Como xa vén sendo habitual, a Asociación AIRA DAS MANTAS organizamos unha nova xornada de xogos tradicionais cunha boa tarde en canto ó meteorolóxico se refire así como á participación, xa que foron moitas as persoas (de todas as idades) as que se pasaron pola Praza das Toldas de Maceda na tarde do sábado 12 de novembro para abrir boca pois deseguido tivo lugar o magosto popular.
Foi o primeiro en coller e empregar o aro unha persoa (nin neno nin vello)que quixo -nun breve tempo- lembrar os seus anos mozos cando, estamos seguros, correu e disfrutou polas rúas de Maceda empregando o aro, anos ha!
Logo xa foron achegándose os máis pequenos, preguntando cando empezabamos cos xogos e unha vez se lles dixo que cando eles/elas quixeran, o que tardaron en remexer entre os que tiñamos colocados nas mesas auxiliares!
Éstes/Éstas animaban, en especial, ás súas nais e outras acompañantes que tamén sentiron o vermiño de botarlles unha man coa corda -sobre todo- e facendo algunha que outra proba cos aros (os hoolahops, dinlles nunha linguaxe máis técnica!), pero ollando de reollo e aproveitando os momentos en que consideraban que ninguén as vía.
Tamén se usaron as gomas, aínda que menos e os homes (nenos e maiores) inclinábanse polos aros e mais polos peóns.
Un dos xogos polo que se interesaron bastante -máis os pequenas que os maiores e concretamente as nenas- foi polo xogo das tabas, no que foron instruídas, rápida e moi eficientemente, por compañeiras da nosa Asociación.
Así pois, foi pasando a xornada e cada vez xuntándose máis xente, ata que o arrecendo dos chourizos foi quen de ir atraendo a xente que empezou a considerar mellor elección o feito de meter algo sólido no bandullo que seguir trouleando cos xogos.
A isto xuntouse a chegada -ós poucos- da noitiña e mesmo un fresquiño que nos moveu a darmos por rematada esta IV xornada adicada ós nosos xogos, os xogos de sempre!

DEICA O ANO QUE VÉN!

Xa está na rúa o nº 3 da nosa revista ALCATRUZ. Hai exemplares desta repartidos por distintos locais da nosa vila como son A Cervexería e mais A Casa Rosa, pero tamén se pode facer cun exemplar quen queira contactando con algún/algunha compoñente da nosa Asociación.
Abofé que non sen moito esforzo pero si con moita máis ilusión, seguimos adiante co noso proxecto comezado aló polo 2008; daquela cuns medios precarios, pero que puidemos ir mellorando -en canto ó seu acabado se refire- dada a inestimable axuda e colaboración no financiamento da mesma de Paco Nóvoa, director do Grupo Academia Postal, sen o cal podemos asegurar que non dariamos chegado ata o actual número por moito esforzo que puñeramos todos os implicados/das neste bonito proxecto que constitúe a devandita revista.
Así pois, esperamos poñer á disposición de todo aquel/a que tivera interese nalgún dos seus artigos e/ou outros contidos a versión dixital ou electrónica da revista ALCATRUZ en vindeiras datas, mediante un enlace que colocaremos embaixo á dereita deste texto.
Tamén queremos dende aquí facer unha chamada á participación en posteriores números da revista con artigos e/ou contidos que teñan que ver con Maceda e a súa bisbarra e/ou mesmo de carácter autonómico.
Polo que se tés algún tema e estás disposto/a a colaborar connosco non deixes de contactar -polo medio que queiras- e moi gustosamente atenderemos ó teu ofrecemento.

Onte, día 15 de maio de 2011 –como estaba previsto- celebramos en Maceda a xornada que a a nosa Asociación tiña programada co gallo do día das Letras Galegas 2011.
Temos que dicir que a climatoloxía nos acompañou, pois disfrutamos dun sol radiante, para poder montar a exposición sobre o Camiño de Santiago na rúa, así como a Feira do libro en galego e a actuación do contacontos Fran Guede que deleitou ó publico asistente co seu bo facer e unha innata capacidade de atracción para cos nenos/as e, asaí, facelos/las partícipes e mesmo convertelos/las en improvisados/as actores/actrices.
Entre o público asistente atopábanse pequenos, xoves e maiores que ó seu remate o recompensaron cuns prolongados aplausos.
Ó remate da devandita actuación, foron agasalladas todas as persoas asistentes á mesma cun material –que agradeceron grandemente- cedido para a ocasión pola Deputación de Ourense a través do seu Dpto. de Publicacións a petición da Asociación; así como o conto tirado da tradición oral “O GALO DA DERENA” que AIRA DAS MANTAS publicou para a ocasión, que é o terceiro da Colección Contos de sempre.
Tamén salientar a presenza de Higinio Castillo Gómez, que foi quen -desinteresadamente,a petición nosa, tivo a ben colaborar connosco mediante as preciosas e ben acabadas ilustracións do devandito conto.

Un ano máis, como aportación da Asociación AIRA DAS MANTAS á celebración do Día das Letras Galegas edita un número máis "O GALO DA DERENA" -e van tres con éste- dos contos recollidos da tradición oral e que a nosa Asociación repartiu, de balde como vén facendo dende a edición do primeiro deles, entre os pequenos/as, nais/pais, avós/avoas e máis persoas que puideran ter a quen levalos para que poidan participar desta rica literatura na que se mistura a realidade e a ficción en distintas proporcións e abundando máis a segunda que a primeira -claro está!- e seren amais de coñecedores, transmisores desta a futuras xeracións (por que non?)

Onte, día 13 de novembro –como estaba previsto e cunha considerable asistencia de público- tivo lugar a Polafía que a Asociación cultural AIRA DAS MANTAS en colaboración coa Asociación de Escritores en Lingua Galega (AELG) organizaron no Centro Sociocomunitario de Maceda.
Temos que salientar que –por causas alleas á vontade da Asociación quen tiña apalabrada a asistencia de 4 persoas máis que ían ser quen expuxera coñecementos e mais vivencias xa da súa vida profesional xa da non profesional- faltaron á cita, trastocando así a idea con que inicialmente, os organizadores desta Polafía, planificaramos a mesma; mais, podemos dicir -desde o noso punto de vista- que saiu non tan mal como nun principio nos levou a pensar ó non poder contar con todos/as aqueles/las con quen pensabamos contar.
O que esta Polafía se desenvolvera dun xeito ameno, por así dicilo dada a tención e posteriores aplausos do público asistente, debémosllo a Antonio Reigosa (coordinador da AELG) polas súas demostradas dotes de excelente dinamizador que coa axuda dalgún dos presentes soubo ir involucrando a persoas que, ós poucos e sen decatarse –diría eu-, foron sendo partícipes de algo para o que elas non supoñían estaban alí.
Así pois, participaron –á súa maneira- Carmiña, Teresa e Lola das cales a primeira se animou cun conto que fixo as delicias dos/das presentes.
Antes que éstas, Antonio Reigosa convidou a Jorge Cid (albardeiro de Maceda que xa se prestara a participar nesta Polafía) para que falara acerca da súa profesión.
Intercalando as actuacións duns e doutros/as foron intervindo as compoñentes do grupo de pandereteiras DEBANADOIRA así como compoñentes da Banda de Gaitas de Maceda e que foron amenizando a velada con distintas pezas musicias.
Unha delas - solicitada por unha persoa de entre o público- deu por rematada a Polafía, non sen antes marcarse un baile unhas cantas mulleres das alí presentes.
A parte literaria foi –marabillosamente- desenvolvida por Isidro Cid (compoñente da AELG) mediante a lectura de distintas poesías de autores ourensáns entre eles Otero Pedrayo, Vicente Risco, …
Por último, atopándose entre o público o profesor Ambrosio Borrajo –colaborador da Asociación cultural- foi convidado a participar e como é habitual nel fíxoo falando sobre o santuario dos Milagros, algo que el leva estudiado xa hai moito tempo. Acerca disto, dicir que a súa exposición foi do gusto da xente asistente e ó final recompensado cuns agradecidos aplausos.
Antes de rematar este comentario, queriamos facer público o noso agradecemento a José María (compoñente do grupo da Banda de Gaitas de Maceda), pois a súa esencial axuda e colaboración que brindou a Antonio Reigosa (que éste aproveitou moi habilmente para ir –como xa comentei anteriormente- involucrando a distintas persoas que estaban asistindo a esta Polafía) serviu para dinamizar e darlle certo protagonismo a varias das persoas que asistiron a este acto. Entre eles/elas cabe citar un señor -de avanzada idade e do cal non lembro o seu nome- que ó final facendo caso omiso dos “dardos” lanzados por José María para animalo a que contara os moitos contos e lendas que –segundo éste- sabe, saiu sen facernos partícipes dos seus supostos saberes.

Antes de dar por rematado este comentario o noso agradecemento á AELG, en particular ó seu coordinador Antonio Reigosa –con quen tivemos un fluído contacto para a planificación e organización desta Polafía- por darnos a oportunidade de colaborar con ésta nunha actividade que tén como principal obxectivo “sonsacar” animando ás xentes para que compartan contando lendas, contos, cantando cantigas, recitando poesías, … e dándoas a coñecer a aqueles/las máis novos/as e, tamén, ós/ás que non o sendo non saben deles/las.
Tamén –como non- a Jorge Cid, ás compoñentes do grupo de pandereteiras DEBANADOIRA e ós compoñente da Banda de Gaitas de Maceda, pola súa desinteresada participación e colaboración nesta Polafía, sen esquecernos de Isidro Cid e mais de Ambrosio Borrajo e, por suposto, a Ana Casal (directora do Centro Sociocomunitario de Maceda) polo seu inestimable apoio, perante a Delegación de Traballo e Benestar, para que esta actividade puidera ter lugar neste Centro.
Todos eles -ó remate da Polafía- foron convidados a uns pinchos con que a Asociación de Escritores en Lingua Galega quixo agradecerlles a súa importantísima e inestimable colaboración.
Se queres ver algunhas fotos, clica no enlace.

1 [2] [3] [4] [5] [6] [7] [8]