Pepe Dovale, Patrón do barco
 CATEGORÍAS
 FOTOBLOGOTECA
 ANTERIORES
 ARQUIVO
 BUSCADOR
 BUSCAR BLOGS GALEGOS
 NA REDE

QUERIAMOS FIAR NA LA...

Nos tempos de antes, fiábase la en tódalas casas, pois non había outro xeito de facer xerseis, chaquetas ou carpíns. A nai da nosa Estrella de Cerceda era cardadora e ela explicounos con todo detalle o proceso de fiado da la.
Na primavera ou primeiros de verán rápanse as ovellas; antigamente facíase cunhas tesoiras e agora xa hai uns peites eléctricos. Xa na rapa, separábase a la en dúas moreas, segundo fora de cor branca ou negra.
Empezabamos fervendo auga na lareira, no pote grande de facerlle a comida aos animais. Botabámoslle a auga fervendo, mollando a la ben mollada. Despois levabámola ao río en paxes, onde non facía lodo e había pedras. Calzabamos os zocos e veña, dabámoslle cos zocos calzados para lavala ben, sen xabrón, dentro dos paxes. Para secala botabámola ao sol derriba dunha silveira deitada que xa estivese de botar a roupa ao sol ou faciamos un cancelo algo volteado de varas e vareabamos a la para que quedara brandiña.
Xa na casa, a la había que escarpizala, poñela aberta e esponxosa. Collíanse dúas cestiñas, unha a cada lado, a da esquerda chea de la e a outra baleira. Íase collendo aos poucos a la da esquerda coas mans, alargándoa e refregándoa para abrila e deixala na cestiña da dereita.
Había quen a cardaba cuns utensilios de madeira de moitos arames tortos, as cardas. A la púñase nunha carda e íase estirando coa outra, moitas veces ata que quedaba ben desenvolta. Outra xente non cardaba pois disque a la rompía moito.
Despois a la anoábase ao fuso e fiábase cos dedos, envolvéndoa no fuso que se suxeitaba no mandil para que non se movera. Tamén había quen a torcía coa parafusa.
A continuación imos envolvendo os nobelos de la no sarillo para facer as madeixas coa la lista para tinguir. Para o tinguido botábase a tintura nunha pota con auga, fervíase arredor de media hora e despois aclarábase ben con auga e púñase a secar á sombra.
Unha vez tinguida e enmadeixada, a la pasaba á debandoira, facendo un novo nobelo coa la preparada para facer todo tipo de prendas, calcetada ou ganchillada. Podíase tamén levar á tecelá que tiña tear e facía mantas ou cobertores; picaban moito pero eran quentiños.
Hai uns días tivemos un agasallo de Antonio de Picas e o seu socio que moito lles agradecemos. La de dúas ovellas tan boa e dociña que daba salvación. Lavámola con moita arte pensando fiala. Porén houbo a quen se lle ocorreu metela na lavadora e? púxose tesa que non había quen lle metera man. A que non sabe fai como a que non ve. Estrella dixo que a solución é prenderlle lume. Outra vez será!
Comentarios (5) - Categoría: 1. CADERNO DE BITÁCORA - Publicado o 19-04-2012 16:29
# Ligazón permanente a este artigo
5 Comentario(s)
1 Ola Pepe.
Vaia oh! sinto que se vos fastidiara a la e non a poidérades fiar. Tamén a quen se lle ocurriu meter a la na lavadora debe de ser do "pueblo". En fin... Eu non sei se a la sería de boa calidade, pero o que si che poido dicir é que deu que rapar. E dígocho con coñecemento de causa. O tal Antoniño de Picas é amigo meu, e funlle axudar a rapar as ovellas. Ben, axudar axudar, mais ben eu grabeino en vídeo para a#blgtk08# posteridade. O rapaz vese que non ten moita práctica esquilando ovellas, pero polo menos ponlle interese. Xa é coñecido por SKILEITOR. De feito o vídeo pódelo ver en youtube http://www.youtube.com/watch?v=Y25TtQ4ZJRk ou se buscas en google RAPA DAS OVELLAS xa é o primeiro que aparece: rapa das ovellas en Santa Mariña do Monte 2012. Tes que velo con son, pola entrevista e todo o demais. Espero que che guste.
Un saúdo
Comentario por Espinete (19-04-2012 20:12)
2 vaia lastima oh!ca ilusion que me facia ver fiar.tamén a quen se lle ocorre meter a la na lavadora se xa o dí estrella¡ que hay que lavala no rio!.#blgtk08#o 23 de abril podemos mercar en moeche unhas cardas e un lavadoiro de madeira deses que se poñian no río para lavar a la a proxima vez.....
Comentario por loly (19-04-2012 23:52)
3 ..por certo pepe,ainda que non puidemos ver o fiado da la teño que decirlle que jaime veu "encantado",chegou a casa todo contento d#blgtk08#icindolle a o seu pai "ya los conozco a casi tod@s".cando a escola llo permita volverei levalo a pasar outra tarde con vos
Comentario por loly (20-04-2012 00:10)
4 O bó disto é que de todo adeprendemos, ata dos erros. Será por ovellas, lá e boas mañas. Non hai máis que mirar algún vídeo de youtube que nos recomendou un amigo.Per#blgtk08#o fiar, fiaremos.Máis ben, fiarémonos das vellas. Elas si que saben!!Unha aperta ben grande para todas elas pola súa boa disposición para ensinarnos canto saben.Bicos
Comentario por Gelo Paz (20-04-2012 11:02)
5 Está ben. Confeso. A burra da aplicación das "novas tecnoloxías" fun eu. Tedes razón, para fiar hai que se fiar das vellas. Síntoo.#blgtk08# Procurarei facerme con máis la, porque o que peor levo é que o grupo de fiandeiras estaba triste como se lles morrera unha ovella.
Comentario por Ara (20-04-2012 20:32)
Deixa o teu comentario
Nome:
Mail: (Non aparecerá publicado)
URL: (Debe comezar por http://)
Comentario:
© by Abertal

Warning: Unknown: Your script possibly relies on a session side-effect which existed until PHP 4.2.3. Please be advised that the session extension does not consider global variables as a source of data, unless register_globals is enabled. You can disable this functionality and this warning by setting session.bug_compat_42 or session.bug_compat_warn to off, respectively in Unknown on line 0