Malmequer


Pandereiteir@s e festeir@s da beira atlántica da Galiza


Malmequer
malmequer.vigo@gmail.com
 GAVETAS
 OS SERÁNS (Sección de consulta)
 FOTOS PARA A HISTORIA
 LIGAZÓNS
 BUSCADOR
 BUSCAR BLOGS GALEGOS
 ARQUIVO
 ANTERIORES

Cinema en galego
A Mocidade pola Normalización Lingüística anima a acudir aos pases en galego de Nocturna, o novo traballo de animación da factoría Filmax

A partir deste fin de semana de ponte, pódese ver nas salas de cinema de Galiza o filme Nocturna, nova produción de animación da factoría Filmax especialmente dirixida á xente máis nova. A fita poderá visionarse tamén en lingua galega nun total de catro salas do país (Filmax da Coruña, Filmax Fontiñas e Multicinemas Compostela na capital galega e Multicinemas Norte en Vigo).

Como sempre que se estrea un filme nas nosas salas con posibilidade de ser visionado no noso idioma, a Mocidade pola Normalización Lingüística, sección xuvenil da Mesa, anima a todos os públicos, maiores e pequenos, a acudiren a calquera dos cinemas onde Nocturna se exhibe en lingua galega. Para a Mocidade da Mesa trátase dun acto de compromiso e reivindicación do idioma propio, nun ámbito esencial para a normalización da lingua como o cinema e, en xeral, os espazos de lecer máis frecuentados pola poboación no seu conxuntol; mais trátase tamén dun xeito de desfrutar do cinema e de exercermos o dereito básico que nos asiste a o podermos facer no noso propio idioma.

Porén, malia considerar sempre “como unha boa noticia” calquera estrea de cinema en galego, a Mocidade pola Normalización Lingüística chama a atención sobre o escaso número de salas onde se exhibirá en galego o novo traballo de Filmax. Así, mentres que Nocturna só poderá verse no noso idioma en tres cidades galegas, poderá visionarse en castelán en calquera das sete cidades e en máis do duplo de salas. “O galego segue así tratado como idioma de excepción e como cousa anecdótica na súa propia terra ”, sinalan desde as Mocidades da Mesa, “ben lonxe dunha suposta ou teórica igualdade ou equilibrio co castelán”.

www.amesanl.org

http://movies.filmax.com/nocturna/
Comentarios (0) - Categoría: Novas - Publicado o 15-10-2007 23:55
# Ligazón permanente a este artigo
Quempallou en Vigo

Quempallou na Fábrica de Chocolate Club de Vigo (r/Rogelio Abalde) este mércores 17 de outubro ás 23:00 (3€)
Comentarios (0) - Categoría: Novas - Publicado o 14-10-2007 23:48
# Ligazón permanente a este artigo
Declarado deserto o Concurso Constantino Bellón
O xurado revoga o XVII Concurso de Gaita Constantino Bellón

Mes e medio despois do fallo do premio, o xurado do XVII Concurso Constantino Bellón decidiu anular o galardón concedido ao gaiteiro fonsagradino Brais Monxardín e declaralo deserto.

Monxardín impuxérase na modalidade de 'interpretación de gaita solista'. Agora, o xurado composto por gaiteiros como Xesús Vaamonde e Pablo López Torneiro entende que o gañador incumpriu as bases xa que a peza composta para o concurso xa fora tocada con anterioridade.

Brais Monxardín recoñeceu ter tocado esta peza con anterioridade pero afirmou que nunca pensou que estaba a vulnerar as bases do concurso xa que a peza estaba sen editar. O gaiteiro fonsagradino terá que renunciar aos 3.000 euros do premio.

www.vieiros.com

Achegado ao correo de l`gaita:

En Ferrol, no local do Ateneo Ferrolán, sito na rúa Magdalena, 202-204, o XURADO do XVII Concurso de Gaita Galega "CONSTANTINO BELLÓN", composto por: Víctor Fernández Gabeiras, Xesús Vaamonde Manteiga, Xavier Rodríguez Fariñas, Pablo López Torneiro, Xoán Rodríguez Silvar e actuando como secretaria, sen voto, Cristina Meizoso Alonso, reunido o día 8 de outubro de 2007 toman a seguinte DECISIÓN:

REVOGAR o PREMIO DE INTERPRETACIÓN DE GAITA GALEGA SOLISTA deste XVII Concurso de Gaita Galega "Constantino Bellón" celebrado en Ferrol o día 31 de agosto de 2007 por:

UNHA FALTA AO ESPÍRITO DO CONCURSO e INCUMPRIMENTO DAS BASES DO MESMO.

Por todo o antedito, se declara DESERTO O PREMIO do XVII CONCURSO DE GAITA GALEGA "CONSTANTINO BELLÓN" do ano 2007.
En Ferrol a 8 de outubro de 2007

Asdo.: Víctor Fernández Gabeiras
Presidente do Xurado
Asdo.: Cristina Meizoso Alonso,
Secretaria

BREVES

Comentario do XURADO:......... a esencia do Concurso de Gaita Galega "Constantino Bellón"

...........os que tivemos a sorte de poder asistir á Final, aínda escoitamos un primeiro "la" interpretado por Brais Monxardín, realmente emocionante, i é que escoitar un efecto dinámico nunha gaita non deixa de ser sorprendente, sobre todo, cando se consigue gracias á presión, e coa axuda dun vibrato para controlar a afinación. Coido que ninguén pensaba que algo así podía resultar nunha gaita, xa que atenta contra un dos principios básicos deste instrumento: "O tempero ".

................................................................

................................................................

COMUNICADO de PRENSA de BRAIS MONXARDÍN

(saúdos iniciais)

Este pasado verán tiven o orgullo e o privilexio de ser proclamado gañador do Concurso de Gaita Galega "Constantino Bellón". Para un xoven gaiteiro coma min, este feito foi sen dúbida un grande estímulo e un claro recoñecemento da miña progresión como gaiteiro, e unha reafirmación da miña dedicación a un mundo, o da gaita galega, que require unha grande perseveranza e esforzo. Máis alá da dotación económica ou o premio en si, o que realmente apreciei foi o recoñecemento que a xente deste mundo me outorgaba.

Lamentablemente, unhas semanas máis tarde, o presidente do xurado púxose en contacto comigo para comunicarme que recibiran informacións que apuntaban a que a peza que eu compuxen e que interpretei xa fora tocada con anterioridade por min, e que iso significaba que non se me podía outorgar o premio.

Efectivamente, a peza en cuestión foi interpretada con anterioridade. Ese feito non me pareceu que contraviñese en modo algún as bases do concurso, xa que a obra non fora editada e foi composta para o Constantino Bellón, tal como estas requirían. Ese foi o meu erro, que estivo motivado por unha diferente interpretación das bases do concurso e con ausencia total de mala fe pola miña parte.

Este feito foi comprendido en todo momento polo xurado, que constatou que en puridade eu era e sigo sendo o gañador moral dun concurso que valora ante todo a interpretación da peza e o concepto de gaiteiro integral, que na opinión unánime do xurado mereceu tal distinción. Esta opinión do xurado foi respaldada en todo momento polos diferentes apoios que recibín de membros da comunidade da gaita galega, apoios que aproveito para agradecer de todo corazón.

Chegados a este punto, decidín que a mellor forma de salvagardar a miña integridade artística e alonxar calquera sombra de dúbida sobre a miña profesionalidade e boa fe era respaldar a decisión do xurado de declarar o premio como deserto.

Esta foi a opinión do xurado, que se viu na obriga de cumprir coa súa función de preservación da formalidade e a reputación dun concurso señeiro coma o Bellón, decisión que me consta non foi sinxela para eles, como tampouco foi sinxela nin doada para mín.

Espero que o meu comportamento nesta situación demostre a miña boa vontade e o meu respeto por este concurso e pola gaita galega, respeto que me consta que lamentablemente non foi compartido por algún que outro mal exemplo, que debería recordar que a envexa e a mezquindade non teñen lugar entre os que facemos deste instrumento a nosa vida, e non un medio para dar escape ós nosos complexos e miserias. O mundo da gaita galega está por riba de todos nós, especialmente de algúns.

Moitas grazas.

Brais Monxardín López

Nova da Final
Fallo do Xurado
Convocatoria
Comentarios (11) - Categoría: Concursos e Xornadas - Publicado o 14-10-2007 23:17
# Ligazón permanente a este artigo
Etiquetal.com

Normalizando o galego en todos os campos...

Principia a súa andaina eTiqueTAL.com, unha páxina para atopar parella na túa lingua
O portal Fillos.org busca poñer en contacto a mozos e mozas de Galiza e da diáspora.

O maior portal da diáspora galega, Fillos.org, presentou esta semana un novo servizo que permitirá que mozos e mozas de todo o mundo atopen amigos ou parella usando unicamente etiquetas en galego. A iniciativa eTIqueTAL.com, que conta co apoio da Secretaría Xeral de Política Lingüística, pretende contribuír á normalización da nosa lingua en internet.

Segundo explican os propios promotores, “o web baséase no concepto da semántica, de tal xeito que cada usuario defínese a si mesmo mediante unha icona, unha frase favorita e unha serie ilimitada de etiquetas que describe todo o que lle gusta”. Posteriormente o propio sistema é o que avisa de xeito automático a outros usuarios que comparten eses mesmos gustos e posibilita o contacto privado.

O responsábel técnico do proxecto, Manuel Casal Lodeiro, subliña que a iniciativa pretende “facer que os mozos galegos empreguen máis o galego para se relacionaren entre si na Rede, e que como en todos os nosos proxectos se reúnan nun lugar común os galegos de Galiza e da diáspora”.

www.etiquetal.com
Comentarios (0) - Categoría: Novas - Publicado o 14-10-2007 23:16
# Ligazón permanente a este artigo
O PP reabre en Cangas a Escola de Gaitas da Deputación
A Deputación de Pontevedra decidiu continuar coa actividade da Escola de Gaitas e Percusión que rexeitara o goberno cangués tras dous anos de funcionamento.

As clases impartiranse na academia Staccato, en cálea Paz, os sábados pola mañá. O prazo de inscrición está aberto ata o día 19. O 20 terá lugar o acto de presentación ás 12.00 horas.

Tanto a matrícula como as clases son gratuítas. A Escola proporciona aos alumnos os instrumentos mentres non o adquiren pola súa conta. Ao alumno non se lle esixe ningún coñecemento previo nin de música nin de instrumento.

O deputado provincial, ex alcalde e concelleiro cangués José Enrique Sotelo, e o director da escola, Hipólito Cabezas, anunciaron onte nun hotel do centro do pobo a decisión do organismo provincial e aproveitaron para criticar ao goberno local por descartar esta oferta recorrendo ao «peregrino argumento», segundo indicou Sotelo, de que os instrumentos e os ensinos musicais non responden á tradición galega. O ex alcalde considera que o tripartito buscou unha «confrontación interesada» con tal decisión. «Nós non entendemos a cultura como un coto privado para adoutrinar ás masas», afirmou.
Hipólito Cabezas mostrou a súa sorpresa pola argumentación que serviu ao goberno cangués para pechar a escola. Afirma que tanto os instrumentos utilizados (gaita, tamboril e pandereita) como os ensinos musicais responden plenamente á tradición folclórica galega. Os estudantes inícianse cunha frauta rectificada, adaptada á escala da gaita. Os estudantes de percusión inícianse con caixas xordas antes de pasar ao tamboril e a pandereita.

Cabezas di que ninguén pon reparos a que os grupos folk toquen calquera instrumento foráneo, pero ás bandas de gaitas obrígaselles a vestir o traxe tradicional, a facer música tradicional e a utilizar os instrumentos tradicionais. Ao seu xuízo, é «algo incomprensible e manipulado». Apunta a posibilidade de que sexa potenciado por músicos que se quedaron descolgados e sen posibilidades de actuar.

A Deputación, que mantén estas escolas en Arousa, Lalín, Pontevedra e Vigo, creou a de Cangas hai dous anos. As clases impartíanse no auditorio. O concelleiro de Cultura cangués, Xosé Manuel Pazos, di que había un grave problema de espazo, problema que recoñece o director da escola. A decisión final de pechala, con todo, tomouse en comisión de goberno. As críticas dalgúns músicos tradicionais desde o mesmo día en que foi aberta foron o argumento de tal decisión. Pazos di que o ensino da gaita e a percusión está ben cuberta polas bandas existentes en Cangas.

www.lavozdegalicia.es
Comentarios (0) - Categoría: Novas - Publicado o 14-10-2007 23:15
# Ligazón permanente a este artigo
Ruxe-Ruxe preparan novo disco

Ruxe-Ruxe anuncia que despois de presentar o seu último traballo discográfico “Comercial” (PAI-musica 2006) nunha intensa xira de 44 concertos ao longo de todo o país, fai unha breve parada para gravar de maneira inminente o que será o seu 6º traballo de estudio, que estará na rúa en marzo de 2008.

A despedida da xira “Comercial” levará ao grupo a tocar os días:
31 de Outubro, Sala Irish Rover, Madrid.
1 de Novembro, Sala MostMusic, Leganés.
2 de Novembro, Sala Baranda, Barco de Valdeorras.
3 de Novembro, Castañazo Rock, Chantada.

Os Ruxe-Ruxe queren agradecer o apoio e cariño recibido por todos os promotores, asociacións, programadores e festivais, así como, moi especialmente aos grupos cos que compartiron cartel e tamén a toda a xente que asistiu aos concertos e cargou de enerxía positiva á banda ao longo de todo este 2007.

"isto somentes é rock and roll pero préstanos dabondo"

www.ruxeruxe.com

Comentarios (0) - Categoría: Novas - Publicado o 14-10-2007 23:14
# Ligazón permanente a este artigo
3ª Ruada en Arteixo

O vindeiro 20 de outubro Xiradela organiza a 3ª Ruada en Arteixo.
Será a partir das 23:00 h. no Paseo Fluvial de Arteixo (a carón do Centro Cívico).

Dende aquí queremos convidarvos a todos os que teñades gañas de festa a que veñades e participedes dunha noite de xolda ó son das pandeiretas e das gaitas.


¡¡¡¡¡Non faltedes!!!!!
Comentarios (0) - Categoría: Seráns e Foliadas - Publicado o 14-10-2007 23:10
# Ligazón permanente a este artigo
Homenaxe ao Gaiteiro 2007
Os gaiteiros de toda Galicia celebran a súa festa en Vigo

A asociación A Buxaina e o Centro Recreativo Artístico e Cultural de Coruxo rende hoxe homenaxe ao gaiteiro. A festa da música tradicional realízase desde hai dezanove anos e ten como obxectivo destacar a figura dalgúns gaiteiros que seguen mantendo a cadea de tradición musical entre xeracións, por encima das modas e os adiantos tecnolóxicos.

A tradición remóntase ata onde un queira buscar, e xa no padrón de Vigo de 1639, constaba un veciño inscrito co oficio de gaiteiro, nun total de 519 veciños, entendidos estes como cabezas de familia, residentes nunha casa.
E é que Galicia non se pode entender sen o son dunha gaita. Romarías, «seráns» ou muiñadas foro amenizados desde sempre por estes personaxes e os seus instrumentos de fol. Durante tempo, os gaiteiros eran como os roqueros; seres relacionados coa troula e o vivir «a lume de biqueira».

A cita terá lugar a partir das sete e media da tarde, no teatro do Centro Cultural Caixanova. O aforamento volverá cubrirse porque o amor polas tradicións está moi vivo no municipio vigués.
Nesta decimonovena edición, os organizadores do evento renderán homenaxe a Manolo Viqueira e Marcelino e Pepe dá Gaita de Sarandón, figuras destacadas da música tradicional galega que seguen transmitindo os seus coñecementos de geración en xeración, desde a experiencia que lles proporciona a súa longa dedicación ao folclore galego.

As presentacións correrán a cargo de Pepe Suevos, que seguro que cargará de humor todos os seus comentarios, non en balde é unha das figuras locais máis destacadas no fino oficio de facer reir.

Pero nunha homenaxe á gaita non podía faltar a presenza da música. Nesta ocasión, o programa está cargado de oficio. Así, os espectadores poderán seguir a actuación de Anacos de Buxo, un cuarteto de música tradicional galega, formado por dúas gaitas (Xurxo Fernández e Pedro Álvarez), tamboril (Ramón Corral ) e bombo (Álex Covelo), que sacaron o seu primeiro disco en 2004; a Agrupación Folclórica Trompos Os Pes, nacida en Marín fai máis de vinte e cinco anos; e Quempallou, un grupo que traballa sobre os ritmos tradicionais galegos intentando conservar a frescura orixinal, e buscando un estilo moi bailable para goce tanto dos propios músicos como do público. Así que a festa da gaita está asegurada, tanto desde o punto de vista emotivo, como musical.

www.lavozdegalicia.es
Comentarios (0) - Categoría: Novas - Publicado o 13-10-2007 15:35
# Ligazón permanente a este artigo
Videos do Concurso de Gaitas de Ponteareas
Xa podemos difrutar dalgúns dos videos da Final do Reveriano Soutullo deste ano.

Con polémica, artificial ou non, noraboa aos gañadores.

Comentarios sobre o concurso.

Final do Reveriano Soutullo 2007

1º PREMIO - VILABEIRA (VILAGARCÍA DE AROUSA)
CHRISTIAN CASTRELO CONDE
ABRAHAN FDEZ LOPEZ
MIGUEL SOUTO
ALEXANDRE FERNANDEZ

2º PREMIO -RÉDEA SOLTA (POIO)
PABLO DE VIGO
OSCAR IBAÑEZ
ALBERTO COSTAS
SERAFÍN SANTOS

3º PREMIO –LAGHAREU (COTOBADE)
EDELMIRO FDEZ
PABLO DALAMA
LOLA FERNANDEZ
MIGUEL FRAGUAS

4º PREMIO - OS CHUPACABRAS (VIVEIRO)
DAVID BELLAS
XESÚS RIVERA
CRISTIAN SILVA
RAFAEL CRESPO

Vilabeira


Laghareu


Os Chupacabras


Abelente

Categoría: Novas - Publicado o 11-10-2007 01:07
# Ligazón permanente a este artigo
VI Premios Opinión de Música Folc

Este xoves día 11 de outubro ás 20:30 celebrarase, no Teatro Colon de A Coruña, a gala de entrega dos prestixiosos "Premios Opinión" adicados á música galega e organizados polo xornal "La Opinión".

Actuacións da gala:

Xosé Luís Miguélez, gaita + Pablo Diago, piano.
Nordestinas: Guadi Galego, voz + Ugia Pedreira, voz e Abe Rábade, piano,
Maite Dono, voz + Manuel Gutierrez, piano
Os Cempés (nunha das derradeiras actuacións antes de despedirse como grupo)

A entrada é libre ata completar aforo, previo levantamento da invitación na sede do xornal. Para conseguir a invitación recorta o cupón que vai co xornal e entregao na sede do mesmo situada na Rúa Franxa 40-42.>


Un ano máis a gala de entrega dos PREMIOS OPINIÓN volve pulsar o estado no que se atopa o folk galego. Os premios concedidos ao longo destas seis edicións conforman un panorama do que se está a facer neste estilo musical, o que se viu reflectido nas votacións elaboradas polo xurado composto por xornalistas de diferentes medios de comunicación.

Unha novidade estilística faise evidente ao consultar o palmarés das dúas últimas edicións do galardón, no que se comproba que xurdiron novas visións musicais capaces de engaiolar a un público quizais necesitado dunha lufada de aire fresco que fixese enriquecer as opcións existentes dentro da música de raíz do noso país. A apertura de novos vieiros plásmase nunha serie de proxectos nos que salienta o traballo dun fato de artistas inquedos necesitados de romper clixés e moverse con absoluta liberdade sen sentir que optar por un camiño diferente é algo que non se debe facer. O seu labor comeza a ser recoñecido e o público refrenda o traballo mercando os seus álbumes e aportando unha interesante cifra de vendas para un pequeno mercado coma o noso.

Nesta sexta entrega dos premios o camiño marcado pola edición anterior, premiando tres obras novidosas dentro do folk galego, continuou no momento en que os gañadores como mellor disco do ano 2006 foron o trío Nordestin@s. A unión do pianista Abe Rábade e as voces de Guadi Galego e Ugía Pedreira, xa cunha traxectoria ás súas costas, conforman unha obra peculiar na que conviven con naturalidade pezas populares, aportacións propias e as pingas jazzísticas aportadas por Rábade, un músico que goza de moito prestixio e foi quen de afrontar o reto lanzado polas súas compañeiras para unirse a elas nunha singradura que cabe considerar exitosa, e que non sabemos se terá continuidade no futuro.
Os Cempés desfanse e esta é unha excelente ocasión para brindarlles unha despedida brillante, como eles merecen, logo de facer bailar a miles de persoas ao longo de todos estes anos. O seu carácter lúdico colaborou para facer de festivais auténticas festas. Recibiron na segunda edición un PREMIO OPINIÓN como terceiro mellor disco do ano por Moe a moa e agora temos ocasión de velos tocar enriba do escenario.

A presentadora do acto é Maite Cabezas, presentadora de A Revista fin de semana, programa da TVG. A cerimonia de entrega comezará ás 20.30 horas no teatro Colón e durará algo máis de dúas horas.

Comezará saíndo ao escenario o gaiteiro Xosé Miguélez para interpretar un par de pezas, acompañado do pianista Pablo Diago. Despois tocaralle o turno a Maite Dono, acompañada ao piano por Manuel Gutiérrez, que cantará cinco temas. Seguidamente tocarán Os Cempés e logo chegará a entrega de premios. Pecharán o acto as Nordestin@s.

www.laopinioncoruna.es
Comentarios (0) - Categoría: Novas - Publicado o 11-10-2007 00:10
# Ligazón permanente a este artigo
VI PREMIOS OPINIÓN DE MÚSICA FOLK - NORDESTIN@S, MELLOR ÁLBUM FOLK GALEGO DO ANO 2006
Hoxe será un día festivo para o folk galego. A cita é no Teatro Colón da Coruña ás oito e media do serán coa entrega dos PREMIOS OPINIÓN e as actuacións de Nordestin@s, Os Cempés, Maite Dono e Xosé Luís Miguélez. Os lectores que queiran asistir á gala de entrega dos galardóns aínda poden conseguir unha invitación presentando o cupón que hoxe aparecerá nas páxinas do xornal, tal como sucedeu en días pasados.

O trío Nordestin@s naceu da unión das voces de Ugía Pedreira e Guadi Galego e o piano de Abe Rábade. Os sons jazzísticos de Rábade poñen o contrapunto a pezas tradicionais ou de composición propia con sabor mariñeiro. A temática desta obra une ao mar de Cedeira, lugar de nacemento de Galego, co de Foz, vila natal de Pedreira. A receptividade a este disco foi notable e foron quen de vender no nadal pasado dúas mil copias, un rexistro excelente para os tempos que corren na industria musical e máis tendo en conta que se moven nun estilo musical no que as vendas son limitadas. Ugía Pedreira foi a cantante do grupo Chouteira e actualmente é a voz principal de Marful, ademais de ser a directora do Conservatorio Folque de Lalín. Guadi Galego é coñecida por ser a voz de Berrogüetto e ultimamente atravesa un momento creativo intenso ao que dá saída co dúo Espido, formado con Guillermo Fernández. Pola súa banda, Abe Rábade é considerado como un dos artistas novos máis sobranceiros no eido do jazz. Uniron as súas forzas para elaborar un disco que xa vai ocupar un lugar importante dentro da música de raíz galega.

Os compoñentes do grupo amosan satisfacción por recibir o PREMIO OPINIÓN como mellor álbum de folk do 2006 e valoran que se premiou por parte do xurado "algo distinto".

-Semella que desde aquel concerto de presentación en Pontevedra e o segundo, realizado en Mera, pasou demasiado tempo ata que asentaron o seu proxecto.
-Foi premeditado. Quixemos facer poucos concertos ata a saída do disco.

-E chegado ese traballo atopáronse cunhas vendas magníficas. Esperaban tal recibimento a unha proposta novidosa no panorama musical galego?
-Esperabamos que á xente lle gustase porque era un concepto distinto e tiñamos o reforzo de cancións populares. Había unha posibilidade de chegar a un maior espectro de xente por mor das harmonías máis sofisticadas, pero nunca esperas que se venda tanto. A estas aturas levamos facturados máis de catro mil exemplares. Confiábamos no álbum porque é un proxecto sincero.

-Desde o concerto realizado no teatro Principal de Santiago, no que gravaron o disco, a proposta non parou de medrar.
-Ese concerto foi un punto de referenza e un comezo dalgo esperanzador. Notamos que o público estaba claramente con nós.

-A súa execelente acollida, xunto a doutras propostas como as de Xabier Díaz, Espido e Marful, e nestas dúas son parte importante Guadi Galego e Ugía Pedreira, amosan que existe un mercado en Galicia para un tipo de música con raíces que comeza a abrir novos vieiros?
-Si, totalmente. Cremos que a xente agora está preparada e apareceron músicos que se botaron cara adiante a realizar cousas diferentes. Tamén apareceu algunha discográfica valerosa, como no caso de Falcatruada, que editou a Nordestin@s. Danos a sensación que o público esperaba que saíse algo distinto e iso vai axudar aos artistas que realizan autoproducións porque se chegan a un número determinado de vendas poderán meter máis cartos nos seus vindeiros traballos. É moi posible que hai un lustro non sucedese o mesmo e a demanda para este tipo de propostas non acadase a mesma acollida. Agora o que debemos facer é sacarnos o complexo da lingua e cantar en galego con normalidade.

-Axudoulles ser xente xa cunha traxectoria musical ás súas costas para realizar un álbum con maior madurez?
-Que os tres tivésemos xa experiencia resultou moi importante para o resultado final. A unha persoa que comeza custaríalle máis. O mercado no que traballamos é pequeno, pero xa contabamos cun certo nome que axuda a que o trío concentre unha maior atención por parte da xente.

-Hai pouco unha das súas pezas foi escollida para aparecer nun disco recompilatorio editado nos Estados Unidos. Que pode representar ese recoñecemento no estranxeiro?
-O tema é Ari, Ari e o mérito haillo que dar á nosa discográfica, que está a currar duramente. Esas cousas sempre están ben, mais nunca sabes que van representar e que pode acontecer cunha promoción así. Ao mellor non sucede nada especial.

-Vistos os resultados e o éxito acadado cómpre falar do futuro de Nordestin@s. Falaban que non tiñan claro se habería un segundo disco. Variou algo esa idea con todo o sucedido neste tempo?
-Estamos nas mesmas. Non imos pensar moito no futuro, depende de como vaian as cousas de cadaquén, xa que traballamos noutros proxectos musicais. Veremos como evolucionan as nosas carreiras e iso é o máis bonito. O único que temos claro é que, de saír outro disco, tamén sería temático no seu contido. Podía ser do mar, como este, ou doutra cousa, mais sempre pensando nalgo conceptual. Estamos ledos da mestura realizada. Abe provén do jazz e trae ideas diferentes ás nosas, que traballamos noutra onda, e iso enriquece ao conxunto.

www.laopinioncoruna.es



Comentarios (0) - Categoría: Novas - Publicado o 11-10-2007 00:10
# Ligazón permanente a este artigo
VI PREMIOS OPINIÓN DE MÚSICA FOLK - BERROGÜETTO , SEGUNDO MELLOR ÁLBUM POR `10.0´
O grupo Berrogüetto foi o primeiro gañador dos PREMIOS OPINIÓN co seu disco Hepta. Eles, xunto a Fía na Roca e Susana Seivane, abriron o capítulo de vencedores dun premio que segue a ser a única referenza no panorama musical galego que salienta o labor dos músicos folk.

Pasaron varios anos desde a saída do anterior traballo e agora o conxunto volveu recibir o beneplácito do xurado por 10.0, unha obra que conmemora unha década no eido musical dunha banda asentada como un dos piares máis fortes na música do noso país.

-Que valoración fan desde a saída ao mercado do seu último traballo?
-En liñas xerais cremos que tivo unha boa acollida. Como adoita acontecer hai xente á que lle gusta e a outra non tanto, pero pensamos que foi acollido con bastante agarimo.

-As vendas amosan que seguen a contar cun bo número de seareiros.
-Tal como vai a industria discográfica non hai queixa. Se miramos o descenso xeral de vendas e os números que saen con esta obra vemos que, máis ou menos, mantemos o noso nivel de vendas.

-No verán actuaron bastante por toda Galicia.
-Xullo foi malo por mor da configuración dos concellos logo das eleccións municipais, pero agosto e setembro foron espléndidos. O verán resultou moi activo e sentímonos ledos porque acostuma suceder que cando non tes disco novo os concertos redúcense de xeito considerable, e non aconteceu iso. Queremos salientar a nosa presenza en países aos que non fóramos, especialmente México, onde tocamos nun festival interesantísimo de culturas en resistencia, que están en perigo de perder a súa identidade, e coñecimos xente de todo o mundo. O festival resultou moi potente e ademais, por unha vez na vida, tivemos tempo de facer turismo e México, coa súa cultura precolombina impresionante, é un país espectacular e a xente tratounos moi ben.

-Veñen de estar no Popkomm en Berlín. Como foi a experiencia nun país, como Alemaña, no que lograron un par de premios da crítica musical e adoitan ser moi ben recibidos?
-Había ben tempo que non iamos por aló e a verdade é que sempre tivemos un gran recibimento por parte do público e esta vez recuncamos con esa sensación. O evento é unha festa máis profesional que de cara ao público e a representación galega e española gustou bastante. Ademais, tivemos unha boa repercusión nos medios de comunicación.

-Esta vez tocoulles ser segundos na votación e aínda ningún artista conseguiu repetir como gañador do galardón. Iso reflicte, en certa medida, o bo momento que atravesa a música de raíz na nosa terra?
-Podería ser unha interpretación. Afortunadamente contamos cun alicerce potente e comezan a saír propostas diferentes, que amosan diversidade e calidade para o noso panorama musical. Para manter unha industria musical viva é imprescindible meter carbón humano a traballar, e que todo ese traballo se consiga plasmar no apartado artístico.

-É inevitable preguntar por ese adiado disco sobre enerxías alternativas.
-Levamos moito tempo traballando niso. O proxecto continúa adiante e non está esquecido pero atopamos atrancos e oxalá en breve teñamos novas, pero xa non damos ningunha data de saída.

-Nesta ocasión acadaron o segundo lugar na votación do xurado logo de obter o primeiro lugar na I edición dos PREMIOS OPINIÓN.
-O importante é seguir estando presentes na lista de premiados e que a xente siga a falar de nós. O outro é unha cuestión sinxelamente numérica que non ten tanta importancia.

www.laopinioncoruna.es



Comentarios (0) - Categoría: Novas - Publicado o 11-10-2007 00:10
# Ligazón permanente a este artigo
VI PREMIOS OPINIÓN DE MÚSICA FOLK - MILLADOIRO, TERCEIRO MELLOR DISCO POR ´UNHA ESTRELA POR GUÍA´
Milladoiro realizou con Unha estrela por guía un traballo atípico na súa carreira, xa que se constituía como o primeiro disco enteiramente cantado na longa andaina da banda.

Os poemas do finado escritor Manuel María son o eixe deste traballo de encarga co que o conxunto afrontaba un reto musical. Maniféstanse decepcionados co recibimento tido a esta obra, tal como se pode comprobar na entrevista, pero o máis importante nestes momentos na vida da formación é a recuperación de Antón Seoane logo dun verán no que non tocou co grupo por mor dun problema de saúde. Na época estival, a banda non interpretou nos escenarios o disco novo, reservado polas súas características para recintos pechados.

-Como valoran o recibimento deste álbum, atípico na súa carreira musical?
-Non estamos moi ledos porque pasou desapercibido. Decepcionounos o silencio que houbo ao redor do álbum. Independentemente da valoración artística sobre a obra, que haberá, loxicamente, para todos os gustos, cremos que un disco que une a poesía de Manuel María con Milladoiro debería ter outra repercusión. Fallou moito a vontade política. Falábase de poder realizar algo no estranxeiro e ao final case nin o presentamos no país.

-Cantos concertos deste traballo deron en Galicia?
-O de presentación en Pontevedra, cuns actos organizados un chisco de tapadillo, en Santiago de Compostela e Vilalba. As actuacións pasaron sen pena nin gloria. Non sabemos o motivo, pero en Galicia viráronlle as costas a este traballo.

-Cales son os vindeiros proxectos do grupo?
-En primeiro lugar remataremos o ano de concertos, que aínda nos levará por Sevilla e Zaragoza. Logo estamos a pór música a un proxecto audiovisual de Jose Luis García Sánchez, con quen xa colaboráramos en Divinas Palabras. Volve fixar a súa atención en Valle Inclán e prepara un traballo sobre tres obras do escritor galego. Imos compoñer a música para unha delas, titulada Las galas del difunto. Tamén estamos en negociacións avanzadas para un proxecto co Eixo Atlántico no que conectariamos a Portugal e Galicia musicalmente e colleriamos referenzas dos dous países para elaborar un disco. A máis longo prazo barallamos ideas para o 2009 porque se van cumprir trinta anos de vida de Milladoiro e queremos realizar algo un pouco singular para conmemorar como é debido ese aniversario tan especial.

www.laopinioncoruna.es



Comentarios (0) - Categoría: Novas - Publicado o 11-10-2007 00:09
# Ligazón permanente a este artigo
IV Encontro internacional de pandeiros de mao.
IV Encontro internacional de pandeiros de mao.
Outubro.Pontevedra 07.

Os tambores de mao, entre os que se incluen algúns dos mais importantes instrumentos populares galegos, é dizer, a pandeireta e o pandeiro, son coñecidos desde a Antiguedade en culturas como a persa, a exípcia, a china ou a india. Desde a Idade Media adquiren protagonismo nas culturas ibéricas destacandose en Galiza como uns dos principais instrumentos para acompañamento de cantos e bailes. Levado por galegos, portugueses e españois a América introducese tamén nas músicas populares do Brasil, Cuba ou México.

A coñecida como “pandeireta galega” conta cunha técnica de execución única no contexto internacional, é destacada tanto pola cantidade de recursos interpretativos como polo valor patrimonial das músicas que acompaña. A vixencia da música popular galega de transmisión oral até os nosos dias convirtea numa das manifestacións mais relevantes da cultura popular europea.

A mostra internacional de pandeireta de Pontevedra evoluiu desde as suas primeiras edicións e foi mostrando exemplos da tradición viva e persoalidades destacadas con tecnicas tradicionais e contemporaneas, entre eles Xavier Leturia (Euskadi), Carlos Rizzo (Italia), Eliseo Parra (Castela).

Esta nova edición ademais de continuar coa programación reservada á pandeireta galega amplia definitivamente o seu interese polos tambores de mao considerando o adufe (pandeiro cadrado) e a pandeira (pandeiro redondo) no conxunto dos pandeiros de mao do mundo.

Teremos neste encontro representación do pandeiro cadrado de Pontevedra, con Maruxa das Cortellas considerada unha virtuosa popular deste instrumento. Desde Portugal, pais que conservou con maior vixencia a tradicción dos adufes introduccindoo en espectáculos contemporaneos, contaremos con a presencia de Paulo Meirinhos, un bon coñecedor da percusión popular portuguesa que compartillará espazo con Davide Salvado, xoven cantador e músico renovador na pandeireta galega. E para rematar,un cantor do Norte galego, Xabier Diaz presentando o seu novo disco “Coplas para Icia”.

PROGRAMACIÓN

Sábado 20.
22,00h. Serán Urbán na Praza da Verdura.
- As tanxedoiras do pandeiro
- Maruxa das Cortellas
- Pandereteiras da Hermida
- … escenario aberto para quen desexe tocar.

Domingo 21.
11h-14h. Aula aberta de adufe con Paulo Meirinho (Portugal). Edificio do antigo Conservatorio.

17-18h. Concerto didáctico.Teatro Principal.
- O adufe en Portugal. Paulo Meirinho.
- A pandereta e o pandeiro galegos. Davide Salvado.

20,30h. Concerto presentación do disco “Coplas para Icia” de Xabier Diaz. Teatro Principal.

Organiza: As. do Conservatorio de Música Tradicional e Folque de Lalín.
Promove: Concellaria de Cultura. Concello de Pontevedra.
Comentarios (0) - Categoría: Concursos e Xornadas - Publicado o 11-10-2007 00:09
# Ligazón permanente a este artigo
Carta do Colectivo en Defensa da Gaita
GAITAS E XAMÓN IBÉRICO

O Colectivo en Defensa da Gaita (CDG) síntese unha vez máis indignado e ofendido ante as recentes declaracións realizadas por D. Xosé Lois Foxo (Director da Escola Provincial de Gaitas e da Real Banda de Gaitas da Deputación de Ourense) con relación á chamada Liga Galega de Bandas de Gaitas e a súa futura denominación anunciada por el mesmo, sendo o promotor desta competición de bandas pseudo-galegas, que semellan máis de Escocia que de Galicia. Segundo palabras do señor Foxo, o vindeiro ano desaparecerá a Liga Galega para pasar a Liga Ibérica, nome curioso que chama a atención do CDG.

As denominacións de orixe (pensemos no xamón ibérico, por exemplo) son lugares ou áreas de fabricación, elaboración ou extracción dun determinado producto que, pola súa singularidade, é representativo dun lugar concreto. Se unha liga como ésta, que dende a súa creación fomenta formacións semellantes ás escocesas, pasa a denominarse en pouco tempo Ibérica, non só constitúe o fracaso deste campeonato en Galicia (recurrir a fórmulas a nivel estatal e non só galego como ata agora é sinal de deterioro e esgotamento dun proxecto que comezou sendo viable ata hoxe), senón que xustifica o agardado desexo do señor Foxo por constituíla como unha denominación de orixe máis e espandila polo resto do Estado, como un auténtico virus.

E é realmente sorprendente como hai xente que pretende vivir deste conto musical que dura xa moitos anos e que o CDG denuncia constantemente á cidadanía galega e non galega dende hai tempo. Non cómpre unha denominación de orixe para as gaitas, señor Foxo. Son case todas galegas (lembremos que hai algunhas inventadas por vostede que non o son, as denominadas gaitas marciais ou marcianas para nós, empregadas na maioría das bandas que participan nesta Liga). A futura Liga Ibérica de Bandas de Gaitas non é, por suposto, de orixe galega. Só faltaba iso. A súa orixe é, sen dúbida, escocesa. Quen pretenda enganar ós cidadáns con artimañas deste tipo non o conseguirá nunca. Nin con isto nin con nada.

Colectivo en Defensa da Gaita. A Coruña

www.cdg.es.vg

Modelo galego



Modelo escocés




Comentarios (0) - Categoría: Novas - Publicado o 11-10-2007 00:09
# Ligazón permanente a este artigo
Remata a data de inscrición do Concurso para Cuartetos Tradicionais de Luou (Teo)
Concurso para Cuartetos Tradicionais a celebrar en Luou (Teo) o domingo 21 de Outubro de 2007.

Data tope de inscrición: 15 de outubro de 2007

Premios:

1º-1000€
2º-600€
3º-400€.

Descargas (gardar como):
Bases do Concurso
Folla de inscripción

Máis información:
http://www.myspace.com/acamamoa
http://acamamoa.atwebpages.com
Comentarios (0) - Categoría: Concursos e Xornadas - Publicado o 11-10-2007 00:08
# Ligazón permanente a este artigo
Videoclip de Luar na Lubre cun tema do novo disco
O disco sairá á venda o vindeiro 23 de outubro mais xa está dispoñible na arañeira o seu primeiro sinxelo "Os animais".

O novo videoclip da banda, na que interpretan o tema titulado "Os animais", transcorre durante un dos desembarcos viquingos en Catoira.

A banda pon música ao lúdico ataque dos feroces guerreiros nórdicos. O tema, unha versión dunha melodía tradicional irlandesa moi difundida en Estados Unidos, é unha adaptación de Xavier Cordal sobre unha das diversas letras tradicionais que ao longo dos anos cantáronse sobre a famosa melodía. No caso da adaptación realizada por Luar na Lubre, o tema está referido a unha historia da Biblia, e trata a salvación que a arca de Noé supuxo para todos os animais.

Luar na Lubre presentará o seu novo disco nunha xira que comezará o 25 de outubro na Coruña e levaraos por toda España.


Comentarios (0) - Categoría: Videos - Publicado o 11-10-2007 00:08
# Ligazón permanente a este artigo
Vinte anos de honradez e dignidade
A Banda de Gaitas Tradicional Airiños de Fene festexou, o pasado 29 de setembro, 20 anos de traxectoria marcados pola seriedade no traballo, a honradez da súa proposta musical e mais a dignidade na súa transmisión

Nuns tempos nos que o máis sinxelo e doado sería ás correntes "de moda", ás subvencións e ó mercantilismo, eles decidiron apostar por unha proposta de música tradicional de calidade e respectuosa co legado recibido dos nosos maiores, sen complexo ningún á hora de empregar os instrumentos propios do noso país. Airiños de Fene conta cun traballo discográfico publicado que, xa no seu propio título, reivindica a autenticidade e enxebreza do que é a súa proposta musical: Identidade.

O presidente de Airiños de Fene, Valentín García, e o seu Director Musical, Miguel Doval, ofrecéronnos a súa persoal ollada sobre o pasado e o presente da agrupación:

O proxecto de formar unha banda de gaitas en Fene, ¿de que xeito comezou?
Valentín García: A idea de reunir os rapaces e rapazas das distintas escolas de música e baile tradicional de Fene, nunha aventura musical común, partiu de Ramiro Couce; cun proxecto inicial, talvez demasiado ambicioso, que era o de formar unha banda de gaitas de todo Ferrolterra. Así naceu Airiños de Fene.

¿E a partir de aí?
Valentín García: A partir de aí a banda viviu dous períodos ben diferenciados. O primeiro deles podémolo situar temporalmente entre o momento mesmo da súa fundación e o ano 1992; nese tempo, os compoñentes foron perfeccionando a súa técnica e preparando o que despois sería o noso repertorio musical. Unha vez conseguido un suficiente nivel de calidade iniciouse o seguinte período e chegou o momento de amosarlle ao público o froito deses case cinco anos de esforzado traballo e dedicación.

O número de actuacións e os seus resultados, desde esa presentación ao público, ¿foi satisfactorio?
Valentín García: Plenamente. Temos actuado por toda Galiza, en distintos lugares do estado español e tamén en Portugal e Francia. O noso traballo, que levamos adiante dun xeito honesto, serio e con dignidade, tivo o seu recoñecemento coa consecución (en dúas das súas edicións) do premio á mellor banda de gaitas tradicional de Galiza no concurso organizado pola RTVG. Tamén fomos convidados para participar, no ano 1992, nos actos de inauguración da Exposición Universal de Sevilla.

Deses lugares de fóra de Galiza nos que tivestes a oportunidade de ofrecer a vosa música ¿onde foi mellor acollida a vosa proposta?
Miguel Doval: Sen dúbida ningunha, no Festival de Lorient. Aquilo é un punto e á parte dentro da música tradicional, tanto polo xeito en que o ven eles como polo que o vemos nós. Na nosa primeira visita, chegabamos alí pensando que era un festival máis; pero tivemos a grata sorpresa de comprobar que, desde o primeiro ata o último dos asistentes, todos gozan escoitando unha gaita. É verdadeiramente impresionante. Mesmo cando estás afinando os instrumentos, algo que aquí resulta un pouco pesado, alí hai xente que está a escoitar atentamente todo o proceso ao mellor dúas ou tres horas seguidas. É case como estar noutro mundo.

Vinte anos dan para moito, pero ¿que foi o máis positivo?
Miguel Doval: Para min foi o traballo compartido con tanta xente. Hoxe en día, cando me atopo con algúns dos antigos compoñentes da banda, lembro as moitas e boas experiencias vividas con eles. Ademais, sinto unha especie de orgullo co feito de que moitos deles sexan hoxe intérpretes de prestixio, aos que Airiños de Fene lles serviu de "rampa de lanzamento" e de referente no respecto debido ás nosas raíces musicais.

Algo no que sempre insistides, incluso ao escribir o voso nome, é en que sodes unha banda de gaitas "tradicional". ¿Por que esa insistencia na definición?
Miguel Doval: En primeiro lugar temos que explicar que a formación de banda non é algo tradicional dentro da nosa música, é unha formación actual que naceu un pouco como froito da necesidade de dar saída artística ao gran número de intérpretes cos que, afortunadamente, contamos hoxe en día en Galiza. A partir desa aclaración, e en contraposición a outro tipo de propostas enganosas, definímonos desde o comezo como banda tradicional porque empregamos os intrumentos tradicionais deste país.
Non precisamos imitar modelos estéticos alleos, nin incorporar instrumentos foráneos, para ofrecer unha proposta de calidade.

No que se refire ao número compoñentes da banda ¿que tal andan as cousas na actualidade?
Miguel Doval: As agrupacións como a nosa pasan todas por momentos moi bos e por outros máis complicados. Agora mesmo contamos cunha "canteira" de músicos máis que aceptable ao tempo que mantemos enganchados a algúns dos máis veteranos para que axuden a "tirar do carro".

Na Xuntanza de Gaiteiros que organizades anualmente hai unha persoa, grupo ou colectivo homenaxeado. Pero nesta XIX edición esa homenaxe é significativamente especial, ¿non?
Valentín García: Un pouco (risas). Ao cumprirse os vinte anos da posta en marcha de Airiños de Fene decidimos que os homenaxeados debían ser todos aqueles que forman ou formaron parte da banda ao longo de todo ese tempo. Por iso convidamos a todos os que, nalgún momento, participaron activamente e deron vida a esta agrupación. Todos eles son os homenaxeados.

Despois de que os responsables de Airiños de Fene nos falaran do pasado e do presente da banda, fixémoslle a mesma pregunta a tres dos grandes músicos convidados á XIX Xuntanza de Gaiteiros. Estas foron as súas respostas:

¿Como valorades a traxectoria musical de Airiños de Fene?


Xabier Díaz: Valorar unha historia tan extensa é bastante complicado, porque é moita a xente que ten participado nesa aventura. Penso que o mellor balance que se pode extraer é o do número de músicos que hoxe gozamos dunha certa "visibilidade", dentro do panorama musical galego, e que somos fillos desa entidade. É de xustiza recoñecerlle o traballo e o esforzo de todos estes anos.

Dani Bellón: Eu incorporeime á banda no ano 1995, con Miguel Doval como director, e síntome moi orgulloso de todo o que aí aprendín. Na miña etapa con Airiños de Fene coincidín cunha xeración de instrumentistas moi interesantes, cos que foi un pracer traballar. O que podo valorar como máis importante é a paixón pola tradición musical que a banda conseguíu transmitir lles sempre aos seus compoñentes.

Xesús Vaamonde: Levar vinte anos traballando e que a cousa siga a funcionar penso que é dabondo significativo. Ademais, o feito de continuar posicionándose claramente como
unha banda que emprega soamente instrumentos tradicionais paréceme moi correcto xa que, por desgraza, segue a ser necesario deixar as cousas claras e rexeitar as copias, sucedáneas e descaradas, de modelos que todos coñecemos e que non son os nosos.

www.elcorreogallego.es
Comentarios (0) - Categoría: Novas - Publicado o 11-10-2007 00:07
# Ligazón permanente a este artigo
Nova Programación do Liceum (O Porriño)
Comentarios (0) - Categoría: Novas - Publicado o 11-10-2007 00:07
# Ligazón permanente a este artigo
Vivamos como galegos
O video do que todos falan...





inda que non sexa moi orixinal...





Comentarios (0) - Categoría: Videos - Publicado o 11-10-2007 00:06
# Ligazón permanente a este artigo
Fin de curso da Clase de Zanfona da Escola de Artes e Oficios
Un video para a lembranza:

Clausura do curso 2006-2007 no Conservatorio Folc de Música Tradicional de Vigo (Escola de Artes e Oficios)




Vindeira mobilización pola continuidade do Conservatorio Folc de Música Tradicional Vigo (Escola de Artes e Oficios):

17 de outubro
(día de escomezo das clases para o resto de aulas da Escola de Artes e Oficios),
ás 20:00 diante do Marco (rúa Principe),
desta vez con instrumentos
Comentarios (2) - Categoría: Videos - Publicado o 10-10-2007 00:14
# Ligazón permanente a este artigo
II CONGRESO DE ENSINANTES DE MÚSICA TRADICIONAL GALEGA

A Asociación de Gaiteiros Galegos está xa a preparar o II CONGRESO DE ENSINANTES DE MÚSICA TRADICIONAL GALEGA, que terá lugar o 7, 8 e 9 de Decembro de 2007 en Santiago de Compostela.

O Auditorio de Galicia será o marco que acolla a congresistas, mestres, gaiteiros, artesáns ou simples afeccionados á música galega que teñan interés en profundizar na aprendizaxe dunha parte tan importante da nosa cultura.

Unha das formas de participar, ademais da presencial, é a través do envío de comunicacións. Toda persoa que queira expoñer algún tema relacionado co ensino da música tradicional poderá escribir unha comunicación e presentala no Congreso, despois da correspondente selección por parte do Comité Científico.

Para isto é necesario seguir unhas normas que podedes consultar a continuación. Esperamos contar coa vosa colaboración e que asistades a este importante evento relacionado co ensino e conservación do patrimonio cultural galego.

Normas para envio de comunicacións

ENVIO DE COMUNICACIÓNS

As normas para a presentación de comunicacións serán as seguintes:

-O prazo de presentación dos resumos das comunicacións será ata o 16 de Novembro de 2007. O contido deberá ser enviado co seguinte formato: letra “Times New Roman”, tamaño 12, interliñado sinxelo. O contido deberá incluirse nunha páxina como máximo (1 cara). Ademais deberán indicarse os datos persoais do autor/es que presentan a comunicación.

-Entre o 19 e o 23 de Novembro o Comité Científico seleccionará as comunicacións aceptadas para a súa presentación no Congreso.

-A duración das comunicacións non deberá ser superior a 10 minutos de exposición

-Os autores poderán redactar o traballo in extenso ata o 21 de Novembro, data límite para que todos os relatorios e comunicacións poidan ser incluidas na documentación oficial do Congreso.

-O envío das comunicacións deberá realizarse por correo electrónico a: secretaria@gaiteirosgalegos.com

-Tamén a través de correo ordinario a:

Asociación de Gaiteiros Galegos
Rúa Alfonso XIII, 7 – Of.8 36002 Pontevedra

Se tedes algunha dúbida podedes poñervos en contacto con nos no teléfono 986 847 074 (Roi ou Patri).

www.gaiteirosgalegos.com
Comentarios (0) - Categoría: Concursos e Xornadas - Publicado o 10-10-2007 00:14
# Ligazón permanente a este artigo
Marful, representante galego no Womex 2007
Comentarios (0) - Categoría: Novas - Publicado o 10-10-2007 00:13
# Ligazón permanente a este artigo
Roteiro en defensa da Ría de Vigo

Unha marcha a pé en catro etapas que percorrerá a nosa ría desde Cangas a Monteferro, organizada polos colectivos integrados na Plataforma A RÍA NON SE VENDE, do 11 ó 14 de outubro de 2007, como chamada de atención ante os graves problemas medioambientais que este espazo ten prantexados.

A constante construción de recheos, portos deportivos, peiraos e outras modificacións artificiais da costa, están producindo un grave dano ó delicado equilibrio ecolóxico da Ría, que significan a destrución do noso principal recurso natural, a riqueza marisqueira e pesqueira do Mar de Vigo, un patrimonio común que estamos poñendo en grave perigo. Isto supón, na práctica, a privatización da nosa costa ó arrebatar á cidadanía espazos de lecer e natureza que por lei lle pertencen.

As rías galegas, pese á súa pequena extensión, contan entre as zonas de máis alta produtividade primaria oceánica do mundo. A explotación desta característica por parte da flota de baixura, marisqueo artesanal e cultivos mariños (mexillón en bateas, granxas mariñas, etc.) xeran na ría de Vigo entre 7.000 e 10.000 empregos directos.

Día 11 MOAÑA – CANGAS: Saída da Estación Marítima de Moaña ás 17:00 horas. Percorreremos a costa ata chegar a Cangas e rematará no Salgueirón (Massó) arredor das 20:00. Será guiado e comentado por Cándido Martínez do colectivo Luita Verde. Como fin de etapa celebraremos, cunha pequena gran festa, os dous anos (recentemente compridos) da resistencia contra a urbanización e o porto deportivo de Massó.

Día 12 VILABOA – REDONDELA: Saída de Vilaboa (marquesina Mercamueble) ás 12:00 horas, visitando as antigas salinas e a marisma, para chegar a Arcade sobre as 14:00. Alí farase unha parada para xantar, partindo de novo ás 16:30 desde o porto de Arcade para chegar a Redondela a tardiña.

Día 13 REDONDELA – A GUÍA: Saída ás 11:00 horas desde debaixo da ponte de Rande. Tras pasar por Aucosa, Frioya e Pescanova chegaremos á ETEA, para seguir polo cortalumes usurpado polo porto deportivo ata chegar a Punta Lagoa sobre as 14:30. Comida festiva e de confraternidade organizada pol@s compañeir@s do Centro Social Caleidoskopio.

Día 14 BOUZAS – MONTEFERRO: Saída ás 10:00 horas desde a Praia do Adro, Bouzas, para chegar sobre as 13:45 á Praia das Canas en Nigrán. Alí seremos recibidos por grupos de gaiteiros, percusionistas, malabares e outras xentes de malvivir para subir tod@s xuntos, en gran rebumbio, ata Monteferro onde celebraremos o xantar anual de Salvemos Monteferro compartindo o que leve cada quen. Se o tempo é malo temos reservado o Pavillón de Deportes de Panxón para seguir a festa ata a tardiña.
Comentarios (0) - Categoría: Roteiros - Publicado o 10-10-2007 00:13
# Ligazón permanente a este artigo
Invitacións para a Homenaxe ao Gaiteiro 2007

Xa podedes recoller as vosas invitacions para a Homenaxe ao Gaiteiro, de luns a venres de 20:15 a 22:00 no Centro Cultural de Coruxo.

Este ano os homenaxeados son Manolo Viqueira e Marcelino e Pepe da Gaita de Sarandón, figuras senlleiras da nosa música tradicional que seguen transmitindo os seus coñecementos de xeración en xeración.

http://gaiteiro2007.blogspot.com/
Comentarios (0) - Categoría: Novas - Publicado o 09-10-2007 00:09
# Ligazón permanente a este artigo
Ricardo Portela, Gaiteiro!!
Actuación do maxestuoso gaiteiro D. Ricardo Portela ( Viascón 1.920 - Pontevedra 1.992 )acompañado por Miguel Souto (Bombo) e Alberto Costas (Tamboril).
Acto celebrado en homenaxe ó palleteiro e gaiteiro Hermenegildo Fernández en Pontevedra no ano 1991.
Material grabado por Maximino Souto e cedido por Miguel Souto.



Ensaio:



Comentarios (2) - Categoría: Videos - Publicado o 09-10-2007 00:09
# Ligazón permanente a este artigo
I Serán da Tempada na Sala Nasa (Compostela)
O mércores 10 ás 21,30 (2€) unha nova cita cos Seráns da NASA, coa participación das agrupacións A Gracia, Tataratá Trío, Xa Son Faif e Alvariza.

Coma sempre, un espazo para bailar e gozar da música tradicional nun contorno urbano e contemporáneo.
Comentarios (1) - Categoría: Seráns e Foliadas - Publicado o 09-10-2007 00:08
# Ligazón permanente a este artigo
A rocha con petróglifos máis grande de Galiza

Unha gran pedra con gravados rupestres coñecida como A Laxe do Barón, na parroquia de Forzáns, Ponte Caldelas, atrae a atención dos especialistas do grupo de investigación A Laxe dá Irena desde hai varios meses. Este petróglifo é unha rocha de superficie irregular, de granito de gran medio groso, que sufriu a acción de canteiros en dous dos seus lados, pero que ten o privilexio de ser, polo menos por agora, a roca con gravados prehistóricos máis grandes de Galiza. As dimensións da superficie visible desta roca -que non está descuberta do todo- son de vinte metros de eixo norte a sur e de quince metros deste a oeste. é dicir, a superficie gravada alcanza os 180 metros cadrados, superando ao gran petróglifo de Monte Tetón, en Tomiño.

O equipo de especialistas que estuda A Laxe do Barón está coordinado polo arqueólogo Antonio da Peña e o historiador Buenaventura Aparicio. Éstos contaron coa colaboración dos propietarios da leira.

Os gravados que conserva esta roca divídense en dous grupos principais. O primeiro correspóndese á fase máis antiga, databa a principios da Idade do Bronce. Nun comunicado, os portavoces da Laxe dá Irena explicaron que «está integrada por numerosas e variadas combinacións de círculos concéntricos e restos moi desgastados doutras borradas pola erosión, puntos, trazos indefinidos e unha curiosa rede de surcos anchos que percorre a metade nordeste da masa rochosa». Ademais, hai un mínimo de oito representacións de cuadrúpedos. Este detalle é importante porque xunto cos próximos xacementos de Aguasantas e Valongo, en Cotobade, «constitúen a máxima expansión cara ao interior dun tema iconográfico que na súa variedade clásica apenas se afasta da área de influencia das Rías Baixas», segundo os historiadores. A esta mesma fase débense atribuír un par de pequenas pegadas de pés humanos calzados, esculpidos na roca.

A segunda fase é máis recente. Esta serie de gravados probablemente daten de distintas épocas desde a Idade Media incluída. Entre os temas identificables áchanse deseños en Ou ou en ferradura, algún cadrado e numerosas e variadas cruces, ata algunhas cunha peana circular. Os arqueólogos resalta un «curioso motivo soliforme con cruz interna que, se consideramos a súa asociación ás cruces, é posible que puidese tratarse da imaxe dunha custodia».
Difícil interpretación

Pablo Novoa Álvarez foi o primeiro en chamar a atención sobre a importancia das figuras do petróglifo de Forzáns en 1994. Entre os motivos máis rechamantes, pola súa escasa frecuencia, refírese ás pegadas de pés. Marco V. García Quintela e Manuel Santos Estévez consideran que se trata de signos utilizados na investidura dos reis dos castros. Unha hipótese que non convence aos investigadores da Laxe dá Irena, quen a clasifican como «suxestivo», pero tan válida como outra calquera por exemplo rituais iniciáticos hoxe perdidos. Os especialistas deste grupo inciden nas rústicas escaleiras e a prominencia superior da roca como a posibilidade de que este xacemento formase un espazo ritual, no que arriba de todo hai unhas grandes cazoletas ou recipientes, «cuxa finalidade se nos escapa», segundo este grupo.

Os portavoces da Laxe dá Irena solicitaron a protección coordinada deste xacemento a Patrimonio, o Concello e os donos da leira.

www.lavozdegalicia.es
Comentarios (0) - Categoría: Novas - Publicado o 09-10-2007 00:08
# Ligazón permanente a este artigo
As covas do Rei Cintolo sálvanse do cemento
O Tribunal Superior de Xustiza de Galicia vén de anular o proxecto que o concello de Mondoñedo tiña presentado para potenciar a vertente turística das Covas do Rei Cintolo. Tratábase de crear unha aula xeolóxica na que se explicarían as particularidades do paso subterráneo, e de adaptar a entrada ás profundidades da terra ós visitantes menos aventureiros mediante a instalación de ramplas e iluminación.

O xuíz rematou así cun debate que viña durando 6 anos, que enfrontaba a partidarios da apertura como forma de revitalizar a economía do concello lugués mediante o turismo e os defensores dun proteccionismo que impida estragos irreparables neste paraxe natural.

Todo comezou co proxecto presentado polo ex alcalde mindoniense, o 'popular' Luis Rego no ano 2001. As cifras de visitantes que se manexaban daquela eran espectaculares, xa que pretendían chegar nada menos que ós 40.000 turistas ó ano.

A polémica chegou de seguida, coa oposición da Federación Galega de Espeleoloxía, que aseguraba que este proxecto prexudicaría gravemente a cavidade. En 2003, a Consellería de Medio Ambiente licitaba as obras da aula xeolóxica no exterior da cova, e dunha rampla de acceso con iluminación para o interior. A Federación respondeu cun recurso contencioso contra a Consellería que daquela dirixía José Manuel Barreiro.

Os espeleólogos denunciaban ademais que se ían realizar obras nun espazo no que se está a tramitar a declaración de Monumento Natural, e como tal, debería ser administrado pola Xunta e non por un concello.

As obras non se chegaron a iniciar.
O xuíz paralizou o proxecto ata que se chegase a unha resolución xudicial, que finalmente lle deu a razón ós argumentos dos espeleólogos. Dende o TSXG lembran que o pasaxe subterráneo está baixo a Ordenanza Reguladora de Solo non Urbanizable de Protección de Espazos Naturais, que só permite a "explotación racional" dos recursos mentres non se atente contra os valores que se protexen.

En palabras da asociación ecoloxista Amigos da Terra, isto supón que "se permite a explotación turística, pero non a construción de ningunha clase de edificación dentro da limitación do espazo".

Peche por orde do xuíz
O proceso xudicial trouxo consigo o peche preventivo das covas. Isto foi un duro golpe para os veciños, que viron descender un dos principais motores turísticos do concello. A corporación municipal non conseguiu chegar a un acordo para que a Federación retirase a súa denuncia.

Co cambio de goberno, as circunstancias tamén mudaron. O novo alcalde, o nacionalista Orlando González, manifestou a súa intención de non levar a cabo as obras de acondicionamento da entrada das covas, e xa contactou cos espeleólogos, co fin de retomar o diálogo para compaxinar a súa conservación cunha explotación turística respectuosa.

Restos arqueolóxicos e fauna única
Ademais das impactantes formacións de estalactitas e estalagmitas, pouco frecuentes en Galicia pola escaseza de pedra caliza baixo os montes galegos, o labirinto que forman as covas do Rei Cintolo posúe outros alicientes que a fan única.

Durante o verán de 2002, unha expedición arqueolóxica da Universidade de Santiago atopou restos da presencia humana, que poderían ter máis de 3.000 anos. Os achados son restos de ósos e cerámica, e tamén gravados nunha das galerías.

En canto á fauna, a cova acolle varias especies animais de interese para a ciencia. Non só alberga unha importante colonia de morcegos, senón o fondo dos lagos acolle a un crustáceo moi pouco frecuente, o Iberobathynella ortizi.

www.xeracion.com
Comentarios (0) - Categoría: Novas - Publicado o 09-10-2007 00:08
# Ligazón permanente a este artigo
O ENSINO FOLK NO ARAME
Os dous conservatorios de música tradicional do País inician o curso con cadansúa crise

Non arrinca ben o curso 2007/2008 para os dous únicos conservatorios galegos de música tradicional. En Lalín o Conservatorio Folque está coa matrícula suspendida e non ten clara a súa continuidade. Pola súa banda, en Vigo problemas coa contratación do profesorado están a atrasar o comezo das clases no Conservatorio de Música Tradicional. A aprendizaxe folk está agora mesmo na corda frouxa.

Os problemas no Conservatorio Folque de Lalín comezaron xa este mes de xullo. Foi daquela cando o rexedor local, Xosé Crespo, do Partido Popular, reclamaba publicamente axuda á Consellaría de Cultura, en mans do BNG, para manter o centro que abrira en 2000 como unha iniciativa municipal. Crespo xa fixera esta mesma reclamación en febreiro do pasado ano, pedíndolle ao departamento autonómico que achegase 18.000 euros anuais, o que suporía a metade do custo do profesorado. En total, o concello inviste cada ano 66.000 euros en manter esta oferta, e segundo asegura o alcalde “resúltanos cada vez máis complicado manter o centro”. No mes de agosto, a situación complicábase cando, “por cuestións burocráticas co concello”, e máis concretamente por vacacións que impediron “realizar as reunións pertinentes para estruturar o próximo ano académico do centro”, aprazábase o prazo de matriculación. A suspensión continuou ao longo de setembro, e o día 29 deste mes o grupo municipal do BNG de Lalín alertou sobre o perigo de que o concello perda este equipamento. Segundo manifestou o portavoz desta formación, Francisco Vilariño, existe a posibilidade de que o centro se traslade a outro concello, e denunciou “o total escurantismo” nas negociacións que se desenvolven arredor deste tema e a responsabilidade do alcalde na situación do conservatorio.

Cuestións profesionais

Fóra dos cruces de acusacións políticas, desde o Conservatorio explicaban este primeiro de outubro que “o equipo docente segue en reunións con Padroado Cultural de Lalín por temas relacionados co orzamento do centro”. Para alén da problemática sobre a participación da Consellaría no conservatorio, Ugia Pedreira, directora do centro, denunciaba nun comunicado que se publicou o primeiro de outubro que “desde o ano 2000 non se ten variado este orzamento”, e que foi o traballo desenvolvido a maiores polo equipo docente e máis pola Asociación do Conservatorio Folque o que permitiu que o centro fose crecendo. Propostas coma o Ciclo Trad e a Aula Folque Infantil de Pontevedra, a organización do circuíto 4x4 ou outras actividades repercutiron “nunha mellora laboral do equipo docente e en múltiples posibilidades para o alumnado que ten desexo de profesionalizarse no sector”. A maiores, Asociación do Conservatorio de Música Tradicional e Folque propón neste texto “un novo proxecto de centro onde haxa salarios dignos, onde se poidan introducir máis materias no proxecto curricular, onde o centro sexa entendido como único, exclusivo sen comparación con outro, onde o centro sexa integrado na comarca a nivel de programación cultural”. Unha iniciativa que, salientan, “está aberta para Lalín e outros concellos interesados de Galicia”. A cuestión mantense, polo momento, aberta e cunha tensa agarda que fai presaxiar novas. Ante a complexidade das negociacións polo momento abertas, os representantes do centro declinaron comentar a situación, e emprazaron os medios para os vindeiros días.

Inestabilidade en Vigo

Nun grado aínda maior, en Vigo a problemática laboral dos profesores aparece como unha cuestión fundamental no atraso no comezo das aulas, que foi adiado ata novembro. Nesta cidade, o conservatorio naceu en 1996 e depende da Escola de Artes e Oficios (antiga Universidade Popular). O centro deu pé ao desenvolvemento de iniciativas tan destacadas coma a Fundación Son de Seu e a súa orquestra, así como a unha destacada nómina de artistas. Desde o concello explicaron que este atraso ten como causa fundamental o proceso de contratación que busca legalizar a situación dos docentes, que ata o de agora contaban con contratos anuais. A concelleira de Educación, Laura López Atrio, asegurou que non se prevé suprimir ningún curso e que mesmo están a barallar unha ampliación da oferta formativa. Malia a isto, o pasado un de outubro desenvolveuse unha primeira concentración de usuarios que temen pola viabilidade do centro. Neste encontro, no que participaron representantes de Educación, explicouse que o problema é que actual normativa non permite manter o sistema de contratación temporal de docentes, unha situación que a corporación asegura que é herdada do anterior goberno. Desde o concello explicaron xa que contan cunha alternativa para legalizar o profesorado que non chegaron a concretar, pero desde os usuarios convocaron xa unha nova xuntanza para o vindeiro día 17 co lema “Por unha escola con futuro”. A pesar de todos estes contratempos, e no medio a incerteza reinante, desde o un de outubro a preinscrición para os cursos de música tradicional da Escola de Artes e Oficios mantense aberta.

A situación deu aínda unha reviravolta onte, tres de outubro, cando o propio alcalde, Abel Caballero terzou no tema e recoñeceu que o concello non está en situación de garantir a continuidade do equipo docente. A maiores, sinalou que se están a barallar varios nomes para ocupar a dirección da escola de Artes e Oficios e, polo tanto, do ensino de música tradicional na cidade. Na actualidade este posto atópase vacante. É de supor que unha mudanza nos ensinantes daría en novos atrasos e en que se intensifiquen as propostas. Nin o Concello nin o coordinador dos cursos do conservatorio, Rodrigo Romaní, comentaron nada sobre a situación e a súa posible evolución. A expectación, mentres, increméntase segundo van pasando os días sen que se resolvan estes problemas.

www.culturagalega.org
Comentarios (4) - Categoría: Novas - Publicado o 04-10-2007 10:56
# Ligazón permanente a este artigo
Novas do Conservatorio Folc de Vigo
Os responsables municipais non saben aínda como afrontar a difícil situación que atravesan preto da metade do persoal do claustro da Universidade Popular.

«Están a ver os servizos xurídicos da Concellaría de Educación que modalidades hai de contrato e como facemos para que esta xente continúe o seu traballo normal na docencia», explicou onte o alcalde. Con todo, advertiu que non está en condicións de garantir a súa continuidade, a pesar de que persoalmente lle gustaría.

Director
Sobre o nomeamento dun director para o centro, Caballero asegurou que se designará a unha persoa e que nestes momentos barállanse varios nomes.

A idea é que o elixido permaneza varios anos á fronte da Escola de Artes e Oficios, por iso é polo que se estude de forma detallada. Na actualidade a Universidade Popular pasa por un período de transición tras o cesamento o pasado luns do director Jacinto Martín. Nestes momentos, e mentres non se cobre o cargo, a supervisión corre a cargo do novo xefe do servizo municipal de Educación, Rafael Ojea.

Boa parte dos 23 profesores que integran o persoal da Escola enfróntanse ao cambio por lei no modelo de contratación.

Fórmulas
O feito de que se eliminasen os contratos por obra e servizo o pasado mes de marzo obriga agora ao Concello a buscar outras fórmulas para garantir a súa continuidade.
Entre tanto, o inicio das clases de atrasou para o día 17 e descoñécese se nesa data xa poderán impartir as súas materias os afectados.
A situación causou certo malestar no centro pola falta de previsión.

Entre os ensinos implicados figuran encadernación, música moderna, palillos, pintura, zanfona, gaita, violín folk e canto popular.
Outro dos motivos do malestar é a falta de director, ao non ser esta a primeira vez que a Escola se enfrenta a esta situación.

www.lavozdegalicia.es
Comentarios (3) - Categoría: Novas - Publicado o 04-10-2007 10:07
# Ligazón permanente a este artigo
IV Encontro/Alcuentru de Pandeireta Galega e Asturiana!!!

Imos a polo cuarto!!!

Desta vez toca na Galiza, e escollemos como emprazamento a mesmísima montaña dos Ancares lugueses. Será o sábado 24 de Novembro no Albergue Campa da Braña, no Concello de Cervantes.

A dinámica será semellante á das outras tres edicións: cea-confraternización, concerto dun grupo de pandereteiras galegas e outro de "pandereteres asturianes". Logo, foliada (tamén de confraternización ;-D) ata altas horas da madrugada, e durmida opcional no propio albergue.

Está confirmada a participación de Polavila, alumnas de Juanjo Fernández e auténticas herdeiras da tradición de pandeira ancaresa.

Restan por confirmar os últimos detalles, pero garantimos uns prezos (incluíndo só cea, ou cea, durmida e almorzo) moi "populares".

O dito, reservade o 24 de Novembro nas vosas axendas, foliadeiros e foliadeiras do mundo!!!

Convoca: Xuntanza Galego-Astur "Transeu".
xuntanza_transeu@hotmail.com

(Resume N'ast).

Vamos a pol cuartu!!

Guardai el sábadu 24 de Payares pal IV Alcuentru/Encontro de Pandereta Gallega ya Asturiana.

Sedrá na montaña ancaresa, nel Albergue Campa da Braña de Cervantes (Lugo).

Ta confirmada la participación del grupu Filandón, herederes del bon tocar de la pandeira ancaresa.

Los precios sedrán populares, y incluyen cena-confraternización, ablugu nel propiu albergue y almuerzu pela mañana.

Contamos con vós!!

Entama: Xuntanza Galego-Astur "Transeu".
xuntanza_transeu@hotmail.com

Comentarios (2) - Categoría: Novas - Publicado o 04-10-2007 10:07
# Ligazón permanente a este artigo
Cambio de hora de Lume na Palleira

Atención ás horas e cambio de canle

O programa da RADIO GALEGA Lume na Palleira especializado en música Folc e Tradicional ven de ampliar a súa oferta e de mudar a RADIO GALEGA MÚSICA, ainda que segue emitindo tamén na RADIO GALEGA.

O seu director e presentador segue a ser Emilio Españadero Paz.

Os seus horarios serán:
Os sábados de 16:00 a 18:00 na RADIO GALEGA MÚSICA con emisión conxunta de 16:05 a 17:00 na RADIO GALEGA
Os domingos de 15:00 a 16:00 na RADIO GALEGA MÚSICA.

As frecuencias de escoita da RADIO GALEGA MÚSICA son:

SANTIAGO 104.2
FERROL 106.3
A CORUÑA 92.1
A COVA (centro.prov.Lugo) 96.6
OURENSE 95.6
LUGO (Capital) 106.2
PONTEVEDRA 101.4
XIABRE 88.0
VIGO (Domaio) 90.8
Comentarios (0) - Categoría: Novas - Publicado o 04-10-2007 10:07
# Ligazón permanente a este artigo
Sobre o novo disco de Luar na Lubre

O grupo Luar na Lubre, un dos máis importantes da música folk en Galicia, e posiblemente de España, regresa á Costa da Morte no seu último traballo, o décimo da súa discografía, titulado Camiños dá Fin dá Terra, e que se publicará a finais de mes. Aínda que, máis que regresar, a agrupación en realidade nunca se foi da comarca.

Nos seus 21 anos de traxectoria, a Costa da Morte é a comarca galega que máis aparece, e con diferenza, nas súas composicións, xa sexa nos títulos, as portadas, as letras ou as fotos interiores. Ao mesmo tempo, non existe ningún artista, local ou galego, que se ocupara tanto desta zona na súa música.

É un exemplo máis, o último, nesta filosofía. Empezando polo propio concepto do fin da terra. Seguindo pola portada, unha ampla panorámica de Cabo Vilán tomada desde a zona de Trece. Arroibada. O da cor non foi casualidade. Explica o líder de Luar na Lubre, Bieito Romero, que esta cor é a única que faltaba nos seus discos. Xa non, agora combinado co negro do contraluz de Vilán e Vilán de Fóra. E do Bufardo, ademais do branco a medias dunha rosa dos ventos. A referencia non se queda só no visual e o exterior. Dentro, sonoros, aparecen dous temas sobre a comarca. Un é Meighallo, baseado na a tradicional Foliada de Malpica. O outro, A Barca de Pedra, tomado do Alalá de Muxía.

Tempo atrás, a finais dos oitenta, o primeiro disco do grupo, O Son do Ar , ilustrouse cun druída no dolmen de Dombate, e varias imaxes do libreto interior estaban tomadas en Verdes. Iso ocorreu no vinilo, porque no cedé a compañía decidiu cambiar a imaxe por unha máis críptica.

No seguinte traballo, Beira Atlántica, do ano 90, a foto de portada do Cabo Roncudo, en Corme, e contiña nada menos que catro temas sobre a Costa da Morte: Carballesa , M uiñeira de Cabana , Danza de Santa María de Torás e Muiñeira de Mazaricos .

Ara Solis, de 1993 (dedicado a Fisterra) contiña a Muiñeira de Malpica , localidade á que estivo moi vinculado Urbano Lugrís, a quen dedicaron o seu seguinte disco, Plenilunio , que contiña fotos desde Monte Branco.

O Cabo do Mundo (1999) é unha nova volta ás súas coordenadas xeográficas, e o recompilatorio XV Aniversario , do 2001, achega un tema novo, unha versión impactante de Camariñas , á voz de Rosa Cedrón.

Espiral, aparecido no 2002, contén o tema Costa da Morte. é das escasas cancións que alguén dedicou a esta zona e con ese nome, aínda que o último dobre de Mago de Oz (un directo editado pola ex compañía do grupo) tamén se denominou así.

En Hai un paraíso, que saíu á luz hai tres anos, Corme (de novo, aínda que agora en forma de música) é un dos fragmentos protagonistas do disco, cunha historia inspirada no Prestige .

En Saudade, explicitamente, non parece haber nada na mesma liña. E os Camiños dá Fin dá Terra recobran o espírito comarcal. A Barca dá Pedra narra a chegada da Virxe a Muxía.

Pero son moitos os temas que valen para calquera lugar de Galicia, como Centeas , que é unha homenaxe ás mulleres de consérvaa, ás redeiras. Na presentación do disco, a compañía asegura que este último traballo é unha procura, e un repaso, da identidade galega e celta. Unha última conexión: a súa web (www.luarnalubre.com) está realizada por unha empresa carballesa, Abertal.

Bieito Romero explicaba onte que é un namorado da Costa da Morte, e que a coñece moi ben, xa desde os tempos en que foi profesor en Malpica ou Zas. Tamén actuou en case todos os concellos, nalgúns varias veces. Facendo un repaso mental, onte pensaba que só lle falta Dumbría, onde estaría encantado de ir. E ao resto, de volver, para presentar Camiños dá Fin dá Terra.
Comentarios (0) - Categoría: Discos - Publicado o 04-10-2007 10:07
# Ligazón permanente a este artigo
Aula de Zanfona en Lugo
A Asociación de Gaiteiros Galegos pon en marcha, un ano máis, a AULA DE ZANFONA na cidade de Lugo. Esta actividade vaise a levar a cabo dende o vindeiro 25 de outubro de 2007 ata Xuño de 2008, todos os xoves de cada mes, no Complexo Residencial Xuvenil LUG, dependente da Delegación Provincial de Lugo da Vicepresidencia da Igualdade e Benestar da Xunta de Galicia.

Luis Correa “O Caruncho”, unha das referencias fundamentais na música tradicional galega, será o mestre encargado de impartir as clases coas que se pretende reivindicar este instrumento tradicional galego, que presenta unhas características culturais, sonoras, técnicas e temáticas que fan moi interesante o seu coñecemento.

A matrícula formalizarase o mesmo día do comezo do curso, ainda que deberá realizarse unha reserva de praza antes do 25 de outubro, a través do correo electrónico:

secretaria@gaiteirosgalegos.com
ou ben no teléfono 986 847 074 (Roi ou Patri).


www.gaiteirosgalegos.com



Comentarios (0) - Categoría: Cursos - Publicado o 04-10-2007 10:07
# Ligazón permanente a este artigo
© by Abertal
free web counter

contador de malmequeriáns dende o 1 de marzo 2007








Galiza

Malmequer