A Bola Extra tira o blog pola fiestra, logo baixa a recollelo e finalmente convoca a todas as persoas interesadas a un concurso de microrrelatos dedicado na súa primeira edición (e posiblemente última) a Manuel Rivas con motivo da próxima edición da súa nova obra Os libros arden mal (e en contraposición ás case 800 páxinas que gasta o tocho… así como non vai arder mal!)
Seguro que moitas veces, lendo algunha das moitas obras do Rivas, pensaches: “Vaia, tanto éxito ten isto, e podía escribilo ata eu”.
Pois non o penses máis, é a túa oportunidade de demostralo, de ser o mellor PseudoRivas!
Colle lapis, papel e/ou teclado e escribe un microrrelatiño imitando a escrita do noso autor galego máis “internacional”.

Velaquí tes as bases do concurso:

1. Aceptaranse todos os microrrelatos que cumpran cos seguintes requisitos:
a) O tamaño do microrrelato non poderá exceder dun palmo (pero non vos preocupedes que teño a man grande).
b) Terá necesariamente que imitar a escrita e os contidos temáticos que habitualmente utiliza Manuel Rivas nas súas obras.

2. Os microrrelatos poderán estar escritos en calquera norma do galego. Igualmente se aceptará calquera tipo de desviación dialectal da nosa lingua. Tamén se aceptarán microrrelatos en castelán, pero non van ganar nin de coña.

3. Os microrrelatos deberán ser enviados ao enderezo abolaextra@terra.es, especificando no asunto o seguinte: “Veña, oh, que tampouco recibes tantos correos como para non saber de que vai este mail!”.
ACTUALIZAÇAO: Como varios participantes tiveron problemas co enderezo mencionado arriba, abrimos tamén conta nova en abolaextra@hotmail.com.
Preferentemente os microrrelatos deberán ser enviados con alcume. En calquera caso, os datos persoais dos participantes non será mostrados publicamente sen a anterior aceptación expresa dos mesmos.

4. Os microrrelatos serán publicados na blog da Bola Extra periodicamente.

5. A data límite para a chegada de microrrelatos será o luns 31 de xullo.

6. Haberá un único premio que consistirá no noso agradecemento máis sincero, na consecución da paz mundial e nun exemplar de Os libros arden mal de Manuel Rivas. O premio carece de patrocinador, pero se algunha editorial, libraría ou empresa láctea quere correr cos gastos do libro ou aumentar o premio, nós encantados e aforrándonos os euros, e o ganador xa nin vos contamos.

7. Poderá participar no concurso todo dios, incluso tamén Manuel Rivas e Manuel Bragado, pero no caso de ganar estes, o premio será doado á Biblioteca municipal de Campo Lameiro (Pontevedra).

8. En ningún caso, o premio poderá quedar deserto. Así mesmo tampouco poderá quedar sabana ou tundra.

9. O xurado estará conformado, se se deixan, por diferentes persoeiros do mundo do blog galego, pero eles aínda non o saben. O número de membros dependerá do éxito ou fracaso da convocatoria (cun mínimo de 2 membros se non se presenta nin dios e un máximo de 5 se choven a chuzos os concursantes). Os membros do xurado serán anunciados no seu momento. A Bola Extra actuará como administrador e secretario, sen voz e sen voto, pero cun bo bate de béisbol con punteira de aceiro por se os resultados non son os que espera.

10. O xurado valorará os seguintes aspectos:
a) A capacidade para imitar o estilo e os contidos das obras de Manuel Rivas.
b) A capacidade para contar unha boa historia nun espazo mínimo.
c) A capacidade para facer chegar queixiños e chourizos da terra aos membros do xurado (sen esquecerse do secretario, claro).

11. O ganador darase a coñecer ao longo do mes de agosto, que así hai máis posibilidades de que estea de vacacións e non recolla o premio. A Bola Extra poñerase nese momento en contacto con el vía mail para darlle os parabéns e tratar o asunto do envío do premio.

12. Se o ganador, por algún casual, recollese o premio cunha camisola co lema “Absolut Corruption” sería inmediatamente desposuído do premio.

12+1. Este concurso vai en serio, e o premio non está amañado (de momento).

Sorte e saúde a todos e a todas!