A lingua, ademais de para moitas outras cousas, tamén vale para facernos rir, así que pensamos que non estaría de máis contar neste blog cun apartado de humor. Nel incluiremos monólogos de conteiros, entrevistas a humoristas, momentos de programas de humor da tele como O show dos Tonechos ou Air Galicia, humor gráfico e o que se tercie.

Aquí tedes un dicionario de mensaxes breves e emoticóns para móbiles, elaborado polo alumnado de Técnicas de Expresión Escrita do IES David Buján de Cambre. Pode servos de moita utilidade para o concurso de SMS, pero tamén, por suposto, para as vosas mensaxes diarias en galego.

Dámoslles as grazas aos do David Buján de Cambre por compartir na rede o seu traballo.

Por terceiro ano consecutivo, o concello do Porriño convocou un concurso de mensaxes de móbil en galego.



Para participar basta con enviar unha mensaxe ao número 679039567.

A mensaxe, de tema libre, debe estar escrita en galego e non pode exceder os 160 caracteres, nin usar tiles.

As mensaxes poden enviarse até o 11 de maio de 2007.

Darase a coñecer o SMS gañador antes do 17 de maio.

Na edición anterior participaron 90 persoas e a gañadora foi Maite Mosquera con esta mensaxe:

"Q ironia prstituir a lngxe, desangrlas plbras e prcurar l cdgo q n custe + d 15 ctms s ste monte m impde chgar a ti. Vou ver s atopo l pomba c cbrtura"

Concurso de declaracións de amor na rede convocado polo Consello da Xuventude de Galicia.

Envía unha declaración de amor.

Máis información

Con este blog queremos dar comezo a unha nova andaina do Equipo de Normalización Lingüística do IES Breamo de Pontedeume, nela abrímoslle as portas a toda a comunidade educativa interesada no proceso de normalización.

Chamámoslle AS GABARRAS porque así se chamaba o lugar onde agora está construído o noso instituto e porque lles queremos ás palabras e non podemos deixar de quererlles aos nomes propios dos lugares (topónimos), mesmo aos dos máis pequenos (microtopónimos), pois en cada nome de lugar vive a historia de centos de persoas que pasaron por el e que o nomearon.

As gabarras son embarcacións de construción sólida, pequenas e de fondo chato, destinadas á carga e descarga nos portos e tamén ao transporte de mercadorías pola costa. Xa usamos hai anos AS GABARRAS en formato revista para transportar poemas e contos e agora queremos usar este vehículo na rede para compartir convosco as nosas inquedanzas e ilusións polo futuro da lingua.

[1] ... [59] [60] [61] [62] [63] [64] [65] 66