a curtametraxe O xogo da guerra.
ZAPO: Tedes que marchar, está prohibido vir á guerra se non se é soldado.
SR TEPÁN: A min impórtame un pito, nós só queremos pasar o día contigo xa que hoxe é domingo.
SRA TEPÁN: Mira, neno, fixen tortilla de patacas, con queixo como a ti che gusta, e trouxen viño e pasteis.
ZAPO: Ummm.
SOBRIÑO E SOBRIÑA: Que rico!
SRA TEPÁN: Demo de rapaces, non toquedes nada.
ZAPO: Se o sabe o capitán cólgame, co que lle molesta iso de que haxa visitas na guerra. Repítenos sempre “na guerra, disciplina e bombas, pero nada de vsitas”.
SR TEPÁN: Xa lle direi un par de cousas a ese capitán.
ZAPO: E en que viñestes?
SRA TEPÁN: No catro latas, que atasco co tanque aquel. Veña, vaiamos comer.
SR TEPÁN: Si, o cheiro a pólvora ábreme o apetito. Nenos, axudade a pór a mesa.
SOBRIÑO E SOBRIÑA: Bah, que rollo.
ZAPO: Como co fusil?
SRA TEPÁN: Nada de fusís, é de mala educación sentar á mesa con fusil. A ver, ensíname as mans, que sucias.
ZAPO: É que me tiven que arrastrar polo chan, ma. (avergoñado)
SRA TEPÁN: E as orellas?
ZAPO: Laveinas esta mañá.
SRA TEPÁN: Poden pasar, e os dentes? Moi ben, quen lle dá ao seu meniño un biquiño por ter os dentes lavados? Porque o que non se pode consentir que co conto da guerra te deixes de lavar.
ZAPO: Si, mamá.






E, por último, a actuación estrela: o grupo dos maiores Xeito, dirixido por Manolo Fontemoura, representou Os cravos de prata, unha farsa de Nicolás Bela que conta a historia dun vello que simula a súa morte para fuxir cos cartos que tiña agochados. O alumnado fartou de rir e aplaudiu a rabiar a esta xente que leva o teatro no sangue. As nosas señoras da limpeza tampouco quixeron perder o espectáculo e botaron unhas gargalladas ben sonoras.
Parabéns e grazas!

Comentarios (0) - Categoría: TEATRO - Publicado o 23-06-2010 18:49
# Ligazón permanente a este artigo
FRAGMENTO DA CURTAMETRAXE HISTORIAS DE ONTE
Os alumnos Miguel Carballo e Jonathan Domínguez realizaron unha interesante curtametraxe sobre o perigo das drogas. Contaron coa colaboración de Pablo González, Ionela Boboc, Elsa Cabrera e Mª Mar Carnero. Dados os rudimentarios medios dos que dispuñan o produto resultante é máis ca digno.
Aquí vai un fragmento sobre esta produción caseira.
Parabéns, rapaces e rapazas!


Comentarios (0) - Categoría: CREACIÓNS ALUMNADO - Publicado o 23-06-2010 13:54
# Ligazón permanente a este artigo
«Periferia» de Iolanda Zúñiga, Premio Xerais de novela 2010

O xurado da 27ª edición do Premio Xerais de Novela acordou por unanimidade declarar como gañadora a presentada baixo o lema «O avesso do avesso» que, despois de aberta a plica, resultou ser de Iolanda Zúñiga e corresponde ao título Periferia.
Para saber máis visitade a páxina de Xerais ou a de Brétemas, de Manuel Bragado.
Teresa González Costa gañou o Premio Merlín.

Fixádevos que camiseta loce a flamante gañadora do Xerais, a erótica da lectura e a escritura!
Comentarios (0) - Categoría: NOVAS DE INTERESE - Publicado o 18-06-2010 20:31
# Ligazón permanente a este artigo
O LUNS RECIBIMOS O GRUPO TEATRAL XEITO

O luns 21 acudirá ao noso instituto o grupo teatral Xeito de Xinzo, formado por actrices e actores xa maduriños, que represantarán Os cravos de prata, de Nicolás Bela. Dirixe o grupo Manolo Fontemoura. Seguro que botamos unhas risas coa parodia do velorio.
Comentarios (0) - Categoría: TEATRO - Publicado o 18-06-2010 20:19
# Ligazón permanente a este artigo
AGASALLOS DO ENDL

O ENDL agasallou a membros do club de lectura, participantes nos distintos recitais e asistentes ás lecturas cunha bolsa que contén un verso de Uxío Novoneyra alterado: "Chove pra que eu soñe...".
Grazas a todas e todos, ás persoas que posaron para esta foto e ás que non saen pero "chuparon cámara" en moitas outras ocasións.

MIL PRIMAVERAS PARA A LINGUA, NOSAS SON AS PALABRAS DE ÁLVARO CUNQUEIRO.
Comentarios (0) - Categoría: VARIOS - Publicado o 18-06-2010 08:21
# Ligazón permanente a este artigo
ESTA SEMANA TEATRO A ESGALLA
As dúas compañías teatrais do instituto levarán á escena dúas pezas: Hotel desguace, unha divertida comedia made in feita na casa sobre a 3ª idade, e Pique- Nique, adaptación realizada sobre a obra do absurdo, crítica das guerras, de Fernando Arrabal. Pasen e vexan!




Comentarios (0) - Categoría: TEATRO - Publicado o 14-06-2010 20:13
# Ligazón permanente a este artigo
Hª DA LINGUA, DE PEPE CARREIRO
Vía trafegando ronseis traemos aquí esta Historia da lingua de Pepe Carreiro.

Comentarios (0) - Categoría: MATERIAIS DIDÁCTICOS - Publicado o 08-06-2010 18:48
# Ligazón permanente a este artigo
ORGULLOS@S DO NOSO, ORGULLOS@S DO GALEGO
Vía este blog, boas e xenerosas, chéganos este vídeo alucinante sobre o orgullo de falar galego e ser galeg@ realizado polo IES Pedras Rubias de Salceda de Caselas.
Cunha técnica de animación e a colaboración dun membro de Dios k te Crew (García MC)elaboraron un produto excelente. Felicitamos o alumnado e profesorado que o fixo posible.



Comentarios (0) - Categoría: CAMPAÑAS - Publicado o 07-06-2010 17:48
# Ligazón permanente a este artigo
EN GALEGO TAMÉN SE FAI CIENCIA
Campaña "En galego tamén se fai ciencia" promovida pola Comisión Interuniversitaria de Política Lingüística.Cantas máis linguas se saiban...

Beatriz de Carlos from En galego tamén se fai ciencia on Vimeo.

Comentarios (0) - Categoría: CAMPAÑAS - Publicado o 06-06-2010 22:16
# Ligazón permanente a este artigo
Hª DE CORTERRÍBEL, UNHA LENDA DA LAGOA DE ANTELA
O alumnado de teatro posibilitou esta versión videográfica dunha historia do libro A lenda da Lagoa de Antela, de Delfín Caseiro.
Algunhas fotos son de Tomás García, outras, que pertencen ao pasado, están tiradas de internet e as de ficción pertencen á que escribe.


Comentarios (1) - Categoría: VARIOS - Publicado o 03-06-2010 21:15
# Ligazón permanente a este artigo
CONCURSO DE BIBLIOCLIPS

Vémonos na biblioteca:
BASES DO CONCURSO DE BIBLIOCLIPS
DAS BIBLIOTECAS MUNICIPAIS DA CORUÑA (Ed. 2010)
1. Presentación
A
s Bibliotecas Municipais da Coruña convocan o concurso de BIBLIOCLIPS para amosar o feito lector entre os cidadáns cunha visión diferente, persoal e lúdica das bibliotecas públicas.
O concurso consiste na realización dun Spot Publicitario dunha duración máxima de 35 segundos de
visionado, inspirados na biblioteca e a lectura. A curta poderá estar ou non gravada nun espazo
bibliotecario. En calquera caso, valorarase a orixinalidade e a capacidade de expresar calquera punto de vista relacionado co tema do concurso, así como as posibilidades de emisión dos traballos presentados.

Máis información na sección de normalización da nosa páxina web.
Comentarios (0) - Categoría: CONCURSOS - Publicado o 03-06-2010 11:21
# Ligazón permanente a este artigo
VIVE A AVENTURA DE LER, PREPÁRATE PARA AS VACACIÓNS
Colgamos no blog lector Nos tamén navegar un tríptico con recomendacións literarias. Achéganse as vacacións e cómpre ir xestionando os préstamos.
Navegamos mares, cruzamos fronteiras, vi
vimos aventuras, soñamos... e todo de balde!

Comentarios (0) - Categoría: RECOMENDACIÓNS LITERARIAS - Publicado o 02-06-2010 17:56
# Ligazón permanente a este artigo
RECITAL EN AGUILLOAR

A palabra chega cando as persoas senten.
Superamos o pouso amargo que deixaron ao inicio as ausencias (nin Xabier Xil nin Anxo Angueira fixeron acto de presenza) co bo ambiente da xente que acudiu á cita. Cita coa palabra. Despois dos saúdos o local foise empapando de literatura: as paredes, as cadeiras, os vasos, os corpos todos. Sobre a pel deshidratada metáforas líquidas. E nos intermezzos merecidos aplausos.
Poemas de Uxío Novoneyra, Antón Lopo, Darío Xohán Cabana, Gioconda Belli, Celso Emilio Ferreiro, Nizam Qabbani e da nosa alumna Mayte López cobraron vida nas voces de Fatima, Mayte, Uxía, Beatriz, Noelia, Jonathan, Anxo, María, Laura, José, Irene e Ana. Acompañaron coas guitarras Miguel e Cristian.
Nun acto organizado conxuntamente polo ENDL do instituto e a Asociación Cultural Aguilloar, con Rubén Domínguez e Diego Quintairos como anfitrións, e diante dun público entregado, puidemos gozar da proxección duns videopoemas do noso alumnado, un documental sobre a figura de Uxío Novoneyra e a curtametraxe O xogo da guerra, baseada no relato homónimo do escritor limiao Carlos Casares. Calidade suprema!!
Grazas, mozas e mozos, pola vosa xenerosidade.




RECITAL EN AGUILLOAR on PhotoPeach
Comentarios (0) - Categoría: LETRAS GALEGAS - Publicado o 31-05-2010 20:33
# Ligazón permanente a este artigo
PÍFANO TEATRO NO IES LAGOA DE ANTELA
Tivemos o pracer de ser espectadores do espectáculo didáctico da compañía Pífano Teatro. Mela Casal e Xavier Picallo leváronnos de paseo pola historia do teatro. Viaxamos dende a Grecia clásica ata o teatro do absurdo pasando pola Idade Media, o teatro de Shakespeare e o de Bertolt Brecht. Botamos unhas risas e logo charlamos cos actores. Ao final quedaron alumnos e alumnas de teatro que recibiron unha lección sobre como educar a voz coa respiración. Mela Casal deitouse no chan e foi moi gráfica.
Unha xente aberta e amable.


Comentarios (0) - Categoría: TEATRO - Publicado o 28-05-2010 11:16
# Ligazón permanente a este artigo
RECITAL E PROXECCIÓNS EN AGUILLOAR

A asociación Aguilloar de Xinzo, formada por antigo alumnado do noso instituto, celebra co noso alumnado as Letras Galegas. Proxeccións audiovisuais e recital serán parte dun menú que terá como "artista" convidado o poeta das Redes Escarlata Anxo Angueira, autor de Fóra do sagrado e a quen sempre é un pracer escoitar.
Esperamos ver por alí a Xabier, Diego, Andrés, Héctor, Borja, Rubén...
Comentarios (0) - Categoría: NOVAS DE INTERESE - Publicado o 27-05-2010 19:44
# Ligazón permanente a este artigo
AGROGLAMOUR EN CANS

Para entender Cans hai que vivilo unha vez polo menos na vida, o malo? é que se vas un ano, inevitablemente, repites. Engancha, sen dúbida, ese glamour de horta e chimpín, de bata e sacho, de ghalpón e grelos que nos é tan familiar e que se fai arte nesta aldea pontevedresa. En Cans o perfume non é de Chanel nº 5 nin os vestidos son de Cristian Dior pero teñen máis encanto e autenticidade que o artificio da cidade francesa de Cannes. Alí podes tomarte un pincho de xamón asado á beira do malo malísimo de Matalobos, gardar cola cos personaxes de Air Galicia ou beber unha caña rozándolle o bigote a Luís Tosar, alias Malamadre. Tamén podes asistir a un concerto no Jalpón de
Alicia mentres a dona remexe na horta ou pelexarte por un cacho de terra cos veciños na entrega de premios. Resistir á calor sen derreterse foi sen dúbida o maior exercicio de supervivencia pero pagou a pena.



Tamén atopas xente que pasou polas aulas do instituto cando existía COU como Héctor Casas ou Andrés Casteleiro.
O premio do público foi para unha curta made in Ourense, unha comedia parodia da arte contemporánea que se titula Instalación. O premio do xurado levouno Rodilla, onde un coleccionista de cromos axusta contas co pasado.O premio á mellor curtametraxe de animación foi para Nuestra fé en el veneno e o dos veciños para Padre Modelo. A actriz premiada foi Nuncy Valcárcel, polo seu papel en Coser e cantar, unha historia de resistencia contra a educación franquista; e os actores galardoados foron Javier Rodríguez e Fernando Cayo polos seus papeis en El vendedor del año, unha crítica ao comportamento inhumano das multinacionais.

Comentarios (0) - Categoría: NOVAS DE INTERESE - Publicado o 23-05-2010 22:30
# Ligazón permanente a este artigo
ALGÚNS FOTOGRAMAS DA CURTAMETRAXE
Estes son algúns dos fotogramas da curtametraxe "O xogo da guerra", realizada e protagonizada por alumnado de 1º de BAC (Anxo Quintairos, Cristian Bolaño, Miguel García e José Fernández) coa colaboración de David Rodríguez e Javier Rivero, de 4º da ESO. O guión foi unha adaptación do relato homónimo de Carlos Casares realizada por Iván Prado. O vídeo foi proxectado no Salón de Actos e causou impacto no profesorado e alumnado asistente, dada a calidade do produto elaborado, tanto a nivel técnico coma interpretativo. Parabéns, rapaces!!


Comentarios (1) - Categoría: LETRAS GALEGAS - Publicado o 23-05-2010 20:58
# Ligazón permanente a este artigo
ENTREGAMOS OS PREMIOS DAS LETRAS GALEGAS
O venres no 1º recreo entregamos os premios das Letras Galegas. Rocío e Yolanda levaron o premio de caligramas, Mayte o de relato, Édgar o de fotografía e Anxo, José, Miguel e Cristian o de vídeo. Noraboa a todas e todos!!


Comentarios (1) - Categoría: LETRAS GALEGAS - Publicado o 23-05-2010 20:35
# Ligazón permanente a este artigo
LECTURAS POLA LINGUA
O venres 21 de maio celebramos as Letras Galegas na biblioteca. Alumnas e alumnos de diferentes niveis leron textos pola lingua e recitaron poemas de Uxío Novoneyra, Manuel María e Darío Xohán Cabana. As palabras pronunciadas expresaron a necesidade de manter a lingua e loitar por ela. Arrancaron moitos aplausos. Participaron:
RAQUEL TRIGO, RAQUEL VÁZQUEZ, ANA BARXA, MAYTE LÓPEZ, JONATHAN DOMÍNGUEZ, NOELIA GAMALLO, UXÍA ALONSO, ÚRSULA CASADO, BEATRIZ DOMÍNGUEZ, MIRIAN FERNÁNDEZ, ISABEL DIEZ, MIGUEL GARCÍA, CRISTIAN BOLAÑO, FATIMA FATHALLAH, ADOLFO DACAL, SONIA VÁZQUEZ, PILAR BARANDELA, VALENTINA JORQUERA, ÁLEX FERNÁNDEZ, LUCÍA BLANCO E SUSANA DIZ.




Comentarios (0) - Categoría: LETRAS GALEGAS - Publicado o 23-05-2010 20:29
# Ligazón permanente a este artigo
RECITAL DOS CENTROS ESCOLARES DE XINZO NA PRAZA MAIOR

RECITAL DOS CENTROS ESCOLARES DE XINZO NA PRAZA MAIOR
O 18 de maio, un día despois do Día das Letras Galegas, os catro centros escolares de Xinzo (CEIP Rosalía de Castro, CEIP Serxio Mascareñas, IES Lagoa de Antela e IES Cidade de Antioquía) reuníronse na Praza Maior da vila para celebrar conxuntamente as Letras Galegas nun acto organizado polas bibliotecas e equipos de normalización dos catro centros. Un recital de poemas de Uxío Novoneyra, música coa banda da xente máis nova, un baile da amizade, un rap e o poema “Letanía de Galicia” , que foi coreado polos asistentes, arrancaron os aplausos das persoas que se reuniron na praza. O noso alumnado (Pablo, Ana, Alicia, Adolfo, Sonia, Melisa e Lucía) abriu a quenda de intervencións cunha notable actuación. As nenos e nenos de Primaria emocionaron, sen dúbida, os espectadores da praza.
Colgaremos máis fotos en próximos días.
Comentarios (0) - Categoría: LETRAS GALEGAS - Publicado o 19-05-2010 23:51
# Ligazón permanente a este artigo
PREMIOS LETRAS GALEGAS


VÍDEO
CRISTIAN BOLAÑO, ANXO QUINTAIROS, MIGUEL GARCÍA E JOSÉ FERNÁNDEZ
CURTAMETRAXE "O XOGO DA GUERRA"

LITERARIO
MAYTE LÓPEZ ATANES
RELATO “O BALEIRO”

FOTOGRAFÍA
ÉDGAR ÁLVAREZ FEIJÓO

1
- Subimos unha das fotos premiadas, digna calquera delas de ser publicadas.

2- Fragmento do relato "O xogo da guerra", do libro Vento ferido do escritor limiao Carlos Casares, falecido hai uns anos. A curtametraxe presentarase ao certame OUFF Escola.

Botaron a sortes e tocoume a min. Eu penso que fixeron trampa, pero calei. Díxome o Rata: "Vai". Eu non quería ir, digo a verdade. Pero cando o Rata dicía vai, había que ir. O Rata estaba tolo, segundo a miña nai. Pero eu penso que non estaba tolo, que era atravesado e de mala lei. "Vai", dixo outra vez. E fun. A casa de don Domingo quedaba lonxe. Algo así como a dous quilómetros. Tiven que dar un rodeo para non pasar por diante da zapatería do meu pai. Pensei:"escapo para a casa e xa está". Pero collín medo. Ademais ía calor e na casa no verán non se para coas moscas.

Cheguei ao chalé de don Domingo e berrei:

- ¡Zalo...!

Ladraron os cans. Agardei un pouco e volvín chamar:

- ¡Zalo..!
[...]

3- Fragmento do relato "O baleiro" de Mayte López.

"E dende aquela pensou que fuxira da soidade, coma se dende o momento en que nacera non fose unicamente ela mesma. Aprendeu, non sen moitas dificultades, a expresarse coas novas verbas, sen medo e sen prexuízos. Xa non era necesario pensar o que dicía, posto que agora tiña o privilexio de falar e facelo sempre con corrección, independentemente do que estivese saíndo pola súa boca, posto que non era iso o que importaba, senón a forma. Entregou a súa identidade a cambio dunha suposta integración que a sacase do seu abismo silencioso, coma quen lle vende a súa alma ao diaño polo prezo de facer realidade un desexo egoísta.
Coma ela antes pensaba en galego, tamén deixou de pensar.

Comentarios (0) - Categoría: LETRAS GALEGAS - Publicado o 17-05-2010 22:21
# Ligazón permanente a este artigo
XOGO TEST WEB SOBRE UXÍO NOVONEYRA
Estes días estivemos a traballar nas aulas con este xogo test web. A actividade realizouse por parellas. As respostas encóntranse na sección de normalización, lugar onde tamén se pode descargar o documento en PDF.


Comentarios (0) - Categoría: LETRAS GALEGAS - Publicado o 17-05-2010 21:38
# Ligazón permanente a este artigo
[1] ... [3] [4] [5] 6 [7] [8] [9] ... [11]
© by Abertal