A. C. Irmáns Suárez Picallo - Sada


Este blogue nace co obxecto de difundir a actividade da A. C. Irmáns Suárez Picallo, así como de recuperar e por a disposición do público diversos materiais de interese sobre o noso pasado,ao tempo que damos a coñecer os artigos escritos por Ramón Suárez Picallo e outros autores sadenses.
Estruturamos o blogue en varias seccións, nas que terán cabida noticias de actualidade sobre as nosas actuacións, artigos, textos históricos, fotografías...


Visitas (desde o 05/08/2010)





Únete a nós!
comisionsuarezpicallo@gmail.com
 CATEGORÍAS
 GALERÍAS FOTOGRÁFICAS
 RECOMENDADOS
 BUSCADOR
 BUSCAR BLOGUES GALEGOS
 ARQUIVO
 ANTERIORES
 DESTACADOS

A OBRA DOS IMPERIALISMOS ASOBALLADORES - Xohán Antón Suárez Picallo
N-ista hora en que todol-os anceios debesen camiñar cara o Progreso e a Libertade do home, sobor da vella Europa, volven a soar, coma fai 21 anos, os cañóns destructoes que deixan tras d-eles, door, miseria e odio. A Italia ou mellor dito Mussolini, acendeu a fogueira que cecais se extenda da milenaria Abisini, a toda Europa e logo ao resto do mundo. Todo por un cacho de terra máis para o vulgo. Por un desexo imperialista de impoñerse pol-a forza para nós. Porque terra sobra cando se travalla ben, i-en todo caso cando non chega, pol-a razón pídese máis, alí onde hai tanta virxen agardando que o brazo do home a faga producir a cotío. Mais nada d-esto é a causa. A causa é o orgulo da forza, cando ésta, non está frenada pola razón. Esa forza que apricada a defensa d-unha causa xusta poidese ser disculpabel.

Que os patrioteiros canten agora himnos aos pobos grandes en quilómetros e baionetas. Ahí teñen a mostra dos ventos que traen agora, e os que traerán logo. Porque a guerra non só, con ser d-abondo xá, é a loita no campo de bat6alla. A guerra, son os orfos, os inútiles, e os centos de miles de mortos que caen na loita. A guerra é a crisis que trae como consecuencia do despilfarro que se fai no tempo que dura. A guerra será tamén as comocións sociaes, políticas i-económicas que irremisiblemente, han producirse como resultado d-ela, e que os patrioteiros achacan sempre a marxistas, antipatriotas, etc., etc. Para eles un <> ten sempre razón, aínda que éste sexa como Mussolini. E un pobo non é grande, aínda que sexa berce de sabios, e disfroite d-un outo nivel de vida, se non ten moitos barcos de guerra, soldados e cañóns, ademais d-un <>. Checoeslovaquia, Suiza, Suecia, Holanda, Dinamarca e outras nacións pequenas en eistensión, para eles non valen rén. Pol-o visto n-unha Patria moi longa estase mellor pasando fame, que n-unha pequena comendo e vivindo relativamente ben. Claro que os feitos encarréganse de amostrarlles todol-os días a falla de senso dos seus argumentos; eles, porque nós, estamos de volta do que buscan coas súas teorías. Para nós un dictador, un imperio e moitos cañóns, camiñan sempre ao mesmo: opresión e guerra. E por eso estaremos sempre contra eles, non por esprito de contradición, senón por lei natural, de que o home non pode ser nemigo do home, serán o irmán e o amigo e proteitor. Que temos razón, vémolo todos os días, e agora n-ista hora de anguria en que se quebran as máis fondas espranzas de paz entre os homes máis que nunca. Por elo con máis afinco, seguiremos o noso camiño federalista, humán, frente aos imperialismos asoballadores que levan detrás d-eles a guerra, o odio entre uns e outros, e a máis desesperante miseria enxendradora das loitas fraticidas na humanidade.


Sada, Outono 1935.

(A Nosa Terra, 05/10/1935)
Comentarios (0) - Categoría: Textos históricos - Publicado o 18-10-2009 13:01
# Ligazón permanente a este artigo
Xohán Antón Suárez Picallo
Nacido en Veloi (Sada) no 1907, protagonizou numerosas iniciativas no campo político, sindical e cultural dentro da súa vila e da comarca mariñá.
A primeira noticia que temos sobre el, deixóunola o seu irmán no 1926, cando integraba a agrupación nacionalista Mareiras, de Sada. Durante a II República actuaría coma vicepresidente do grupo local do PG, conselleiro comarcal do PG e membro do Consello Nacional do partido (1935-1936), presidente do Ateneo de Cultura Política y Social de Sada (1935), secretario xeral da Alianza de Esquerdas-Fronte Popular de Sada (1935-36), delegado na comarca das Misións Biolóxicas, colaborador do Seminario de Estudos Galegos, correpondente e articulista en A Nosa Terra, El Pueblo Gallego, Ser e Eco de Galicia, directivo da Sociedad Cultural Artística (1934), etc.
Ante a sublevación militar, participou na defensa de Sada, enfrontándose verbalmente aos primeiros falanxista que chegaran desde Betanzos. Agochouse nun primeiro momento en Meirás, na compaña de Manuel Prego, Antonio Carballeira, José Mosquera e Gumersindo Montero. Posteriormente partiron a pe cara Coruña os tres primeiros, instalándose nunha casa da Agra do Orzán, onde serían localizados polos falanxistas. Tras seren brutalmente torturados, os seus cadáveres aparecerían o 12/VIII/1936 no monte de Abeleiras, en Veigue (Sada). Xohán Antón tiña 29 anos.
Comentarios (0) - Categoría: Biografías-Xohan Antón Suárez Picallo - Publicado o 18-10-2009 12:19
# Ligazón permanente a este artigo
Presentado o libro RAMÓN SUÁREZ PICALLO. A VOZ ESQUECIDA DO GALEGUISMO
No día de onte, 16 de outubro, presentouse na Casa da Cultura "Pintor Llorens" de Sada un volume no que, ademais de abundante material gráfico e documental, recóllense as aportacións de diferentes investigadores acerca da figura excepcional de Ramón Suárez Picallo.
O libro, editado pola Comisión Irmáns Suárez Picallo co patrocinio da Deputación Provincial da Coruña, conta coas colaboracións de Justo Beramendi, Hernán Díaz, Alfredo Erias, Mercedes Fernández-Couto, Emilio Grandío Seoane, Esperanza Mariño, Edmundo Moure Rojas, Francisco Rodríguez, Xesús Torres Regueiro, Ramón Villares, Francisco Pita Fernández, Rexina Basadre Orozco e Manuel Pérez Lorenzo.
O seu deseño gráfico e maquetación correu a cargo de Xosé Díaz (Imago Mundi).
Na presentación interviron, ademais dos representantes da Comisión Irmáns Suárez Picallo (Francisco Pita e Manuel Pérez), a Deputada provincial Silvia Seixas e o Alcalde Abel López Soto, que entregou á Comisión valiosa documentación sobre Ramón Suárez Picallo.


[…] Queremos que a finalidade primordial desta publicación sexa falarvos de Ramón Suárez Picallo, quebrar definitivamente o silenzo que se cinguiu durante décadas en torno á súa figura, para que todos podamos servirnos do seu maxisterio e reivindicar un vínculo que nos une co pasado. Falarvos, en definitiva, dese “nós” colectivo en nome do que se erixía Ramón, e que engloba a todos os desherdados, a todos os que, como o seu irmán Xohán Antón, asasinado polos fascistas no 1936, foron vítimas da barbarie e da inxustiza por teren gastado os seus esforzos en causas xenerosas, en beneficio do ben común.

COMISIÓN IRMÁNS SUÁREZ PICALLO - PRESENTACIÓN

Por Ramón Suárez Picallo pasou gran parte da Galicia do século XX, a da terra europea e a ergueita en terras americanas. Así, a súa figura sérvenos de fío condutor para facer un percorrido pola Galicia de aquí e de “acolá” durante o século pasado. Daquelas terras e daquel tempo foi actor e partícipe sobranceiro. Ao noso protagonista poderíanselle dedicar as palabras que adornan toda gran biografía: orixe humilde, un home que se fixo a si mesmo, a vida foi a súa escola. E con seren máximas adoito repetidas, son características que lle acaen ben a aquel home que veu ao mundo en Veloi, un lugar da parroquia de Sada, en 1894. […]

RAMÓN VILLARES - PRÓLOGO


Comentarios (0) - Categoría: Actividades - Publicado o 17-10-2009 17:11
# Ligazón permanente a este artigo
© by Abertal