Club de lectura Nós tamén navegar IES Lagoa de Antela


ler sen cancelas

O meu perfil
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

ELENA GALLEGO VISITA O INSTITUTO

Hai dúas semanas Elena Gallego visitou o noso instituto e impartiu unha charla sobre o proceso de creación de Dragal, que tanto éxito lle ten reportado á escritora, ao alumnado de 2º ESO, que previamente lera o libro que inicia a triloxía: A herdanza do dragón. As alumnas e alumnos de 2º ESO tiveron a oportunidade de coñecer de primeira man como se xestou o proxecto e algúns gardaron cola para que lles fosen asinados os seus libros.


Comentarios (0) - Categoría: VISITAS - Publicado o 29-05-2016 21:22
# Ligazón permanente a este artigo
REUNIÓN DO CLUB DE PROFES

Con algo de retraso colgamos esta entrada que recolle a primeira reunión do club de profes deste ano. Os libros que suscitaron debate foron El cielo es azul, la tierra es blanca, de Hiromi Kawakami, e Instrucións para tomar café, de Manuel Nuñez Singala.
A tertulia discorreu nun ambiente agradable, como é habitual cando se acompaña o debate de manxares.

Comentarios (0) - Categoría: CLUB DE PROFES - Publicado o 04-04-2016 21:25
# Ligazón permanente a este artigo
TERTULIA EN ALLARIZ CON NÚÑEZ SINGALA

No 1º trimestre participamos na tertulia literaria organizada polo equipo de Biblioteca do IES Allariz. As persoas que forman parte do club de lectura achegáronse á vila veciña para compartir unha xornada literaria cos membros dos clubs dos institutos de Maceda, Bande, Allariz e Viana do Bolo. Acudimos a esta nova cita coa literatura compartindo cos nosos veciños do IES Cidade de Antioquía.
O libro escollido para o debate foi Instrucións para tomar café, de Núñez Singala, un interesante conxunto de relatos que non deixan indiferente. A través do humor e a sorpresa, o narrador obríganos a reflexionar sobre a idiosincrasia e identidade galegas, tamén sobre tópicos e estereotipos. O coloquio foi intenso e apaixonado, por veces excesivo. Logo do debate, lectoras e lectores tiveron a oportunidade de departir co escritor, o cal contou algunhas anécdotas que inspiraron certos relatos que compoñen o libro. Previamente, Núñez Singala participou nun programa de radio con integrantes dos diferentes clubs, entre eles Paula Nogueiras, a moza da foto.
Comentarios (0) - Categoría: NOVAS DO CLUB - Publicado o 24-01-2016 10:49
# Ligazón permanente a este artigo
ASISTIMOS AO ACTO DE ENTREGA DO PREMIO SAN CLEMENTE

O pasado xoves 28 de maio asistimos, por fin, á entrega de premios do XX Concurso Literario Arcebispo San Clemente e no que participaran como xurado alumnas do IES Lagoa de Antela o curso pasado. Acudiron á cita Lorena, Eva, Clara e Kimberly, esta última entregou o premio ao escritor Jöel Dicker, autor de La verdad sobre el caso Harry Quebert, gañador na modalidade de mellor novela en lingua estranxeira. Carlos Reigosa, gañador na modalidade de lingua galega con A victoria do perdedor, e Juan Gabriel Vásquez, gañador na modalidade de lingua española con Las reputaciones, recibiron os premios de mans do alumnado do IES Rosalía de Castro de Santiago, o instituto que organiza o concurso.

Logo do acto de entrega de premios, en que alumnas e alumnos do Rosalía presentaron e leron fragmentos das novelas premiadas, os escritores asinaron exemplares dos seus libros. Para rematar, celebrouse unha cea no Hostal dos Reis Católicos, onde o alumnado que formou parte do xurado compartiu mesa cos escritores galardoados.

Agradecemos ao profesorado do IES Rosalía de Castro, en nome das nosas “antigas” alumnas, a oportunidade que nos brindaron de vivir esta experiencia inesquecible. Mención especial merecen Lara e Leticia, as dúas ex - alumnas que non puideron asistir ao acto por encontrarse estudando en Salamanca.

Comentarios (0) - Categoría: NOVAS DE INTERESE - Publicado o 07-06-2015 08:41
# Ligazón permanente a este artigo
O CLUB LEU MI HERMANA VIVE SOBRE LA REPISA DE LA CHIMENEA

O club leu Mi hermana vive sobre la repisa de la chimenea, de Annabel Pitcher, unha novela que chega ao fondo da corazón, que conmove. O libro formou parte das lecturas do club de profes hai dous anos. Nesta entrada hai máis información.
Comentarios (0) - Categoría: club de aula - Publicado o 31-05-2015 11:55
# Ligazón permanente a este artigo
NOVA REUNIÓN DE PROFES

Celebramos una nova xuntanza literario-gastronómica. Os libros que se leron e comentaron foron El profesor, de Frank Mccourt e O bosque dos raposos aforcados, de Arto Paasilinna. Entre o humor da novela do escritor finés e o tema da docencia que trata dende un punto de vista autobiográfico o escritor irlandés pasamos a xornada. As maneiras de ensinar, o sistema educativo, as relacións entre os diferentes membros da comunidade educativa etc foron algúns dos aspectos máis controvertidos da sesión.
Comentarios (0) - Categoría: CLUB DE PROFES - Publicado o 31-05-2015 11:38
# Ligazón permanente a este artigo
TERTULIAS EN OURENSE

O pasado mesde abril acudimos á 2ª tertulia que organiza cada ano a Concellaría de Educación do municipio de Ourense. O debate foi intenso e controvertido pois expresáronse opinións moi diverxentes.

A novela Matarte lentamente, do escritor e guionista ourensán Diego Ameixeiras, provocou moita discusión entre o público en relación a algúns temas: sexualidade, moral, delincuencia, consumo de drogas, aborto…

Logo da tertulia, asistimos a un encontro co autor, compartindo espazo cos integrantes doutros clubs. O escritor falou do oficio de escribir e de como vai madurando unha historia na súa cabeza e no papel; tamén respondeu as preguntas que lle formularon. Finalmente, Diego Ameixeiras asinou con infinita paciencia todos os libros de mozas e mozos presentes.


Matarte lentamente é unha novela negra-social que narra a derrota duns personaxes que viven á deriva, nunha realidade opresiva. As circunstancias, a falta de comunicación, os conflitos persoais colócaos en situacións tan límite que acaban tomando decisións desesperadas, á marxe da lei. As historias, fragmentadas, conforman a radiografía dunha sociedade en crise, onde a ausencia de valores non deixa lugar para a esperanza.


Parabéns para o escritor Diego Ameixeiras, que acaba de gañar o premio Antón Losada Diéguez.
Comentarios (0) - Categoría: NOVAS DO CLUB - Publicado o 18-05-2015 20:14
# Ligazón permanente a este artigo
VISITOUNOS FRAN ALONSO

O escritor Fran Alonso impartiu dúas charlas no instituto: co alumnado de 3º e 4º de ESO falou de Cartas de amor ( un libro de relatos protagonizados por mulleres que viven circunstancias dolorosas)e co alumnado de 1º ciclo falou de Cidades e de creación poética.

Nas dúas sesión compartimos espazo co alumnado do IES Cidade de Antioquía.

Velaquí a crónica dun alumno de 1º de ESO, Álex Cabido Martínez.


O mércores 15 de abril, visitou o noso IES o escritor Fran Alonso. Foi unha charla moi agradable e amena. Comezou coa presentación do autor por parte duns compañeiros de 3º de ESO.

Logo, Fran Alonso explicounos o que era a poesía, da que nos dixo que estaba formada por catro patas. Ademais fixonos a demostración de que as palabras teñen máis significado na poesía que no léxico normal. A súa demostración consistiu en coller un globo, inchalo ata que non cabía máis aire e logo, de súpeto, pinchouno e fixo un ruído que penso que fixo estremecer ata aos que estaban ao final do salón de actos.

Tamén nos recitou poemas facendo ruídos de animais coma un moucho e un pato.

Por todas estas cousas, encantoume a súa visita e pareceume moi interesante.



Comentarios (0) - Categoría: VISITAS - Publicado o 26-04-2015 19:34
# Ligazón permanente a este artigo
VISITOUNOS LEDICIA COSTAS

O alumnado de 1º de ESO asistiu a unha charla da escritora Ledicia Costas.

Velaquí a crónica dun alumno.

O pasado día 14 de abril, a escritora Ledicia Costas visitou o noso IES para falarnos sobre o seu libro Escarlatina, a cociñeira defunta.

Dous compañeiros presentaron a autora e logo ela contounos algunhas cousas máis da súa vida.
Os alumnos fixéronlle á escritora as preguntas que tiñan sobre a novela, ás que ela respondeu amablemente. Tamén nos contou algunhas anécdotas que lle ocorreran a ela ou que lle contaran outros rapaces e que tiñan relación co seu libro.

Xa no final do encontro, a autora asinounos os libros e unha compañeira entregoulle como agasallo un libro que narra a historia da lagoa de Antela, tema sobre o que a escritora se mostrou moi interesada.

Segundo as opinións dos rapaces, a charla foi un encontro moi interesante, que lles agradou moito, e no que o pasaron moi ben.

Comentarios (0) - Categoría: VISITAS - Publicado o 26-04-2015 19:27
# Ligazón permanente a este artigo
VISITA DE CARLOS VILA SEXTO, AUTOR DE AS SETE MORTES

O venres 13 de marzo recibimos a visita de Carlos Vila Sexto, autor de As sete mortes, unha novela de intriga ambientada en Galicia e que trata o tema da inmortalidade. A historia contén elementos da mitoloxía e simboloxía celtas que engaden atractivo á lectura.

O escritor, que foi presentado polas alumnas Paula Nogueiras e Carmen Canal, contounos como se converteu en escritor e como as súas historias son produto dunha adolescencia influenciada polos videoxogos. Respondeu algunhas preguntas e asinou libros.

Agradecemos a visita a Carlos Vila Sexto, as súas palabras e a súa amabilidade.
Comentarios (0) - Categoría: VISITAS - Publicado o 17-03-2015 10:36
# Ligazón permanente a este artigo
© by Abertal