O Equipo de Normalización e Dinamización Lingüística, en coloboraciòn coa Biblioteca Escolar, pon á disposición do profesorado unha serie de publicacións audiovisuais destinadas ao alumnado de Infantil e Primaria. Este fondo bibliográfico consta de material diverso que inlúe música galega infantil en diferentes formatos, dende cancións para escoitar en CD ata DVD interactivos que reproducen xogos populares, karaokes e videoclips ou libros-xogo.

Este material pódese retirar en préstamo na Biblioteca segundo as mesmas normas que rexen para o resto dos fondos. Nesta listaxe descritiva podedes coñecer un pouco máis polo miúdo estas referencias.

Unha boa mostra tédela nos vídeoclips "Arao", interpretado pola Señora Carmen, e "Debaixo da figueira", interpretado por Migallas, no DVD Pelo Gato 24.

A revista en liña Código Cero informa que a Secretaría Xeral de Política Lingüística vén de aloxar no portal web da Xunta o tradutor automático español-galego que permite traducir textos de ata 2.500 caracteres e páxinas web completas, o que facilita a lectura de contidos na nosa lingua.
Este tradutor vén a desenvolverse dende hai uns 2 anos e xa se distribuíron licenzas desta aplicación en concellos, no Parlamento de Galicia, nos centros de ensino, na Administración de xustiza, nos medios de comunicación e na Administración periférica do Estado, entre outras entidades, co que se pretende axudar á xeración de contidos en galego.
Polo momento o tradutor só permite pasar textos de español a galego, pero xa se adxudicou nunha convocatoria pública a creación dun tradutor do inglés ao galego e viceversa.

Por outra banda, o operador galego de telecomunicacións por fibra óptica R, acaba de sacar ao mercado catro móbiles en lingua galega. Segundo unha nota de prensa do propio operador, “son móbiles de última xeración coa posibilidade de predeterminar o galego como idioma principal, satisfacendo así a demanda de moitos usuarios“.

En concreto, R lanzou tres modelos de Nokia, o 2600 Classic, o 3120 Classic o 5610, e un de Sony Ericsson, o w380i.

| View | Upload your own

Traballo presentado ao certame convocado pola Rede de Dinamización da Consellaría de Innovación e Industria en colaboración coa Concellaría de Industria, Medio Rural, Vivenda e Solo do Concello de Cuntis, con motivo da celebración o 17 de maio do Día das Letras Galegas, Día de Internet e Día das Telecomunicacións e da Sociedade da Información, coa finalidade de fomentar o uso do galego nas novas tecnoloxías e conmemorar ao autor homenaxeado no ano 2008 a partir da creatividade, literaria e gráfica.

O fotolog da Mesa pola Normalización Lingüística faise eco do acto simbólico que levamos a cabo o martes no colexio en favor da campaña Polo dereito a vivirmos en galego e recolle dúas das fotografías das nosas linguas azuladas.

Os/as alumnos/as do CPI don Aurelio dixeron:

Pasámolo "xenial", conta María Prado, "tod@s coa lingua azul defendendo a nosa lingua" en palabras de Noemí. Un/unha alumno/a (ou non) considera que "está ben que se fagan esas cousas para demostrar que temos o dereito a falar galego. A pena é que aínda teñamos que reivindicar o dereito a falar o que queiramos cando xa debía de vir dado de sempre". Porque, como sinala Javier, hai que falar "en todos os ámbitos, incluíndo as fotos, contos, ligues... o galego, lingua de todos, lingua que para todo serve".

María Justa teno claro. Pintamos as nosas linguas de azul "pola nosa lingua", porque "temos dereito a vivir nela".

O ENDL do CPI don Aurelio apoia o manifesto Polo dereito a vivirmos en galego e anima á comunidade escolar do CPI don Aurelio de Cuntis a participar na manifestación nacional convocada pola Mesa pola Normalización Lingüística que sairá da Alameda de Santiago de Compostela o domingo 18 de maio ás 12:00 da mañá.

Hoxe pintamos as linguas de azul polo galego para amosar tamén simbolicamente o noso apoio a esta mobilización.

Se o domingo 27 a Casa da Cultura Roberto Blanco Torres de Cuntis acollía a presentación do libro Xohán Xesús González: un precursor do soberanismo galego (Laiovento), de Héitor Picallo, este venres terá lugar a presentación dun novo traballo baixo o título A loita permanente de Xoán Xesús González e publicado pola editorial A Nosa Terra. O acto terá lugar na Casa da Cultura de Cuntis ás 20:15h e nel intervirán o seu autor, Marcos Seixo, así como Dionisio Pereira e Xosé Enrique Acuña.

Tamén por medio de Alberto chegamos a un blogue colaborativo EPO-ESO que está a facer a xente da Cooperativa de Ensino Andaina sobre as Letras Galegas.

Tal e como explican dende Andaina, cada aula céntrase nun aspecto do autor ou o seu contexto e logo mediante o blogue o alumnado accede á globalidade. Tamén insisten en que "está aínda incompleto e moitos vínculos laterais inactivos, pois atópanse en pleno proceso de traballo e a punto de colgar os resultados das súas investigación".

Nós non o cremos así. Parabéns a Andaina!

O Centro de Documentación Sociolingüística do Consello da Cultura Galega faise eco, como antes fixera a Coordinadora de Traballadores pola Normalización Lingüística, do proxecto que puxo en marcha o ENDL do CPI don Aurelio.



Tamén queremos destacar a cálida crónica que a Asociación Cultural O Fervedoiro fixo dun dos actos programados no Musigal. Agradecidos/as estamos unha vez máis polo seu apoio ás diferentes iniciativas normalizadoras que nacen na vila de Cuntis.