O motor de procura máis popular de China, Baidu, comezou unha cooperación oficial xunto cos editores de libros mediante o cobro dos seus servizos de e-book, dando un primeiro paso na súa loita contra a pirataría, afirmaron os analistas. Desa maneira, debido aos problemas de copyright, os lectores deberán abonar un 10% do prezo do exemplar impreso á hora de comprar os libros electrónicos na tenda on-line de Baidu.
Anteriormente a este paso, os usuarios podían descargar libros e documentos gratuitamente co uso de diñeiro virtual gañado a través da presentación de documentos ou libros en liña. Actualmente, a biblioteca de Baidu conta con máis de 9 millóns de exemplares.

Pola súa banda, a compañía Shanda Literatura formou unha alianza cos propietarios dos dereitos de autor, entre eles Written Works Copyright Society. Shanda Literatura, é a edición dixital de Shanda Interactive Entertainment, un dos principais medios de comunicación interactivos de China, que conta con máis de 3 millóns de obras na súa base de datos. Esta compañía presentou unha denuncia contra Baidu polo uso ilegal dos seus documentos.

Segundo o xerente do departamento do usuario de produtos de Baidu, Hai Lei este paso é importante para a colección de Baidu, co fin de promover os libros con dereitos de autor e evitar a pirataría. En palabras do directivo ao diario Global Times, Hai afirma que están a negociar con decenas de editores e editoriais para que poidan promocionar os seus libros a través da nosa tenda electrónica.