|
|
|
|
|
|
| 9 de outubro |
|
 Mais haberá outros,
claro que haberá outros
dignos de recibirte
comandante,
baixo os claros castiñeiros deste outono,
sen chumbo aínda que estoupa
de inmundicia.
Hai un furor interno,
unha batalla,
un querer berrar e bater forte.
Unha lava brutal que está agardando.
Mais o volcán non é volcán,
só monte frío,
só coroa de seixo e só de terra,
sen árbores, sen toxo, sen carqueixa,
duro e calvo cume
que nos cega.
Mais haberá outros,
claro que haberá outros
dignos de recibirte
comandante.
Este poema pertence ao libro Pel de ameixa, 1996, e toma prestados os primeiros catro versos do poema que Mario Benedetti, "Consternados, rabiosos", escribiu e publicou en homenaxe ao Che Guevara. Tamén Silvio Rodríguez escribiu a canción "Hombre" (de 1987 no disco Silvio 1992) en homenaxe ao Che. |
|
|
|
|
| Deixa o teu comentario |
|
|
|
|
|
