Traballo presentado ao certame convocado pola Rede de Dinamización da Consellaría de Innovación e Industria en colaboración coa Concellaría de Industria, Medio Rural, Vivenda e Solo do Concello de Cuntis, con motivo da celebración o 17 de maio do Día das Letras Galegas, Día de Internet e Día das Telecomunicacións e da Sociedade da Información, coa finalidade de fomentar o uso do galego nas novas tecnoloxías e conmemorar ao autor homenaxeado no ano 2008 a partir da creatividade, literaria e gráfica.

O fotolog da Mesa pola Normalización Lingüística faise eco do acto simbólico que levamos a cabo o martes no colexio en favor da campaña Polo dereito a vivirmos en galego e recolle dúas das fotografías das nosas linguas azuladas.

Os/as alumnos/as do CPI don Aurelio dixeron:

Pasámolo "xenial", conta María Prado, "tod@s coa lingua azul defendendo a nosa lingua" en palabras de Noemí. Un/unha alumno/a (ou non) considera que "está ben que se fagan esas cousas para demostrar que temos o dereito a falar galego. A pena é que aínda teñamos que reivindicar o dereito a falar o que queiramos cando xa debía de vir dado de sempre". Porque, como sinala Javier, hai que falar "en todos os ámbitos, incluíndo as fotos, contos, ligues... o galego, lingua de todos, lingua que para todo serve".

María Justa teno claro. Pintamos as nosas linguas de azul "pola nosa lingua", porque "temos dereito a vivir nela".

Se o domingo 27 a Casa da Cultura Roberto Blanco Torres de Cuntis acollía a presentación do libro Xohán Xesús González: un precursor do soberanismo galego (Laiovento), de Héitor Picallo, este venres terá lugar a presentación dun novo traballo baixo o título A loita permanente de Xoán Xesús González e publicado pola editorial A Nosa Terra. O acto terá lugar na Casa da Cultura de Cuntis ás 20:15h e nel intervirán o seu autor, Marcos Seixo, así como Dionisio Pereira e Xosé Enrique Acuña.

A unha semana da celebración das Letras Galegas, toca facer balanzo dos recursos que estas semanas foron aparecendo na rede arredor do escritor homenaxeado este ano e que fomos recollendo dende o Equipo de Normalización e Dinamización Lingüística do CPI don Aurelio. Gustaríanos agradecer dende Na lingua de tod@s o labor de difusión que está a facer o profesor Alberto Armada tanto no seu blogue como na web dinámica do noso colexio, que el se encarga de actualizar incansabelmente.

Seguro que estes traballos supoñen a penas unha parte ínfima dos que circulan pola rede e nos centros educativos. Os nosos parabéns a todos eles, especialmente ao profesorado de Infantil e Primaria que está a traballar arreo no aproveitamento educativo das novas tecnoloxías.

Mapa de recursos sobre Álvarez Blázquez elaborado coa aplicación Cmap (premer na fotografía):

Tamén por medio de Alberto chegamos a un blogue colaborativo EPO-ESO que está a facer a xente da Cooperativa de Ensino Andaina sobre as Letras Galegas.

Tal e como explican dende Andaina, cada aula céntrase nun aspecto do autor ou o seu contexto e logo mediante o blogue o alumnado accede á globalidade. Tamén insisten en que "está aínda incompleto e moitos vínculos laterais inactivos, pois atópanse en pleno proceso de traballo e a punto de colgar os resultados das súas investigación".

Nós non o cremos así. Parabéns a Andaina!

Inauguramos unha radio en Na lingua de todo@s, Radio Musigal. Só tes que botar unha ollada á esquerda do blogue e nesa rechamante caixa vermella atoparás a aplicación Deezer.

Só che queda darlle ao play e pasar para adiante cando queiras escoitar un novo tema. A orde das cancións é aleatoria e tes un par de ducias de bandas para comezar a goza da música en galego.

Nos próximos días iremos actualizando e dando a coñecer novas bandas e solistas.

O Centro de Documentación Sociolingüística do Consello da Cultura Galega faise eco, como antes fixera a Coordinadora de Traballadores pola Normalización Lingüística, do proxecto que puxo en marcha o ENDL do CPI don Aurelio.



Tamén queremos destacar a cálida crónica que a Asociación Cultural O Fervedoiro fixo dun dos actos programados no Musigal. Agradecidos/as estamos unha vez máis polo seu apoio ás diferentes iniciativas normalizadoras que nacen na vila de Cuntis.

Para difundirmos entre todos/as a convocatoria da manifestación en defensa da lingua que promove a Mesa pola Normalización Lingüística para o próximo domingo en Compostela, podedes inserir nos blogues e webs un banner como o noso, que obtemos grazas ao blogue fandiarzua.

Por se alguén non lembra o procedemento, ir a:
- Configuración
- Datos básicos
- Presentación
A continuación, hai que empregar as mesmas funcións de formato de texto que empregamos ando actualizamos con texto, imaxes e ligazóns.
- Pegar a imaxe no cadro empregando a función para inserir fotos. A URL da foto é esta: http://img186.imageshack.us/img186/3200/amesanu8.gif
- Logo seleccionar e introducir o enderezo da MNL se queremos inserir unha ligazón a esta organización.

A Secretaría Xeral de Política Lingüística iniciou unha campaña de promoción do galego no ámbito notarial en colaboración co Colexio Notarial de Galiza.

Informar e facer unha oferta positiva do idioma son os dous piares da campaña que quere chegar a todas as notarías do país através deste cartaz informativo. Así mesmo, contémplanse outras medidas como cursos de formación de 40 horas para os/as notarios/as e a actualización de modelos documentais.

Agardemos que casos como o denunciado polo escritor Lois Diéguez, que foi rexeitado en varias notarías que non elaboraban a documentación en galego como solicitaba, sexan cada vez menos frecuentes. E iso tamén depende en boa medida de nós.

1 [2] [3] [4] [5] [6] [7]