Club de lectura Nós tamén navegar IES Lagoa de Antela


ler sen cancelas

O meu perfil
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

NOVA REUNIÓN DO CLUB DE PROFES

O mércores pasado, día 10 de febreiro, acudimos a unha nova cita literario-gastronómica. Desta vez, o lugar elixido foi A arca da Noe, onde degustamos ricas viandas adobadas con literatura. Os libros que nos convocaron foron O tempo das palabras en voz baixa, de Anne Lise Grobéty, e El emblema del traidor, de Juan Gómez-Jurado. O tema do nazismo centrou o debate, pois os dous libros tratan ese período escuro da historia de Alemaña.

A escritora suíza trata o tema da xenofobia, o odio aos xudeus, dende a mirada dun neno, un neno que observa, estrañado, os cambios que se van introducindo na vida cotiá e que van alterando as relacións cos xudeus; un neno que é testemuña de como as palabras se van desinflando e perdendo altura.

Respecto á novela de Juan Gómez-Jurado, a opinión máis estendida foi que se trataba dunha novela de entretemento, onde coincidían todos os ingredientes necesarios para enganchar un lector pouco esixente que precisa evasión e pouca reflexión: intriga, personaxes planos, desexos de vinganza, un pasado escuro, segredos de familia, unha misión, obstáculos que salvar, unhas circunstancias históricas atractivas … Aínda que a historia se sitúa na época da Alemaña prenazi e nazi, o tema do nazismo é algo circunstancial, non se aborda con profundidade.

Comentarios (0) - Categoría: CLUB DE PROFES - Publicado o 22-02-2015 19:58
# Ligazón permanente a este artigo
O CLUB PARTICIPOU NAS TERTULIAS OURENSÁS

O pasado martes 2 de febreiro asistimos á tertulia no Liceo de Ourense para debatermos sobre a novela de Clara Sánchez Lo que esconde tu nombre. Un membro do club de Allariz iniciou a sesión co tema do nazismo e logo fóronse unindo outras voces ao diálogo compartido. As relacións entre os personaxes, os movementos neonazis, o desexo por permanecer novos, a falta de madurez na protagonista, o final inconsistente, foron algúns dos temas que acapararon a atención dos presentes.

Agradecemos de novo, coma todos os anos, á Concellaría de Educación que nos convidase a participar nesta actividade e ás nosas alumnas un recoñecemento pola súa implicación, pois estiveron moi activas.
Comentarios (0) - Categoría: NOVAS DO CLUB - Publicado o 10-02-2015 19:35
# Ligazón permanente a este artigo
O CLUB LE A CLARA SÁNCHEZ

O club le a novela de Clara Sánchez Lo que esconde tu nombre para participar nas tertulias que organiza a Concellaría de Educación do Concello de Ourense. Temas como o nazismo e os movementos neonazis son abordados nesta historia de certa intriga e clima desasosegante.


Entrevista á escritora.




Comentarios (0) - Categoría: NOVAS DO CLUB - Publicado o 22-01-2015 20:11
# Ligazón permanente a este artigo
O CLUB DE 3º ESO LE A FINA CASALDERREY

O club de 3º de ESO leu a novela de Fina Casalderrey Sobrevives?.
Comentarios (0) - Categoría: NOVAS DO CLUB - Publicado o 22-01-2015 20:05
# Ligazón permanente a este artigo
TERTULIA LITERARIA EN ALLARIZ

O mércores 26 de novembro celebramos en Allariz unha tertulia literaria arredor da novela de Francisco Castro O corazón da Branca de Neve. Mentres rapazas e rapaces do noso club de lectura e dos clubs do IES Allariz, IES Cidade de Antioquía, IES San Mamede e IES de Bande debatían sobre diferentes aspectos temáticos e literarios, o escritor vigués participaba nun programa de radio con outros membros dos diferentes clubs. Despois dun intenso debate, Francisco Castro fixo acto de presenza e mantivo un coloquio con todos os presentes, respondendo amablemente as súas preguntas. Finalmente, asinou algúns libros.

Temas como a adopción ilegal, as mafias, a corrupción, as adiccións suscitaron moita discusión e enfrontou posturas nun clima de diálogo e respecto.

A charla do escritor foi amena, didáctica e moi suxestiva, Francisco Castro é un excelente comunicador que conecta moi ben cos seus lectores e lectoras.

Agradecemos ás organizadoras todo o traballo de planificación para gozarmos desta xornada inesquecible.
Comentarios (0) - Categoría: NOVAS DO CLUB - Publicado o 04-12-2014 20:41
# Ligazón permanente a este artigo
COMEZAMOS CO CLUB DE PROFES

Celebramos a primeira tertulia do club de lectura de profes na Taberna Acevedo de Xunqueira de Ambía combinando literatura e gastronomía. O libro que inaugurou a xornada foi El chico, de Steve Hamilton, unha novela de intriga contada por un rapaz que non fala pero que, non obstante, é capaz de comunicarse coas persoas coas que se relaciona. A historia engancha porque mantén a incertidume e dosifica a información. Describe con precisión o mundo da delincuencia en todas as súas formas, explora vehículos de comunicación coma o cómic, fala da intervención do azar na vida das persoas, do amor, da capacidade de superación, da necesidade de escoitar…
Comentarios (0) - Categoría: CLUB DE PROFES - Publicado o 16-11-2014 12:17
# Ligazón permanente a este artigo
COMEZA A ANDAINA DO CLUB

Comezou a andaina dos clubs de lectura co libro de Fancisco Castro O corazón da Branca de Neve, unha historia policial de nenos roubados e mafias que trafican con seres humanos.
Comentarios (0) - Categoría: NOVAS DO CLUB - Publicado o 16-11-2014 12:15
# Ligazón permanente a este artigo
CHUS ESCRIBE SOBRE A SÚA EXPERIENCIA NO CLUB

A nosa compañeira Chus conta a súa experiencia no club.


O pasado mes de setembro incorporeime outra vez ao IES Lagoa de Antela despois de pasados oito anos e, a verdade, sentinme partícipe da frase que pronunciou fray Luis de León: “… como decíamos ayer…” ao incorporarse á súa cátedra despois de pasado anos. Poucos cambios había, tanto no troco de xente como no “desgaste” que producen os anos, máis ben parecía ao contrario.

A xente, na miña primeira etapa, tíñame por unha lectora ávida, pero cando voltei seguíanme recordando como tal; e pronto comenzáronme a recomendar libros, cheguei a ter lista de espera. Da noite para a mañá atopábame afiliada á biblioteca que, por certo, funciona fenomenal, levan todo “al dedillo”, non se lles escapa nada!; e tamén era membro do clube de lectura. Nunca pertencera a ningún e, ao principio, impúñame un pouco, pero, a verdade, atopeime cunha moi grata sorpresa: un grande respecto, unha boa amizade e, como non, unha diversidade de opinións que che fan reflexionar sobor o porqué das cousas e que non son tan simples como a primeira vista nos parece.

Para o clube de lectura recoméndanse entre os membros textos diversos, xa sexan artigos, relatos, libros ou películas para logo ser comentadas. Sempre vin que non había problemas; todo o mundo aceptaba, pero por convencemento, nunca por imposición ( dá gusto ver a democracia interna que existe e o bo ambiente que impera).

Outra das grandes sorpresas coas que me atopei foi co libro electrónico. Reacia onde as haxa a estes progresos, non por medo, senón por afianzamento ao papel, fíxenme defensora de tal aparello (crede que só ata un punto); máis ca nada pola comodidade que me supón poder facer outra cousa ó mesmo tempo (camiñar, facer ximnasia, estar na cama, etc) e sobor de todo polo peso e a comodidade de non ter que ir con “guías telefónicas” a tódolos sitios. Saber que tes outros libros gardados esperándote e cun coste cero é algo extraordinario: si, xa sei que na biblioteca tamén os tes, pero é distinto.

Remata o curso, e non sei se voltarei o ano vindeiro, pero o que si sei é que levo os mellores recordos e experiencias que se poden levar dos compañeiros. Todos temos “a nosa leira en Toledo”, pero é moi importante sabela repectar e delimitar (aí é onde se demostra a verdadeira liberdade e democracia); pois ben, aquí de verdade que existe. Levarei sempre estas experiencias, que aínda que non son “fortes”, non deixan de ser menos importantes e axudan a seguir formándonos como persoas.

GRAZAS A TODOS/AS

En Xinzo de Limia a 18 de xuño do 2014

Dende o club agradecemos estas palabras da nosa compañeira Chus, incansable e voraz devoradora de libros, excelente tertuliana e asidua visitante da biblioteca.
Comentarios (0) - Categoría: CLUB DE PROFES - Publicado o 24-06-2014 21:14
# Ligazón permanente a este artigo
5ª REUNIÓN DO CLUB

A última reunión foi una festa. Xantamos no Langrina un restaurante situado na zona vella de Xinzo e que prepara uns menús deliciosos, exquisitos.

Debatemos sobre La cena, de Hermann Koch, sobre a película Un dios salvaje, de Roman Polanski, e sobre o poemario Penúltimas tendencias, de Carlos Negro. A charla foi moi animada, distendida, salpicada de reflexións pero tamén de moito humor, notábase que as clase remataran. Falouse da relación pais e fillos, da herdanza biolóxica, de natureza e sociedade, dos instintos primarios e a súa domesticación. Cando algo inesperado activa as emocións, salta o salvaxe reprimido que habita en nós, e xa non hai razón que valla, nin idea de xustiza nin ética, só instinto.


FELIZ VERÁN LECTOR!!
Comentarios (0) - Categoría: CLUB DE PROFES - Publicado o 24-06-2014 21:13
# Ligazón permanente a este artigo
AS NOSAS ALUMNAS PARTICIPARON COMO XURADO NO PREMIO LITERARIO SAN CLEMENTE

O martes 16 de xuño acudimos a unha cita coa literatura en Santiago. Seis das nosas alumnas de 2º de BAC, Clara, Lara, Kimberly, Eva, Lorena e Leticia, participaron, xunto con alumnas e alumnos doutros institutos de Galicia e do IES Rosalía de Castro de Santiago, como xurado no prestixioso premio literario San Clemente que convoca o instituto compostelán. Despois de reunirse, defender a súa escolla e votar, os membros do xurado comunicaron aos medios os gañadores en cada unha das tres categorías convocadas. En Lingua Galega o premio foi para Carlos Reigosa pola súa novela A vitoria do perdedor, en Lengua Española o premio recaeu no escritor colombiano Juan Gabriel Vászquez por Las reputaciones e o premio en Lingua Estranxeira levouno o escritor suízo Joël Dicker, pola novela La verdad sobre el caso Harry Quebert. Logo dunha sesión de fotos xantamos no Casino e paseamos polas rúas cargadas de historia de Santiago. Algunhas das nosas alumnas percorrerán as rúas de Santiago moitas veces nos próximos anos, deixarán pegada nelas e sucumbirán ao seu magnetismo, inevitablemente.

Foi unha xornada inesquecible. Pero máis inesquecible supoñemos que será o día da entrega de premios, cando as nosas alumnas e nón teñamos a oportunidade de saudar e intercambiar palabras cos escritores galardoados.

O noso acompañante e profesor de inglés, Pablo Antorrena, viviu con especial emoción esta cita, pois estudou o bacharelato no instituto Rosalía de Castro e fartouse de saudar o profesorado e lembrar vellos tempos.
Comentarios (0) - Categoría: NOVAS DE INTERESE - Publicado o 23-06-2014 09:16
# Ligazón permanente a este artigo
© by Abertal