Caderno do Equipo de Normalización e Dinamización Lingüística do IES Breamo
As gabarras son embarcacións de construción sólida, pequenas e de fondo chato, destinadas á carga e descarga nos portos e tamén ao transporte de mercadorías pola costa.
Queremos usar este vehículo na rede para compartir convosco as nosas inquedanzas e ilusións polo futuro da lingua.
Velaí vai outro curso e con el moitas cousas vividas. Para a lingua foi un tempo máis axitado do habitual, digamos que estivo na boca de todo o mundo dun xeito ou doutro e o blog As Gabarras quixo ser testemuña das declaracións e actuacións que en política lingüística levaron a cabo os diversos axentes sociais (públicos e privados), porque a política lingüística non a deciden só os políticos, aínda que teñan a máxima responsabilidade na defensa da lingua, pois o resto da sociedade tamén ten moito que dicir e facer polo idioma.
Tamén recollimos aquí unha pequena parte da marea de reflexións sobre a lingua que circularon polos medios de comunicación e que na primavera desbordaron todo o imaxinable.
Ademais seguimos coa recollida dalgunhas mostras do humor en galego que se pode ver por internet e da música de todos os estilos que se está a facer, pois este foi un moi bo ano para a música galega e por fin se está notando o intenso traballo, tanto das institucións como da xente da musica (os grupos, as casas de gravación, as editoras de música on line, xente da radio e da tele...), que fixeron un labor de difusión moi interesante e desexamos que imparable, pois aínda que xa se recibiron malas novas sobre a política nos medios de comunicación ao respecto, o traballo de creación está na man dos artistas e a rede permítenos algo que hai anos era impensable, sobrevivir ao silenciamento sistemático dos medios de comunicación. Así que confiamos en que o ano que vén a oferta sexa moito maior e o acceso a toda esa creatividade musical se multiplique.
E para despedírmonos até o curso que vén, aquí deixamos un dos éxitos deste curso, "A festa non vai parar", ese tema da música dance que recibiu un honroso sétimo posto no Festival Eurodance 2008 representando a España, e como xa temos no blog As Gabarrasa versión orixinal de Dj Son1c, cantada por Isis, amosamos nesta ocasión a versión dos brasileiros DM'Boys, porque a boa música acaba por rachar as fronteiras!!!
Representantes da Coordinadora de Equipos de Normalización e Dinamización Lingüística nos centros escolares achegáronlle á Xunta un decálogo "para o consenso".
A Coordinadora Galega de Equipos de Normalización e Dinamización Lingüística tivo esta cuarta feira unha xuntanza co conselleiro de Educación, Xesús Vázquez, onde lle expresaron a "preocupación" e o "malestar" diante da polémica orixinada arredor da lingua galega no ensino. "Esta polémica é moi negativa para a convivencia nos centros, e polo tanto para a educación en xeral e para a lingua en particular", indican. Ao fío, achegámoslles os dez puntos debatidos pola coordinadora este xoves co conselleiro e en base aos cales os representantes do colectivo solicitaron da Xunta que, como parte "fundamental" do sistema educativo, se lles permita participar na elaboración de "calquera documento que lexisle o uso das linguas no ensino":
1.O marco lexislativo educativo ten que evitar a confrontación na comunidade escolar.
2.O alumnado non pode ser segregado por razón de lingua.
3.Débese garantir a presenza do galego no ensino ao 50% como mínimo para poder acadar a competencia nas dúas linguas cooficiais. Só así o alumnado poderá escoller en liberdade.
4.Téñense que elaborar materiais didácticos, de calidade e actualizados, en lingua galega para todas as materias e todos os ciclos educativos, que suplan as carencias existentes.
5.Hai que ofrecerlle ao profesorado cursos de reciclaxe e capacitación en lingua galega; para isto é imprescindible contar cun programa previo de formación de formadores.
6.Cada centro debe seguir elaborando o seu Proxecto lingüístico, que é a base para que os ENDL desenvolvan as súas funcións unha vez analizada a situación sociolingüística do centro.
7.Decreto de infantil.
A)Nesta etapa débese garantir que o alumnado adquira de forma oral e escrita o coñecemento das dúas linguas oficiais tendo en conta que a lingua minorizada precisa de maior reforzo.
B)Propoñemos que avalíen os resultados das liñas de galego en infantil de cara a manter este programa. Os informes elaborados nestes centros valoran moi positivamente estes proxectos xa que permitiron conseguir que todo o alumnado adquirise a competencia nas dúas linguas oficiais, fose cal fose a lingua inicial dos rapaces e rapazas.
8.Equipos de Normalización e Dinamización.
A)Débense implementar programas de formación en dinamización lingüística para o profesorado interesado.
B)Hai que potenciar as coordinacións intercentros.
C)Téñense que consolidar as funcións das coordinadoras provinciais dependentes da DXPL.
9.A administración debe realizar campañas efectivas de dignificación da lingua, que comecen polo propio goberno da Xunta. A situación do galego é moi delicada, por iso algunhas accións e declaracións realizadas nos últimos tempos cuestionan o labor de recuperación do galego feito ata o momento.
10. Parécenos inadecuado que a enquisa sexa a base dun decreto novo. Esta consulta, tal e como foi realizada, non pode ter ese peso nunha lexislación educativa. En cambio, débense ter en conta conta os diferentes datos sociolingüísticos existentes tirados de estudos elaborados con rigorosidade (MSG, IGE), así como os diferentes Proxectos Sociolingüísticos de Centro realizados nos últimos anos.
A Asociación do Profesorado de Tecnoloxía de Galicia (APETEGA) quere facer público o seguinte comunicado:
Como asociación de profesorado, queremos manifestar a nosa preocupación ante a intención do novo goberno de Galicia de derrogar o Decreto 124/2007 polo que se regula o uso e promoción do galego no sistema educativo.
Consideramos que a lingua galega forma parte da riqueza e da idiosincrasia do noso país, e como todos sabemos o seu uso está en alarmante retroceso.
Dende as institucións educativas debe ser transmitida e apoiada para fomentar o seu uso, buscando unha situación de igualdade real entre as dúas linguas de Galicia.
Asociación do Profesorado de Tecnoloxía de Galicia, APETEGA
Non queremos marcharnos de vacacións sen antes deixar aquí constancia dunha banda de punk/rock eumesa que xa é máis que unha promesa: ArengA.
Os integrantes do grupo son Chelen (bataka e coros), Pablo (baixo e coros), Miguel (guitarra solista) e Xabi (guitarra e voz) e as súas caras sonnos moi coñecidas no Breamo, así que agardamos con impaciencia a súa maqueta.
Xa está na rúa A tribu, o último disco da banda de rock de Cerceda Zënzar, pero hoxe poñemos a navegar nas Gabarras este temazo que lle deu título ao seu anterior álbum Sigue... e dálle, que viu a luz en 2006:
Preséntase no Museo do Pobo Galego o Arquivo do Patrimonio Oral da Identidade (APOI), traballo que xurdiu da evolución do proxecto Sons e Voces da Identidade, programa de dixitalización, catalogación, estudo e difusión do patrimonio inmaterial, que creou o Instituto de Estudos das Identidades do Museo do Pobo Galego.
Nos momentos iniciais, o proxecto contou cunha abondosa "materia prima", consistente nunhas 600 fitas recollidas de informantes da Galiza rural directamente, ou baixo a súa dirección, por Xosé Luís Rivas, Mini, e Baldomero Iglesias, Mero, nos últimos 35 anos.
Tamén se dispuña no fondo do Museo dunha colección de gravacións realizadas en 1994, como resultado do proxecto interactivo museo-escola Recupera-la tradición oral.
Despois dun laborioso proceso de tratamento das gravacións orixinais, transcrición e construción dunha base de datos, o APOI está en condicións de entrar en funcionamento e desde aquí dámoslle a benvida.
Dez compañías punteiras do país comprométense a introducir de xeito gradual o galego na súa actividade seguindo convite do Foro Peinador.
Son Itelsis e Egatel (grandes empresas galegas do sector das telecomunicacións);Tuconsa (construción); Travibus Noroeste (agrupación provincial de transporte público); Progando (subministro de pensos); Vulcano (estaleiros de construción naval); Fegatur (entidade que reúne aos negocios de turismo rural); Celtic Estores (empresa que fabrica seis milleiros de estores diarios); Pórtico Audiovisuais (produtora); e Academia Postal (encargada da formación dos futuros funcionarios da administración pública).
O acto formal foi a sinatura dun convenio de colaboración coa Secretaría Xeral de Política Lingüística, un acordo que contempla a promoción da nosa lingua nas súas relacións internas e externas. Na documentación, nas páxinas web, na sinalización, na documentación administrativa, nos actos sociais da entidade ou en actuacións formativas: o galego comezará a ser unha lingua máis de referencia nos seus actos comunicativos.
No seu conxunto, segundo explica o presidente do Foro Peinador, Xosé González, estas dez compañías suman unha cifra nada desprezábel de máis de sete mil traballadores. De aí a importancia da iniciativa, xa que, ademais, contempla a promoción do galego entre o cadro de persoal.
Mais, unha das grandes conquistas deste proxecto, que o Foro Peinador leva reeditando dende hai tres anos, é a conversión da lingua en activo empresarial, nun elemento de interese para o sector económico.
O verán chegou o 21 de xuño, pero nós recibímolo con honores onte na noite de San Xoán saltando o lume novo e pedindo "que non nos trabe cadela nin can, nin cousa mala que ande polo chan" e hoxe lavando a cariña coa auga das herbas de San Xoán.
Feitos todos estes traballos, xa podemos dicir que lle demos a benvida ao verán e entregármonos a el ben purificad@s e coa ledicia merecida.
A EXPERIENCIA DESTE CENTRO MONOLINGUE REVELA QUE NON SE DAN EIVAS NA APRENDIZAXE DE CASTELÁN
Nun momento no que está de especial actualidade o debate sobre a lingua no ensino, podemos escoitar como se ve isto nun dos escasos centros de ensino que traballan cun sistema de inmersión en galego no noso país, o colexio Andaina, centro privado concertado da Coruña.
Xabier Álvarez, coordinador do Equipo de Normalización Lingüística do colexio Andaina, na Coruña, explícanos como funciona o seu sistema e os resultados que dá logo de vinte anos.
“Fóra dos primeiros cursos de infantil, o emprego oral na práctica é moi reducida”, sinala. “Como non se aplique ben o actual decreto, o futuro é francamente preocupante para a nosa lingua”, conclúe.
A EXPERIENCIA DESTE CENTRO MONOLINGUE REVELA QUE NON SE DAN EIVAS NA APRENDIZAXE DE CASTELÁN