Club de lectura Nós tamén navegar IES Lagoa de Antela


ler sen cancelas

O meu perfil
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

AS MOCHILAS VIAXEIRAS NON DESCANSAN

12 mochilas viaxeiras seguen o seu percorrido polas casas da Limia.

Esta experiencia, que botou a andar o curso pasado, converteuse nunha campaña exitosa de promoción da lectura. Ademais de incrementar o hábito lector no alumnado, está a aumentar o hábito lector noutros membros da familia, como demostra a solicitude de máis préstamos de fondos por parte de nais e pais a través do alumnado.
Tamén está a resultar unha exitosa estratexia de normalización lingüística (un 75% dos fondos están en lingua galega)pois persoas que antes non lían en galego estanse atrevendo.

No diario que acompaña os fondos recóllense comentarios sobre as lecturas e palabras que agradecen esta iniciativa.

Citamos algúns títulos que forman parte da equipaxe lectora que acompaña o noso alumnado e as súas familias nesta viaxe polo pracer e do saber:

Ollos de auga, de Domingo Villar
A pomba e o degolado, de Fina Casalderrey
Cando petan na porta pola noite, de Xabier P. Docampo
Pepa a Loba, de Carlos Reigosa
Veleno tinto, de Ramón Carredano
Tempo rachado, de Margot Chamorro
Pel de lobo, de Xosé Miranda
Memorias do esquenzo, de Inma Antonio
Los escarabajos vuelan al atardecer, de María Gripe
El cartero siempre llama mil veces, de Andreu Martín e Jaume Ribera
Libros da Colección universal de A Nosa Terra

Cómics:
Mortadelo e Filemón
Astérix
No nome da amada morta


Revista No límite

Música:
CD de música galega (Budiño,O’Leo, The Homens, Uxía...)
Comentarios (1) - Categoría: MOCHILAS VIAXEIRAS - Publicado o 19-03-2009 21:21
# Ligazón permanente a este artigo
8 DE MARZO: LECTURAS RECOMENDADAS

Un cuarto propio (ensaio), de Virginia Wolf. Describe a situación da muller, encorsetada nun papel que lle obrigaron a asumir.

Persépolis (cómic), de Marjane Satrapi: conta a historia autobiográfica da autora, de orixe iraniana, de como medrou nun réxime fundamentalista islámico que a levou a abandonar o país. A protagonista é unha muller que non acepta as imposicións dun goberno represor e iso desencadea problemas.

Rapazas, de Agustín Fernández Paz. 6 historias diversas que teñen mozas como protagonistas.

A expedición do Pacífico, de Marilar Aleixandre. Unha rapaza disfrazada de rapaz consegue formar parte dunha expedición para estudar novas especies.

Memoria para Xoana, de Marica Campo. A nai de Xoana, que está por nacer, cóntalle a historia das mulleres da familia, o heroísmo das súas vidas anónimas.

O diario vermello de Carlota, de Gemma Lienas: Carlota procura o coñecemento sobre o sentir, as relacións sexuais, enfróntase aos conflitos da adolescencia con valor.

Amantia (novela), de Mª Xosé Queizán: nos tempos de Prisciliano, personaxe curioso que viviu en Galicia polo século IV, un grupo de mulleres ilustradas reúnense para comentar temas de interese: política, cultura, historia...

Antígona ou a forza do sangue (teatro), de Mª Xosé Queizán: resucita o mito de Antígona, recreándoo en terras galegas...

Unha primavera para Aldara (teatro), de Teresa Moure: nos tempos das guerras irmandiñas, unha abadesa debe enfrontarse á lei por obedecer o amor.

O club da calceta (novela), de María Reimóndez. Un grupo de mulleres diversas reúnense para facer calceta. Contan as súas vidas, mudan de hábitos...

Das últimas mareas (poesía), de Ana Romaní. O verso transpira forza, convida a navegar.

A Ponte das Poldras (poesía), de Chus Pato: a palabra, a muller moderna e as devanceiras, o mito, a Limia, a lagoa que xa non está...

La mujer habitada, de Gioconda Belli. Unha muller arquitecta convértese en activista fronte á ditadura militar. A súa historia discorre paralela a outra historia antiga, á das mulleres indíxenas que loitaron contra os colonizadores.
Comentarios (1) - Categoría: PARA LER - Publicado o 05-03-2009 19:10
# Ligazón permanente a este artigo
8 DE MARZO: PELÍCULAS RECOMENDADAS

Buda explotou por vergonza: dirixida pola iraniana Hana Makhmalbaf. Conta como unha nena afgá se enfronta a un grupo de nenos que imita a violencia dos adultos.

Osama: dirixida polo afgán Siddiq Barmak. Conta a historia dunha nena afgá que debe disfrazarse de rapaz para sobrevivir nun espazo que rouba a dignidade ás mulleres.

As mulleres de verdade teñen curvas: dirixida pola mexicana Patricia Cardoso. Conta a historia dunha adolescente mexico-americana que se resiste aos desexos dunha familia tradicional.

Antonia: dirixida pola holandesa Marleen Gorris. Conta a historia de 4 mulleres da mesma familia, pertencentes a 4 xeracións distintas, que deciden como conducir as súas vidas sen importarlles o que dirán.

Persépolis: coodirixida por Marjane Satrapi e Vincent Paronnaud. Baseada no cómic homónimo de Satrapi.
Comentarios (0) - Categoría: PARA VER - Publicado o 05-03-2009 19:06
# Ligazón permanente a este artigo
O MITO DE PENÉLOPE NOS VERSOS DE MARTA DACOSTA

Mentres Ulises se empapaba de sabedoría viaxando, Penélope tecía e destecía. Mentres Ulises gozaba dalgunha aventuriña amorosa, Penélope gardaba fidelidade. Penélope, o descanso do guerreiro, o símbolo da submisión, condenada a non ser, secuestrada.
A figura de Penélope foi recuperada por moitas mulleres poetas e liberada das cadeas do amor perverso. A nova Penélope rebélase contra o destino e bótase ao mar. Naceu un novo mito: a muller que decide sobre a súa propia vida, que actúa. Penélope é esa nova muller, símbolo da liberación feminina.
Penélope navegante.

Proba disto, estes versos de Marta Dacosta en As amantes de Hamlet , no apartado “Cartas mariñas para Penélope”.

... Eu son Penélope
e rexeito teas e fíos
non te vou agardar.

PENÉLOPE,
Penélope,
Penélope navegante,
cabelos atados e pel de salitre,
rodeiras nos beizos e dor
nas mans
rotas polas cordas e polo vento.
Penélope navegante,
a que traza rotas e encarta mapas,
leva timón e leme
e ve máis alá do mar,
máis lonxe có charrán,
e busca a calor das illas,
o seu resplandor branco no centro da noite.

CARTAS mariñas para Penélope,
compás e redes,

única bagaxe para a vida,
nin fitas nin alfaias,
ningunha cadea que a prenda á terra,

só compás, redes e cartas.

Se queredes saber máis da poeta entrade no seu blog Acuática, lede e deixade comentarios:
Blog de Marta Dacosta
Comentarios (2) - Categoría: DATAS E ACCIÓNS PARA LEMBRAR - Publicado o 05-03-2009 09:07
# Ligazón permanente a este artigo
8 DE MARZO: A POETA MARTA DACOSTA VISITARÁ O LAGOA DE ANTELA

Setembro leva aínda a dor que foi o parto,
os días de salitre baixo a chuvia do outono.
Unha muller e outra e tantas que non sei
cunha dor tan prfunda nas rodeiras dos labios.

Marta Dacosta (Setembro)

O luns 9 de marzo recibiremos a poeta Marta Dacosta.
Comentarios (0) - Categoría: DATAS E ACCIÓNS PARA LEMBRAR - Publicado o 05-03-2009 00:21
# Ligazón permanente a este artigo
SEMANA DE ROSALÍA
A escritora Marina Mayoral(autora de Tristes armas, Chamábase Luís...) recita o poema de Rosalía "Unha vez tiven un cravo"
Esta semana en Santiago Anxo Angueira aborda o espectáculo poético-musical Rosalía 21, podedes ver o escritor na sección de normalización da páxina web recitando "Aurora" en Aguilhoar.
Comentarios (0) - Categoría: DATAS E ACCIÓNS PARA LEMBRAR - Publicado o 25-02-2009 19:56
# Ligazón permanente a este artigo
AMEAZA NA ANTÁRTIDA, DE RAMÓN CARIDE



Said e Sheila, os irmáns do futuro, protagonistas de Perigo vexetal, vivirán unha nova aventura. Descobren un río contaminado, investigan, vense envoltos en perigos...

“Deime conta axiña de que os robots non traían boas intencións. Tentaban rodearme e apreixarme. Quixen fuxir o máis rápido que puiden. Corrín, todo canto daban as miñas pernas, lanzándome ó espazo que deixaban dous robots entre eles. Pero daquela, cando xa os pasaba, sentín que tropezara con algo. Era un fío, case invisible, fino e duro coma un arame, que unía as máquinas entre si, formando un círculo ou unha rede.”
Comentarios (0) - Categoría: PARA LER - Publicado o 18-02-2009 20:48
# Ligazón permanente a este artigo
BIOGRAFÍA DE DARWIN
Comentarios (0) - Categoría: NOVAS DE INTERESE - Publicado o 17-02-2009 18:29
# Ligazón permanente a este artigo
A EXPEDICIÓN DO PACÍFICO, DE MARILAR ALEIXANDRE

No ano de Darwin propoñemos esta lectura para a ESO: A expedición do Pacífico, de Marilar Aleixandre

Unha rapaza, interesada pola Zooloxía, viaxa de polisón nun barco coa intención de formar parte da expedición dun grupo de científicos á procura de novas especies polo continente americano. Para ser admitida no grupo (estamos a mediados do século XIX) disfrázase de mozo e, deste modo, cumpre o seu soño: observar e estudar in situ exemplares da fauna e flora dos países latinoamericanos, correr aventuras cheas de perigos e sentir a emoción do amor.

“... Falemos dos insectos que ti ben coñeces. Pódese negar que as distintas especies de formigas parécense entre si máis que formigas e avésporas? Pero, por outra banda, as formigas, as avésporas, as abellas e os abellóns teñen semellanzas entre eles e son distintas das moscas e mosquitos, ou dos escaravellos, comprendes?
- Comprendo, pero non vexo a relación entre as clasificacións e as teorías de Darwin.
- Pois está ben claro! Sendo estes grupos cada vez máis distintos entre si, ou cada vez máis semellantes, segundo percorremos a scala de clasificación nun sentido ou noutro, non é razoable defender, como fan os fixistas, que cada especie foi creada independentemente das outras, senón que, todos os que se parecen, proceden de antepasados comúns.”
Comentarios (0) - Categoría: PARA LER - Publicado o 15-02-2009 19:27
# Ligazón permanente a este artigo
A SEMANA DO AMOR FOI UN ÉXITO

Celebramos a semana do amor con éxito de palpitacións.

O alumnado de 1º de BAC puxo en marcha o proxecto “Bombón ou toxo” que tanto disparou os niveis de concentración hormonal e incrementou a temperatura corporal (e as expectativas amorosas) que a piques estivo de colapsarse o centro: tantas emocións producen taquicardias, xa se sabe. Circularon sobre todo bombóns e algún que outro toxo, esa planta que doura os montes de Galicia (palabras poéticas de Manuel Rivas)
A biblioteca adornouse de frases de “quéroche” nun monte de idiomas e colocou unha mesa con algúns títulos sobre o amor, o desamor e a perversión do amor que non é amor.

Algúns deses títulos:

A pomba e o degolado, de Fina Casalderrey: sobre o amor adolescente.
O único que queda é o amor, de Agustín Fernández Paz: sobre o amor con letras maiúsculas e tamén minúsculas.
Resistencia: sobre o amor que permanece a pesar dos obstáculos.
O centro no labirinto, de Agustín fernández Paz: sobre o amor adolescente e o amor á lingua e á natureza.
Memoria para Xoana, de Marica Campo: sobre o amor xeracional.
20 canciones de amor y una canción desesperada, de Pablo Neruda: sobre a metáfora do amor.
As lágrimas de Shiva, de César Mallorquí: sobre o amor á lectura e o amor adolescente.
Cartas de amor, de Fran Alonso: sobre
Made in Galiza, de Séchu Sende: sobre o amor á lingua.
Trilogía de la huida, de Dulce Chacón: sobre a destrución nas parellas.
Romeo and Juliet, de William Shakespeare: sobre os amores que acaban en traxedia polo odio.
Tristes armas: sobre o amor filial e fraternal.
Mira si yo te querré, de Luis Leante: sobre o amor a pesar das dificultades.
El amor en los tiempos del cólera, de Gabriel García Márquez: sobre o amor.

Entregamos os premios do concurso de declaracións de amor:
1º ciclo: David Gonçalves
2º ciclo: Alejandra Parejas
Noraboa!!!
Comentarios (1) - Categoría: DATAS E ACCIÓNS PARA LEMBRAR - Publicado o 15-02-2009 11:52
# Ligazón permanente a este artigo
© by Abertal