Xa temos nas mans o noso C.D. Son de Rianxo. Máis de sesenta gaiteiros novos do noso concello, facendo a música que lle aprenderon aos vellos mestres.
O 14 de novembro ás oito e media da tarde, faremos a presentación pública no Auditorio María Casares da nosa escola, á que estades convidadas todas as familias e os amigos e amigas de Educaldea.
Xunto co C.D. a Biblioteca B.B.S. vén de editar unha guía didáctica, con información adicional e múltiples actividades. Podédela baixar aquí.

Despois duns meses de descanso as mochilas viaxeiras volveron saír desde a BBS cara ás vosas casas. Neste curso contamos con oito mochilas, unha para cada clase, así que non han tardar en chegar a todas as casas. Outra novidade con respecto ao curso pasado é que botarán dúas semanas con cada un de vos, así teredes máis tempo para gozar dos libros, películas e CDs que van incluídos.
O venres sete no recreo celebrouse o primeiro sorteo e xa nese mesmo día Borja, Antía, María Fungueiriño, María Fernández, Marcos , Carlos, José e Sergio marcharon coas súas mochilas ao lombo.
Benvidas mochilas, alédanos contar de novo con vós!

No recreo do venres 31, despois das emocións fortes da entrada e para continuar gozando do Samaín, os compañeir@s de 5º curso xunto con Adrián e Iván de 4º, fixeron unha lectura dramatizada da obra de teatro Indo para o Samaín. Trátase dun texto escrito por Carlos e Sabela Labraña e publicado por Everest.
Temos que facer máis teatro; moito nos gusta a tod@s, a público e a actores e actrices!

Vimos de incluir en recomendados unha páxina que acabamos de coñecer grazas a unha compañeira do CEIP de Aguiño e que nos parece unha marabilla. Trátase de Orella pendella, unha páxina sobre a nosa tradición oral: ditos, recitados e cancións infantís, elaborada por Carlos Yus, membro do grupo Migallas. É o resultado dun amplo traballo de investigación e recollida e está aberta á nosa participación, así que xa sabedes, animádevos a visitala e a aportar o que poidades recoller sobre literatura oral na nosa comarca.

Os alumnos e alumnas de 4ºB recomendávosvos ler o libro de 29 historias disparatadas. Nel atoparedes contos moi especiais, grandes e pequenos, divertidos e disparatados que vos van facer rir. Fixádevos nos debuxos, sin moi simpáticos e chistosos.
Ademais 29 historias disparatadas é un libro que vos pode ensinar a facer historias curtas que non sexan sen graza e botedes media hora a lelas. Todo o mundo pode facer unha así.
As dúas historias que máis nos gustaron aos de 4ºB son a da Super nai e a da muller co gato que comía cada vez máis.
Lédeas!

A nosa BBS estivo moi ben acompañada no Día da Biblioteca. Tod@s, de 1º a 6º achegámonos no recreo para celebrar o día cantando O libro máxico do grupo Migallas, expresando os parabéns de distintos xeitos e recibindo os agasallos que a nosa biblioteca nos tiña preparados:
un marcapáxinas e folerpas de millo.

A nós gustounos este conto porque estaba entre as novidades e recordábanos á primavera. Tratábase dunha aventura chea de auga e monstros. Xa non vos imos dicir máis e agora abride o
libro e sumerxidevos na lectura de PÉTALA, unha aventura na que a fantasia reina.

Temos moita música que escoitar e que gozar!
Vimos de engadir na sección de unidades didácticas un completo repaso polas gravacións de música galega de distintos xéneros e para distintos gustos. Consultadeo e veredes como hai moito onde escoller.

Saiu o primeiro boletín informativo da biblioteca coincidindo coa súa reapertura. Inclúe información sobre os horarios de uso, as seccións da biblioteca e os servizos que oferta para o conxunto da comunidade escolar. Queremos animar ás familias e os antig@s alumnos a vir á biblioteca os martes e venres de cinco a seis e a participar das propostas que vos iremos ofertando.
Acompañádenos e mergulládevos tamén na lectura.

Este martes Pepa e Esperanza abriron a tempada de contacontos con Marea Negra de Pepe Carreiro, un dos contos da exposición central da campaña Mergullate na Lectura.
Xa sabedes, a cita é todos os martes no recreo, animádevos a participar.

Un día da semana pasada un león entrou na nosa biblioteca. Axudounos a lembrar canto nos gusta estar nela e como podemos, entre tod@s, facela cada día máis acolledora e máis viva.
Antes de que este luns reabriramos a biblioteca, cada curso tivo unha primeira sesión para lembrar normas, recordar como atopar os libros, descubrir novidades... Todas as sesións comezaron compartindo este fantástico libro da editorial Ekaré, escrito por Michelle Knudsen e ilustrado por Kevin Hawkes.
Convidámosvos a tod@s a seren auténticos leóns de biblioteca.

A última mañá de setembro preparamos as nosas novas táboas para a biblioteca e o patio en xogo. Traballamos por ciclos deseñando e decorando as táboas que nos permitirán buscar e consultar materiais na biblioteca e coller xogos no recreo. Intentamos reflectir o lema da campaña deste curso: Mergúllate na lectura.

1 [2] [3] [4] [5] [6]