Viveireando


Sitio onde se conserva algunha cousa e donde se propaga.

Contacta
viveireando@gmail.com
 CATEGORÍAS
 BUSCADOR
 BUSCAR BLOGS GALEGOS
 ARQUIVO
 ANTERIORES

Viaxeiros ( II ): Aubrey F. G. Bell visita Viveiro
O critico literario e historiador Aubrey F. G. Bell visita Viveiro no ano 1922. Da súa obra, “ Spanisch Galicia” ( 1922 ), publicada posteriormente en galego co título “Galicia vista por un inglés”, ( Editorial Galaxia, 1994 ) , escollo a colorista descrición que fai do Viveiro dos anos 20:
“…vila rodeada de montañas cubertas de piñeiros no esteiro do río Landrove. As orquídeas en enredadeira e as hortas miran desde o alto a ría, e nos balcóns escanabouzados, acubillados baixo os beirados, florecen os xeranios e os caraveis, ou unha manta vermella aparece pendurada ao longo da baranda”. “É desde logo—segue escribindo o viaxeiro inglés—unha cidade fascinante, un semicírculo de vellas murallas sobre as abas costentas dos outeiros, con portas estreitas en forma de arco e escuras calellas”.

Categoría: Xeral - Publicado o 08-07-2011 20:48
# Ligazón permanente a este artigo
Viaxeiros ( I ): George Borrow pasa por Viveiro
Releo “The Bible in Spain” de George Borrow. Nesta obra—a edición española conta cunha introducción de Manuel Azaña— o viaxeiro inglés narra como chega a Viveiro no ano 1837, desde Ferrol.
O vendedor de Biblias entra na vila pola noite, acompañado por dous guías, un deles contratado en Couzadoiro, e escribe: “…vimos diante de nós os muros de Viveiro, sobre os que derramaba a lúa un débil resplandor. Entramos por unha porta abovedada, alta e, ao parecer, ruinosa…”. Borrow, tamén anota: “ Todo o mundo estaba en Viveiro sepultado nun profundo sono; nen sequer un can nos saudou cos seus ladridos…”. Despois de durmiren nunha pousada, nun “edificio grande e ruinoso”, deron unha volta pola vila que para George Borrow “consiste en pouco máis dunha rúa longa, na aba dun empinado outeiro, moi poboado de bosque e árbores frutais”.

Así conta Mr. Borrow o seu paso por Viveiro.
Categoría: Xeral - Publicado o 07-07-2011 18:24
# Ligazón permanente a este artigo
Con don Álvaro n´As Tixolas ( En 50 palabras )
Se cadra o godello tivo algo que ver...
Fora un día de fervorosa devoción e non era esta a primeira capela que visitaba.
Sentei e puxéronme o 1º: crema de cabazo con virutas de xamón...Seguín dándolle ao godello.
Cando levantei a vista--xúrocho Augusto--don Álvaro aínda estaba alí.
Categoría: Xeral - Publicado o 06-07-2011 12:42
# Ligazón permanente a este artigo
Na mesa con Cunqueiro
Ás veces onde menos se pensa salta a lebre. Ou o que o mesmo: tomando un chiquito xorde a agradábel surpresa. Cóntolles. A baiuca As Tixolas, en Covas, agasállanos nestes días coa Antoloxía gastronómica e literaria Na mesa con Cunqueiro. E convoca un concurso de relatos curtos ( 50 palabras ).
Unha, querendo participar fóra de concurso, fóra de prazo e –supoño— fóra de lugar, compuxo un texto de 50 palabras que quer ser tamén unha homenaxe a Augusto Monterroso, escritor guatemalteco, autor de “El dinosaurio”, un dos relatos máis curtos que coñezo: “Cuando despertó, el dinosaurio todavía estaba allí”.

( O meu relato curto, vai deseguido )
Categoría: Xeral - Publicado o 06-07-2011 12:33
# Ligazón permanente a este artigo
Divagación
Pasados os fastos imperiais ( louvado sexa Charles Uve e compaña ) entramos de cheo na tempada estival. No Consistorio o labor de dillei pasa a ser preponderante. Panem et circenses ou boliños preñados e play-back de balde na Praza Maior, xa saben.

E unha, apartada do mundanal ruído, aproveita o lusco-fusco para as paseatas á beira do mar. De cando en vez chegan os ecos da canción sabiniana “…ediles socialistas, putones verbeneros…cronistas carroñeros…estaban todos menos tú, todos menos tú…”

En fín que se lle vai facer, xa corre o mes de xullo e hai que aproveitar o tempo. Releo O ano do cometa de don Álvaro Cunqueiro, na versión teatral de Quico Cadaval que me traslada a outra vila. ( A outra vila? )

“Todas as rúas da cidade conflúen na porta da ponte…A ponte, segundo dicen os cronistas titulados, foi construída polos romanos, destruída polos suevos, reconstruída polo demo, dinamitada polos franceses e finalmente reparada a expensas da cidade que lle puxo á frente unha estatua de Xulio César de mármore, disque de Carrara”.
Categoría: Xeral - Publicado o 05-07-2011 19:17
# Ligazón permanente a este artigo
[1] 2
© by Abertal