Vimos de pasar a fin de semana cuns amigos en Palas de Rei, concretamente en A Parada das Bestas, onde puidemos disfrutar unha vez máis da súa cociña, aproveitando que nesta casa rural, como en moitas outras, están agora co Outono Gastronómico.

O venres chegamos para a cea, pero o sábado puidemos gozar dun fermoso día de sol para dar un bo paseo, visitar o Castelo de Pambre ou pasar a tarde no Balneario cercano.

Xa o domingo, cada un foise indo segundo as súas obrigas familiares o reclamaban. Despois de mercar o famoso queixo de Arzúa-Ulloa, Guido e Marcela deixáronnos; e os demais aínda demos un pequeno paseo, aproveitando que había mercado, por Melide. Esperanza e Juan fóronse despois de mercar melindres; pero nós demos unha volta máis con Narciso e Chus para buscar os típicos ricos (xa non quedaban onde os mercaramos doutra volta). E, como non, para tomar o aperitivo.

Non fixo falta separarse moito do mercado para caer na Cervecería Cire, onde demos boa conta do pincho de ensaladilla que nos puxeron coa cervexa. Un dos poucos sitios, por certo, onde vimos que aos clientes non lles poñían olivas ou patatillas.

Rúa Principal nº11. Melide

Cando un está de vacacións semella que os días dan para facer unha morea de cousas, como descubrir unha fermosa praia, ou un bo sitio para tomar uns pinchos.

Á praia dos Genoveses chégase por un camiño de terra, polo que na fin de semana só transitan os autobuses que saen de San José, xa que se atopa a un par de quilómetros do pobo. Pero como nós fomos pola semana, levamos o noso coche, así que despois aproveitamos para dar unha volta pola zona.

Así foi como chegamos a Islote del Moro, unha pequena localidade na que atopamos varios bares nos que puxeran un pincho máis que decente.

O primeiro no que estivemos foi o restaurante La Ola. Cunha fermosa terraza con vistas ao mar reservada xa para as ceas cando chegamos, tomamos un par de cañas na barra. Dos pinchos que nos ofreceron, Makeijan optou polo bacallau en tomate, e eu fun de descuberta e pedín tabernero (pensando que era un peixe), que resultou ser unha especie de pisto. Todo, por 3,20 euros.

Outra cousa a favor (para min, xa o sei) deste local é que é de non fumadores.

Rúa Virgen del Carmen nº5. Islote del Moro

El Empalme non é un bar de pinchos. É un deses restaurantes de estrada no que un pode tomar un café ou unhas tapas na barra de paso que vai de viaxe, ou pode sentarse tranquilamente a degustar os deliciosos pratos que con cogomelos prepara Gloria Martín, a cociñeira. Iso si, sempre previa reserva.

Despois de varios intentos, xantamos alí fai uns meses. E fai un par de semanas volvemos a pasar por alí, esta vez a media mañá camiño de Madrid, Xa na visita anterior falaramos dos blogs; e de novo saíu o tema nesta ocasión, en canto os donos se deron conta de que lles soaban as nosas facianas.

En canto lle comentei a Gloria o tema do meu blog marchou cara a cociña; e cando nos demos conta, estábanos agasallando co delicioso pincho que podedes ver: un delicioso petisco de foie, con pasta de olivas e escamas de man de buda.

Todo un detalle pola súa parte, e unha grande sorte para nós!

Estrada Villacastín-Vigo, km 352 (Rionegro del Puente)

O nosa primeira mañá das vacacións foi de veraneantes total: erguerse non moi cedo, almorzar e á praia! Como aínda estabamos cansos da viaxe (non estamos afeitos a facer 1200 km en coche dunha tirada, as cousas como son) nin sequera nos molestamos en pensar a onde ir: á praia de San José.

Aínda que tiña ouvido falar do gusto pola xente pola primeira liña de praia, non pensei que a cousa fose para tanto. Nós, discretiños como somos, e pouco afeitos a pelexar por segundo que cousas, espetamos o noso parasol nunha máis que honrosa (ó noso máis ignorante entender) segunda liña de praia, e gardando o que nos pareceu unha educada distancia de seguridade respecto dos que chegaran antes ca nós. Máis debemos ser os únicos, porque nuns minutos, estabamos cercados por unha morea de descoñecidos, e case non atopamos sitio para pasar entre as toallas para chegar a darnos un baño!

Para repoñernos; non nos quedou outra que buscar onde tomar unha cervexiña. Como queriamos ver a pinta do menú de día que ofertaban por dez euros, entramos no Arrecife, onde nos deron a escoller entre diferentes ensaladas de tapa, e optamos por unha de temporada e outra de pasta. As dúas Alhambras, algo máis baratas que o día anterior, 4,40 euros.

Rúa Cala Higuera. San José

Fai unha semana que voltei do Cabo de Gata, e aínda non tivera tempo a poñerme a contar nada da viaxe. Pero é o que teñen as vacacións, que antes de saír hai que deixar todo ao día, e ao voltar fan falla uns días para voltar á normalidade...

Fomos ate aló en coche. Makeijan foi cos amigos ao FIB, e eu quedei con el en Ocaña para despois baixar xuntos ate San José. Despois dunha viaxe tan longa, o único que nos apetecía era darnos unha ducha... e saír a tomar unha cervexa ben fresquiña, a ser posíbel acompañada dun pincho, xa que os meus curmáns que estiveran por alá facía uns anos nos comentaran que nesta zona as tapas (como eles lles chaman) de cortesía son habituais.Despois dun paseo (breve, estabamos cansos) polo pobo, fixemos ilusionados a nosa primeira parada. Pedimos dúas cervexas, e puxéronnos con elas esas patatillas que tan pouco nos gustan. Cousa que nos cabreou sobremaneira toda vez que vimos que a outros clientes si lles poñían tapa. Cruz e raia!

Decepcionados, collemos cara o porto buscando onde cear, pero aínda así fixemos outro intento. Na Taberna del Puerto pedimos dúas cervexas (Alhambra Reserva 1925), e aquí xa nos ofreceron a posibilidade de escoller unhas tapas para acompañalas. Prezo: 5,60 euros. Caro? Pode ser, pero tendo en conta que é un pobo turístico, que esta é unha cervexa de alta gama, e o que pagamos noutros locais, estaba dentro da media.

Puerto Deportivo. San José

[1] ... [5] [6] [7] 8 [9] [10] [11] ... [43]