Literalingua


Caderno de Lingua e Literatura Galega para as alumnas e alumnos de Bacharelato do IES Breamo
 SECCIÓNS
 FOTOBLOGOTECA
 RECOMENDADOS
 BUSCA NESTE BLOG

Durmo. Eva Veiga
Durmo
atada
a
un
fío
que
vai
dar
a un mar escuro onde afondan estrelas de ollos abisais
que me miran dende min mesma e tan lonxe
enleada pero comprendo porque amo ata
queimarme a lingua estas palabras tan estrañas
e súbito esperto a pedir auxilio na ribeira
do corpo e só me acode a mudez da voz
como a sede da auga por ser auga.



Eva Veiga, 2006, Desconcerto, A Coruña: Biblos


Comentarios (0) - Categoría: 071. Poesía dos 90 - Publicado o 23-04-2012 16:13
# Ligazón permanente a este artigo
A lúa aínda latexaba. Eva Veiga
A lúa aínda latexaba
cando entrou polo balcón.



Eva Veiga, 2006, Desconcerto, A Coruña: Biblos






Comentarios (0) - Categoría: 071. Poesía dos 90 - Publicado o 23-04-2012 16:12
# Ligazón permanente a este artigo
Unha e outra vez o paxaro. Eva Veiga
Unha e outra vez o paxaro porfiaba contra o cristal coas ás
abertas mentres os seus pés se contraían no baldeiro
intento por aferrarse á impenetrable e esquiva
transparencia. No seu baterse aquel corpo semellaba o
desconcertado latexo dun arrebatado corazón e as súas
contorsións evocaban as dun peixe nas redes do desespero.



Eva Veiga, 2006, Desconcerto, A Coruña: Biblos


Comentarios (0) - Categoría: 071. Poesía dos 90 - Publicado o 23-04-2012 16:12
# Ligazón permanente a este artigo
58. Eva Veiga
Na lagoa azul do meu reino
vértome de lonxes e de flor.
Ábrenseme de noite todas as
portas que penetran os astros
a buscar ávidos de sentido
algo tan de min que descoñezo.
De cando en vez despréndense
as augas do soño e confúndense
os tempos na súa absoluta transparencia.



Eva Veiga, 2006, A luz e as súas cicatrices, Ferrol: Esquío


Comentarios (0) - Categoría: 071. Poesía dos 90 - Publicado o 23-04-2012 15:56
# Ligazón permanente a este artigo
57. Eva Veiga
Altos na crista da onda que se apaga
enriba doutras ondas que tamén nos
precederon en abismos e corazón.

Un movemento ou vibración do tempo
que irrompe e rómpese e, se cadra,
xa se erixe en acordes intocables.

Escoitar o propio sangue, o segredo de todas as buguinas.



Eva Veiga, 2006, A luz e as súas cicatrices, Ferrol: Esquío


Comentarios (0) - Categoría: 071. Poesía dos 90 - Publicado o 23-04-2012 15:56
# Ligazón permanente a este artigo
44. Eva Veiga
Chegar así
No bico da luz
Dende tan lonxe
A unha horta exactamente como esta
E abrollar na flor do limón



Eva Veiga, 2006, A luz e as súas cicatrices, Ferrol: Esquío


Comentarios (0) - Categoría: 071. Poesía dos 90 - Publicado o 23-04-2012 15:54
# Ligazón permanente a este artigo
43. Eva Veiga
De súpeto, abro as mans e escoito a música
da tarde que se pousa como un paxaro,
entregada coma area finísima
na que se desfai o primeiro estourido
das galaxias. Tan lonxe e tan cerca estamos
de todo canto flúe eternamente.
Ave sonora vai deixando un ronsel
de silencio nos dedos asombrados.
Inatinxible gozo da ebriedade.
Toco a morte, pero xa fun coa vida.



Eva Veiga, 2006, A luz e as súas cicatrices, Ferrol: Esquío


Comentarios (0) - Categoría: 071. Poesía dos 90 - Publicado o 23-04-2012 15:53
# Ligazón permanente a este artigo
40. Eva Veiga
Vai frío e saímos ao monte
buscar leña e tamén traemos
piñas coas que prender o lume.
Sobre a lareira dispoñemos
as achas e as chamas inician
con vehemencia a combustión
da periferia ata que o lume
se instala na cerna do bosque
e reina coma un deus inapelable
a quen se lle rende o sacrificio das horas.
Pola cheminea medra unha flor de fume
que esfolla o vento.



Eva Veiga, 2006, A luz e as súas cicatrices, Ferrol: Esquío


Comentarios (0) - Categoría: 071. Poesía dos 90 - Publicado o 23-04-2012 15:52
# Ligazón permanente a este artigo
25. Eva Veiga
Eu non estiven
a carón do sabugueiro.
Eu fun a donda e perfumada
compracencia do aire.



Eva Veiga, 2006, A luz e as súas cicatrices, Ferrol: Esquío




Comentarios (0) - Categoría: 071. Poesía dos 90 - Publicado o 23-04-2012 15:51
# Ligazón permanente a este artigo
13. Eva Veiga
Houbo unha primeira primavera do mundo.
Está no meu sangue.


Eva Veiga, 2006, A luz e as súas cicatrices, Ferrol: Esquío


Comentarios (0) - Categoría: 071. Poesía dos 90 - Publicado o 23-04-2012 15:50
# Ligazón permanente a este artigo
© by Abertal

Warning: Unknown: Your script possibly relies on a session side-effect which existed until PHP 4.2.3. Please be advised that the session extension does not consider global variables as a source of data, unless register_globals is enabled. You can disable this functionality and this warning by setting session.bug_compat_42 or session.bug_compat_warn to off, respectively in Unknown on line 0