Club de lectura Nós tamén navegar IES Lagoa de Antela


ler sen cancelas

O meu perfil
 CATEGORÍAS
 RECOMENDADOS
 BUSCADOR
 BUSCAR BLOGS GALEGOS
 ARQUIVO
 ANTERIORES

TERTULIA EN OURENSE CON RENDICIÓN E ENCONTRO CON RAY LORIGA

O xoves 4 de maio acudimos á 2ª cita coa literatura que organiza cada ano a Concellaría de Educación de Ourense. Nada defraudou neste encontro, nin o debate nin a sorpresa que nos tiña preparada Sara, a nosa eficiente xestora: a presenza do autor do libro. A novela que nos convocou nesta ocasión foi Rendición, de Ray Loriga, unha historia distópica moi atractiva que abriu moitas portas para a discusión (a tiranía das redes sociais, os sistemas totalitarios, as drogas legais, a perda da individualidade, o control da educación, a manipulación da información…). Cando nos decatamos tivemos que pechar bruscamente o acto para poder asistir á cita co escritor.

O encontro con Ray Loriga tampouco decepcionou, pois este falou sobre o oficio de escribir e a novela e, por suposto, respondeu as múltiples preguntas do público lector. Parecía que non se esgotaba nunca a curiosidade e o tempo voaba para o noso desgusto.

Cómpre salientar a participación dos integrantes do noso club no debate e no encontro co escritor, as súas intervencións e reflexións merecen un recoñecemento explícito.

Comentarios (0) - Categoría: NOVAS DO CLUB - Publicado o 05-05-2018 20:14
# Ligazón permanente a este artigo
O CLUB LE RENDICIÓN, DE RAY LORIGA

O club de lectura está lendo Rendición, de Ray Loriga, unha historia distópica que nos lembra nalgúns aspectos á novela 1984 de George Orwell. Este libro foi o escollido para a 2ª sesión das tertulias organizadas pola Concellaría de Educación do municipio ourensán.

Aquí aparecen algúns membros do club na biblioteca coa novela de Ray Loriga
Comentarios (0) - Categoría: NOVAS DO CLUB - Publicado o 25-03-2018 16:00
# Ligazón permanente a este artigo
TERTULIA EN OURENSE CON IZAN O DA SACA E ENCONTRO CON XABIER QUIROGA

O pasado xoves, 1 de febreiro, asistimos á cita coa literatura no Liceo de Ourense. Membros do noso club de lectura compartiron unha sesión de intenso debate con alumnado do IES Cidade de Antioquía, IES Allariz, Universidade Laboral, IES de Mende e IES As Lagoas. O coloquio xirou en torno á novela de Xabier Quiroga Izan o da saca, novela que trata a presenza do nazismo en Galicia e as súas conexións co réxime franquista xunto co papel colaboracionista da Igrexa, que agochou nazis escapados de Alemaña ao remate da 2ª Guerra Mundial e facilitou a súa fuxida a Latinoamérica, o que se denominou a Ruta das Ratas. A historia tamén aborda a corrupción política e do sistema xudicial, que impiden que a verdade saia á luz e que son capaces de mandar asasinar para que o sistema, a maquinaria que favorece a oligarquía, non se deteriore.

O alumnado manifestou que a lectura fora difícil e que algúns capítulos ("No escuro", "O Graciano") non os entenderan ata o final. O personaxe de Lelia e a súa relación co taxista investigador Reina, a represión na Guerra Civil, a violencia de xénero… tamén foron obxecto de debate.

Ao remate do coloquio, celebrouse o encontro co autor, Xabier Quiroga, o cal foi desvelando datos reais e probas documentais en que se baseou para escribir a novela. O escritor, oriúndo da Ribeira Sacra, espazo e escenario de Izan o da saca, contestou amablemente as preguntas que lle formularon algunhas persoas e, a continuación, procedeu a asinar os libros.


A experiencia resultou moi atractiva para os integrantes do club de 3º ESO, que asistían por primeira vez e que aparecen na foto xunto con Ana Posada, unha das tertulianas máis veteranas e que sempre realiza unhas intervención moi agudas e interesantes.
Comentarios (0) - Categoría: NOVAS DO CLUB - Publicado o 12-02-2018 11:10
# Ligazón permanente a este artigo
O CLUB LE IZAN O DA SACA, DE XABIER QUIROGA

Parte do club de lectura le o libro Izan o da saca, de Xabier Quiroga, novela elixida para a 1ª tertulia que organiza a Concellaría de Cultura e Educación do Concello de Ourense.

A tertulia celebrarase no Liceo de Ourense a finais de xaneiro.
Comentarios (0) - Categoría: NOVAS DO CLUB - Publicado o 30-12-2017 21:44
# Ligazón permanente a este artigo
VISITA DE MARCOS CALVEIRO

O luns 5 de xuño tivemos a honra de contar, de novo, coa presenza do escritor Marcos Calveiro, quen impartiu unha charla moi interesante ao alumnado de 1º ciclo, 1º e 2º de ESO, sobre Palabras de auga, novela que mergulla o lector na cultura africana e tamén describe unha viaxe iniciática cara á madureza.
Comentarios (0) - Categoría: VISITAS - Publicado o 16-06-2017 20:55
# Ligazón permanente a este artigo
TERTULIA EN OURENSE E ENCONTRO CON CARLOS MONTERO

Con algo de retraso subimos esta noticia: a asistencia do club de lectura á 2ª tertulia organizada pola Concellaría de Educación de Ourense. Nesta ocasión foi o libro de Carlos Montero, El desorden que dejas, o que nos convocou. A novela provocou moita polémica en todos os ámbitos pois a algunhas profesoras, entre as cales me encontro, non nos gustou. Logo da tertulia celebrouse un encontro co escritor, o cal foi acribillado a preguntas.
Comentarios (0) - Categoría: NOVAS DO CLUB - Publicado o 20-05-2017 22:39
# Ligazón permanente a este artigo
TERTULIA EN OURENSE E ENCONTRO CON MARÍA SOLAR

Celebrouse no Liceo ourensán a 1ª tertulia organizada pola Concellaría do concello de Ourense. A novela escollida para o coloquio foi As horas roubadas, de María Solar. Todos os clubs que acudiron á cita coa literatura (IES Lagoa de Antela, IES Cidade de Antioquía, IES San Mamede, IES O Ribeiro e IES Allariz) participaron nun intenso debate sobre as relacións, os factores sociais e culturais que as condicionan e a violencia de xénero. Falouse de liberdade, de capacidade para decidir ou non, de valores…

Despois do coloquio tivo lugar un encontro coa escritora que foi debullando a historia e os personaxes, satisfacendo así as dúbidas e curiosidade de lectoras e lectores.
Comentarios (0) - Categoría: NOVAS DO CLUB - Publicado o 07-02-2017 19:43
# Ligazón permanente a este artigo
TERTULIA EN ALLARIZ CON INMA LÓPEZ SILVA

Asistimos á cita coa literatura en Allariz, como vén sendo habitual nestes últimos anos.

O libro que nos convocou nesta ocasión foi Aqueles días en que eramos malas, de Inma López Silva. Aínda que ao principio custou entrar en calor, non era moi propicia a temperatura do local, logo se sucederon as intervencións máis animadas do coloquio. Para rematar, a presenza da escritora proporcionou un clima favorable ao diálogo e á confidencia. A partir desta novela con personaxes femininas como Margot, Sor Mercedes, Valentina e Laura foron abordados temas como: a falta de liberdade e o fráxil que é a fronteira que separa a quen está dentro de quen está fóra, as circunstancias que levan a delinquir e que converten as vítimas en culpables, as relacións entre mulleres, o machismo, o acoso, a maternidade… A verdade é que a lectura da novela fíxoseme algo pesada pero, non obstante, pagou a pena escoitar a Inma López Silva. Seduciunos tanto coa palabra que foi como se nos roubasen o tempo, cando nos demos conta xa había que marchar.



Comentarios (0) - Categoría: boletíns de lectura - Publicado o 06-12-2016 20:42
# Ligazón permanente a este artigo
VISITOUNOS DIEGO AMEIXEIRAS

O escritor Diego Ameixeiras achegouse ao IES Lagoa de Antela para impartir unha charla ao alumnado de 4º de ESO e 1º de BAC. O novelista ourensán falou do oficio de escribir e dos seus libros, centrándose, sobre todo, nos lidos polo alumnado: Matarte lentamente e Baixo mínimos. As historias que compoñen o puzle de Matarte lentamente suscitaron moito debate polos temas de alta voltaxe social e os conflitos éticos que se presentan.

Diego Ameixeiras confesou que a súa incursión na novela negra bebe da literatura de vaqueiros dos anos 70, asinada baixo pseudónimos anglosaxóns, e da novela negra norteamericana.
O escritor foi presentado pola alumna de 1º BAC, integrante do club de lectura, Paula Nogueiras; impartiu a charla, contestou amablemente as preguntas que se lle formularon e, finalmente, asinou exemplares dos seus libros.

Comentarios (0) - Categoría: VISITAS - Publicado o 10-06-2016 19:44
# Ligazón permanente a este artigo
TERTULIA EN OURENSE CON BERTA DÁVILA

Acudimos a unha nova cita coa literatura no Liceo de Ourense. Viaxamos cos integrantes dos clubs de lectura do IES Cidade de Antioquía e IES ALLariz para reunírmonos máis tarde, xa no Liceo ourensán, cos lectores e lectoras do IES San Mamede e IES Ribadavia. O libro que nos convocou nesta ocasión foi O derradeiro libro de Emma Olsen, de Berta Dávila.

Serafín Alonso, profesor de Lingua do IES Ribadavia, deu uns datos sobre a escritora e abriu o camiño para o debate co tema da identidade e a partida. Ao principio ao alumnado custoulle entrar no coloquio pero logo foron agromando temas que suscitaron moita discusión como: a relación dependente entre Clarissa e Emma, a relación homosexual entre mulleres, o ambiente abafante de Faith, a literatura como coñecemento e liberación…

Para finalizar, xa no Salón de Actos e xunto cos integrantes dos clubs da capital, celebrouse o encontro con Berta Dávila. A escritora falou de como concibiu a historia, respondeu as numerosas preguntas formuladas polas lectoras e lectores e asinou libros. Durante a súa intervención, a autora do libro O derradeiro libro de Emma Olsen fixo gala dunha fina ironía.

Comentarios (0) - Categoría: VISITAS - Publicado o 10-06-2016 19:43
# Ligazón permanente a este artigo
© by Abertal