Arredor de Lámbrica


Aliñamentos de coviñas en Avión
Aliñacións de coviñas nunha rocha do Castro de San Vicenzo (Avión, Ourense).
Amancio Bruquet Albitos, de Casa Valderías en Avión, foi o que fixo esta fotografía. Trátase dunha aliñación de coviñas que está na cima do Castro de San Vicenzo, no concello de Avión (Ourense).

Israel Barandela Rivero e José Manuel Lorenzo Rodríguez citan no seu libro "Petroglifos de Ourense" (Deputación Ourense, 2004, páx 43) un petroglifo que eles denominan como "Avión IV (AvP4)" e que definen como unha rocha de pequenas dimensións (3 x 0,60 x 3,50 m.) insculturada cunha aliñación de catro cazoletas, "aparecendo outras dúas espalladas pola rocha anarquicamente".

Non sabemos se os autores anteriores se referían ás coviñas da fotografía, xa que no alto do Castro de Avión hai máis dunha rocha con insculturas, pero o achádego de Amancio Bruquet dounos a satisfacción de poder ver nas nosas comarcas outro caso de aliñamento de petroglifos cara o punto de solpor no solsticio de verán.

Unha das liñas que forman as coviñas está orientada aproximadamente (coa brúxula) ós 304º azimutais, o punto por onde se pon o sol no devandito solsticio. Na fotografía esa liña ós 304º coincide case coa diagonal que vai do ángulo inferior dereito ó superior esquerdo. A intencionalidade dos gravados parece indiscutible.

Moi cerca desta combinación de coviñas hai unha gran peneda que contén pías na súa parte superior. Unha delas é claramente antrópica -feita polo home- de forma rectangular e bastante profunda. Para subir a esta rocha hai uns pequenos chanzos que nos fan pensar nas fermosas escaleiras dos grandes santuarios castrexos de Ulaca en Ávila ou do de Panóias en Vila Real (Portugal).

Os chanzos de Avión só son esbozos na rocha, non son tan espectaculares coma os dos exemplos citados, pero permítennos establecer paralelismos con eles. Trátase de santuarios no interior dos castros, na cima de grandes penedos ós que os oferentes, sacerdotes ou druídas deberían ascender para realizar os seus ritos.

Chegamos así á conclusión de que este penedo cumpliu funcións de santuario -posible altar de sacrificios- dentro do recinto do fermoso castro de San Vicenzo, a 618 metros de altitude, cunhas impresionantes vistas das paisaxes do contorno.

Ver Dos castros en Avión (J. Fernández Pintos)
Ver web do concello de Avión
Ver restos da muralla do castro de San Vicenzo
Artigo publicado o 07-09-2009 17:36
# Ligazón permanente a este artigo
Aliñamentos nos petroglifos de Eiras (San Amaro)
Aliñamentos comprobados nos petroglifos da Ermida (Eiras, San Amaro).
Dende unha posición ó Leste do petroglifo máis grande (A) podemos observar que o sol se pon no solsticio de verán xusto detrás do petroglifo que está ó Noroeste (B).

Moi curiosa tamén é a orientación ó Norte da liña que une ós petroglifos máis pequeniño (E) e máis grande (A).

Tamén existe unha importante coincidencia xeográfica, xa que a liña que une os petroglifos D e A sinala cara o outeiro onde se ergue o Castro de San Cibrao das Las.

Aínda que falta un estudo rigoroso sobre o significado dos petroglifos da peneda da Ermida, xa estamos en condicións de afirmar estas tres evidencias:


1.- Os aliñamentos de dous petroglifos co solpor de solsticio de verán (A-B).

2.- O aliñamento de dous petroglifos na dirección Sur-Norte (E-A).

3.- O aliñamento de outros dous petroglifos cara o outeiro onde está o Castro de San Cibrao das Las (D-A). É de destacar que nese castro existe unha mámoa ou sepulcro colectivo, parella a outra que hai nas inmediacións dos petroglifos da Ermida.

É salientable que en todos os aliñamentos descritos se vexa involucrado o petroglifo A, o máis grande de todos, o que ten máis liñas concéntricas e o único que ten liñas radiais.

Ver noticia da axencia EFE en A hora dos mouros
Ver fotografía do solpor do solsticio de verán
Artigo publicado o 01-09-2009 19:45
# Ligazón permanente a este artigo
Arredor da citania ourensá de San Cibrao das Las e Ourantes, do monte do Santrocado e do Castelo de Laias: deuses, mámoas, petroglifos, castros, xentes...

 Artigos destacados
 Outros artigos, blogues ou webs
 Procurar en Lámbrica

© by Abertal