 Para mediados de xuño, os membros da nova pero experimentada Asociación Cultural Loaira preparan o seu primeiro Concurso de Pandeireteiras. Será o domingo, 15 de xuño, ás 17 horas no colexio San Narciso, en Marín.
Persoalmente, nunca fun moi de concursos. De feito, aínda non participei en ningún que tivese que ver co baile, o canto ou a gaita. Pero nunca hai que pechar as portas...
Noraboa pola iniciativa e moita sorte. Os interesados tedes toda a información no seu blog. Hai dúas categorías, de máis e de menos de 15 anos, con premios de ata 250 euros. |
DEITADO FRENTE Ó MAR...
Lingua proletaria do meu pobo
eu faloa porque si, porque me gusta
porque me peta e quero e dame a gana
porque me sae de dentro, alá do fondo
dunha tristura aceda que me abrangue
ó ver tantos patufos desleigados,
pequenos mequetrefes sen raíces
que ó pór a garabata xa non saben
afirmarse no amor dos devanceiros,
fala-la fala nai,
a fala dos abós que temos mortos,
e ser, co rostro erguido,
mariñeiros, labregos da linguaxe,
remo e arado, proa e rella sempre.
Eu faloa porque si, porque me gusta
e quero estar cos meus, coa xente que sufren longo
unha historia contada noutra lingua.
Non falo prós soberbios,
non falo prós ruíns e poderosos,
non falo prós finchados,
non falo prós estupidos,
non falo prós valeiros,
que falo prós que aguantan rexamente
mentiras e inxusticias de cotío;
prós que súan e choran
un pranto cotián de volvoretas,
de lume e vento sobre os ollos núos.
Eu non podo arredar as miñas verbas de
tódolos que sufren neste mundo.
E ti vives no mundo, terra miña,
berce da miña estirpe,
Galicia, doce mágoa das Españas,
deitada rente ó mar, ise camiño...
Celso Emilio Ferreiro (Longa Noite de Pedra)  |
