O éxito da 2ª novela de Domingo Villar, A praia dos afogados, en que Leo Caldas e Rafael Estévez se enfrontan a un complexo e intrigante caso, conformou un nutrido grupo de fans deste escritor no noso centro que espera ansiosamente unha nova entrega das pescudas destes dous policías. E, casualmente, hoxe publica o xornal La Voz de Galicia que falta pouco para que saia ao prelo esa tan agardada novela co título Cruces de pedra.

Describimos a campaña de fomento da lectura na aula a través de traballos colaborativos e exposicións orais.

No club de profes estamos a ler 1984, de George Orwell, e Marcas de nacemento, de Nancy Huston, dúas novelas interesantes que, seguro, darán moito que falar no debate.

O xoves celebramos a 1ª tertulia literaria organizada pola Concellaría de Educación de Ourense capital. Compartimos autobús co club de lectura do IES Cidade de Antioquía e ás 16:30 reunímonos no Liceo para debater co club do IES Allariz sobre a novela de Rosa Montero Lágrimas en la lluvia. Lucía e Tiziana, dúas lectoras empedernidas e veteranas do club, abriron o debate con tan bo facer que arrancaron os aplausos dun público entregado. O coloquio foi intenso e cuestións como a memoria, a ética na ciencia, as relacións, o afán de poder e a corrupción suscitaron moita controversia.
Felicitamos o alumnado pola súa participación nesta actividade. A lectura sempre dá que pensar e falar, está claro.

Celebramos a 3ª tertulia de profes e foi moi animada.

Comezamos por Las cruzadas vistas por los árabes, de Amin Malouf, e as persoas que fomos capaces de rematar o libro (6) confesamos ter aprendido moito dese período convulso da historia. A perspectiva dos historiadores árabes contribuíu a incrementar un pouco os nosos precarios coñecementos sobre a famosa Guerra Santa e a ocupación dos territorios árabes. Manuel, o noso benquerido profe de Historia, aclarou as nosas dúbidas dunha maneira didáctica. Soubemos dos conflitos, rivalidades e divisións entre faccións musulmán (chiitas e sunitas, a seita dos asasinos, os fatimitas…); da crueldade e fanatismo dos cristiáns (canibalismo incluído); da personalidade de Saladino, unha figura que ensombrece e anula ao cinematográfico Ricardo Corazón de León; da orixe dalgunhas palabras como azar e asasino; das diferenzas entre sultán, califa, emir e visir, as. Viaxamos no tempo por Alepo, Mosul, Beiruth, Antioquía…

O que está claro é que as guerras santas son guerras polo poder.

Na sobremesa, tocou falar de O curioso incidente do can a medianoite, de Marck Haddon e o debate xirou en torno ao tema das relacións, as emocións e as dificultades de comunicación do protagonista fronte á súa extraordinaria capacidade analítica e matemática. Tamén se comentou a maneira de procesar a información dos Asperger, as reaccións ante o que non comprende, o que se sae do programa; a maneira de escribir a historia dende o punto de vista do rapaz, cunha redacción sinxela, ordenada e lóxica. Pero foi un problema de lóxica que se aborda na historia o que provocou un serio enfrontamento entre tertulianos, o tema das probabilidades deu moito de si.

Case tres horas de tertulia, todo un éxito.

Os integrantes do club de lectura de 1º ciclo leron e falaron sobre Contos por palabras, de Agustín Fernández Paz, e agora comezan a lectura de O tempo das palabras en voz baixa, de Anne-Lise Grobéty. Esta historia está ambientada na Alemaña nazi e chega ao corazón.

Dúas películas significativas desa época son Napola e Europa Europa.