Pepe Dovale, Patrón do barco
 CATEGORÍAS
 FOTOBLOGOTECA
 ANTERIORES
 ARQUIVO
 BUSCADOR
 BUSCAR BLOGS GALEGOS
 NA REDE

O APALPADOR
Dende os tempos de Maricastaña, camiña pola serra do Courel un home grande coma un día sen pan, un xigante amigo de todos: novo ou vello, pobre ou rico, da montaña ou da costa, da aldea ou da vila. Non fai distincións. O pelo é rubio, a barba longa, os ollos con chispas de bos sentimentos e as mans coma pas de enfornar. Viste diario unha camisa de cadros, chaqueta de cor, pantalón de pana, boina na cabeza e uns zocos, para se meter polo medio dos soutos e das fragas. Cando chove pon un saco de cochocho. Nunca ten frío porque sempre anda a traballar.
Vive nas montañas, entre cumios nevados, ríos cantareiros e fragas de carballos e castiñeiros. Durante o ano, come xabarís, ovos de paxaros, mel das abellas, noces e abelás que apaña...
Por oficio, é carboeiro. De verán, recolle uces e toxos que estean sequiños e os pica ben. Logo amorea os cachos de menor a maior nus buratos no chan e prende o lume para que arda de dentro para fóra, sen deixar saír o lume, tapando todo con terrón. Cando o carbón está logrado, o mete en sacos e o garda para o inverno. Deste xeito anda o día enteiro, cun saquete ao lombo para alimentar os lumes da veciñanza.
Pero ten outro oficio que lle cadra máis e polo que se coñece mellor. Este home é o Apalpador. A noite de fin de ano para ano novo, un día de renovación, de novos desexos e de unión das persoas coa natureza, vai esparexendo castañas polo mundo adiante.
Para poder repartilas, no outono abanea os castiñeiros cunha taloura e así tira os ourizos, sácalles as castañas e méteas en sacos. Despois ponas na gran caniza da súa lareira a secar e afumar. E, por fin, fai o bandoxo, quita os picóns e deixa sen puxa as boas castañas. Quen o vira batendo cos sacos había pensar que toleara. Non toleou, non, que para ter boas castañas todo o ano, cómpre facer a bulla. Por forza teñen que ser as mellores castañas de Galicia e disque tamén son máxicas, pois dan chegado a tódolos nenos e nenas galegos.
Na derradeira noite do ano, comeza a súa andaina o vello carboeiro. Antes de saír coceu unha bola de pantrigo feita coa derradeira gavela da colleita. Así vaise alimentando polos camiños. Leva ao lombo un gran saco cheíño de castañas e algunha cousa máis. É un home moi curioso, para ir polas casas pon unhas zapatillas de pano a cadros, así non mete boureo e non mancha os cuartos quentiños de nenos e nenas. Entra mainamente para apalpar as súas barriguiñas. Se non lle pareceron ben mantidas, porque son mal comedores, cala, pero déixalles unha presa de castañas. Se as atopa cheas di: ?Así. Así esteas todo o ano? e tamén deixa unha presa de castañas e algún agasallo máis feito por el coa punta da navalla: buxainas, tirataques, diábolos, ioiós, zoadeiras, matracas, canas, andacamiños, bailaretes, carracas, asubíos, chifres, frautas, xilófonos, muíños, carretiñas, trens, barquiños, colares, animaliños, bonecas, monicreques, cabaliños para se abanear... e non sei cantas cousas máis.
Para tranquilizar aos picariños e picariñas, bulideiros pola inquedanza da chegada do Apalpador, as nais e pais poden aprender esta cantiga:
Vaite logo, miña meniña
marcha agora para a camiña
que vai vir o Apalpador
a apalparche a barriguiña.
Xa chegou o día grande
día do noso Señor.
Xa chegou o día grande
e virá o Apalpador.
Mañá é dia de cachela,
que haberá gran nevarada
e ha vir o Apalpador
cunha maga de castañas.
Por aquela cemba
xa ven relumbrando
o señor Apalpador
para darvos o aguinaldo.

Baixou o Apalpador esta noite das montañas galegas e seguirá a facelo mentres o mundo teña ilusión...
Aquí vai este conto contado e quen non levante o cu, quedaralle pegado.
Comentarios (3) - Categoría: 4. CONTOS DA VILA - Publicado o 01-01-2012 05:40
# Ligazón permanente a este artigo
3 Comentario(s)
1 FELIZ ANO 2.012.
A ti Pepe o primeiro, a todos e todas as tripulantes (vellas e novas), á esa xentiña que colabora neste blog cos seus comentar#blgtk08#ios e, en especial, a alma deste recuncho na rede, Gelo.
Que este ano máis longo do habitual teñamos grandes momentos de ledicia xuntos. Bicos.
Comentario por Ara (01-01-2012 13:23)
2 FFLIZ ANO A TOD@S!!!Patrón,o Apalpador debeume ver cara de neno...,menuda castañada me deixou...
Patrón;este ano o meu propósito é de manter os pés na terra.Como galego de pura cepa,descendo dunha estirpe de meigos bos e teño o don de aparecer en "soños"...
En "soños"(rondará o mes) xa lle mencionei que tiña que desenrolar da tripulación Coa Marea,para experimentar noutro eido seguindo o formato de Coa Marea.Mostrarlle a miña gratitude por deixarme navegar ó seu carón xunto con outr@s grumetes,foi un pracer.
Achégolle un saúdo sen ornamenta#blgtk08#cións(son os que atravesan a alma) a vostede e ós donos dos camarotes que pernoitan no barco.
Para toda a tripulación deséxolles unha marea con moreas de capturas.
Abofé que xurdirán imitacións ou"versións remasterizadas" do Retranqueiro... así fenderemos coa risa....
Desenrolo cun dito do meu bisavó(home rexo,sabio de poucas palabras pero de moitos ditos) cando me regalou un libro:
"Os analfabetos son aqueles que non queren entender o que len,nin recoñecen os seus propios escritos ou non queren recoñecelos"(aliquid in bonam partem)
Comentario por Retranqueiro (01-01-2012 14:46)
3 Unome a felicitaciòn, feliz2012 e que veña cargado de felicidade para todos, en especial para toda esta tripulaciòn, espero que segades#blgtk08# facendo grandes cousas e grandes saidas e que este barco sega co bo ritmo que leva e levou ata agora.
FELIZ ANO NOVO 2012
Comentario por Sonia (01-01-2012 20:31)
Deixa o teu comentario
Nome:
Mail: (Non aparecerá publicado)
URL: (Debe comezar por http://)
Comentario:
© by Abertal

Warning: Unknown: Your script possibly relies on a session side-effect which existed until PHP 4.2.3. Please be advised that the session extension does not consider global variables as a source of data, unless register_globals is enabled. You can disable this functionality and this warning by setting session.bug_compat_42 or session.bug_compat_warn to off, respectively in Unknown on line 0