literactúa


Agustín Fernández Paz
O autor do libro proposto por Literactúa para xuño de 2008, O único que queda é o amor

Agustín Fernández Paz (Vilalba, 1947). Autor dunha longa obra narrativa en lingua galega, na súa maior parte traducida a todas as linguas ibéricas, o seu labor creativo céntrase no eido da narrativa infantil e xuvenil.

Publicou as seguintes obras dirixidas a público xuvenil: Rapazas (Xerais 1993, 2003), contos; Trece anos de Branca (1994), novela, Premio EDEBÉ de literatura Xuvenil 1994; Cartas de inverno (Xerais 1995), novela, Premio Rañolas ao mellor libro xuvenil de 1995; Amor dos quince anos, Marilyn (Xerais 1995, 2001), contos; O centro do labirinto (Xerais 1997), novela; Aire negro (Xerais 2000), novela, Lista de Honra do IBBY 2002 e Premio Protagonista Jove 2001; Noite de voraces sombras (Xerais 2002), novela; Tres pasos polo misterio (Xerais 2004), relatos, Corredores de sombra (Xerais 2006), novela e O único que queda é o amor (Xerais 2007), relatos.

Conversa co autor

Agustín Fernández Paz falará cos lectores e lectoras de O único que queda é o amor o mércores 18 de xuño a partir das 21.00 h no Pub Silfo de Carballo.

Agustín Fernández Paz pola rede

Literactúa! Comentarios (6) - Categoría: AUTORES/AS - Publicado o 11-06-2008 18:44
# Ligazón permanente a este artigo
Xurxo Souto
O autor do libro proposto por Literactúa para abril de 2008, Tres trebóns

Xurxo Souto (Lugo, 1966). Licenciado en Filoloxía Clásica. Traballa desde 1986 en diferentes medios de comunicación. Como narrador ten publicado: A tralla e a arroutada (1995), relatos; Fumareu (1997), relatos; O retorno dos homes mariños (1999), novela; Contos da Coruña (2001), escolma de artigos sobre a súa cidade e Tres trebóns (2005), relatos.

Foi vocalista do conxunto bravú Os Diplomáticos de Monte-Alto e agora toca o acordeón no grupo que leva o mesmo nome que o seu último libro, Tres trebóns.

Na actualidade é xefe de programas da Radio Galega e presentador do programa musical Aberto por reformas.


Conversa co autor

Xurxo Souto falará cos lectores e lectoras de Tres trebóns o mércores 30 de abril a partir das 21.00 h no Bodegón O'Pescador de Carballo.

Xurxo Souto pola rede
Literactúa! Comentarios (11) - Categoría: AUTORES/AS - Publicado o 28-04-2008 15:29
# Ligazón permanente a este artigo
Antón Riveiro Coello


...o autor do libro proposto por Literactúa para marzo de 2008, Os ollos de K


Naceu en Xinzo da Limia en 1964, estudou Dereito e actualmente traballa na administración pública.

Ademais dun gran número de relatos en libros colectivos e revistas literarias ten publicadas as novelas Valquiria (1993, premio Camilo José Cela), A historia de Chicho Antela (1997), A quinta de Saler (1999), Animalia (2000) coa que obtivo o premio Café Dublín 1999, As rulas de Bakunin, que recibiu o premio García Barros en 2000 e Homónima Premio Álvaro Cunqueiro de Narrativa 2000.

En 2007 publica A voz do lago, novela coa que se adentra na creación literaria para os/as lectores/as máis novos/as e Os ollos de K, novela sobre a que nos falará en Literactúa.


Conversa co autor

Antón Riveiro Coello conversará cos lectores e coas lectoras de Os ollos de K o mércores 26 de marzo de 2008 ás 20.30 h na Taberna-Café O’Patacón de Carballo.


Antón Riveiro Coello pola rede
Literactúa! Comentarios (3) - Categoría: AUTORES/AS - Publicado o 13-03-2008 17:12
# Ligazón permanente a este artigo
Iolanda Zúñiga

...a autora do libro proposto por Literactúa para febreiro de 2008, Vidas post-it

Iolanda Zúñiga (Vigo, 1975) foi mudando de pel: exerceu de boa, de mala, de actriz, vendeu libros, discos, mentiras, serviu mesas, tivo medo, fotografou amigos, pretendeu a música, colleu tres avións e o bus urbano, conduciu por estradas comarcais até vidas post-it redactado nos entreactos da cordura. Vidas pos-it (Xerais 2007) é o seu debut como narradora.


Conversa coa autora

Iolanda Zúñiga conversará cos lectores e coas lectoras de Vidas post-it o mércores 27 de febreiro de 2008 ás 20.30 h no Pub A Reserva de Carballo.


Iolanda Zúñiga pola rede

Literactúa! Comentarios (9) - Categoría: AUTORES/AS - Publicado o 12-02-2008 13:01
# Ligazón permanente a este artigo
Anxos Sumai

...a autora do libro proposto por Literactúa para xaneiro de 2008, Así nacen as baleas

Anxos Sumai (Catoira, 1962) é documentalista, tradutora e escritora.

Desde 2001 desenvolve unha intensa actividade literaria no portal Culturagalega.org, onde tivo as seccións «Anxos e diaños», con Roberto Ribao, «Anxos da garda» e «Crítica da memoria pura». Entre os traballos de tradución destacan os Diarios de Syra Alonso.

Como narradora publicou Anxos da garda (A Nosa Terra, 2003. Premio da Crítica de Galicia 2004) e Melodía de días usados (Galaxia, 2005). Obtivo o Premio Novos Valores da Narrativa Galega en 1985. En 2007 gañou o Premio de Xornalismo Literario e de Opinión Roberto Blanco Torres polo seu espazo de opinión «Somos perigosamente normais», emitido semanalmente no Diario Cultural da Radio Galega durante o 2006. Actualmente traballa no Consello da Cultura Galega.

En 2007 recibiu o II Premio de Narrativa Breve Repsol YPF pola obra Así nacen as baleas, publicada por Editorial Galaxia.


Conversa coa autora

Anxos Sumai conversará cos lectores e coas lectoras de Así nacen as baleas o mércores 30 de xaneiro de 2008 ás 20.30 h no Café Valle Inclán de Carballo.


Anxos Sumai pola rede




Literactúa! Comentarios (3) - Categoría: AUTORES/AS - Publicado o 10-01-2008 13:35
# Ligazón permanente a este artigo
Carlos G. Meixide

...o autor do libro proposto por Literactúa para outubro de 2007, O home inédito.

Carlos G. Meixide é coruñés, aínda que naceu en Vilagarcía de Arousa en 1977. É xornalista, aínda que está envolto en proxectos de diverso tipo como guionista, actor (Un mundo de historias; O meu nome, o meu mundo; Cascallos; ou Selección Galega, setenta anos despois), humorista (forma parte, xunto con Tomás Lijó, do dúo Os da ría), etc. Destaca ademais por recitar o nome dos 314 concellos galegos por orde alfabética e está a aprender tamén por orde alfabética os números do 1 ao 100.

Como autor publicou un libro infantil, A Miragaia (Sotelo Blanco, 2004), a historia duns rapaces que viven nunha aldeíña á beira do mar. Os seus xogos, a solidariedade cun rapaz e a súa familia, a amizade cun vello que dicían que era malhumorado e a aprendizaxe poética.

O home inédito converteuse no primeiro libro en galego en publicarse en internet para descargar de balde en .pdf, no primeiro con licenza Creative Commons e o primeiro en publicar Ediciós da Rotonda.

Aquí está o autor promocionando o seu libro:



Conversa co autor:

Carlos G. Meixide conversará cos lectores e lectoras de O home inédito o martes 30 de outubro, ás 21.00 h, no Café Colón de Carballo.


Carlos G. Meixide pola rede:
Literactúa! Comentarios (103) - Categoría: AUTORES/AS - Publicado o 11-10-2007 10:30
# Ligazón permanente a este artigo
Séchu Sende

...o autor do libro proposto por Literactúa para setembro de 2007, Made in Galiza.

Séchu Sende (Padrón 1972) é activista social e cultural, dinamizador sociolingüístico, profesor de lingua e literatura galegas e autor de obras como Orixe (Premio Blanco Amor 2003) ou a de poemas Odiseas, e participante activo en diversos colectivos sociais, como Arredemo, Burla Negra, Area Negra, AS-PG, Nunca Máis, SOS Caurel etc.
Tamén foi cofundador da Cooperativa Tagen Ata de lingua e comunicación e do proxecto editorial Letras de Cal.
Está licenciado en Filoloxía Galego-portuguesa e exerce a súa actividade profesional no IES Marco de Camballón, de Vila de Cruces.

O seu artigo "Guía sexual da sociolingüística" foi galardoado co segundo premio no III Premio a artigos xornalísticos normalizadores Concello de Carballo 2007.

O seu último libro é Made in Galiza (Editorial Galaxia, 2007) e, a raíz del, mantén o blog www.blogoteca.com/madeingaliza



Conversa co autor:

Séchu Sende conversará cos lectores e lectoras de Made in Galiza o mércores 26 de setembro, ás 20.30 h, na Taberna-Café O'Patacón (na Rúa de Ourense, en Carballo).


Séchu Sende pola rede:
Literactúa! Comentarios (2) - Categoría: AUTORES/AS - Publicado o 09-09-2007 14:34
# Ligazón permanente a este artigo
María Reimóndez
María Reimóndez. Foto de Paco Vilabarros
...a autora do libro proposto por Literactúa para xuño de 2007, O club da calceta.

María Reimóndez Meilán naceu en Lugo en 1975 e é tradutora e intéprete de profesión e feminista por convicción. O seu primeiro libro publicado é Moda Galega (Positivas, 2002) e no ano 2003 recibiu o premio de novela Mulleres Progresistas de Vigo con O Caderno de Bitácora (Positivas 2004). En 2005 foi finalista do Premio Merlín coa súa novela xuvenil Usha e finalista do Premio Xerais con O club da calceta, que xa vai pola súa 2.º edición. Tamén colaborou con O son das buguinas, un libro e DVD solidarios promovidos por Implicadas/os no Desenvolvemento.

Leva escribindo desde que tiña 6 anos, recibiu premios durante a súa mocidade (Rúa Nova, Minerva), é autora de varias obras de teatro e participou en múltiples recitais poéticos. Tamén colaborou con artigos de opinión en A Nosa Terra e en Vieiros. Forma parte do grupo de investigación Feminario de Investigación: Feminismos e Resistencias (Teorías e Prácticas) da Universidade de Vigo.

María Reimóndez leva traballando en cooperación desde o ano 1994, cando realiza a súa primeira visita a un proxecto de desenvolvemento na India. Despois de novas visitas, principalmente de formación e participación en diversos proxectos, todos na India, funda Implicad@s no Desenvolvemento, que leva traballando na India desde o ano 1998 e desde 2003 en Etiopía en proxectos de desenvolvemento integral cun claro compromiso pola superación da discriminación de xénero como base do desenvolvemento perdurábel. É experta en enfoque de xénero na planificación e avaliación de proxectos de diversa índole, sobre todo de desenvolvemento integral tanto en zonas urbanas como rurais.

María Reimóndez é tamén fundadora da Asociación Galega de Profesionais da Tradución e da Interpretación (AGPTI).


Conversa coa autora:

María Reimóndez conversará cos lectores e lectoras de O club da calceta o mércores 27 de xuño, ás 20.30 h, no CAFÉ VALLE INCLÁN (Rúa de Valle Inclán 32).
A autora será presentada por Fina Bastón, da Marcha Mundial das Mulleres.

María Reimóndez pola rede:

> Ficha en Xerais.
> O blog de Implicad@s no Desenvolvemento.
> Ficha na Biblioteca Virtual Galega.
> Ficha en Lg3 de Culturagalega.org.
> En +Internet, +Galego, + Futuro.
> María Reimóndez estivo no noso club de lectura, no blog da Biblioteca do IES Auga da Laxe de Gondomar.
> A escritora María Reimóndez actúa coa súa ONG en India e Etiopía, reportaxe en El País.
> GENTE QUE CAMBIA EL MUNDO: Con mujeres de India y Etiopía, reportaxe en La Voz de Galicia.
> Os seus artigos en Vieiros.
> Os favoritos de... María Reimóndez. En Culturagalega.org.
Literactúa! Comentarios (8) - Categoría: AUTORES/AS - Publicado o 08-06-2007 12:32
# Ligazón permanente a este artigo
Suso de Toro
...o autor do libro proposto por Literactúa para maio de 2007, Home sen nome.


Naceu en Santiago de Compostela en 1956. Está licenciado en Arte Moderna e Contemporánea. É Premio Nacional de Narrativa 2003.

Como narrador publicou: Caixón desastre (1983, 1991), relatos, Premio Galicia da Universidade de Santiago; Polaroid (1986), relatos, Premio da Crítica Galicia; Land Rover (1988), novela; Ambulancia (1990), novela; Tic-Tac (1993, 2003), novela, Premio da Crítica Española 1994; A sombra cazadora (1994), novela; Conta saldada (1996), novela; Calzados Lola (1997), Premio Blanco Amor 1997; Círculo (1998), relatos; Non volvas (2000), novela, Premio da Crítica Española; Trece badaladas (2002), novela, que foi adaptada libremente ao cine por Xavier Villaverde co título homónimo (2003) e Premio Nacional de Narrativa 2003; Morgún (2003), novela e Home sen nome (2006), novela.

Escribiu os libros de xornalismo e ensaio: F.M. (1991), Unha memoria da esquerda nacionalista (Camilo Nogueira e outras voces) (1991), Eterno retorno (1996), Parado na tormenta (1996), O país da brétema (2000), A carreira do salmón (2001), Nunca máis, Galiza á intemperie (2003), Españois todos (2004), Ten que doer (2004) e Outra idea de España (2005).

Publicou ademais a obra de teatro Unha rosa é unha rosa (1997) e Servicio de urxencias (2002), guións de televisión, etc. Tamén é protagonista do libro, preparado por Antonio Pedrós-Gascón, Conversas con Suso de Toro (Xerais 2005)

Conversa co autor

Suso de Toro conversará cos lectores e lectoras de Home sen nome o mércores 30 de maio, ás 20.30 h, na Cervexaría San Xoán de Carballo (Rúa de Ourense 8-10).

Suso de Toro pola rede

> Botelha ao mar, o blog de Suso de Toro
> Na Galipedia
> Na Biblioteca Virtual Galega
> Na Editorial Xerais
> En Culturagalega.org
> Suso de Toro e a proxección exterior da literatura, audio en Culturagalega.org
> Chat con Suso de Toro en Vieiros
Literactúa! Comentarios (1) - Categoría: AUTORES/AS - Publicado o 16-05-2007 13:21
# Ligazón permanente a este artigo
Uxía Casal

Uxía Casal

...a autora do libro de Literactúa para abril de 2007, Vidas exemplares.

Naceu en Santiago de Compostela en maio do 57, e alí viviu até os 27 anos.

Licenciouse en Xeografía e Historia e en Filoloxía Hispánica na USC.

Entre 1984 e 2003 traballou como profesora de Lingua Galega e Literatura, primeiro na Universidade Laboral e logo nun instituto de Ourense, cidade na atopou o seu espazo vital e literario. A partir de 2004 foi vivir a Nigrán e na actualidade reside en Ribeira.

Na súa produción literaria podemos destacar obras como As ás de Xenoveva (2004). Tamén para lectores novos publicou Un ano de fábula en catro estacións (1994). Completan a súa produción títulos como O faro de Arealonga, Saturno tamén é Deus ou Sede en Ourense. Nos libros de autoría colectiva Narradoras e Longa lingua deu ao prelo os relatos "O pequeno Mario" e "A palabra de Deus".

Así se presenta ela na Biblioteca Virtual Galega:

Nacín en Santiago de Compostela o 13 de maio de 1957 e alí vivín durante vinte e sete anos, até que marchei a Ourense a traballar no ensino público.

Estudei no único colexio laico e feminino que había daquela na cidade, San Paio, onde entrei con tres anos e saín con dezasete. Gustábanme a historia, a arte e a literatura moi por riba doutras materias, así que, acabado o COU, decidinme pola Facultade de Xeografía e Historia, onde me licenciei en Historia da Arte Moderna e Contemporánea en 1979. A lingua e a literatura seguían chamando por min e comecei Filoloxía Románica ese mesmo ano; en 1981 pasei a Filoloxía Hispánica, e en 1984 licencieime por segunda vez.

Ao tempo que estudaba, impartía clase de francés e literatura nas Aulas da Terceira Idade, e de español nos cursos para estranxeiros da USC durante un par de veráns. Semellaba predestinada ao ensino, e ao rematar Filoloxía marchei a Ourense a dar clase de galego na Universidade Laboral. En 1986 aprobei a oposición de ensino secundario de Lingua Galega e ao ano seguinte tomei posesión da praza definitiva desa materia no Instituto As Lagoas. Alí permanecín até 2003, ano en que me xubilei por problemas crónicos de saúde.



Conversa coa autora:

Uxía Casal conversará cos lectores e lectoras de Vidas exemplares o mércores 25 de abril de 2007 a partir das 20.30 h no Pub Silfo de Carballo (Rúa de Rosalía de Castro 8).


Uxía Casal pola rede:

> Uxía Casal na Galipedia.
> Ficha da autora na Biblioteca Virtual Galega.
> Ficha da autora na Editorial Xerais.
> Ficha da autora na Editorial Galaxia.
> Uxía Casal deu a coñecer Vidas exemplares, en Novaxove.com.
> Uxía Casal presentou o seu libro Vidas exemplares, en La Voz de Galicia.
Literactúa! Comentarios (2) - Categoría: AUTORES/AS - Publicado o 03-04-2007 10:50
# Ligazón permanente a este artigo
1 [2]
Blog do programa Literactúa para o fomento do libro e da lectura en galego no Concello de Carballo.

O QUE É LITERACTÚA...
 DESTACADOS
 CATEGORÍAS
 FOTOS
 PROCURA
 ALGUNHAS LIGAZÓNS
 ARQUIVO

Concello de Carballo

Estadisticas y contadores web gratis
Estadisticas Gratis


free web counter

Esta web apoia á iniciativa dun dominio galego propio (.gal) en Internet
© by Abertal