Dun tempo a esta parte estamos a ver como se producen, día si e día tamén, ataques (furibundos os máis deles) contra o galego. Nós non acertamos a comprender qué mal tan grande pode facer unha lingua secular e fermosísima coma a nosa, para que algunha "xente" se poña a botar pestes contra dela, negando aos que a usamos o dereito de facelo e, o que é máis grave, dando a entender que se está a impoñer, cando calquera con dous dedos de fronte que mire ao seu redor e escoite se dará conta de que a realidade dista moito de ser esa, senón a contraria.
Gustaríanos saber onde estaban (e están) estes que agora denuncian a suposta imposición do galego cando era (e é) outro idioma, alleo, o que era (e é) imposto, mesmo pola forza (temos que lembrar a algúns e algunhas os sopapos que levaron por dicir algunha palabra en galego na escola?). Entón non se lles oía falar desa "Galicia Bilingüe" que propugnan (ainda que todos sabemos que tras dese eufemismo se agacha unha cruzada contra a nosa lingua).
A estes ataques que se veñen producindo constantemente contra o galego, que todos podemos ver a cotío en certa prensa (cómplice moitas veces desta cruzada) acaba de unirse un comentarista deste blog, que no día de onte se atreveu a escribir nun comentario en "queres preguntar?" isto:

Estoy un poco harto de que las contestaciones salgan única y exclusivamente en gallego.
¿Tenéis algún problema con el castellano?
Agradecería me contestaseis. (Por lo menos en los dos idiomas).GRACIAS.
EN VEZ DE AVANZAR LO QUE HACEMOS ES RETROCEDER
victor

Pensamos que estas palabras non necesitan comentarios. Que alguén se atreva a entrar no blog que desenvolven outras persoas e lles esixa que non escriban o blog en galego (se estivera en inglés seguro que non tiñan problemas), fala por si só, e é claro exemplo dos ataques orquestados (imaxinamos por quen) que se están a producir, fomentando o odio e o rexeitamento cara a nosa lingua.
Xa alguén respostou a este suxeito acertadamente. Nós tamén fixemos o propio, velaqui a nosa resposta:

victor, non sabemos ben quen te obriga a entrar ó noso blog para estar farto de nada do que aquí se poña e de que utilicemos a nosa lingua para expresalo, simplemente non entres.
este blog foi concebido para encher un espazo de información sindical que pensábamos que faltaba na rede, pero o aspecto sindical non é a única sensibilidade que temos, a língua, a NOSA LINGUA, ten un tratamento especial nél posto que entendemos que de seguir ca perda de galego falantes dos últimos anos o galego será como o latín nun par de xeneraciois, é un legado dos nosos pais, dos nosos abós e que ó igual que outros temas como o respeto o medio ambiente (ó que tamén dedicamos moitos dos posts deste blog), temos a responsabilidade de mimalo e protexer.
respetamos o resto das linguas, podes ver que contestamos igual ás cuestiois que se nos fan en castellano, ata temos un traductor enlazado, pero pedimos que se nos teña o mesmo respeto que temos nós polo resto de linguas.(...) asi que o dito victor, como che contestaron antes, deberas cambiar por libertad digital ou a cadena episcopal, este está claro que non é o teu sitio.

Posto que non imos consentir que ninguén nos diga en qué idioma temos que falar, e por suposto non imos consentir que se desprecie a nosa lingua, participaremos activamente na manifestación convocada pola Mesa pola Normalización Lingüística o próximo domingo 18 de maio en Santiago de Compostela " polo dereito a vivirmos en galego", e convidámosvos a tod@s a participar e denunciar estes ataques inxustificados e fascistas.
Para ir á manifestación, ademais, A Mesa facilitará o transporte poñendo autobuses gratuitos (en colaboración cos concellos) con saída desde O Barco e A Rúa. Para apuntarvos nos autobuses podedes chamar ao 622 53 80 10.

CANCIÓN PRA CANTAR TODOS OS DÍAS

Hai que defender o idioma como sexa:
con rabia, con furor, a metrallazos.
Hai que defender a fala en loita rexa
con tanques, avións e a puñetazos.

Hai que ser duros, peleóns, intransixentes
cos que teñen vocación de señoritos,
cos porcos desertores repelentes,
cos cabras, cos castróns e cos cabritos.

Temos que pelexar cos renegados,
cos que intentan borrar a nosa fala.
Temos que loitar cos desleigados
que desexan matala e enterrala.

Seríamos, sen fala, unhos ninguén,
unhas cantas galiñas desplumadas.
Os nosos inimigos saben ben
que as palabras vencen ás espadas.

O idioma somos nós, povo comun,
vencello que nos xungue e ten en pé,
herencia secular de cada un,
fogar no que arde acesa a nosa fe.

Manuel María.

acabamos de pornos en contacto co SERGAS e adiantaronnos de voz un cronograma que pasarán por correo, a grosso modo é este:

TRASLADOS:

29 de abril: tódalas categorias de facultativos

6 de maio: resto do persoal excepto: DUE, auxiliar enfermaria, celador, auxiliar administrativo e psx

OPE

7 de maio: listados definitivos de TEL, TAP, TER, fisio, hixienistas, lavandeiras e pasadora de ferro.

o 9 de maio: sairán as listas de aprobados definitivos de case que tódalas especialidades de facultativos, mais farmacéuticos de primaria e especializada.

preguntámoslle que pasaba co resto das categorias se saldrían ou non ó longo de maio e nos respostaron sen confirmalo que esperaban que sí.
cando teñamos o cronograma que quedaron en enviar o publicaremos, de momento, isto é o que hai.

Temen que a pretensión da administración sexa externalizar estas funcións
A consellaría de Sanidade elimina o 20% dos postos do Corpo de Inspectores Farmacéuticos a cambio de subirlles o nivel
Representantes de CIG-Saúde, CIG-Administración e unha ampla representación do colectivo de Inspectores Farmacéuticos de Saúde Pública denunciaron en rolda de prensa a pretensión da consellaría de Sanidade de Sanidade de amortizar 19 das 100 prazas existentes a cambio de subilos de nivel. Denuncian que tras desta redución de prazas agóchase a intención da administración de externalizar progresivamente o traballo que desenvolve este colectivo.
No ano 2005 faise unha restruturación dos anteriores sanitarios locais e créase a clase de inspectores farmacéuticos de saúde pública, que teñen como función a vixilancia e verificación da lexislación en materia medioambiental, de sanidade escolar, de policía sanitaria mortuoria ou de hixiene alimentaria, ademais de participar na administración, coordinación e execución de programas de saúde xestionados pola dirección xeral competente en materia de saúde pública, emitir informes, actuar sobre determinados alimentos, bens ou servizos... entre outros.

Para desenvolver estas funcións, na relación de postos de traballo (RPT), que se crea ese mesmo ano, contémplanse e orzaméntanse 100 prazas deste corpo, das que só se chegan a cubrir 81. ?Non porque a carga de traballo non tivese que contemplar as 100 prazas senón porque hai programas que non se facían coa periodicidade e a cadencia coa que se tiñan que facer?, explica María Xosé Abuín, membro da executiva de CIG-Saúde.

No ano 2007, convócase un proceso selectivo e sorprendentemente e por vez primeira, a administración en vez de manter os postos de traballo, o que fai é cesar a todo o persoal malia ter orzamentadas esas 19 prazas.

A xustificación esgrimida para adoptar unha decisión como esta é que van proceder a subir os niveis, pasando o persoal deste corpo do 20 ao 22 e incrementar en 140 euros i salario. A cambio desaparecen o 20% dos postos de traballo. ?Non é viábel, nin razoábel, nin admisíbel porque senón, cada vez que a administración quixese facer un aumento retributivo iamos a metade á rúa?, afirmaba María Xosé Abuín.

Unha decisión contraria ao Estatuto Básico do empregado público

Pola súa banda, o secretario nacional de CIG-Administración Autonómica, Manuel Gallardo Canitró explicou que con este anuncio a consellaría de Sanidade incumpre o acordo asinado pola administración o pasado mes de abril respecto dos criterios de negociación. Un acordo que, ademais ten a súa base no Estatuto Básico do Empregado Público e que obriga a negociar entre os sindicatos e a administración sempre que as decisións que se adopten ?afecten ás condicións de traballo e ás retribucións de funcionarios cuxa regulación exixa norma con rango de lei ou a decisión da administración que afecte ás súas potestades de organización?.

Canitró denunciou ademais que a decisión unilateral da consellaría de amortizar estas prazas vai afectar ás condicións de traballo dos restantes porque a carga de traballo vaise incrementar exponencialmente ao ter menos traballadores/as. ?Entendemos que isto é completamente irregular e ilegal. O que ten que abrir a administración, neste caso a consellaría de Sanidade, é unha mesa de negociación, para negociar a RPT no seu conxunto coas propostas que fagan e despois acordalas e en ningún caso coa escusa de subir o nivel ou de calquera tipo de incremento retributvo se pode aceptar que se amorticen ou que se destrúa emprego público?, afirmou.

Para o representante da CIG na Administración Autonómica tamén se están a conculcar dereitos dos funcionarios/as que aprobaron a oposición, xa que ao eliminar esas 19 prazas elimínase tamén a posibilidade de elección dun destino máis preto da súa casa que facilite a conciliación da vida laboral e familiar dun xeito máis efectivo.

Auxiliares e técnicos esixiron nos hospitais maior retribución polo seu traballo

Autor: La Voz
Data de publicación: 24/4/2008

Técnicos sanitarios superiores e auxiliares de enfermería dos complexos hospitalarios concentráronse ao mediodía de onte no Clínico e no Hospital de Conxo para esixir o recoñecemento profesional que contempla o Estatuto Básico do Empregado Público, e que se lles apliquen as retribucións correspondentes ao seu novo grupo de clasificación: o grupo B os técnicos superiores, e o C1 auxiliares de enfermería.
A mobilización convocouna a CIG, e en principio repetirase os días 23 de cada mes ata que consigan ese obxectivo. «Solicitamos que na Mea Sectorial do Servizo Galego de Saúde se acorde a reclasificación destes colectivos, e consecuentemente se lles recoñezan as retribucións correspondentes. E que unha vez conseguido este acordo a Consellaría inste a Función Pública para que proceda á modificación normativa que posibilite esta reclasificación», indica o sindicato.

Recoñecer a titulación

Afirman que non se entende que unha empresa pública esixa unha titulación ao persoal e o retribuya por unha categoría inferior á esixida.
A CIG mantén así o apoio a unha reivindicación de fai tempo destes colectivos, e insiste en que lles agarraches a razón a un mellor recoñecemento profesional e unha maior retribución, pois así se contempla no Estatuto Básico do Empregado Público, polo que o sindicato insistirá ante Sanidade para que o faga efectivo.

postos en contacto telefónicamente ca xente do sindicato que participou nesta reunión dinnos que as listas das categorias que están a espera de publicarse (celadores, técnicos, psx, aux administrativo etc.), según o SERGAS estarán en funcionamento para os chamamentos do verán. que xa están baremadas todas as listas excepto as de a provincia da Coruña, que é onde teñen mais chollo pois comprende as áreas de ferrol, coruña e santiago.

aproveitamos o pegar aquí a resposta que acabamos de dar a varias "preguntas" que nos está a facer o persoal, pero antes decirvos que manter informado á xente e contestar as suas preguntas que cada dia que pasa son mais, requiren moito do noso tempo polo que pedimos que leades as preguntas e respostas que hai no post no que queirades preguntar algo antes de facelo posto que igual xa está contestada esa pregunta.

INFORMACIÓN DA MESA CENTRAL DE CONTRATACIÓNS 22 DE ABRIL DE 2008.

a falta de noticias sobre o acontecido na reunión de hoxe sobre contratación, a lo menos temos unha boa nova
por fin parece que mañá será publicado no DOG a Orde de recoñecemento de trienios ao persoal estatutario temporal
esta é a mensaxe que recibimos do SERGAS

A través da presente, comunicámosvos que previsiblemente a Orde de recoñecemento de trienios ao persoal estatutario temporal será publicada mañá, 23 de abril no Diario Oficial de Galicia.

Respaldando o chamamento feito polo Movemento polos Dereitos Civís (MpDC), a CIG tamén se suma ás concentracións convocadas por esta organización, fronte aos locais da Cope das principais cidades galegas, para o mércores 23 de abril. O lema da convocatoria de mobilización é "A Cope quere amordazar a nosa lingua. Non llo imos permitir" e con ela quérese manifestar un claro rexeitamento á política de agresión contra o galego practicada polo grupo mediático da Conferencia Episcopal.
Nesta ocasión, a hostilidade da emisora dos bispos manifestouse a través dunha denuncia presentada perante o Consello Xeral do Poder Xudicial contra a xuíza Ana López-Suevos Fraguela, quen está á fronte do Xulgado do Social número 2 da capital galega. Na devandita denuncia, o avogado da Cope ceibaba a súa animadversión e os seus prexuízos sobre o galego, cuestionando a validez dun xuízo e unha sentenza (que lle era desfavorábel) porque se produciran no idioma de país, algo que evidentemente non só entra dentro da lóxica máis normal senón que ten plenas garantías legais para que sexa así, até o punto de que a denuncia vén de ser arquivada polo CXPX.

Así e todo, esta actuación da Cope, cuestionando a lexitimidade do galego nun ámbito como o xudicial (que se por algo salienta a nivel de usos lingüísticos, é pola escasa presenza da lingua galega), está a ter contestación desde diferentes sectores. Profesionais do Dereito e da Xustiza están a asinar un manifesto de apoio ao labor da xuíza denunciada. Así mesmo, diversas organizacións, entre elas a CIG e a Mesa, difundiron hai días cun comunicado de prensa censurando a actitude da Cope por esta cuestión. Igualmente o asunto tivo repercusión parlamentaria, a través dunha pregunta realizada polo grupo do BNG na Cámara galega.

Dentro da contestación social á postura da Cope, está agora este chamamento feito polo MpDC e que está a ser secundado por diversos colectivos, organizacións e persoas a título individual, chamamento a mobilizarse e a concentrarse diante dos locais da Cope das sete cidades galegas para o mércores 23 de abril ás 20 horas.

1 [2] [3] [4]