Nunha recente entrevista concedida polo escritor e xornalista Xabier Cid a Tempos Novos confirmaba a desaparición do fenómeno blogueiro galego: "o blogomillo, como comunidade, desapareceu. A ninguén lle importa xa o que se fai no blog do lado". Basea a súa opinión no feito, segundo el, de que "Blogalego e Blogaliza nunca funcionaron axeitadamente" e partindo da premisa de co blogomillo era a bitácora de María Yáñez "Todonada no centro e catro ou cinco blogs básicos".
Aínda que non teño moi claro o significado exacto do termo blogomillo non podo estar de acordo con Xabier Cid en ningunha das súas afirmacións. En primeiro lugar se por blogomillo se entende o conxunto de blogs feitos por galegos ou descendentes, na Galiza ou na diáspora, maioritariamente escritos en galego e fundamentalmente agrupados en torno a un ideal galeguista ou de amor ó país; non so non desapareceu senón que se multiplicou dende fai uns anos e segue a medrar. Ocorre que ó tomar unhas dimensións de certa envergadura non pode funcionar seguindo a teoría dun blog central ó rededor do que xiran os demais como simples satélites.
Hoxe as bitácoras galegas son moitas e de moi diversa temática debido a evolución natural que se produciu como noutro fenómeno cultural calquera. O perigoso sería que se houbera quedado estancando nesas bitácoras primitivas. En canto a Blogalego e Blogaliza, así como Chuza, si funcionan como elementos de cohesión de todo este novo mundo que deixou a teoría centrista para dispersarse e crear non un senón varios novos centros de referencia.
Non teño ningún dato obxectivo para defender a miña tese pero estou convencido de que o blogomillo nunca tivo tan boa saúde.