Óscar Carballo, compañeiro do BNG, asesor de deporte do Concello da Coruña e veciño de Oleiros, presentou onte a súa tese de doutoramento sobre a flexibilidade no campo da forza dos deportes de equipo obtendo un Sobresaliente Cum Laude por este traballo.

Óscar Carballo presentou onte a primeira tese en lingua galega na Facultade de Educación Física de Galiza, e foi avaliado por cinco doutores que compuñan o tribunal, todos eles non galegos, que louvaron as características da tese de Óscar Carballo e, lonxe de consideraren a lingua galega en que está redixida esta tese como un factor contrario, consideraron o valor positivo de a tese estar feita en Galego, por causa de convivirmos nun Estado plurinacional, plurilingüístico, e comprendendo a tese sen calquera problema e sen calquera rexeitamento por razón de lingua. Resulta sorprendente que profesores doutores das máis variadas universidades do Estado español non atopen ningún problema para avaliaren unha tese redixida en idioma galego e que o Goberno galego estea a tomar medidas represoras e contrarias ao noso idioma.

Xurxo Dopico, compañeiro do Concello Local de Oleiros, e Eliseo Iglesias, profesores ambos da Facultade de Educación Física, dirixiron a tese de Óscar Carballo.

No BNG de Oleiros queremos dar os nosos parabéns máis efusivos a Óscar Carballo, que con só 28 anos amosa un compromiso certo co noso idioma na práctica e que, ao mesmo tempo, acada a excelencia no seu expediente académico.

O portavoz e a viceportavoz do Grupo Parlamentar do BNG, Carlos Aymerich e Ana Pontón, ofreceron na día de onte unha rolda de prensa para facer un balanzo de lexislatura que oficialmente remata hoxe e da que salientaron “o traballo constante do BNG para levar á Cámara Galega os problemas do país, fronte a un Goberno do PP inactivo e que o único que fai ben é destruír”.

En concreto, Carlos Aymerich referiuse á eliminación dos “tímidos” avanzos na normalización da lingua galega que se deron no Goberno bipartido; a privatización de servizos públicos como a sanidade, ou a eliminación de medidas sociais como a gratuidade dos libros de texto.

“Seguimos sen saber nada das propostas de Feijóo para o financiamento autonómico”

O portavoz parlamentar do BNG denunciou o “desleixo e desinterese” cos que o Goberno do PP está a afrontar os problemas de Galiza. No caso da negociación do financiamento autonómico mostrou a súa sorpresa “porque parece que a reunión entre Feijóo e Chaves foi fantástica, mais de resultados e números enriba da mesa non temos nada de nada”.

“Onde están os cálculos que fai o Goberno de Feijóo? Cal é a postura que está a defender? Non sabemos nada de nada”, criticou o deputado nacionalista.

Por iso, conminou o presidente galego a que “dunha vez comece a defender os intereses do país”.

Entrada de capital privado nas infraestruturas públicas

Ademais, Carlos Aymerich denunciou a “atitude sumisa” do presidente da Xunta ante os prazos propostos polo Goberno Central para as grandes infraestruturas galegas. “Agora parece ser que imos ter AVE coa Meseta para finais de 2015 e o Goberno español presenta isto como unha sinal de bo trato para Galiza cando Madrid leva conectado con Andalucía, Catalunya e próximamente València desde hai anos. Nós queremos infraestruturas dignas para o noso país e a poder ser construídas no século XXI”, subliñou.

“O Parlamento Galego non pode irse de vacacións en xullo cando a xente está padecendo tantos problemas”

Por outra parte, o portavoz parlamentar do BNG demandou que o Parlamento Galego declare hábil o mes de xullo para seguir traballando. Considerou que non sería de recibo “marchar de vacacións mentras están sen resolver o modelo de financiamento autonómico; mentres os traballadores do metal seguen sen convenio; mentres non se asine o protocolo de infraestruturas ou mentres non saibamos que vai pasar coas caixas de aforros coa nova reforma do Goberno Central, que pode provocar a súa absorción por entidades de fóra”.

“O BNG non se vai ir de vacacións en xullo. Esperamos que os demais grupos apoien a nosa solicitude porque sería bo que, polo ben de Galiza, traballásemos todos e todas” , concluíu.

Actitude antidemocrática do PP para minimizar o papel do BNG

Pola súa parte, a viceportavoz do Grupo Parlamentar do BNG, Ana Pontón, denunciou a “atitude antidemocrática” do PP “que considera o Parlamento un apéndice do Goberno e quere minimizar a capacidade do BNG para levar ao Parlamento temas que lles preocupan aos galegos e galegas”.

Ana Pontón advertiu que con esta actitude “o PP tenta ocultar a falta de iniciativa e de capacidade do Goberno para resolver os problemas do país, como medidas de apoio ao sector lácteo, a resolución do conflito do metal; recortes sociais como a supresión da gratuidade dos libros de texto ou os intentos de privatización dos servizos públicos”.

A viceportavoz nacionalista salientou o intenso traballo do BNG durante estes meses con máis de 1.300 iniciativas presentadas. Porén, denunciou que debido ás limitacións “inxustas e antidemocráticas” impostas polo PP “o 86% das iniciativas do BNG en Pleno e o 91% das presentadas en Comisión quedaron sen tratar”.

O BNG vén de denunciar que só as familias por debaixo do umbral de pobreza accederán ao 100% das axudas para os libros de texto

A deputada nacionalista Carme Adán di que "o que está a facer o PP é eliminar unha medida social e engadir aínda máis incerteza tanto para as familias como para os centros escolares, que non saben qué vai ocorrer"

A portavoz do BNG na Comisión de Educación do Parlamento Galego, Carme Adán, denunciou onte que a supresión do sistema de préstamo gratuíto de libros escolares e a súa substitución polas axudas directas para a adquisición que puxo en marcha o Goberno do PP "é unha medida moi restritiva que prexudicará miles de familias xusto no momento en que peor o están a pasar".

Carme Adán denunciou na mañá de onte durante a comparecencia en Comisión do conselleiro de Educación que "cos dados na man, coa reforma do PP case se podería dicir só terán dereito ás axudas para a compra de libros as familias que se atopen por debaixo do umbral da pobreza".

O INE sitúa neste nivel as familias cuns ingresos de 7.203 euros por persoa no ano 2007. Coas medidas anunciadas pola Consellaría só terán dereito ao 100% da axuda aquelas unidades familiares que obteñan ingresos inferiores a 5.400 euros por persoa e ano, e ao 50% as de entre 5.400 e 9.000 euros.

Por iso, a deputada do BNG denunciou que "o que está a facer o PP é eliminar unha medida social, e engadir aínda máis incerteza tanto para as familias como para os centros escolares, que non saben qué vai ocorrer, xusto no momento no que se atopan máis sobrecargados de traballo".

Ademais, a parlamentar nacionalista preguntou ao Conselleiro de Educación sobre cales son os seus obxectivos canto á creación de prazas de educación infantil (co BNG no Goberno creáronse 6.000 prazas públicas), canto á creación de prazas nos comedores escolares (o Goberno bipartito creou máis de 8.000) ou para a mellora do transporte escolar.

Porén, a resposta do Conselleiro non concretou ningún obxectivo para aumentar estas prazas e mesmo laiouse de que se tratase dun "gasto".

Máis críticas

Carme Adán tamén criticou a supresión das axudas aos movementos de renovación pedagóxica, o incremento de agrupamentos de alumnos e alumnas de diferentes niveis educativos, a falla de medidas para mellorar o ensino no rural, ou "a imposición dun modelo educativo no que non se garante que os estudantes teñan competencia en galego ao rematar os estudos".

Por iso, para a deputada nacionalista "o PP está a aplicar medidas para desmantelar o ensino público, sen escoitar ao profesorado e tampouco ao alumnado".

O novo formato de competición permitiu que o ferrolán sumase os puntos necesarios para ultrapasar o británico Alistair Brownlee.

Xavier Gómez Noya lidera xa a clasificación das Series Mundiais de triatlón, grazas ao sexto posto acadado na corrida de Des Moines, disputada en Iowa (Estados Unidos). Esta proba non figura na listaxe de oito que compoñen o reformado campionato mundial, mais o máis prestixioso torneo por probas do momento inclúe desde este ano a posibilidade de os triatletas acadaren puntos noutras das que tradicionalmente foron as carreiras máis destacadas do circuíto. Neste caso atópase Des Moines, onde o gañador optaba a 300 puntos no canto dos 800 que outorgan as corridas que compoñen as novas Series Mundiais.

O feito de en Iowa non competir o líder do campionato mundial, o británico Alistair Brownlee, permitiu o deportista galego Gómez Noya adiantar e colocarse xa na primeira posición da listaxe. Na loita pola vitoria final estiveron os dous primeiros clasificados dos Xogos Olímpicos de Pequín: o canadense Simon Withfield e o alemán Jan Fródeno (actual campión olímpico). Nesta ocasión foi Withfield o gañador, seguido de Kahlefeldt e de Fródeno, que finalizou terceiro. Gómez Noya perdera o contacto co grupo no último quilómetro e rematou entrando a oito segundos do vencedor.

A cita agora é en Kitzbühel

O 12 de xullo teremos a ocasión de presenciar unha nova entrega do enfrontamento entre Brownlee e Gómez Noya, na cuarta entrega das Series Mundiais. Nesta ocasión a carreira terá lugar na localidade austríaca de Kitzbühel e, pola primeira vez no ano, o galego tomará a saída como líder do campionato.

A ciclista oleirense Eva Castro clasificouse oficialmente en 8ª posición no Campionato de Europa celebrado en Eslovenia despois de que os xuíces tivesen suspendido a final pola choiva dando como válidos os postos das probas clasificatorias.

Esta suspensión provocou que o actual campión do mundo, o español Rafa Álvarez teña acadado no europeo un modesto posto 14, feito que provocou a protesta da maior parte dos participantes, ao entender que o circuíto non estaba espacialmente perigoso e que esta medida adulteraba o resultado final do campionato, pois a choiva caída non afectou da mesma maneira a todos os ciclistas do Four Cross.

Eva Castro, así e todo, segue a estar no "top ten" europeo e a participar na Copa do Mundo cun digno papel entre as mellores profesionais. No BNG de Oleiros animamos á galega, conveciña e amiga do noso concello.

A CORREDOIRA DAS VIÑAS, PUNTO NEGRO EN SEGURIDADE VIARIA

A corredoira das Viñas, que une a Avenida Che Guevara á altura de Santa Cristina coa rúa Xosé Neira Vilas na Canteira de Perillo, atópase sen beirarrúa e escasa iluminación, cunha calzada estreita que fai perigar a integridade dos peóns nun tramo altamente denso que soporta centos de vehículos diarios por comunicar a Avenida Che Guevara coa zona alta de Perillo, que aumenta ano tras ano o número de persoas residentes, e onde se atopan, ademais, o mercado, o centro de saúde, correos, o colexio de primaria, a escola infantil municipal, a piscina, o instituto de secundaria, a Casa da Cultura, a igrexa municipal, etc.

As fochas, a inexistencia de iluminación, e a falta de beirarrúas e cunetas, provocan que haxa un longo tramo desa estreita moi perigoso para os viandantes, pola existencia dun lateral dun muro e dun noiro que non permiten que se poida apartar.

É urxente solucionar este problema coa máxima rapidez nunha zona cunha alta densidade de poboación e de tránsito, lembrándomos que o Concello ten abordado en zonas menos concorridas a creación de beirarrúas ou andéns peonís menos urxentes, aínda que necesarios, que este tramo.

O portavoz do Grupo Parlamentar do BNG, Carlos Aymerich, conminou o presidente Núñez Feijóo a “vestir a camisola de Galiza” na negociación do novo sistema de financiamento autonómico.

Carlos Aymerich retou onte no Parlamento o presidente da Xunta Núñez Feijóo a aclarar se, “en caso de que o acordo do novo sistema de financiamento sexa lesivo para Galiza”, mais beneficioso para Madrid ou València, “os deputados e deputadas galegas do PP nas Cortes van votar en contra -e romper a disciplina de partido- ou van seguir o que diga Esperanza Aguirre e Francisco Camps”.

“A Madrid, Cataluña ou València abóndalle co 50% dos impostos para cubrir os seus gastos, a Galiza non”

O portavoz do BNG reclamou tamén a Núñez Feijóo para que faga unha negociación bilateral co Estado para que Galiza teña suficiencia financeira porque “a cesión do 50% dos impostos chégalle a Madrid, Cataluña ou València, mais esa porcentaxe de cesión é insuficiente para que Galiza cubra as súas necesidades de gasto”.

Ademais, Carlos Aymerich demandou ao presidente da Xunta que aclare a posición do seu partido a respeito do financiamento autonómico. “Vostede ten que reclamar ao Estado que poña máis cartos enriba da mesa porque cos 9.000 millóns de euros non chega, mais ao mesmo tempo o PP en Madrid di que non hai que aumentar o gasto público, como se o gasto autonómico non fose para servizos sociais, sanidade ou educacion”.

“Non lles chame parvos aos galegos, ten que informar dos novos prazos do AVE que vai asinar con Fomento”

Por outra parte, o portavoz do BNG Carlos Aymerich demandou de Núñez Feijóo que informase o Parlamento Galego do convenio relativo ás infraestruturas galegas que asinará mañá [por hoxe] co Ministerio de Fomento.

“Non lles chame parvos aos galegos, ten que dicir cales son as datas que vai negociar porque está compromentendo gravemente os interes de Galiza”, aseverou.

Neste sentido, alertou de que “se os prazos van máis alá do 2013 teremos un problema de financiamento porque nese ano o Estado español verá reducidos sensibelmente os fondos que recibe da Unión Europea para infraestruturas”.

Por último, o portavoz do BNG lembrou ao presidente da Xunta que “o 10 de xullo do 2008 o PP apoiou no Parlamento Galego unha proposición non de Lei que demandaba que o AVE do Eixo Atlántico estivese rematado, como moi tarde, en 2013, e a conexión de Galiza coa Meseta en 2012”.

Bieito Lobeira lamenta que o texto aprobado considere o Galego como “unha barreira lingüística” ou un “lastre”

O deputado do grupo parlamentar do BNG Bieito Lobeira acusou onte o goberno do Partido Popular de consumar o “primeiro atentado lexislativo contra a lingua galega” ao aprobar, en solitario, a reforma da Lei da Función Pública pola que se elimina a proba de Galego nos exames das oposicións á administración.

Lobeira, na defensa da emenda á totalidade presentada polo BNG, cualificou de “ruín, abxecto e miserábel” o proxecto de lei e preguntouse que é para o PP o “consenso” cando se aproba cos votos en contra da oposición e están manifestándose os traballadores e traballadoras da función pública para amosar tamén o seu rexeitamento.

Para o deputado nacionalista, o Partido Popular está a “prostituír” o concepto de liberdade, “amparándose nel para proclamar que o Galego ten que desaparecer e que non vale para nada. Non nos tomen por parvos –engadiu- porque o que realmente perseguen é o exterminio do idioma e da súa oficialidade na administración, o que é unha auténtica vulneración dos dereitos democráticos e dos dereitos humanos, do dereito a falar e recibir atención en Galego”.

O parlamentar asegurou que Galiza, con esta lei, pasa a ser a única Comunidade Autónoma do Estado en que o idioma propio non vai ser obrigatorio nas probas de selección e advertiu que o goberno está a manipular a legalidade en materia lingüística, pois entende o Galego como lingua propia, “ou sexa un dialecto”, e o castelán como lingua oficial.

Ademais, engadiu Bieito, tal e como se recolle no proxecto de lei, o galego é considerado unha “barreira lingüística”, un “lastre”, cando a obriga, legal e estatutaria, é que os poderes públicos defendan o idioma e contribúan á súa normalización, lembrou.

“En función de que intereses traballan vostedes, de Galiza ou dos traballadores de fóra?”, preguntou, ao tempo que agoirou, con esta medida e outras que se están a adoptar en diferentes ámbitos, a desgaleguización total da administración e do país a través “da mesma estratexia de españolización de séculos atrás”.

Bieito Lobeira amosouse convencido de que detrás desta estratexia, o goberno do Partido Popular o que realmente agocha é ser uns “mercenarios ao servizo dunha causa que non se merece este país. Vostedes están fusionados non co país senón coa FAES e os seus argumentos xenófobos. Deixen de converter este Parlamento no local social da FAES”.

O deputado nacionalista concluíu lamentando que nunha lei do Estado se poidan chegar a acordos en materia lingüística e non no propio Parlamento galego e lembrou que son as administracións as que deben estar ao servizo do pobo non o pobo ao servizo da administración.

Reunida a Asemblea Local do BNG de Oleiros onte 22 de xuño de 2009 ás 20h15 en Santa Cruz de Liáns, após a realización dun Consello Local previo á Asemblea, decidiuse aprobar por asentimento na Asemblea Local do BNG de Oleiros a proposta do Consello Local sometida a consideración da Asemblea.

O Consello Local do BNG de Oleiros ficará, por tanto, constituído segundo a proposta aprobada na Asemblea Local, que é a seguinte:

-Coordenador do Consello Local: Xavier Vásquez Freire.
-Responsábel Local: Antonio Ardá Suárez.
-Vice-responsábel: Noelia Papín Estévez.
-Organización e Finanzas: Manuel Ferreiro Bra.
-Responsábel Institucional e Municipal: Xosefina Quintáns Antelo.

Vogais:

-Xuventude: Paula Turnes Paredes (Galiza Nova).
-Educación e Cultura: Manuel Sarmiento González.
-Coordenación parroquial: Dolores Loureiro Iglesias.
-Urbanismo: Antón Tenreiro Ferreiro.
-Igualdade e Benestar: Luz Marcos Buján.
-Deportes e Actividade Física: Xurxo Dopico Calvo.

O senador do BNG, Xosé Manuel Pérez Bouza, realizou unha avaliación da primeira explicación ofrecida polo Ministro de Fomento, José Blanco, na tarde de onte Senado sobre as liñas a seguir no ámbito das infraestruturas.

Neste sentido, o senador nacionalista criticou a ausencia de concreción por parte de Blanco no que atinxe aos prazos temporais e aos compromisos orzamentarios para o AVE galego na exposición que o Ministro fixo na tarde de onte ante a Comisión de CC.AA do Senado.

“Non concretou ningún destes aspectos. Limitouse a realizar un relatorio de proxectos coñecidos xa por todos”, afirmou Pérez Bouza, quen engadiu que o que lle “preocupa á sociedade galega é cando se van rematar as conexións por AVE para Galiza e que orzamentos existen para facelos realidade”.

Para Pérez Bouza “é importante que nestes momentos de crise económica o Ministro informe sobre que financiamento posúe o AVE galego dada a merma de recursos públicos que se está a producir”.

O senador do BNG, Xosé Manuel Pérez Bouza, dirixiuse logo ao Ministro de Fomento na Comisión de CC.AA do Senado, para lle pedir que “verta luz sobre os horizontes temporais e os orzamentos disponíbeis para a execución do AVE para Galiza”.

O senador do BNG reprochou ao Ministro que só fixera un relatorio de todos os proxectos de grandes infraestruturas que están en execución ou en obra, “aínda que, iso si, fuxindo de compromisos concretos canto a datas e disponibilidade de recursos para as levar a cabo”.

BNG demanda “o cando e o como”

Por iso, Pérez Bouza, demandou na tarde de onte a José Blanco que “aquí, na Cámara de representación territorial, aclare a todos os galegos e galegas varias cuestións, cuestións que debido aos enganos padecidos, tanto no pasado como nos tempos recentes, xeran cada día maior confusión e incerteza”.

O senador do BNG dirixiuse a José Blanco para lle dicir que “a cidadanía galega quer saber cando veremos circular trens de alta velocidade tanto no Eixo Atlántico, desde Ferrol e até a fronteira portuguesa, como na liña que ligará Madrid con Galiza, sen esquecer as ligazóns interiores de Ourense con Vigo, Lugo e Santiago”, enfatizou o senador do BNG.

E ademais, “como non é posíbel executar obras sen respaldo orzamentario, explique se para o período 2010-2014 pode garantir os investimentos necesarios para executar estas obras”. Pérez Bouza aludiu ao contexto de crise económica e á merma de recursos públicos para lle preguntar de “onde van saír tais recursos”.

1 [2] [3] [4] [5] [6] [7] [8] ... [163]