Inauguro esta nova sección do blogue, Aulas virtuais, como un espazo no que localizar sitios onde poidamos ver e compartir experiencias de aula, non só materiais.
Xa son bastantes máis de 300 os centros que dispoñen de páxinas dinámicas, pero poucos están aproveitando aínda as posibilidades das aulas virtuais. Neste momento, localicei 14 aulas virtuais con contidos/cursos de lingua e literatura; porén, só catro delas permiten o acceso a convidados/as. Son as seguintes:
-IES Xulián Magariños, a cargo de Noemí Pazó (a quen lle agradezo a suxestión de incluír esta sección)
-IES García Barros, cun curso de inmersión para alumnado romanés de Luis Miguel Bugallo
-IES A Sangriña, con dous cursos de Ramón Quiroga
-IES Valle Inclán, cun curso de Vitoria Ogando
A visita destas aulas ofrécenos a posibilidade de observar o traballo e as experimentacións doutros docentes, co que iso pode ter de enriquecedor. Por esta razón, gustaríame apelar á xenerosidade dos demais compañeiros e compañeiras que xa están empregando a aula virtual, pero que non permiten o acceso a xente de fóra, para que se animen a compartir o seu traballo, polo menos aquelas partes que consideren que poden ser máis útiles.
Estar dispostas/os a aprender dos demais e permitir que os demais poidan aprender de nós beneficia, na miña opinión, a todas as partes.

Despois de algo máis de tres meses na rede e 4000 visitas, achégovos unha nova entrega de ligazóns para todas as seccións. En total e tras revisar todas as páxinas de centros aloxadas no servidor da Consellería, xa están dispoñibles máis de 150 enlaces. Aproveito para darlle as grazas publicamente a Noemí Pazó pola axuda que me prestou cos centros da provincia de Pontevedra. Se despois deste repaso quedaron materiais sen rexistrar, agradecería que mo indicarades.
Entre as novidades de lingua, salientamos tres presentacións sobre sintaxe, información sobre fonética, unha miniquest sobre os pidgins ou, para 2º de bacharelato, máis apuntamentos e material para a análise de textos.
En literatura localizamos varios comentarios de cantigas medievais e da cousa "O pai de Migueliño". Tamén temos unha webquest sobre Álvarez Blázquez, información e textos con propostas de traballo de Suso Sambade sobre a Xeración Galaxia, Celso Emilio e a literatura en América ou un material sobre estratexias para a comprensión de textos literarios.
Finalmente, en lectura aumentou o número de listas de libros e dispoñemos xa dun cuestionario sobre O neno do pixama a raias.

Acabo de incorporar á web un material en pdf sobre sintaxe para 2º de bacharelato. É unha simplificación da análise funcionalista que incide en problemas comúns facendo propostas concretas. Consta de información teórica e mais 14 actividades.
É por todas e todos coñecida a diversidade de conceptos, enfoques e modelos cos que se pode traballar a análise sintáctica; este material pretende ser unha proposta eminentemente práctica -tan discutible coma calquera outra- que intenta non perder de vista a idea de que non estamos a formar filólogos/as, senón que debemos fornecer unha formación básica.
Publícoa, en todo caso e coma sempre, coa intención de que lle poida ser de utilidade a alguén.

Están xa ao voso dispor tres atractivas presentacións enviadas por Noemí Pazó: unha sobre o Rexurdimento e dúas sobre variedades dialectais. Agradécese moito a súa colaboración!!
Ademais diso, hai novas ligazóns en todos as seccións: en lingua, destacamos a páxina de exercicios de Serafín Álvarez ou unha actividade sobre usos lingüísticos e actitudes de Luciano Fernández; en literatura, Román Landín ofrecénos máis material sobre Castelao, parte del reelaborado a partir das presentacións feitas por Noemí Pazó e por min, o que demostra que estes intercambios están resultando proveitosos e útiles; e en lectura podedes consultar cinco novos guións de traballo sobre outros tantos libros.
Ánimo para todas e todos para continuarmos con este labor.

1 [2] [3] [4]